Sinsɛn Nǔgbo ɔ Na Hɛn Lè Mavɔmavɔ Wá nú We!

1. Enyi mǐ “sɛkpɔ́ Mawu” ɔ, etɛ ka na jɛ?

JEHOVAH nɔ yí wǎn nú mɛ e nɔ sɛn ɛ lɛ é. Enyi a nɔ sɛn Jehovah ɔ, é na kɔn nyɔna dó jǐ we dìn, bo na lɛ́ wà mɔ̌ ɖò sɔgudo. Biblu ɖɔ: “Mi sɛkpɔ́ Mawu; enɛ ɔ é na sɛkpɔ́ mi.”—Jaki 4:8.

2. Nɛ̌ mǐ ka sixu sɛkpɔ́ Mawu gbɔn? Ali tɛ nu é ka cá kan xá ɖɛ mǐtɔn lɛ ɖè?

² Bo na dó sɛkpɔ́ Mawu ɔ, a ɖó na kplɔ́n Xó tɔn bo wà nǔ sɔgbe xá. Enyi a xoɖɛ sɔgbe xá jlǒ tɔn ɔ, é na ɖótó we bo na na sinkɔn nú ɖɛ towe lɛ. Mɛsɛ́dó Jaan, ee nyí Klisanwun ɖé é wlan ɖɔ: “Mǐ ɖó ganjɛwu kpíkpé ɖò Mawu nukɔn ɖɔ mǐ byɔ nǔ ɖebǔ nú é sɔgbe xá jlǒ tɔn ɔ, é nɔ ɖótó mǐ. Ee mǐ tuùn ɖɔ hwenu e mǐ ɖò nǔɖe byɔ ɛ wɛ ɔ, é nɔ ɖótó mǐ ɔ, mǐ lɛ́ tuùn ɖɔ é nɔ na nǔ e byɔ ɛ wɛ mǐ ɖè ɔ mǐ.”—1 Jaan 5:14, 15.

3-7. Nɛ̌ mǐ ka sixu ɖó nǔnywɛ e nɔ gosin Mawu gɔ́n é gbɔn? Nɛ̌ é ka sixu d’alɔ mǐ gbɔn?

³ Gɔ́ na ɔ, enyi a sɛkpɔ́ Mawu ɔ, é na na we nǔnywɛ e a na dó ɖí xwi xá gbɛmɛ tagba gbè bǐ gbè tɔn lɛ na é. Biblu ɖɔ: “Enyi nǔnywɛ hwedó mɛɖé ɖò mi mɛ hǔn, ni byɔ Mawu nú é na na ɛ.”—Jaki 1:5.

⁴ Nɛ̌ nǔnywɛ Mawu tɔn ka sixu d’alɔ we gbɔn? Lee é na d’alɔ we gbɔn é ɖokpo wɛ nyí ɖɔ a na tuùn nǔ ɖěɖee Jehovah gbɛ́ wǎn na lɛ é. A na lɛ́ tuùn nǔ e wu nǔ enɛ lɛ nyla é kpo lee a na nyi alɔ nú ye gbɔn é kpo. Nukúnnúmɔjɛnǔmɛ enɛ na cyɔn alɔ jǐ we sín tagba e mɛ lɛ nɔ mɔ ɖò kpaa mɛ lɛ é sí. Ði kpɔ́ndéwú ɔ, tónúsíse nú sɛ́n Mawu tɔn e kúnkplá mimɛ̌jininɔ ɖò walɔ lixo é nɔ nya xɛ ɖò togun Jehovah tɔn jí sín xò maɖónukún, glɔ̌zɔn lɛ kpo alɔwliwli e mɛ awǎjijɛ ma ɖè ǎ é alǒ ee ma nɔ yì ta ǎ lɛ é kpo sí.

⁵ Nǔ ɖevo tɛ nǔnywɛ e Mawu nɔ na mɛ é ka sixu wà nú we? É sixu d’alɔ we bɔ gbɛ̀ towe na ɖó nu. É sixu d’alɔ we bɔ a na wá gbeta e nǔnywɛ kpé lɛ é kɔn dó nǔ taji lɛ jí, ɖi lee a na zán akwɛ towe gbɔn é mɔ̌. É na d’alɔ we bɔ a na nya nǔ e na hɛn lè wá nú we lɛ é gbé, bo na nyi alɔ nú nǔ e ma na nɔ ayǐ sɔyi ǎ lɛ é gbé nyinya.

