É Nɔ Acéjí Bo Lɛ́ Nɔte Kpɔ́n Mawu

1, 2. Azɔ̌ syɛnsyɛn tɛ ka ɖò te kpɔ́n Elíi? Ali tɛ lɛ nu Elíi ka gbɔn vo nú Axabu ɖè?

ELÍI jló tawun bo na nɔ éɖokpo bo xoɖɛ sɛ́dó Tɔ́ tɔn jixwé tɔn ɔ. Amɔ̌, dìn jɛn gbɛtɔ́ wɔbuwɔbu e lɛlɛ̌ dó é lɛ é mɔ bɔ gbeyiɖɔ tewungbeju enɛ xoɖɛ bɔ myɔ gosin jixwé. É ɖò gaàn ɖɔ mɛ gègě ɖò ye mɛ bo ɖò biba wɛ ɖesu bo na nyí mɛ ɖò así tɔn. Cobonu Elíi na yì Kaamɛli Só ɔ jí bo na nɔ éɖokpo bo xoɖɛ sɛ́dó Jehovah Mawu ɔ, azɔ̌ syɛnsyɛn ɖokpo ɖò te kpɔ́n ɛ. É ɖó na ɖɔ xó nú Axɔsu Axabu.

² Axabu kpo Elíi kpo gbɔn vo nú yeɖée tawun. Axabu sɔ́ axɔsu sín nǔ bɔ nǔ bǐ vɔ ɖ’ewu, nyí nukúnkɛ́nnɔ, bo nɔ yawu jó éɖée dó bɔ mɛ ɖevo lɛ nɔ dɔn ɛ dó nǔ nyanya mɛ, lobo lɛ́ nyí gǔfɔntɔ́. Elíi ka sɔnǔ lee gbeyiɖɔ lɛ nɔ sɔnǔ gbɔn é; é dó awu gaga ɖé kpowun, é sixu ko nyí kanlinnyú wɛ è dó bló kabǐ lakunmifún alǒ gbɔ̌fún wɛ è dó lɔn na. É nyí mɛɖé bo kpankɔ́n tawun, nɔ ɖɔ nugbǒ bo lɛ́ ɖó nùɖiɖi. Nǔ gègě jɛ azǎn enɛ jí bo xlɛ́ gbɛtɔ́ alɔkpa e ye mɛ ɖokpo ɖokpo nyí é.

3, 4. (a) Etɛwu azǎn enɛ ka nyí azǎn nyanya ɖé nú Axabu kpo Baalu sɛntɔ́ ɖevo lɛ kpo? (b) Nùkanbyɔ tɛ lɛ mǐ ka na gbéjé kpɔ́n?

³ Azǎn nyanya ɖé wɛ nyí azǎn enɛ nú Axabu kpo Baalu sɛntɔ́ ɖevo lɛ kpo. Elíi ɖè mɛ̌ vodun e jí jɛhun dó wɛ Axabu kpo asì tɔn Jezabɛli kpo ɖè ɖò akɔta wǒ Izlayɛli tɔn sín axɔsuɖuto mɛ é bǐ mlɛ́mlɛ́. Bɔ mɛ bǐ mɔ nǔ jɛ wu vaàn ɖɔ nùɖé kún nyí Baalu bo tíìn ó. Hunnɔ Baalu tɔn lɛ xomlá ɛ, ye ɖúwè bo já wutu nú yeɖee có, vodun enɛ sixu sɛ́ myɔ yayǎ dó ǎ. É tlɛ lɛ́ cyɔn alɔ hunnɔ tɔn 450 e é jɛxa ɖɔ è ni hu bɔ è hu lɛ é vɔ́vɔ́ jí ǎ. É lɛ́ ɖu winnya ɖò ali ɖevo nu, bɔ zaanɖé dìn ɔ, winnya enɛ na lɛ́ jɛji. Hunnɔ Baalu tɔn lɛ ko xomlá ɛ nú xwè atɔn jɛji ɖɔ é ni ɖó akú e ɖò ya dó nú ye wɛ é te, amɔ̌, Baalu kpé nùɖé wu bo wà ǎ. Loɔ, zaanɖé dìn ɔ, Jehovah na ɖexlɛ́ ɖɔ emi wɛ nyí Mawu nugbǒ ɔ, bo na ɖó akú ɔ te.—1 Axɔ. 16:30–17:1; 18:1-40.

