TÀN 59
Nǔ E Wu Davidi Ðó Na Hɔn É
EE DAVIDI hu Goliati gudo é ɔ, ahwangán Izlayɛli tɔn Abunɛɛ kplá ɛ sɔyi Sawulu gɔ́n. Xomɛ Sawulu tɔn hun dó Davidi wu tawun. Sawulu sɔ́ ɛ gǎn ɖokpo ɖò ahwangɔnu ɔ mɛ, bo lɛ́ yí i dó xwégbe.
Ee ahwangɔnu ɔ lɛkɔ sín ahwangbenu gudo é ɔ, nyɔnu lɛ jihan bo ɖɔ: ‘Sawulu hu afatɔ́ɔ́n, bɔ Davidi ka hu afatɔ́ɔ́n donu mɔkpan.’ Sawulu jɛ wǔ hwan jí, ɖó ye sɔ́ Davidi sù hú i. Loɔ, vǐ tɔn Jonataan ka hwan wǔ ɖě ǎ. É nyɔ́ wà ɔ, é yí wǎn nú Davidi tawun, bɔ Davidi lɔmɔ̌ yí wǎn n’i. Enɛ wu ɔ, ye mɛ wè lɛ d’akpá nú yeɖee, bo na nyí xɔ́ntɔn kaka sɔyi.
Agidigboxotɔ́ xéɖéxéɖé wɛ nú Davidi, bɔ Sawulu yí wǎn nú nùxixo tɔn. Amɔ̌, wuhwinhwan Sawulu tɔn zɔ́n, bɔ é dó nǔ baɖabaɖa ɖé sìn. Davidi ɖò agidigbo xó n’i wɛ gbè ɖokpo, bɔ é sɔ́ hwǎn tɔn, bo nyì dó Davidi bo ɖɔ: ‘Un na xwè Davidi dó dǒ ɔ wu!’ Amɔ̌, Davidi sɛ̀ sín hwǎn ɔ nu, bɔ é mɔ ɛ ǎ. Sawulu lɛ́ nyì hwǎn ɔ hwe ɖevo nu, bo xó kpò. Davidi wá mɔ ɖɔ emi ɖó na nɔ acéjí tawun.
A ka flín akpá e Sawulu dó é à? É ɖɔ emi na sɔ́ vǐ emitɔn da nú mɛ e na hu Goliati é. Amɔ̌, Sawulu wá ɖɔ nú Davidi dìn ɖɔ é ɖó na tó hu Filisitiinu 100 hwɛ̌, có emi na sɔ́ vǐ emitɔn Mikalu da n’i. Kpɔ́n xó enɛ! Sawulu lin ɖɔ Filisitiinu lɛ na hu Davidi. Amɔ̌, ye kpéwú ǎ, bɔ Sawulu gbɔ bo sɔ́ vǐ ɔ da nú Davidi.
Sawulu ɖɔ nú Jonataan kpo deví tɔn lɛ kpo gbè ɖokpo ɖɔ emi na hu Davidi. Amɔ̌, Jonataan ɖɔ nú tɔ́ tɔn ɖɔ: ‘Ma wà nǔ ɖebǔ nú Davidi ó. É wà nǔ nyanya ɖebǔ nú we kpɔ́n gbeɖé ǎ. É nyɔ́ wà ɔ, nǔ e é wà lɛ é bǐ wɛ nyí ɖagbe nú we. É ɖibla sɔ́ gbɛ̀ tɔn nyì gbě hwenu e é hu Goliati é. Ee a sè mɔ̌ é ɔ, é ka víví nú we sín.’
Sawulu sè Jonataan sín xó, bo d’akpá ɖɔ emi kún na wà nùɖé nú Davidi ó. Davidi lɛkɔ wá Sawulu xwé, bo lɛ́ jɛ nǔ e é nɔ wà n’i ɖ’ayǐ é wà jí. Loɔ, Davidi ka ɖò nǔ xó nú Sawulu wɛ gbè ɖokpo, bɔ Sawulu lɛ́ nyì hwǎn d’é. Davidi sɛ̀ sín hwǎn ɔ nu, bɔ hwǎn ɔ yì xò dǒ ɔ. Azɔn atɔngɔ ɔ nɛ! Davidi wá mɔ lo ɖɔ emi ɖó na hɔn!
Zǎn enɛ mɛ ɔ, Davidi yì xwé éɖesunɔ tɔn gbè. Amɔ̌, Sawulu sɛ́ mɛɖé lɛ dó ɖɔ ye ni hu i. Mikalu tuùn ayi e kàn wɛ tɔ́ tɔn ɖè é. Enɛ wu ɔ, é ɖɔ nú asú tɔn ɖɔ: ‘Enyi a ma hɔn zǎn elɔ mɛ ǎ ɔ, cyɔ towe wɛ è na sɔ́ sɔ.’ Zǎn enɛ mɛ ɔ, Mikalu d’alɔ Davidi, bɔ é hɔn gbɔn flɛtɛli nu. Davidi hɔn gbɔn gbèjágbèjá nú xwè tɛnwe mɔ̌, bɔ Sawulu kpéwú bo wlí i ǎ.
1 Samuel 17:55-58; 18:1-30; 19:1-18.