Nukúnɖiɖo Jɔ Nukúnɖiɖo nú Mɛvívɛ́ Towe E Kú lɛ É

1-3. Kɛntɔ́ tɛ ka ɖò mǐ bǐ gbě nya wɛ? Etɛwu xóɖiɖɔ dó nǔ e Biblu kplɔ́n mɛ é jí ka na zɔ́n bɔ ayi mǐtɔn na jɛ dò?

MǏ NI ɖɔ ɖɔ a ɖò hinhɔn nú kɛntɔ́ baɖabaɖa ɖé wɛ. É ɖó hlɔnhlɔn tawun bo nɔ lɛ́ kanwezun hú we. A tuùn ɖɔ é kún nɔ kú nǔblawu nú mɛ ó, ɖó é ko hu xɔ́ntɔn towe ɖé lɛ ɖò nukún towe mɛ. A ɖò gǎn dó wɛ bo ɖò hinhɔn n’i wɛ có, é ɖò sisɛkpɔ we wɛ jɛn wɛ jɛn wɛ. É cí ɖɔ a sɔ́ sixu gló é ǎ ɖɔhun. Amɔ̌, mɛhwlɛngantɔ́ ɖé wá tɔ́n ɖò akpá towe ajijimɛ. É ɖó hlɔnhlɔn hú kɛntɔ́ towe enɛ tawun, bo d’akpá ɖɔ emi na d’alɔ we. Kpɔ́n lee ayi towe na jɛ dò sɔ é!

² Ðò ali ɖé nu ɔ, kɛntɔ́ mɔhun ɖé ɖò gbě towe nya wɛ. Mǐ bǐ gbě nya wɛ é ɖè lɔ. Lee mǐ ko kplɔ́n gbɔn ɖò wemata e wá yì é mɛ é ɔ, Biblu ylɔ kú ɖɔ kɛntɔ́ ɖé. Mǐ mɛ ɖebǔ sixu gló kɛntɔ́ enɛ ǎ. Kɛntɔ́ enɛ ko hu mɛvívɛ́ mǐtɔn gègě. Amɔ̌, Jehovah ɖó hlɔnhlɔn hú kú tawun. É wɛ nyí Mɛhwlɛngantɔ́ wanyiyinɔ e ko xlɛ́ ɖɔ emi na gb’ahwan kɛntɔ́ enɛ tɔn é. É d’akpá na sú kún dó nú kɛntɔ́ enɛ bǐ dégbédégbé. Biblu kplɔ́n mɛ ɖɔ: “Kɛntɔ́ gudo tɔn e sín kún è na sú dó ɔ wɛ nyí kú.” (1 Kolɛntinu lɛ 15:26) Wɛnɖagbe ɖé wɛ!

³ Mǐ ni tó ɖɔ xó dó lee é nɔ cí nú mǐ hwenu e kú hu mɛtuùnmɛ mǐtɔn ɖé é wu hwɛ̌. Mɔ̌ blóbló na d’alɔ mǐ bɔ mǐ na mɔ nukúnnú jɛ nǔ e na zɔ́n bɔ mǐ na ɖó awǎjijɛ é wu. Nǔ ɔ wɛ nyí ɖɔ Jehovah d’akpá ɖɔ mɛkúkú na fɔ́n. (Isaïe 26:19) Ye na lɛ́vɔ wá nɔ gbɛ̀. Akpá enɛ zɔ́n bɔ mǐ ɖó nukúnɖiɖo.

HWENU E MƐVÍVƐ́ TOWE ÐÉ KÚ É

4. (a) Etɛwu lee Jezu wà nǔ gbɔn hwenu e mɛvívɛ́ ɖé kú é ka zɔ́n bɔ mǐ tuùn lee é nɔ cí gbɔn nú Jehovah é? (b) Mɛ̌ mɛ̌ e kpo Jezu kpo ka huzu xɔ́ntɔn vívɛ́?