⁴ Hwetɛnu Jehovah ka na ɖó akú ɔ te? Etɛ wà wɛ Elíi ka ɖè hwenu e é ɖò te kpɔ́n Jehovah bonu é na wà enɛ é? Etɛ kpɔ́ndéwú nya nùɖitɔ́ enɛ tɔn ka sixu kplɔ́n mǐ? Mǐ ni bo gbéjé tan ɔ kpɔ́n.—Xà 1 Axɔsu lɛ 18:41-46.

Elíi Nɔ Ðò Ðɛ Xò Wɛ

5. Etɛ Elíi ka ɖɔ Axabu ni wà? Nǔ e jɛ ɖò azǎn enɛ jí lɛ é ka kplɔ́n nùɖé Axabu vlafo à?

⁵ Elíi yì Axabu gɔ́n bo ɖɔ: “Yì, ɖu nǔ, bo nu sìn, ɖó jǐ ɖò nǔ wà wɛ.” Nǔ e jɛ ɖò azǎn enɛ jí lɛ é ka kplɔ́n nùɖé axɔsu nyanya enɛ vlafo à? Tan ɔ ɖɔ xó tawun ɖé dó akpá enɛ xwé ǎ, mǐ mɔ xógbe hwɛvɛ́númɛ tɔn ɖě ǎ, mɔ̌ jɛn mǐ ma ka lɛ́ mɔ nú é byɔ ɖɔ gbeyiɖɔ ɔ ni d’alɔ emi bonu emi na nyɔ́ ɖò Jehovah sí bonu é na sɔ́ hwɛ kɛ emi ǎ é nɛ. Axabu wà nǔ enɛ lɛ ɖě ǎ, é “yì ɖu nǔ, bo nu sìn.” (1 Axɔ. 18:41, 42) Elíi ka ló?

6, 7. Etɛ Elíi ka xoɖɛ bo byɔ? Etɛwu?

⁶ “Elíi ka xá Kaamɛli Só ɔ ta aga, bo fɛ́, lobo zé ta dó asá mɛ.” Hwenu e Axabu yì nǔ ɖu gbé é ɔ, ali hun nú Elíi bɔ é xoɖɛ sɛ́dó Tɔ́ tɔn jixwé tɔn. Ðǒ ayi lee Elíi nɔ hwenu e é xoɖɛ ɔ é wu; é yì dò kaka bo zé ta dó asá mɛ. Etɛ lee é nɔ bo xoɖɛ ɔ é ka xlɛ́? É byɔ ɖɔ è ni lin tamɛ lɔ ǎ. Biblu ɖɔ ɖò Jaki 5:18 mɛ ɖɔ ɖɔ Elíi xoɖɛ ɖɔ akú ɔ ni nɔte. É cí ɖɔ Kaamɛli Só ɔ jí wɛ é xoɖɛ enɛ ɖè.

⁷ Jehovah ko ɖɔ wá yì ɖɔ: “Un na sɛ́ jǐ dó bɔ é na ja kɔn nyì ayikúngban ɔ jí.” (1 Axɔ. 18:1) Enɛ xlɛ́ ɖɔ Elíi xoɖɛ bonu jlǒ Jehovah tɔn ni dó nyí wiwa. Xwè afatɔ́n gudo ɔ, Jezu lɔ wá kplɔ́n nǔ ɖokpo ɔ ahwanvu tɔn lɛ.—Mat. 6:9, 10.

