TÀN 72
Mawu D’alɔ Axɔsu Ezekiasi
A KA tuùn nǔ e wu nya enɛ ɖò ɖɛ xò sɛ́dó Jehovah wɛ é à? Etɛwu é ka fɔ wema enɛ lɛ ɖó vɔsakpe Jehovah tɔn nukɔn? Ezekiasi wɛ nyí nya ɔ. É wɛ nyí axɔsu nú akɔta wè tofɔligbé tɔn lɛ ɖò Izlayɛli. Wuvɛ̌ ɖaxó ɖé mɛ wɛ é ɖè dìn. Aniwu?
Ahwangɔnu Asilii tɔn lɛ ja ahwan tɔ́n ɛ gbé wu wɛ. Ahwangɔnu enɛ lɛ ka ko viva akɔta 10 totaligbé tɔn lɛ. Nǔ baɖabaɖa e ye nɔ dosin lɛ é wɛ zɔ́n, bɔ Jehovah tin bɔ nǔ nyí mɔ̌.
Wema ɖé lɛ wɛ axɔsu Asilii tɔn sɛ́dó Axɔsu Ezekiasi. Tlolo e é mɔ wema lɛ é ɔ, é fɔ ye wá tɛ́ ɖó Jehovah nukɔn. Ðò wema lɛ mɛ ɔ, Axɔsu Asilii tɔn cá Jehovah ko, bo ɖɔ nú Ezekiasi ɖɔ é ni jó gbè kpowun. Enɛ wu wɛ axɔsu Ezekiasi xoɖɛ bo ɖɔ: ‘Jehovah è, hwlɛn mǐ sín axɔsu Asilii tɔn sí. Enɛ ɔ, akɔta lɛ bǐ na tuùn ɖɔ hwi ɖokpo wɛ nyí Mawu.’ Jehovah ka sè ɖɛ tɔn à?
Axɔsu ɖagbe ɖé wɛ nú Ezekiasi. É cí axɔsu baɖabaɖa axɔsuɖuto akɔta 10 totaligbé tɔn lɛ tɔn ɖɔhun ǎ. Mɔ̌ jɛn é ma ka lɛ cí tɔ́ tɔn Axazi ɖɔhun ǎ é nɛ. Ezekiasi nɔ setónú nú sɛ̀n Jehovah tɔn lɛ bǐ tɛnwin lɛnwin. Enɛ wu ɔ, ee é xoɖɛ ɔ fó é ɔ, gbeyiɖɔ Ezayi sɛ́ mɛ dó, bɔ mɛ ɔ dó wɛn Jehovah tɔn n’i ɖɔ: ‘Axɔsu Asilii tɔn ja Jeluzalɛmu ǎ. Ahwanfuntɔ́ tɔn lɛ kwín ɖokpo na sɛkpɔ toxo ɔ ǎ. Ye ɖě na da gǎ ɖokpo vɔ́vɔ́ dó toxo ɔ mɛ ǎ.’
Kpɔ́n ɖiɖe e ɖò wexwɛ elɔ jí é. A ka tuùn ahwanfuntɔ́ e kú ɖò finɛ lɛ é à? Asiliinu lɛ wɛ. Jehovah sɛ́ wɛnsagun tɔn dó bɔ é hu ahwanfuntɔ́ Asilii tɔn 185 000 ɖò zǎn ɖokpo mɛ. Axɔsu Asilii tɔn gbɔ bo jó gbè, bo yì xwé.
Jehovah hwlɛn axɔsuɖuto akɔta wè tofɔligbé tɔn lɛ tɔn gán, bɔ togun ɔ nɔ fífá mɛ nú hwenu ɖé. Ee Ezekiasi kú gudo é ɔ, vǐ tɔn Manase jɛ tɛn tɔn mɛ. Amɔ̌, axɔsu baɖabaɖa wɛ nú Manase kpo vǐ elɔ tɔn Amɔɔ e wá jɛ tɛn tɔn mɛ é kpo. Enɛ wu ɔ, adakaxixo lɛ́vɔ gɔ́ tò ɔ mɛ. Ee Deví Amɔɔ tɔn lɛ ɖesu hu i gudo é ɔ, vǐ tɔn Joziasi jɛ tɛn tɔn mɛ.
2 Rois 18:1-36; 19:1-37; 21:1-25.