⁴ Mɛ vívɛ́ná ɖé ka ko kú nú we kpɔ́n à? Nǔ mɔhun nɔ hɛn wuvɛ̌, wubla kpo linkpɔ́n kpo wá nú mɛ tawun. Ðò hwe enɛ lɛ nu ɔ, mǐ nɔ ɖó hudo gbɔdónúmɛ Xó Mawu tɔn tɔn. (2 Kolɛntinu lɛ 1:3, 4) Biblu d’alɔ mǐ bɔ mǐ mɔ nukúnnú jɛ nǔ e Jehovah kpo Jezu kpo nɔ lin dó kú wu é wu. Jezu e nyí akpajlɛ jɔnwun Tɔ́ tɔn tɔn é tuùn wuvɛ̌ e è nɔ mɔ hwenu e mɛ kú nú mɛ é. (Jaan 14:9) Hwenu e Jezu ɖò Jeluzalɛmu é ɔ, é ɖó aca bo nɔ yì ba Lazaa kpo nɔví tɔn Mali kpo Mata kpo kpɔ́n ɖò toxo Betani tɔn mɛ. Ye wá huzu xɔ́ntɔn vívɛ́ lɛ. Biblu ɖɔ: “Jezu . . . yí wǎn nú Mata kpodo nɔví tɔn nyɔnu ɔ kpo, kpodo Lazaa kpan.” (Jaan 11:5) Amɔ̌, lee mǐ kplɔ́n gbɔn ɖò wemata e wá yì é mɛ é ɔ, Lazaa kú.

5, 6. (a) Nɛ̌ Jezu ka wà nǔ gbɔn hwenu e hɛnnumɔ kpo xɔ́ntɔn Lazaa tɔn lɛ kpo ɖò aluwɛ mɛ bɔ é wá gɔ̌n yetɔn é? (b) Etɛwu wuvɛ̌ e Jezu mɔ é ka na akɔnkpinkpan mǐ?

⁵ Nɛ̌ é ka cí gbɔn nú Jezu hwenu e xɔ́ntɔn tɔn kú é? Tàn ɔ ɖɔ nú mǐ ɖɔ Jezu yì hɛnnumɔ kpo xɔ́ntɔn Lazaa tɔn lɛ kpo gɔ́n hwenu e ye ɖò aluwɛ mɛ é. Ee Jezu mɔ ye é ɔ, wǔ kú i ɖesu. “Lanmɛ tɔn slɔ́ fún, bɔ ayi tɔn bǐ gbado.” Enɛ gudo ɔ, tàn ɔ ɖɔ ɖɔ “Jezu ya avǐ.” (Jaan 11:33, 35) Jezu ɖó nukúnɖiɖo ɖě ǎ wɛ zɔ́n bɔ wǔ kú i à? Eǒ. É nyɔ́ wà ɔ, Jezu tuùn ɖɔ nùjiwǔ ɖé ɖò na jɛ wɛ. (Jaan 11:3, 4) É ɖò mɔ̌ có, é mɔ wuvɛ̌ kpo akpɔ̀ e è nɔ mɔ enyi mɛ kú nú mɛ é kpo.

⁶ Ðò ali ɖé nu ɔ, wuvɛ̌ e Jezu mɔ é na akɔnkpinkpan mǐ. É kplɔ́n mǐ ɖɔ Jezu kpo Tɔ́ tɔn Jehovah kpo gbɛ́ wǎn nú kú. Amɔ̌, Jehovah Mawu kpé nǔ wu bo na gb’ahwan kɛntɔ́ enɛ tɔn! Mi nú mǐ ni kpɔ́n nǔ e Mawu na hlɔnhlɔn Jezu bɔ é wà é.

“LAZAA TƆ́N, BO WÁ”

7, 8. Etɛwu ɖò nukún gbɛtɔ́ tɔn mɛ ɔ, è ma ka sɔ́ sixu fɔ́n Lazaa sín kú ǎ? Amɔ̌, etɛ Jezu ka wà?

