Mɛ̌ ka Nyí Wɛnsagun Ðaxó Micɛli Ɔ?

È ÐƆ nùɖíɖó gbigbɔ mɛ tɔn e nɔ nyí Micɛli é sín xó ɖò Biblu mɛ azɔn gègě ǎ. Amɔ̌, enyi è ɖɔ xó tɔn ɖò fí ɖé ɖ’emɛ ɔ, é nɔ ɖò nùɖé wà wɛ. Ðò wema Daniɛli tɔn mɛ ɔ, Micɛli ɖò ahwan fun xá wɛnsagun baɖabaɖa lɛ wɛ, ɖò wema e Judi wlan é mɛ ɔ, é ɖò nǔ dɔn xá Sataan wɛ, lobɔ ɖò Nǔɖexlɛ́mɛ mɛ ɔ, é tɔ́n ahwan Sataan kpo awovi tɔn lɛ kpo. Micɛli sín tinmɛ wɛ nyí “Mɛ̌ ka Cí Mawu Ðɔhun?” É nɔ wà nǔ sɔgbe kpo nyikɔ tɔn kpo, ɖó é nɔ jɛ hun dó acɛkpikpa Jehovah tɔn jí bo nɔ fun ahwan xá kɛntɔ́ Mawu tɔn lɛ. Mɛ̌ ka nyí Micɛli lo?

Mɛ ɖé lɛ nɔ ɖó nyikɔ gègě. Ði kpɔ́ndéwú ɖé ɔ, tɔ́gbó Jakɔbu nɔ lɛ́ nyí Izlayɛli, bɔ mɛsɛ́dó Piyɛɛ nɔ lɛ́ nyí Sinmɔɔ. (Genèse 49:1, 2; Matie 10:2) Mɔ̌ ɖokpo ɔ, Biblu ɖexlɛ́ ɖɔ Jezu Klisu wɛ nɔ lɛ́ nyí Micɛli. Hwenu e é ɖò jixwé é kpo hwenu e é lɛkɔ yì dɔ̌n é kpo kɛɖɛ wɛ é nɔ nyí mɔ̌. Mi nú mǐ ni kpɔ́n wemafɔ Biblu tɔn e zɔ́n bɔ mǐ wá gbeta enɛ kɔn lɛ é.

Wɛnsagun Ðaxó. Xó Mawu tɔn ylɔ Micɛli ɖɔ “wɛnsagun ɖaxó.” (Judi 9) Xógbe enɛ sín tinmɛ wɛ nyí “wɛnsagungán.” Ðò Biblu mɛ ɔ, mɛ ɖokpo géé wɛ è zán xógbe enɛ na, è zán nú mɛ gègě gbeɖé ǎ. Enɛ ɖexlɛ́ ɖɔ wɛnsagun ɖokpo géé wɛ ɖó nyikɔ enɛ. Gɔ́ nú enɛ ɔ, Biblu xlɛ́ ɖɔ nyikɔ Jezu tɔn enɛ ɔ sɔgbe kpo tɛn e mɛ é ɖè é kpo. 1 Tɛsalonikinu lɛ 4:16 ɖɔ dó Aklunɔ Jezu Klisu e fɔ́n sín kú é wu ɖɔ: “Aklunɔ ɖesunɔ na jɛte sín jixwé, bɔ è na sè mɛɖé na ɖegbe kpo xósusu kpo, bo na sè wɛnsagun Mawu tɔn ɖaxó ɖokpo sín gbè.” Wemafɔ enɛ ɖexlɛ́ ɖɔ Jezu sín gbè cí wɛnsagun ɖaxó ɖé tɔn ɖɔhun. Hǔn Jezu ɖesunɔ wɛ nyí wɛnsagun ɖaxó Micɛli ɔ nɛ.

Ahwangán. Biblu ɖɔ ɖɔ “Micɛli kpodo wɛnsagun e ɖò glɔ tɔn lɛ kpo fun ahwan xá Dlagɔ́ɔn ɔ . . . kpodo wɛnsagun tɔn lɛ kpo.” (Nǔɖexlɛ́mɛ 12:7) Hǔn, Micɛli nyí Gǎn nú ahwangɔnu wɛnsagun gbejinɔtɔ́ lɛ tɔn ɖé nɛ. Wema Nǔɖexlɛ́mɛ tɔn lɛ́ ɖexlɛ́ ɖɔ Jezu nyí Gǎn nú ahwangɔnu wɛnsagun gbejinɔtɔ́ lɛ tɔn ɖé. (Nǔɖexlɛ́mɛ 19:14-16) Mɛsɛ́dó Pɔlu ɖɔ xó tlɔlɔ dó “Aklunɔ Jezu” kpo “wɛnsagun tɔn hlɔnhlɔnnɔ lɛ” kpo wu. (2 Tɛsalonikinu lɛ 1:7) Hǔn, Biblu ɖɔ xó dó Micɛli kpo “wɛnsagun tɔn lɛ” kpo wu bo lɛ́ ɖɔ xó dó Jezu kpo “wɛnsagun tɔn lɛ” kpo wu. (Matie 13:41; 24:31; 1 Piyɛɛ 3:22) Ðó Xó Mawu tɔn sɔ́ ɖexlɛ́ ɖò fí ɖebǔ ɖɔ ahwangɔnu wɛnsagun gbejinɔtɔ́ lɛ tɔn wè wɛ ɖò jixwé bɔ Micɛli ɖò nu nú ɖokpo lobɔ Jezu ɖò nu nú wegɔ ɔ ǎ wutu ɔ, é sɔgbe ɖɔ è ni ɖɔ ɖɔ Micɛli kún sɔ́ nyí mɛ ɖevo zɛ Jezu Klisu wu ó. Nyikɔ enɛ sɔgbe xá azɔ̌ e è ɖè n’i ɖò jixwé é.a