TÀN 109
Piyɛɛ Yì Kɔnɛyi Xwé
MƐSƐ́DÓ Piyɛɛ wɛ ɖò te finɛ. Xɔ́ntɔn tɔn ɖé lɛ wɛ ɖò gudo tɔn. Amɔ̌, etɛwu nya enɛ ka ɖò kɔ́ ɖé n’i wɛ? É ka ɖó na wà mɔ̌ à? A ka tuùn nya e wɛ é à?
Sɔjakanwekogán Hlɔma tɔn Kɔnɛyi wɛ. É tuùn Piyɛɛ kpɔ́n ǎ, amɔ̌, è ɖɔ n’i ɖɔ é ni ylɔ ɛ wá xwé tɔn gbè. Mǐ ni ba dò nú lee nǔ nyí mɔ̌ gbɔn é.
Jwifu wɛ nú ahwanvu Jezu tɔn nukɔntɔn lɛ. Kɔnɛyi ka nyí Jwifu ǎ. É ɖò mɔ̌ có, é yí wǎn nú Mawu, bo nɔ xoɖɛ sɛ́dó é, bo nɔ lɛ́ nyɔ́ xomɛ dó gbɛtɔ́ lɛ wu. Wɛnsagun ɖé tɔ́n dó jǐ tɔn hwelɛkɔ gbè ɖokpo bo ɖɔ n’i ɖɔ: ‘Mawu hun xomɛ dó wutu towe, bo sè ɖɛ towe lɛ. Sɛ́ mɛ dó bonu è ylɔ nya e nɔ nyí Piyɛɛ é wá nú we. É ɖò Sinmɔɔ e nɔ nɔ xù tó é xwé ɖò Jopée.’
Tlolo ɔ, Kɔnɛyi sɛ́ mɛ dó Piyɛɛ gbé mɛ. Ee mɛ lɛ sɛkpɔ Jopée ayihɔngbe tɔn é ɔ, Piyɛɛ ɖò Sinmɔɔ sín xɔta, bɔ Mawu xlɛ́ ɛ nùɖé. É mɔ avɔ ɖaxó ɖé ɖò te jɛ sín jixwé wɛ, bɔ kanlin alɔkpa alɔkpa ɖ’emɛ. Sɔgbe kpo sɛ́n Mawu tɔn kpo ɔ, kanlin blíblí wɛ nú kanlin enɛ lɛ, bɔ è ɖò na ɖu ǎ. Gbè ɖé ka ɖɔ n’i ɖɔ: ‘Piyɛɛ! Site, hu, bo ɖu.’
Piyɛɛ ɖɔ: ‘Eǒ! Un ɖu nùblibli mɔhun kpɔ́n gbeɖé ǎ.’ Amɔ̌, gbè ɔ ɖɔ n’i ɖɔ: ‘Ma sɔ́ ylɔ nǔ e Mawu ɖɔ é nyí mímɛ́ é ɖɔ nùblibli ɖě ó.’ Azɔn atɔn wɛ nǔ enɛ ɔ jɛ. Piyɛɛ ɖò tinmɛ nǔ enɛ lɛ tɔn kanbyɔ éɖee wɛ, bɔ mɛ e Kɔnɛyi sɛ́dó lɛ é wá xwé ɔ gbè bo kàn ɛ byɔ.
Piyɛɛ jɛte bo ɖɔ: ‘Nyɛ wɛ nyí mɛ e ba wɛ mi ɖè é. Etɛ ka hɛn mi wá?’ Mɛ lɛ tinmɛ nú Piyɛɛ ɖɔ wɛnsagun ɖé wɛ ɖɔ nú Kɔnɛyi ɖɔ é ni ylɔ ɛ wá xwé tɔn gbè. Piyɛɛ ka yí gbè. Ayihɔngbe tɔn ɔ, é kpo xɔ́ntɔn tɔn ɖé lɛ kpo ɖido Kɔnɛyi gɔ́n ɖò Sezalee.
Kɔnɛyi ko kplé hɛnnumɔ tɔn lɛ kpo xɔ́ntɔn vívɛ́ tɔn lɛ kpo. Ee Piyɛɛ wá é ɔ, Kɔnɛyi yì kpé é. É jɛkpo ɖò Piyɛɛ nukɔn, bo ɖèkɔ́ n’i, lee mɔ gbɔn wɛ a ɖè é. Amɔ̌, Piyɛɛ ɖɔ: ‘Site; gbɛtɔ́ yayǎ wɛ nú nyì lɔmɔ̌.’ Biblu xlɛ́ ɖɔ é kún sɔgbe bonu è na jɛkpo bo ɖèkɔ́ nú gbɛtɔ́ ó. Jehovah kɛɖɛ wɛ mǐ ɖó na sɛ̀n.
Piyɛɛ ɖɔ yɛhwexó nú mɛ e kplé lɛ é. É ɖɔ: ‘Un mɔ dìn ɖɔ Mawu nɔ yí mɛ e jló na sɛ̀n ɛ lɛ é bǐ.’ Piyɛɛ kpó ɖò xó ɖɔ wɛ có Mawu kɔn gbigbɔ mímɛ́ dó mɛ e kplé lɛ é jí, bɔ ye jɛ xó ɖɔ dó gbè tɛnmɛ tɛnmɛ mɛ jí. Nǔ nɛ ɔ kpaca ahwanvu Jwifu e xwedó Piyɛɛ lɛ é, ɖó ye nɔ lin ɖɔ Jwifu lɛ kɛɖɛ wɛ na mɔ fɛ́nú Mawu tɔn. Nǔ nɛ ɔ kplɔ́n ye ɖɔ Mawu kún nɔ ɖè akɔ ɖé ɖó vo ɖò akɔ ɖé mɛ ó. É jɛ ɖɔ mǐ bǐ ni nɔ wà nǔ gbɔn mɔ̌ à cé?
Mɛsɛ́dó 10:1-48; 11:1-18; Nǔɖexlɛ́mɛ 19:10.