⁷ È ko ɖi Lazaa dó só ɖé xó mɛ bɔ Jezu ɖɔ è ni blí awinnya e ɖò yɔ ɔ nu é síìn. Amɔ̌, Mata ka ba ǎ, ɖó é ko ɖò azǎn ɛnɛ ɖó wɛ nɛ, bɔ cyɔ Lazaa tɔn na ko ɖò cyɔ dó wɛ. (Jaan 11:39) Ðò nukún gbɛtɔ́ tɔn mɛ ɔ, nukúnɖiɖo ɖě sɔ́ ɖè ǎ.

⁸ È blí awinnya ɔ síìn bɔ Jezu súxó syɛnsyɛn bo ɖɔ: “Lazaa tɔ́n, bo wá.” Etɛ ka jɛ? “Mɛkúkú ɔ tɔ́n sín yɔdo ɔ mɛ nugbǒ.” (Jaan 11:43, 44) Kpɔ́n lee xomɛ na ko hun mɛ e ɖò finɛ lɛ é sɔ́ é! Nɔví tɔn lɛ wɛ à, hɛnnumɔ tɔn lɛ wɛ à, xɔ́ntɔn tɔn lɛ wɛ à, alǒ nɔzo tɔn lɛ wɛ à, ye bǐ tuùn ɖɔ é ko kú. Amɔ̌ dìn ɔ, mɛvívɛ́ yetɔn ɖokpo enɛ ko lɛ́ ɖò gbɛ̀. Nǔ enɛ na ko kpaca mɛ lɛ tawun. É ɖò gaàn ɖɔ ye mɛ gègě na ko zunfan Lazaa kpo awǎjijɛ kpo. Enɛ wu ɔ, mǐ mɔ ɖɔ Jehovah ɖó hlɔnhlɔn bo na gbà kú sín ahwan.

9, 10. (a) Nɛ̌ Jezu ka xlɛ́ Fí e é ba hlɔnhlɔn sín bo dó fɔ́n Lazaa sín kú é gbɔn? (b) Lè tɛ lɛ tàn fínfɔ́n sín kú e ɖò Biblu mɛ lɛ é tɔn xixa ka na na we?

⁹ Jezu xlɛ́ ɖɔ emiɖesu wɛ ɖó hlɔnhlɔn e bló nùjiwǔ enɛ é ǎ. Ðò ɖɛ e é xò hwɛ̌ cobo súxó ylɔ Lazaa é mɛ ɔ, é xlɛ́ céɖécéɖé ɖɔ Jehovah wɛ nyí Mɛ e bló nùjiwǔ enɛ é. (Jaan 11:41, 42) Azɔn ɖokpo e Jehovah zán hlɔnhlɔn tɔn dó fɔ́n mɛ sín kú é nɛ ǎ. Xó Mawu tɔn kplɔ́n mɛ ɖɔ Jehovah lɛ́ zán hlɔnhlɔn tɔn dó fɔ́n mɛ tantɔn ɖevo sín kú.a Tàn enɛ lɛ gbígbéjé kpɔ́n nɔ zɔ́n bɔ è nɔ ɖó awǎjijɛ. Ye kplɔ́n mǐ ɖɔ Mawu kún nɔ ɖè mɛɖé ɖó vo ɖò mɛɖé mɛ ó, ɖó yɔkpɔvu kpo mɛxo kpo, sunnu kpo nyɔnu kpo, Izlayɛli-ví kpo mɛ e ma nyí Izlayɛli-ví ǎ é kpo ɖò mɛ e è fɔ́n sín kú lɛ é mɛ. Nǔ e è ɖɔ ɖò wemafɔ enɛ lɛ mɛ é nyí xomɛhunhun sín nǔ tawun. Ði kpɔ́ndéwú ɖé ɔ, hwenu e Jezu fɔ́n ɖyɔvivu ɖé sín kú é ɔ, “nǔ nɛ ɔ nyí nùɖé, bo kpaca [mɛ e ɖò xɔ ɔ mɛ lɛ é] tlala.” (Maki 5:42) Jehovah wà nǔ e na zɔ́n bɔ ye na ɖó awǎjijɛ é nú ye bɔ ye sɔ́ na wɔn kpɔ́n gbeɖé ǎ.

