TÀN 69
Azɔn Naama Tɔn Gbɔ
A KA tuùn xó e ɖɔ wɛ nyɔnuví enɛ ɖè é à? Gbeyiɖɔ Jehovah tɔn Elizee kpo nùjiwǔ e Jehovah d’alɔ ɛ bɔ é bló lɛ é kpo xó ɖɔ nú nawe ɔ wɛ é ɖè. Nawe ɔ tuùn Jehovah ǎ, ɖó é nyí Izlayɛli-ví ǎ. Mi nú mǐ ni kpɔ́n nǔ e wu nyɔnuví ɔ wá yí tɔ́n ɖò nawe ɔ xwé é.
Siliinu wɛ nyí nawe ɔ. Asú tɔn nɔ nyí Naama, bo nyí gǎn nú ahwangɔnu Silii tɔn. Siliinu lɛ wɛ wlí nyɔnuví Izlayɛlinu ɔ, bo kplá ɛ wá nú Naama sín asì bonu é na nyí deví tɔn.
Naama ɖò wutuzɔn-baɖabaɖa e nɔ nyí gudu é jɛ wɛ. Azɔn enɛ nɔ ɖu agbaza mɛtɔn. Enɛ wu ɔ, nyɔnuví ɔ ɖɔ nú Naama sín asì ɖɔ: ‘Enyi gǎn ce sixu yí mɔ gbeyiɖɔ Jehovah tɔn ɖò Izlayɛli ɔ, azɔn tɔn na gbɔ.’ Nawe ɔ sín asú wá sè xó enɛ.
Naama ɖò biba wɛ ɖesu ɖɔ azɔn emitɔn ni gbɔ. Enɛ wu ɔ, é ɖido Izlayɛli. Ee é jɛ dɔ̌n é ɔ, é yì Elizee xwégbe. Elizee ɖɔ nú deví tɔn ɖɔ é ni ɖɔ nú Naama nú é ni lɛwu dó Judɛɛn Tɔ̀ ɔ mɛ azɔn tɛnwe. Nǔ enɛ sìn xomɛ nú Naama kaka, bɔ é ɖɔ: ‘Tɔsisa e ɖò tò ce mɛ lɛ é bǐ wɛ nyɔ́ hú tɔsisa e ɖò Izlayɛli lɛ é!’ Ee Naama ɖɔ mɔ̌ gudo é ɔ, é lɛkɔ ɖido tò tɔn mɛ.
Amɔ̌, deví tɔn lɛ ɖokpo ɖɔ n’i ɖɔ: ‘Mɛɖaxo, enyi nǔ syɛnsyɛn ɖé wɛ Elizee ɖɔ a ni wà dìn ɔ, a na ko wà mɛ. Etɛwu a ma ka sixu lɛwu dó tɔ̀ ɔ mɛ lee é ɖɔ gbɔn é à?’ Naama sè xó e deví tɔn ɖɔ é, bo yì nylɔ́ éɖee dó Judɛɛn Tɔ̀ ɔ mɛ azɔn tɛnwe, bɔ azɔn tɔn gbɔ nugbǒ.
Xomɛ hun Naama tawun. É lɛkɔ yì mɔ Elizee bo ɖɔ n’i ɖɔ: ‘Un mɔ nǔ jɛ wu dìn ɖɔ, gbɔn gbɛ̀ ɔ bǐ mɛ ɔ, Mawu Izlayɛli tɔn wɛ nyí Mawu nugbǒ ɖokpo e tíìn é. Enɛ wu ɔ, kɛnklɛn bo yí nùnina elɔ.’ Amɔ̌, Elizee ɖɔ: ‘Eǒ, un na yí ǎ.’ Elizee tuùn ɖɔ enyi emi yí nùnina ɔ, é kún na sɔgbe ó, ɖó Jehovah wɛ gbɔ azɔn ɔ. Amɔ̌, deví Elizee tɔn Geazi ɖò biba na yí nùnina ɔ wɛ.
Enɛ wu ɔ, ee Naama lɛkɔ ɖido é ɔ, Geazi kanwezun bo yì mɔ ɛ. É ɖɔ nú Naama ɖɔ: ‘Elizee wɛ sɛ́ mì dó ɖɔ ma yí nùnina ɔ kpɛɖé wá nú xɔ́ntɔn e wá ba jonɔ emi dìn tlolo lɛ é.’ Adingban ɖó wɛ Geazi ɖè. Amɔ̌, Naama ka tuùn mɔ̌ ǎ, bo bɛ́ nùnina ɖé lɛ n’i.
Ee Geazi lɛkɔ wá xwégbe é ɔ, Elizee tuùn nǔ e é yì wà é. Jehovah wɛ ɖɔ nú Elizee. Enɛ wu ɔ, Elizee ɖɔ: ‘Ðó a dó nǔ baɖabaɖa enɛ sìn wutu ɔ, a na bɛ̌ gudu e gbɔ nú Naama é.’ Tlolo ɔ, é bɛ́ gudu ɔ nugbǒ.
Etɛ tàn elɔ ka kplɔ́n mǐ? Nukɔntɔn ɔ, mǐ ɖó na nɔ ɖɔ xó Jehovah tɔn nú mɛ ɖevo lɛ nyɔnuví ɔ ɖɔhun. Wegɔ ɔ, mǐ na nɔ yigo lee Naama bló gbɔn jɛ nukɔn é ɖɔhun ǎ, é nyɔ́ wà ɔ, mǐ ɖó na nɔ setónú nú devizɔwatɔ́ Mawu tɔn lɛ. Atɔngɔ ɔ, mǐ ɖó na nɔ ɖó adingban gbeɖé Geazi ɖɔhun ǎ. A mɔ dìn ɖɔ Biblu xixa hɛn ɔ é na kplɔ́n nǔ gègě mǐ à cé?
2 Rois 5:1-27.