TÀN 62
Davidi Sín Xwé Byɔ Wuvɛ̌ Mɛ
EE DAVIDI jɛ axɔsu ɖu jí ɖò Jeluzalɛmu é ɔ, Jehovah d’alɔ ɛ, bɔ é ɖu ɖò kɛntɔ́ tɔn lɛ gègě jí. Jehovah ko d’akpá ɖɔ emi na na Kanaa yikúngban ɔ bǐ Izlayɛli-ví lɛ. É ka wà mɔ̌ nugbǒ.
Davidi nyí axɔsu ɖagbe ɖé. É yí wǎn nú Jehovah. Enɛ wu wɛ, ee é yí Jeluzalɛmu gudo é ɔ, é sɔ́ akɔjɛgba Jehovah tɔn wá finɛ. Azɔ̌ nukɔntɔn e é wà lɛ é ɖokpo nɛ. É lɛ́ jló na gbá tɛmpli ɖé, bo na zé akɔjɛgba ɔ d’emɛ.
Ee Davidi jɛ kpikpò jí é ɔ, é dó nǔ baɖabaɖa ɖé sìn. Davidi tuùn ɖɔ é kún nyɔ́ bonu è na sɔ́ mɛ ɖevo nǔ dó gudo tɔn ó. Amɔ̌, é ɖò xɔ tɔn ta gbadanu gbè ɖokpo, bo kpɔ́n dò bo mɔ nawe ɖɛkpɛɖɛkpɛ ɖé sɛ́dó. Nawe ɔ nɔ nyí Batu-Ceba, bɔ asú tɔn nɔ nyí Ulii. Ahwanfuntɔ́ Izlayɛli tɔn lɛ ɖokpo wɛ.
Batu-Ceba sín nǔ nyɔ́ Davidi nukún mɛ kaka, bɔ é sɛ́ mɛ dó, bɔ è kplá ɛ wá n’i. Asú tɔn ka ɖò ahwangbenu hwenɛnu. Davidi ɖóxó xá ɛ, bɔ é mɔ xò n’i. Davidi sín hǔn zɛ, bɔ é sɛ́ wema dó ahwangán tɔn Joabu ɖɔ é ni sɔ́ Ulii ɖó fí e ahwan ɔ syɛn ɖè é, bonu è na hu i. Ee Ulii kú gudo é ɔ, Davidi sɔ́ Batu-Ceba sɔ́ da.
Nǔ e Davidi bló é vɛ́ nú Jehovah ɖesu. Enɛ wu ɔ, É sɛ́ deví tɔn Nataan dó, bɔ é ɖè nùwanyido tɔn lɛ xlɛ́ ɛ. Nataan nɛ ɖò xó ɖɔ nú Davidi wɛ ɖò ɖiɖe ɔ mɛ nɛ. Nǔ e Davidi wà é vɛ́ nú éɖesu tawun. Enɛ wu ɔ, Jehovah sɔ́ hu i ǎ. Amɔ̌, Jehovah ɖɔ: ‘Ðó nǔ baɖabaɖa e a dosin lɛ é wu ɔ, xwédo towe na mɔ wuvɛ̌ gègě.’ Davidi ka mɔ wuvɛ̌ nugbǒ.
Vǐ e Batu-Ceba jì e tó kú hwɛ̌. Enɛ gudo ɔ, Davidi sín vǐsunnuɖaxo Amɔɔ ɖóxó xá nɔví tɔn Tamaa gannugánnú. Davidi sín vǐ Abusalɔmu sìn xomɛ kaka, bo hu Amɔɔ. Gudo mɛ ɔ, Abusalɔmu wà nǔ, bo dó nyɔ́ ɖò togun ɔ sí, bo mɔ tɛn dó sɔ́ éɖee axɔsu. Wá gbɔ tɔn ɔ, è hu Abusalɔmu, bɔ Davidi ɖó ɖuɖeji. Davidi mɔ wuvɛ̌ gègě nugbǒ.
Ðò avla enɛ mɛ ɔ, Batu-Ceba jì vǐ sunnu ɖé, bɔ è sùn nyǐ ɖɔ Salomɔɔ. Ee Davidi kpò, bo ɖò azɔn jɛ wɛ é ɔ, vǐ tɔn Adonija tɛnkpɔn bo na sɔ́ éɖee axɔsu. Enɛ wu ɔ, Davidi ɖɔ nú vɔsanúxwlémawutɔ́ Zadɔki ɖɔ é ni kɔn ami dó ta nú Salomɔɔ, bo dó xlɛ́ ɖɔ é wɛ na wá ɖu axɔsu. É sɔ́ lín ǎ, bɔ Davidi kú. Xwè 70 ɖó wɛ é ɖè hwenɛnu. É ɖu axɔsu nú xwè 40, bɔ Salomɔɔ jɛ tɛn tɔn mɛ.
2 Samuel 11:1-27; 12:1-18; 1 Rois 1:1-48.