¹⁰ Mɛ e Jezu fɔ́n sín kú lɛ é lɛ́vɔ wá kú. Enɛ xlɛ́ ɖɔ nǔ vɔ̌tɔ́ wɛ é wà bo fɔ́n ye sín kú wɛ à? Eǒ. Tàn Biblu tɔn enɛ lɛ tɛɖɛ̌ nugbǒ taji ɖé lɛ jí bo lɛ́ na mǐ nukúnɖiɖo.

NǓ E TÀN FÍNFƆ́N SÍN KÚ TƆN LƐ KPLƆ́N MƐ É

11. Nɛ̌ tàn Lazaa fínfɔ́n sín kú tɔn ka tɛɖɛ̌ nugbǒ e ɖò Ecclésiaste 9:5 mɛ é jí gbɔn?

¹¹ Mɛkúkú lɛ “tuùn nǔtí ǎ.” Nǔ e Biblu kplɔ́n mɛ é nɛ. Ye sɔ́ ɖò gbɛ̀ ǎ, ye ka sɔ́ lɛ́ tuùn ɖɔ emi ɖò fí ɖě ǎ. Tàn Lazaa tɔn tɛɖɛ̌ nugbǒ enɛ jí. Hwenu e è fɔ́n Lazaa sín kú é ɔ, é ɖɔ lee jixwé cí é nú mɛ lɛ bo dó hɛn xomɛ hun ye wɛ à? Alǒ é ɖɔ xó dó zomɛ̀ wu bo dó dó xɛsi ye wɛ à? Eǒ. Xó mɔhun lɛ ɖě tɔ́n sín Lazaa nu mɛ bonu Biblu ɖɔ ǎ. Ðò azǎn ɛnɛ e é bló ɖò yɔdo mɛ lɛ é hwenu ɔ, é “tuùn nǔtí ǎ.” (Ecclésiaste 9:5) Lazaa kú bo ɖò amlɔ dɔ wɛ kpowun wɛ.—Jaan 11:11.

12. Etɛwu mǐ ka sixu ɖeji ɖɔ è fɔ́n Lazaa sín kú nugbǒ nugbǒ?

¹² Tàn Lazaa tɔn lɛ́ kplɔ́n mǐ ɖɔ fínfɔ́n sín kú kún nyí xɛxó ɖé kpowun ó, xó jɔ xó wɛ. Jezu fɔ́n Lazaa ɖò kúnnuɖetɔ́ gègě nukɔn. Sinsɛngán e gbɛ́ wǎn nú Jezu lɛ é tlɛ dɔn nǔ ɖɔ nùjiwǔ mɔhun kún jɛ ó ǎ. É nyɔ́ wà ɔ, ye ɖɔ dó Jezu wu ɖɔ: “Nɛ̌ wɛ mǐ na bló gbɔn nú nya elɔ? Eɖíe ɖò nǔ gègě jlɛ wɛ é.” (Jaan 11:47) Mɛ gègě yì kpɔ́n nya e è fɔ́n sín kú é. É sín enɛ wu bɔ ye mɛ gègě ɖi nǔ nú Jezu. Ee ye mɔ Lazaa ɖò gbɛ̀ é ɔ, ye kudeji ɖɔ Mawu wɛ sɛ́ Jezu dó nugbǒ. Enɛ lɛ́ zɔ́n tawun bɔ sinsɛngán Jwifu e gbɛ́ wǎn nú Jezu é ɖé lɛ ba wlɛnwín bo na hu é kpo Lazaa kpo.—Jaan 11:53; 12:9-11.