8. Etɛ kpɔ́ndéwú Elíi tɔn ka kplɔ́n mǐ dó ɖɛ wu?

⁸ Kpɔ́ndéwú Elíi tɔn kplɔ́n nǔ gègě mǐ dó ɖɛ wu. Jlǒ Mawu tɔn ni dó nyí wiwa wɛ nyí nǔ e mya nukún nú Elíi hú nǔ bǐ é. Enyi mǐ ɖò ɖɛ xò wɛ ɔ, mǐ ɖó na flín ɖɔ: “Mǐ byɔ nǔ ɖebǔ nú é sɔgbe xá jlǒ [Mawu] tɔn ɔ, é nɔ ɖótó mǐ.” (1 Jaan 5:14) Hǔn, é ɖò wɛn ɖɔ mǐ ɖó na tuùn nǔ e nɔ jló Mawu é bo na mɔ tɛn dó xoɖɛ sɔgbe kpo jlǒ enɛ kpo; enɛ byɔ ɖɔ mǐ ɖó na kplɔ́n Biblu gbè bǐ gbè. É lɛ́ ɖò gaàn ɖɔ Elíi lɛ́ ba ɖɔ akú ɔ ni nɔte, ɖó wuvɛ̌ e mɔ wɛ mɛ tɔn lɛ ɖè é wu. Ee é mɔ nùjiwǔ e Jehovah bló gbè nɛ gbè lɛ é ɔ, é ɖó kúdónúmɛ sín ayixa. Mɔ̌ ɖokpo ɔ, mǐ lɔ jló na xlɛ́ ɖɔ mǐ ɖó kúdónúmɛ sín ayixa, bɔ ganjininɔ mɛ ɖevo lɛ tɔn nɔ ɖu ayi mɛ nú mǐ.—Xà 2 Kɔlɛntinu lɛ 1:11; Filipunu lɛ 4:6.

É Ðeji Bo Lɛ́ Ðò Acéjí

9. Etɛ Elíi ka ɖɔ nú mɛsɛntɔ́ tɔn ɖɔ é ni wà? Nǔ wè tɛ é ka wà bɔ mǐ na ɖɔ xó d’eji?

⁹ Elíi ganjɛwu ɖɔ Jehovah na ɖó akú ɔ te, amɔ̌, é tuùn hwenu e é na wà mɔ̌ dó é ǎ. Etɛ gbeyiɖɔ ɔ ka wà ɖò avla enɛ e mɛ é ɖò te kpɔ́n Mawu é lo? Ðǒ ayi nǔ e tan ɔ ɖɔ é wu, é ɖɔ: “[Elíi] ɖɔ nú mɛsɛntɔ́ tɔn ɖɔ: ‘Xá só ɔ jí bo kpɔ́n xuwa jí.’ Bɔ mɛsɛntɔ́ ɔ xá só ɔ jí, bo kpɔ́n xuwa jí, lobo ɖɔ: ‘Un mɔ nǔ ɖebǔ ǎ.’ Elíi ɖɔ n’i azɔn tɛnwe ɖɔ ni lɛkɔ yì kpɔ́n xuwa jí.” (1 Axɔ. 18:43) É hwe bǐ ɔ, kpɔ́ndéwú Elíi tɔn kplɔ́n nǔ wè mǐ. Nukɔntɔn ɔ, é ɖeji dó Jehovah wu. Wegɔ ɔ, é ɖò acéjí.

10, 11. (a) Ali tɛ nu Elíi ka xlɛ́ ɖɔ emi ɖeji dó akpá Jehovah tɔn wu ɖè? (b) Etɛwu mǐ lɔ ka sixu ɖó jiɖiɖe mɔhun?

