TÀN 108
Ðò Damasi Li Jí
A KA tuùn nya e ɖò kɔ mɛ finɛ é à? Solu wɛ. É wɛ hɛn awu mɛ e nyì awinnyaglo dó hu Etyɛni lɛ é tɔn. Kpɔ́n weziza e hɔ́n ɖò finɛ é! Etɛ ka ɖò jijɛ wɛ?
Ee è hu Etyɛni gudo é ɔ, Solu nɔ nɔ nukɔn, bɔ è nɔ doya nú ahwanvu Jezu tɔn lɛ. É nɔ gbɔn xwégbe xwégbe, bo nɔ wlí ye dó gankpa mɛ. Ahwanvu gègě hɔn yì toxo ɖevo lɛ mɛ, bo jɛ “wɛnɖagbe” ɔ jla jí ɖò fí enɛ lɛ. Amɔ̌, Solu nɔ lɛ́ yì toxo ɖevo lɛ mɛ, bo nɔ ba ahwanvu Jezu tɔn lɛ mɔ. Damasi li jí wɛ é ɖè dìn. Amɔ̌, ee é ɖò yìyì wɛ é ɔ, nùjiwǔ e jɛ é ɖíe:
Weziza ɖé gosin jixwé, bo hɔ́n lɛlɛ̌ dó é. É j’ayǐ, lee mɔ gbɔn wɛ mǐ ɖè ɖò finɛ é. Enɛ gudo ɔ, gbè ɖé ɖɔ: ‘Solu, Solu! Etɛwu a ka ɖò ya dó nú mì wɛ?’ Mɛ e kpo Solu kpo zɔn lɛ é mɔ weziza ɔ bo lɛ́ sè gbè ɔ, amɔ̌, ye mɔ nukúnnú jɛ nǔ e ɖɔ wɛ gbè ɔ ɖè é mɛ ǎ.
Solu kanbyɔ ɖɔ: ‘Hwi mɛ̌ ka wɛ, Aklunɔ?’
Gbè ɔ ɖɔ: ‘Nyɛ Jezu e doya na a ɖè é wɛ.’ Jezu ɖɔ mɔ̌, ɖó enyi Solu doya nú ahwanvu tɔn lɛ ɔ, é nɔ cí ɖɔ Jezu ɖesunɔ doya na wɛ é ɖè ɖɔhun.
Solu lɛ́ kanbyɔ ɖɔ: ‘Etɛ un ka ɖó na wà, Aklunɔ?’
Jezu ɖɔ: ‘Site bo yì Damasi. È na ɖɔ nǔ e a ɖó na wà é nú we ɖò dɔ̌n.’ Ee Solu site bo hun nukún é ɔ, é sɔ́ mɔ nǔ ɖebǔ ǎ. É tɔ́n nukún! Enɛ wu ɔ, mɛ e kpo é kpo zɔn lɛ é hɛn alɔ tɔn bo kplá ɛ yì Damasi.
Jezu ɖɔ nú ahwanvu tɔn Ananiasi e nɔ nɔ Damasi é ɖɔ: ‘Site, bo wlí ali e è nɔ ylɔ ɖɔ Jlɔjlɔ é, bo yì Juda xwégbe bo kàn nya e nɔ nyí Solu é byɔ. Un ko ɖè é, bɔ é na nyí deví titewungbe ɖé nú mì.’
Ananiasi setónú. Ee é yì Solu gɔ́n é ɔ, é ɖ’alɔ jǐ tɔn bo ɖɔ: ‘Aklunɔ wɛ sɛ́ mì dó, bonu a na lɛ́ mɔ nukúnnú, bɔ gbigbɔ mímɛ́ na gɔ́ ayi mɛ nú we.’ Tlolo ɔ, nǔ hwevízá ɖɔhun ɖé lɛ j’ayǐ sín Solu nukún jí, bɔ é lɛ́ jɛ nǔ mɔ jí.
Jezu nɔ gudo nú Solu, bɔ é jla “wɛnɖagbe” ɔ nú akɔta gègě kpo akɔnkpinkpan kpo. Nyikɔ tɔn wɛ wá nyí mɛsɛ́dó Pɔlu. Mǐ na wá kplɔ́n nǔ gègě dó wutu tɔn. Amɔ̌, mǐ ni tó ɖɔ xó dó nǔ e Mawu zɔ́n Piyɛɛ ɖɔ é ni yì wà é jí hwɛ̌.
Mɛsɛ́dó 8:1-4; 9:1-20; 22:6-16; 26:8-20.