TÀN 66
Axɔsi Adakaxotɔ́ Jezabɛlu
EE AXƆSU Jeloboamu kú gudo é ɔ, axɔsu e kpa acɛ ɖò axɔsuɖuto akɔta 10 totaligbé tɔn mɛ lɛ é bǐ wɛ baɖa. Axɔsu Axabu wɛ ka baɖa hú ye bǐ, ɖó asì tɔn Jezabɛlu nyí adakaxotɔ́.
Jezabɛlu nyí Izlayɛli-ví ǎ. Axɔsu Sidɔɔn tɔn sín vǐ nyɔnu wɛ. É nɔ sɛ̀n vodun Baalu, bo dɔn Axabu kpo Izlayɛli-ví gègě kpo d’emɛ. Jezabɛlu gbɛ́ wǎn nú Jehovah kaka, bo hu gbeyiɖɔ tɔn gègě. Gbeyiɖɔ ɖevo lɛ gbɔ bo hɔn hwla cí só xomɛ, bonu é ma mɔ ye hu ó. Enyi Jezabɛlu ɖò nùɖé ba wɛ ɔ, é sixu hu mɛ, bo mɔ nǔ ɔ.
Gbè ɖokpo sù, bɔ wǔ kú Axabu tawun. Enɛ wu ɔ, Jezabɛlu kanbyɔ ɛ ɖɔ: ‘Etɛwu wǔ ka kú we égbé sɔmɔ̌?’
Axabu ɖɔ n’i ɖɔ: ‘Nǔ e Nabɔti ɖɔ nú mì é wu wɛ. Un jló na xɔ viwungle tɔn, bɔ é ka gbɛ́.’
Jezabɛlu ɖɔ n’i ɖɔ: ‘Ma keya ó, un na yí nú we.’
Enɛ wu ɔ, Jezabɛlu wlan wema sɛ́dó gǎn ɖé lɛ ɖò toxo e mɛ Nabɔti nɔ nɔ é. É ɖɔ sɛ́dó ye ɖɔ: ‘Mi cyan sunnu e ma nyí nùɖewánu ǎ é ɖé lɛ, bonu ye ni ɖɔ Nabɔti dónu Mawu kpo axɔsu ɔ kpo. Enɛ gudo hǔn, mi dɔn Nabɔti sín toxo ɔ mɛ bo nyì awinnyaglo dó hu i.’
Tlolo e Jezabɛlu sè ɖɔ Nabɔti kú é ɔ, é ɖɔ nú Axabu ɖɔ: ‘Yì klá jɛ viwungle tɔn nu lo.’ Jezabɛlu ɖó na sún sìn alànnúwíwa mɔhun tɔn, kabǐ?
Enɛ wu ɔ, Jehovah wá sɛ́ Jewu dó ɖɔ é ni dɔn tó n’i. Ee Jezabɛlu sè ɖɔ Jewu ja é ɔ, é sá nǔ dó nukún, bo na mɔ tɛn dó nyɔ́ kpɔ́n. Amɔ̌, ee Jewu wá mɔ Jezabɛlu ɖò flɛtɛli nu é ɔ, é súxó sɛ́dó mɛ e ɖò hɔn ɔ mɛ lɛ é ɖɔ: ‘Mi sísɛ́ ɛ dó dò!’ Mɛ lɛ wà mɔ̌ nugbǒ, lee mɔ gbɔn wɛ a ɖè ɖò ɖiɖe ɔ mɛ é. Ye sísɛ́ ɛ dó dò, bɔ é kú. Lee Axɔsi adakaxotɔ́ Jezabɛlu sín xó fó gbɔn é nɛ.
1 Rois 16:29-33; 18:1-4; 21:1-16; 2 Rois 9:30-37.