¹⁰ Ðó Elíi ɖeji dó akpá e Jehovah dó é wu wutu ɔ, akpàkpà nɔ ɖò sísɔ́ ɛ wɛ bɔ é nɔ ɖò nǔ ɖebǔ e na xlɛ́ ɖɔ Jehovah na bló bɔ jǐ na ja malin malin mɛ é ba wɛ. É sɛ́ mɛsɛntɔ́ tɔn dó fí e lɛ́ yì aga hú mɔ̌ ɖò só ɔ jí é bonu é ni kpɔ́n sɛ́dó ɖɔ nùɖé xlɛ́ ɖɔ jǐ ɖò na ja wɛ à jí. Ee mɛsɛntɔ́ ɔ lɛkɔ wá é ɔ, é ɖó gbè n’i wǔɖeewǔɖee ɖɔ: “Un mɔ nǔ ɖebǔ ǎ.” É ɖò gaàn ɖɔ akpɔ́kpɔ́ ɖebǔ kún ɖò jinukúnsin ó, bɔ fí bǐ ɖò séé. É ɖò mɔ̌ có, Elíi ɖɔ nú Axɔsu Axabu ɖɔ: “Jǐ ɖò nǔ wà wɛ.” Eɖíe akpɔ́kpɔ́ ɖě ma ka ɖò jinukúnsin ǎ é, bɔ nɛ̌ ka gbɔn bɔ gbeyiɖɔ ɔ ɖɔ mɔ̌?

¹¹ Elíi tuùn akpá e Jehovah dó é. Ðó é nyí gbeyiɖɔ Jehovah tɔn bo lɛ́ nyí afɔsɔ́ɖótetɔ́ tɔn wutu ɔ, é ɖeji ɖɔ é na ɖè akpá tɔn. Elíi ɖeji sɔmɔ̌ bɔ é cí n’i ɖɔ jǐ ɔ ko ɖò nǔ wà wɛ ɖɔhun. Enɛ sixu flín xó e Biblu ɖɔ dó Mɔyizi wu é mǐ, é ɖɔ: “É kpan akɔ́n, ɖi é ɖò éyɛ Mawu e è ma nɔ mɔ ǎ é mɔ wɛ ɖɔhun.” É ɖò mɔ̌ nú hwi lɔmɔ̌ à? Mawu nɔ na hwɛjijɔ e wu mǐ na ɖó nùɖiɖi mɔhun n’i bo ɖeji dó akpá tɔn wu lɛ é gègě mǐ.—Ebl. 11:1, 27.

12. Nɛ̌ Elíi ka xlɛ́ ɖɔ emi ɖò acéjí gbɔn? Nɛ̌ é ka wà nǔ gbɔn hwenu e é sè ɖɔ è mɔ akpɔ́kpɔ́ kpɛví ɖé é?

¹² Ðǒ ayi lee Elíi nɔ acéjí gbɔn é wu lo. Azɔn tɛnwe wɛ é sɛ́ mɛsɛntɔ́ tɔn dó, é nyí azɔn ɖokpo alǒ azɔn wè kpowun ǎ! Kpɔ́n lee azɔ̌ wà bo lɛ́ wà enɛ na ko cikɔ nú mɛsɛntɔ́ ɔ sɔ́ é! Amɔ̌, nǔ ko cikɔ nú Elíi ǎ, é kpó ɖò xlɛ̌ ɖé ba wɛ nukún myamya. Ee mɛsɛntɔ́ ɔ lɛkɔ wá azɔn tɛnwegɔ ɔ é ɔ, é ɖó gbè n’i ɖɔ: “Un mɔ akpɔ́kpɔ́ kpɛví ɖé site sín xù ɔ jí, bo sɔ́ gbló hú alɔkpákpá mɛ gbɛtɔ́ tɔn ǎ.” Lin tamɛ kpɔ́n dó lee mɛsɛntɔ́ ɔ tɛ́ alɔkpákpá tɔn, bo ɖò akpɔ́kpɔ́ kpɛví e site ɖò Mɛditɛlanɛ́ɛ Xù ɔ jí é jlɛ́ wɛ gbɔn é wu. Mɛsɛntɔ́ ɔ sixu ko lin ɖɔ akpɔ́kpɔ́ kpɛví enɛ kún hwɛ́n nùɖé ó. Amɔ̌, nǔ ɖaxó tawun wɛ é nyí nú Elíi. Enɛ wu ɔ, é ɖɔ nú mɛsɛntɔ́ tɔn tlolo ɖɔ: “Yì ɖɔ nú [Axabu] ɖɔ é ni sɔ́ kɛkɛví tɔn sín dó sɔ́ tɔn lɛ wu, bo yawu yì, bonu jǐ ni ma gbò é dó ó.”—1 Axɔ. 18:44.