13. Ganjɛwu tɛ mǐ ka ɖó bo na ɖi nǔ ɖɔ Jehovah na fɔ́n mɛ sín kú nugbǒ nugbǒ?

¹³ Mɛ e ɖi nǔ ɖɔ fínfɔ́n sín kú na tíìn é ka ɖò lugbe à? Ganji, ɖó Jezu kplɔ́n mɛ ɖɔ hwenu ɖé na wá sù bɔ Mawu na fɔ́n mɛkúkú lɛ. (Jaan 5:28) Jehovah wɛ nyí Gbɛɖotɔ́ ɔ. É jɛ ɖɔ è ni ɖi ɖɔ é na lɛ́ na gbɛ̀ nǔ e kú é à cé? Amɔ̌, lee Jehovah nɔ kpé nǔ wu bo nɔ flín nǔ gbɔn é wu wɛ é na sín. É ka sixu flín mɛvívɛ́ mǐtɔn e kú lɛ é à? Sunví maxamaxa lɛ wɛ ɖò jinukúnsin có, Mawu ka sùn nyǐ ye mɛ ɖokpo ɖokpo! (Isaïe 40:26) Enɛ wu ɔ, Jehovah Mawu hɛn ɔ, é na flín mɛvívɛ́ mǐtɔn e kú lɛ é céɖécéɖé, bo lɛ́ kpé nǔ wu bo na fɔ́n ye sín kú.

14, 15. Sɔgbe kpo xó e Jɔbu ɖɔ é kpo ɔ, etɛ ka xlɛ́ ɖɔ Jehovah jló na fɔ́n mɛ e kú lɛ é?

¹⁴ Biblu kplɔ́n mɛ ɖɔ akpàkpà ɖò Jehovah sɔ́ wɛ nú é na fɔ́n mɛkúkú lɛ. Nɛ̌ mǐ ka sixu ganjɛ enɛ wu gbɔn? Nya gbejinɔtɔ́ Jɔbu kanbyɔ ɖɔ: “Enyi asuká ɖé kú ɔ, é ka sixu lɛ́ wá nɔ gbɛ̀ à?” Lee Jɔbu na ɖò te ɖò yɔdo mɛ kaka jɛ hwenu e Mawu na flín i é wu ɖɔ xó dó wɛ é ɖè. É ɖɔ nú Jehovah ɖɔ: “A na ylɔ, bɔ un na sɔ́ nú we. Akpàkpà na sɔ́ we dó nǔ e alɔ towe bló é wu.”—Job 14:13-15.

¹⁵ Lin tamɛ kpɛɖé! Akpàkpà ɖò Jehovah sɔ́ wɛ bonu é na fɔ́n mɛ e ko kú lɛ é. Jlǒ Jehovah tɔn enɛ dó gbɔ nú mɛ à cé? Amɔ̌, nɛ̌ fínfɔ́n sín kú e jǎwe é ka na cí? Mɛ alɔkpa tɛ lɛ è ka na fɔ́n sín kú? Dó fitɛ?

‘MƐKÚKÚ LƐ NA FƆ́N’

16. Ninɔmɛ alɔkpa tɛ lɛ mɛ è ka na fɔ́n mɛkúkú lɛ dó?

¹⁶ Tàn fínfɔ́n sín kú tɔn e ɖò Biblu mɛ lɛ é kplɔ́n nǔ gègě mǐ dó fínfɔ́n sín kú sɔgudo tɔn ɔ wu. Mɛ e è fɔ́n sín kú wá yì dó ayikúngban jí lɛ é nɔ kpɔ́ kpo mɛvívɛ́ yetɔn lɛ kpo. Fínfɔ́n sín kú sɔgudo tɔn ɔ na cí nǔ mɔhun ɖɔhun, amɔ̌, é na lɛ́ nyɔ́ hú mɔ̌. Lee mǐ ko kplɔ́n gbɔn ɖò Wemata 3gɔ́ ɔ mɛ é ɔ, linlin Mawu tɔn wɛ nyí ɖɔ ayikúngban ɔ bǐ ni huzu palaɖisi ɖé. Enɛ wu ɔ, è na fɔ́n mɛkúkú lɛ dó gbɛ̀ e mɛ ahwan, adakaxixo kpo azɔn kpo gɔ́ é ǎ. Ali na hun nú ye bɔ ye na nɔ gbɛ̀ kaka sɔyi ɖò ayikúngban elɔ jí ɖò fífá kpo awǎjijɛ kpo mɛ.