⁶ Nǔnywɛ Mawu tɔn sixu lɛ́ d’alɔ we ɖò lee a nɔ wà nǔ xá mɛ ɖevo lɛ gbɔn é mɛ. A sixu ɖó xwédo awǎjijɛnɔ ɖé. A sixu zun xɔ́ntɔn e na nɔ ayǐ sɔyi é xá mɛ ɖevo lɛ, bɔ mɛ lɛ na nɔ sí we, mɛ e ma ɖò Jehovah sɛn wɛ ǎ lɛ é lɔ tlɛ na wà mɔ̌.

⁷ Gɔ́ na ɔ, nǔnywɛ Mawu tɔn na lɛ́ bló bɔ linlin e a nɔ ɖó dó gbɛ̀ wu é na lɛ́ kpɔ́n te d’eji. É na d’alɔ we bɔ a na ɖu ɖò gbɛmɛ tagba lɛ kpo nǔagɔwaxámɛ lɛ kpo jí. Linlin ɖagbe ɖiɖó dó gbɛ̀ wu na zɔ́n bɔ a na ɖò ganji ɖò taglo kpo agbaza kpo mɛ.—Nǔnywɛxó 14:30; Ezayíi 48:17.

8. Enyi a ɖò Mawu sɛn wɛ ɔ, etɛ a ma ka ɖó na ɖi xɛsi na ǎ?

⁸ Enyi a nɔ sɛn Mawu nǔgbo ɔ ɔ, é na zɔ́n bɔ a sɔ́ na ɖi xɛsi e nɔ dóya nú mɛ e ma nɔ sɛn ɛ ǎ lɛ é ǎ. Ðó a tuùn ɖɔ mɛkúkú lɛ kún sɔ́ tuùn nǔɖe ó wutu ɔ, a sɔ́ na ɖi xɛsi nú ye ǎ. Ðó a ɖeji dó akpá e Mawu dó ɖɔ emi na fɔ́n mɛkúkú lɛ é wu wutu ɔ, a sɔ́ na ɖi xɛsi nú kú ǎ. Bɔ ee a ko tuùn ɖɔ Mawu wɛ nyí hlɔnhlɔnnɔ ɖaxó bǐ ɔ wutu é ɔ, a sɔ́ na ɖi xɛsi nú azě kpo bǒ kpo ǎ.—Jaan 8:32.

Nǔjlɔjlɔwatɔ́ lɛ Na Ðu Gǔ Ayikúngban ɔ Tɔn

9-11. Mɛ̌ mɛ̌ e ka na nɔ Palaɖisi mɛ? Mɛ̌ lɛ ma ka na nɔ mɛ ǎ?

⁹ Enyi a sɛkpɔ́ Mawu ɔ, xɛsi sɔ́ na ɖi we dó sɔgudo wu ǎ. Lee mǐ ko mɔ gbɔn é ɔ, Biblu ko ɖɔ wuvɛ̌ e tíìn ɖò ayikúngban jí égbé dìn lɛ é sín xó ɖ’ayǐ. Jehovah ɖɔ nú mǐ ɖɔ táan kpɛɖé jɛn nǔ enɛ lɛ na nɔ ayǐ na; zaanɖé dìn ɔ, Axɔ́suɖuto Mawu tɔn na bló bɔ ayikúngban ɔ na huzu palaɖisi ɖé.—Luki 21:10, 11, 31; 23:43, nwt.

¹⁰ Mɛ e sɛkpɔ́ Jehovah bo nɔ sɛn ɛ lɛ é kɛɖɛ wɛ na nɔ Palaɖisi ɔ mɛ. Biblu ɖɔ: “Zaanɖé dìn ɔ, mɛdídá sɔ́ na ɖè ǎ; a nyi kɔ kpɔ́n fí e é nɔ ɔ, a sɔ́ na mɔ ɛ ǎ. Tò ɔ ka na nyí mɛ e nɔ sɔ́ yeɖée hwe lɛ tɔn, bɔ fífá ma ɖó dogbó e ye na mɔ ɔ wɛ na nyí nǔ e na nɔ víví nú ye é.”—Ðɛhan 37:10, 11.

¹¹ Mɛ ɖěɖee kpó ɖò ta syɛn wɛ, bo ma jló na nyi sɛ́n jlɔjlɔ Mawu tɔn lɛ ǎ é na kú, bɔ nukúnɖiɖó sɔ́ na ɖè nú ye ǎ. (2 Tɛsalonikinu lɛ 1:8, 9) Ye sɔ́ na tíìn ǎ. Ye na gɔ́ nú Satáan kpo awoví tɔn lɛ kpo bɔ è na sú kún yetɔn dó kaka sɔyi. (Nǔɖexlɛ́mɛ 20:10, 14) Amɔ̌, mɛ e kplɔ́n nǔ dó Jehovah wu, bo nɔ sɛn ɛ lɛ é na ɖu vivǐ Palaɖisi ayikúngban jí tɔn tɔn.