13, 14. (a) Nɛ̌ mǐ ka sixu xwedó kpɔ́ndéwú Elíi tɔn bo nɔ acéjí gbɔn? (b) Hwɛjijɔ tɛ lɛ mǐ ka ɖó bo na ván kàn dó sinsɛnzɔ́ mǐtɔn wu?

¹³ Kpɔ́ndéwú ɖagbe nɛ Elíi ko lɛ́ sɔ́ ɖ’ayǐ nú mǐ nɛ. Hwenu e Mawu na ɖè akpá e é dó lɛ é ɖò malin malin mɛ é wɛ mǐ lɔmɔ̌ ɖè. Elíi nɔte kpɔ́n akúɖíɖó ɔ sín vivɔnu, Mawu sɛntɔ́ égbé tɔn lɛ lɔ ka ɖò te kpɔ́n vivɔnu gbɛ̀ nyanya elɔ tɔn. (1 Jaan 2:17) Mǐ ɖó na ɖò acéjí hwebǐnu Elíi ɖɔhun, kaka jɛ hwenu e Jehovah Mawu na vɔ gbɛ̀ ɔ dó é. Jezu ɖɔ nú ahwanvu tɔn lɛ ɖɔ: “Hǔn mi bo nɔ acéjí, ɖó mi tuùn azǎn e gbè Aklunɔ mitɔn na lɛkɔ wá dó é ǎ.” (Mat. 24:42) Ðiɖɔ wɛ Jezu ɖè ɖɔ ahwanvu emitɔn lɛ na ɖò vi mɛ bɔ gbɛ̀ vivɔ ɔ na wá fyán ye à? Eǒ, ɖó é tinmɛ nǔ ɖěɖee na ɖò jijɛ wɛ hwenu e gbɛ̀ vivɔ ɔ na sɛkpɔ é. Mǐ mɛ bǐ sixu ɖó ayi wu ɖɔ nǔ ɖěɖee na ɖexlɛ́ ɖɔ ‘gbɛ̀ elɔ ɖò na vɔ wɛ’ lɛ é ko ɖò jijɛ wɛ.—Xà Matie 24:3-7.

¹⁴ Akpáxwé xlɛ̌ ɔ tɔn lɛ ɖokpo ɖokpo na kúnnuɖenú e wu mǐ na ɖeji dó bǐ mlɛ́mlɛ́ lɛ é mǐ. Kúnnuɖenú mɔhun lɛ ko kpé bo na sísɛ́ mǐ bɔ mǐ na ván kàn dó sinsɛnzɔ́ Jehovah tɔn wu wɛ à? Akpɔ́kpɔ́ kpɛví ɖé kpowun jɛn wá aga bɔ Elíi kudeji ɖɔ Jehovah na bló bɔ jǐ na ja. Jehovah ka flú gbeyiɖɔ gbejinɔtɔ́ enɛ wɛ à?

Jehovah Sú Hudo Yetɔn lɛ Sín Dò Bo Hɛn Nyɔna lɛ Wá

15, 16. Nǔ tɛ lɛ ka jɛ ɖebɔdoɖewu? Etɛ Elíi ka sixu ko ɖó nukún ɖɔ Axabu na wà?