17. Bǎ tɛ mɛ è ka na fɔ́n mɛ sín kú ɖó?

¹⁷ Mɛ alɔkpa tɛ lɛ è ka na fɔ́n sín kú? Jezu ɖɔ ɖɔ mɛkúkú e Mawu flín lɛ é bǐ na fɔ́n. (Jaan 5:28, 29) Mɔ̌ ɖokpo ɔ, Nǔɖexlɛ́mɛ 20:13 ɖɔ: “Mɛkúkú e ɖò xù mɛ lɛ ɔ, xù jó ye. Kú kpo kútomɛ [hadɛsi] kpo jó mɛkúkú e ye hɛn lɛ.” “Hadɛsi” nɔte nú yɔdo kpaà gbɛtɔ́ lɛ tɔn. (Kpɔ́n Xota Ðevo ɔ “Etɛ Ceɔlu kpo Hadɛsi kpo ka Nyí?”) Yɔdo kpaà enɛ na jɛ vɔ̌. Mɛkúkú maxamaxa e ɖò gbigbɔjɛ wɛ ɖ’emɛ lɛ é na lɛ́vɔ wá nɔ gbɛ̀. Mɛsɛ́dó Pɔlu ɖɔ: “Mawu na wá fɔ́n mɛ ɖagbe [“nǔjlɔjlɔwatɔ́,” NW] lɛ, kpodo mɛ nyanya [“nǔagɔwatɔ́,” NW] lɛ kpo sín kú.” (Mɛsɛ́dó 24:15) Etɛ ka nyí tinmɛ enɛ tɔn?

18. Mɛ̌ mɛ̌ e ka ɖò “nǔjlɔjlɔwatɔ́” e na fɔ́n sín kú lɛ é mɛ? Nɛ̌ nukúnɖiɖo enɛ ɔ ka cí ɖò ayi towe mɛ?

¹⁸ Mɛ e sín xó mǐ mɔ xà ɖò Biblu mɛ bɔ ye nɔ gbɛ̀ cobɔ Jezu wá ayikúngban ɔ jí lɛ é gègě ɖò “nǔjlɔjlɔwatɔ́ lɛ” mɛ. A sixu flín Nɔwee, Ablaxamu, Saala, Mɔyizi, Hwiliti, Ɛsitɛɛ kpo mɛ gègě ɖevo lɛ kpo. Nùɖiɖi e sunnu kpo nyɔnu kpo enɛ lɛ ɖó nú Mawu é syɛn ɖesu bɔ è ɖɔ xó yetɔn ɖò Eble lɛ sín wemata 11gɔ́ ɔ mɛ. Amɔ̌, Jehovah sɛntɔ́ e kú hwe mǐtɔn nu lɛ é lɔmɔ̌ ɖò “nǔjlɔjlɔwatɔ́ lɛ” mɛ. Ðó nukúnɖiɖo fínfɔ́n sín kú tɔn ɔ wutu ɔ, mǐ sɔ́ sixu nyí kannumɔ nú xɛsiɖiɖi nú kú ǎ.—Eble lɛ 2:15.

19. Mɛ̌ mɛ̌ e ka nyí “nǔagɔwatɔ́ lɛ”? Wǔ tɛ Jehovah ka na jɔ ye kpo xomɛnyínyɔ́ kpo?

¹⁹ Mɛɖé lɛ tíìn bo sɛ̀n Jehovah, alǒ setónú n’i ǎ, ɖó ye tuùn i kpɔ́n gbeɖé ǎ wutu bo ka ko kú. Nɛ̌ mɛ enɛ lɛ tɔn ka na nyí gbɔn? È na wɔn “nǔagɔwatɔ́” maxamaxa enɛ lɛ ǎ. È na fɔ́n ye lɔ sín kú bo na na hwenu ye bonu ye na kplɔ́n nǔ dó Mawu nugbǒ ɔ wu lobo na sɛ̀n ɛ. Ðò xwè afatɔ́ɔ́n ɔ sín hwenu ɔ, è na fɔ́n mɛkúkú lɛ bo na jɔwu ye bɔ ye na gɔ́ nú gbɛtɔ́ gbejinɔtɔ́ lɛ ɖò ayikúngban jí bo na sɛ̀n Jehovah. Hwe enɛ nu na jiwǔ tawun. Hwe enɛ nu wɛ Biblu ylɔ ɖɔ Hwɛɖɔzán.b