Sɔgudo Ðagbe Ðé!

12. Etɛ Biblu ka ɖɔ dó sɔgudo wu?

¹² Jehovah ɖó nǔ ɖagbe gegě ɖò sɛxwetɛn nú mɛ e yí wǎn n’i lɛ é! Kpɔ́n nǔ e Xó tɔn ɖɔ dó gbɛ̀ ninɔ ɖò Palaɖisi ayikúngban jí tɔn mɛ wu é:

• Nǔɖuɖu na túnflá: “Jì [na] jɛ ɖò tò ɔ mɛ kaka bo túnflá. Atín sínsɛ́n [na] bla ta nú só lɛ.”—Ðɛhan 72:16.

• Xɔ ɖagbe na tíìn: “Ye na sá xwé bo nɔ ɛ mɛ.”—Ezayíi 65:21.

• Azɔ̌ ɖagbe na tíìn: “Mɛ e un sɔ́ lɛ ɔ, nǔ e ye sɔ́ alɔ yetɔn dó bló lɛ ɔ, ye na ɖu lè tɔn. Ye sɔ́ na jɛ tagba dó wǔvɔ́ ɖě ǎ.”—Ezayíi 65:22, 23.

• Azɔn sɔ́ na tíìn ǎ: “Toví ɖé sɔ́ na ɖɔ: ‘Un ɖò azɔn jɛ wɛ’ ǎ.”—Ezayíi 33:24.

• Mɛɖé sɔ́ na nyí wɔ̌nɖowǔnanɔ ǎ: “Enɛ ɔ, nukúntíntɔ́nnɔ lɛ na mɔ nǔ, tókúnɔ lɛ na sè nǔ. Sékunɔ lɛ na lɔ́n yì jǐ tɛ́ ɖɔhun; ɖɛ̌kúnanɔ lɛ na ɖɔ xó dó ɖè awǎjijɛ yetɔn xlɛ́.”—Ezayíi 35:5, 6.

• Wuvɛ̌, aluwɛ kpo kú kpo sɔ́ na tíìn ǎ: “[Mawu] na súnsún ɖasin bǐ sín nukún yetɔn mɛ; kú sɔ́ na tíìn ǎ, aluwɛ sɔ́ na tíìn ǎ, alěnina sɔ́ na tíìn ǎ, wuvɛ̌ mimɔ sɔ́ na tíìn ǎ; nǔ xóxó lɛ ko bú.”—Nǔɖexlɛ́mɛ 21:4.

• Ahwan sɔ́ na tíìn ǎ: “[Mawu] wɛ sú ahwan kún dó gbɔn gbɛ̀ ɔ bǐ mɛ.”—Ðɛhan 46:10.

• È na nɔ gbɛ̀ kaka sɔyi: “[Ayikúngban] ɔ na nyí hwɛjijɔnɔ lɛ tɔn, bɔ ye na nɔ [jí] kaka sɔyi.”—Ðɛhan 37:29.

13. Mɛ ɖokpo géé tɛ ka sixu bló bɔ ayikúngban ɔ na nyí palaɖisi ɖé? Etɛwu?

¹³ Gbɛtɔ́ lɛ sixu bló nǔ enɛ lɛ gbeɖé ǎ, amɔ̌, Jehovah ɖó hlɔnhlɔn bo na wà nǔ ɖebǔ e é ɖɔ emi na wà é. Nǔ ɖebǔ sixu hɛn ɛ ɖó te ɖò nǔ e é jló na wà é kɔn ǎ. Biblu ɖɔ: “Nǔ ɖebǔ gló Mawu ǎ.”—Luki 1:37.

14. Nɛ̌ a ka sixu mɔ ali e nɔ kplá mɛ yì gbɛ̀ mavɔmavɔ mɛ é gbɔn?

¹⁴ Jehovah ɖò Kúnnuɖetɔ́ tɔn lɛ jí gbɔn wɛ bo ɖò ali hun nú gbɛtɔ́ lɛ bǐ wɛ nú ye na “gbɔn hɔn kpɛví ɔ nu,” bá dó gbɔn ali e nɔ kplá mɛ yì gbɛ̀ mavɔmavɔ mɛ é jí. É na nyɔ́ ɖɔ a ni nɔ togun awǎjijɛnɔ e yí gbè nú mɛylɔylɔ́ enɛ é tɛntin. É na nyɔ́ ɖɔ a ni sɛn Mawu ɖò nǔgbo mɛ bá ɖu lè nyɔna Jehovah tɔn tɔn kaka sɔyi!—Matie 7:13, 14.