20. Etɛ ka nyí Jeyɛnu? Mɛ hǔnmɛ tɛ lɛ ka nɔ yì mɛ?

²⁰ Mɛ e ko nɔ gbɛ̀ kpɔ́n lɛ é bǐ na fɔ́n sín kú ɖɔ wɛ è ɖè à? Eǒ. Biblu ɖɔ ɖɔ mɛ e kú lɛ é ɖé lɛ ɖò “Jeyɛnu” mɛ. Ðò Biblu ɖé lɛ mɛ ɔ, è lilɛ xógbe Jeyɛnu dó “zomɛ̀.” (Luka 12:5) Zunkɔ́ta e ɖò Jeluzalɛmu hwexónu tɔn sín dǒ gudo é mɛ wɛ xógbe Jeyɛnu ɔ gosin. È nɔ fyɔ nùkúkú lɛ kpo zunkɔ́ lɛ kpo ɖò finɛ. Jwifu lɛ nɔ kpɔ́n mɛkúkú e ye nɔ bɛ́ nyí finɛ lɛ é dó mɔ cyɔ e é ma jɛ ɖɔ è ni ɖi ǎ é, kpo e è ma na fɔ́n ǎ é kpo na. Enɛ wu ɔ, nùɖé yì Jeyɛnu mɛ hǔn, é xlɛ́ ɖɔ kún nǔ ɔ tɔn sú dó kaka sɔyi mavɔmavɔ. Jehovah wɛ nyí Hwɛɖɔtɔ́ ɖaxó ɔ. É na fɔ́n mɛ e éɖesu mɔ ɖɔ é nyí mɛ nyanya bo ma ka jló na huzu jujɔ ǎ lɛ é gbeɖé ǎ.

FÍNFƆ́N SÍN KÚ JIXWÉ TƆN Ɔ

21, 22. (a) Fínfɔ́n sín kú alɔkpa ɖevo tɛ ka tíìn? (b) Mɛ̌ è ka fɔ́n sín kú gbɔn mɔ̌ dó nukɔn?

²¹ Biblu lɛ́ ɖɔ fínfɔ́n sín kú alɔkpa ɖevo sín xó, é wɛ nyí fínfɔ́n sín kú dó jixwé bo na nyí nǔɖògbɛ gbigbɔ mɛ tɔn. Kpɔ́ndéwú fínfɔ́n sín kú alɔkpa enɛ tɔn ɖokpo géé wɛ ɖò Biblu mɛ, é wɛ nyí Jezu Klisu tɔn.

²² Ee è hu Jezu gudo é ɔ, Jehovah lɔn bonu Vǐ Tɔn gbejinɔtɔ́ enɛ cí yɔdo mɛ ǎ. (Psaume 16:10; Mɛsɛ́dó 13:34, 35) Mawu fɔ́n Jezu sín kú, amɔ̌, é ka fɔ́n ɛ dó agbaza gbɛtɔ́ tɔn mɛ ǎ. Mɛsɛ́dó Piyɛɛ tinmɛ dó Klisu wu ɖɔ “ɖò agbaza sín alixo ɔ, è hu i; loɔ, ɖò [gbigbɔ] ɔ sín alixo ɔ, è fɔ́n ɛ wá gbɛ̀.” (1 Piyɛɛ 3:18) Nùjiwǔ ɖaxó ɖé wɛ enɛ nyí. Jezu lɛ́vɔ wá gbɛ̀ bo nyí gbɛtɔ́ gbigbɔnɔ hlɔnhlɔnnɔ ɖé! (1 Kolɛntinu lɛ 15:3-6) Jezu wɛ nyí mɛ nukɔntɔn e è fɔ́n sín kú gbɔn mɔ̌ é. (Jaan 3:13) Amɔ̌, é na nyí mɛ gudo tɔn ɔ ǎ.

23, 24. Mɛ̌ mɛ̌ e ka ɖò “lɛngbɔhwan kpɛví” Jezu tɔn mɛ? Mɛ nabi ka nú ye?

²³ Kú Jezu tɔn kpò kpɛɖé é ɔ, é ɖɔ nú ahwanvu tɔn gbejinɔtɔ́ lɛ ɖɔ emi na yì jixwé bo na “bló tɛnmɛ ɖó ɖ’ayǐ” nú ye ɖò dɔ̌n. (Jaan 14:2) Jezu ylɔ mɛ e na yì jixwé lɛ é ɖɔ “lɛngbɔhwan kpɛví.” (Luka 12:32, NW) Mɛ nabi ka ɖò gbɛ̌ kpɛví Klisanwun gbejinɔtɔ́ lɛ tɔn enɛ mɛ? Mɛsɛ́dó Jaan ɖɔ ɖò Nǔɖexlɛ́mɛ 14:1 mɛ ɖɔ: “Un kpɔ́n bo mɔ Lɛngbɔví ɔ [Jezu Klisu] ɖò te ɖò Ziɔn sín só ɔ jí. Gbɛtɔ́ afatɔ́ɔ́n afatɔ́ɔ́n donu kantɔn-ko-nukún ɛnɛ e sín nukɔn è wlan nyikɔ tɔn kpo [Tɔ́] tɔn sín nyikɔ kpan ɖó lɛ ɖò finɛ xá ɛ.”

²⁴ È nɔ fɔ́n Klisanwun 144 000 enɛ lɛ e mɛ Jezu sín mɛsɛ́dó gbejinɔtɔ́ lɛ ɖè é sín kú dó jixwé. Hwetɛnu fínfɔ́n sín kú enɛ ka bɛ́? Mɛsɛ́dó Pɔlu wlan ɖɔ nǔ na nyí mɔ̌ ɖò fí ɖiɖe Klisu tɔn hwenu. (1 Kolɛntinu lɛ 15:23) Lee mǐ na wá kplɔ́n gbɔn ɖò Wemata 9gɔ́ ɔ mɛ é ɔ, hwe enɛ nu nɔ gbɛ̀ ɖè wɛ mǐ ɖè dìn. Enɛ wu ɔ, enyi mɛɖé kú ɖò égbé dìn ɖò mɛ kpɛ e kpò ɖò mɛ 144 000 enɛ lɛ mɛ é mɛ ɔ, è nɔ fɔ́n ɛ sín kú afɔji afɔji dó jixwé. (1 Kolɛntinu lɛ 15:51-55) É ɖò mɔ̌ có, gbɛtɔ́ wɔbuwɔbu ɖevo lɛ ɖó nukúnɖiɖo bɔ è na fɔ́n ye sín kú ɖò sɔgudo dó Palaɖisi mɛ ɖò ayikúngban jí.

25. Etɛ jí mǐ ka na ɖɔ xó dó ɖò wemata e bɔ d’ewu é mɛ?

²⁵ Jehovah na gb’ahwan kɛntɔ́ mǐtɔn kú ɔ tɔn bɔ xó tɔn na fó bǐ mlɛ́mlɛ́! (Isaïe 25:8) É ɖò mɔ̌ có, mǐ sixu kanbyɔ ɖɔ: ‘Etɛ wà gbé mɛ e è fɔ́n sín kú dó jixwé lɛ é ka xwè?’ Ye na nɔ Axɔsuɖuto jixwé tɔn sín acɛkpikpa mɛ. Mǐ na kplɔ́n nǔ gègě dó acɛkpikpa enɛ wu ɖò wemata e bɔ d’ewu é mɛ.