¹⁵ Tan ɔ ɖɔ nú mǐ ɖɔ: “Zaanɖé kpowun ɔ, akpɔ́kpɔ́ kpé jinukúnsin bǐ, bɔ ablu dó, bɔ jɔhɔn jɛ nyìnyì jí, bɔ jǐ ɖaxó ɖé bɛ́, bo ja ɖesu, bɔ [Axabu] xá kɛkɛví tɔn jí, bo ɖido Izleyɛli.” (1 Axɔ. 18:45) Bléblé jɛn nǔ lɛ jɛ jijɛ jí. Hwenu e mɛsɛntɔ́ Elíi tɔn ɖò wɛn gbeyiɖɔ ɔ tɔn dó Axabu wɛ é ɔ, akpɔ́kpɔ́ kpɛví enɛ sukpɔ́, bo gbakpé jinukúnsin bǐ bɔ ablu dó. Jɔhɔn ɖaxó ɖé bɛ́. Xwè atɔn adaɖé gudo ɔ, jǐ wá ja dó ayikúngban Izlayɛli tɔn jí lo. Ayikúngban e xú bo ɖò kláklá é nu sìn bǐ kpɛ́ncɛ́n kpɛ́ncɛ́n. Ee jǐ ɔ ɖò jija wɛ magbokɔ é ɔ, tɔsisa Kicɔni tɔn ɔ gɔ́, bo kplɔ́ hunnɔ Baalu tɔn e è hu lɛ é sín hun yì. Ali hun nú Izlayɛli-ví tótlitɔ́ gǔfɔntɔ́ lɛ bonu ye na sú kún dó nú Baalu sinsɛn bonu Jehovah na sɔ́ hwɛ kɛ ye.

¹⁶ É ɖò gaàn ɖɔ nǔ e ɖó nukún wɛ Elíi ɖè é nɛ! É sixu ko ɖò nǔ e Axabu na wà dìn e é mɔ nùjiwǔ enɛ lɛ e ɖò jijɛ wɛ lɛ é kanbyɔ éɖée wɛ. Hwɛ Axabu tɔn lɛ ka vɛ́ n’i bɔ é lɛkɔ sín Baalu sinsɛn gudo vlafo à? Hwɛjijɔ e wu é ɖó na huzu jujɔ é gègě tɔ́n ɖò nǔ e jɛ gbè nɛ gbè lɛ é mɛ. Nugbǒ wɛ ɖɔ mǐ sixu tuùn nǔ e lin wɛ Axabu ɖè hwenɛnu é ǎ. Tan ɔ ɖɔ nú mǐ kpowun ɖɔ axɔsu ɔ “xá kɛkɛví tɔn jí, bo ɖido Izleyɛli.” Nǔ e jɛ lɛ é ka kplɔ́n nùɖé é à? É ka ɖò gbesisɔmɛ bo na ɖyɔ gbɛzinzan tɔn à? Nǔ e wá jɛ lɛ é xlɛ́ ɖɔ é kún wà mɔ̌ ó. Amɔ̌, azɔ̌ kpó ɖò te nú Axabu bo lɛ́ kpó ɖò te nú Elíi lɔmɔ̌ ɖò azǎn ɖokpo enɛ jí.

17, 18. (a) Nùjiwǔ tɛ ka jɛ hwenu e Elíi wlí Izleyɛli sín ali é? (b) Etɛ ka jiwǔ ɖò wezun e Elíi kán sín Kaamɛli yì Izleyɛli é mɛ? (Lɛ̌ kpɔ́n tinmɛ e ɖò dò é.)

¹⁷ Gbeyiɖɔ Jehovah tɔn lɔ wlí ali ɖokpo e Axabu mlɛ́ é bo ɖido. Ali ɔ ɖi ga, bɔ jǐ ɖò jija wɛ lobɔ akpɔ́kpɔ́ ɔ zɔ́n bɔ ablu lɛ́ dó. Amɔ̌, nùjiwǔ ɖé wá jɛ.

¹⁸ “Mawu Mavɔmavɔ nɔ kpɔ́ xá Elíi, bɔ é sìn gǒjiblanú tɔn, bo kanwezun ɖò [Axabu] nukɔn kaka yì Izleyɛli.” (1 Axɔ. 18:46) É ɖò gaàn ɖɔ “Mawu Mavɔmavɔ nɔ kpɔ́ xá Elíi” gbɔn alɔkpa ɖé bɔ é jiwǔ. Kilomɛtlu 30 wɛ Izleyɛli ɖó dó finɛ, bɔ Elíi ka sɔ́ nyí yɔkpɔvu ǎ.a Kpɔ́n Elíi, é wló awu tɔn gaga ɔ bo sín dó alin bo na mɔ tɛn dó kanwezun, enɛ gudo ɔ, é ɖò wezun kán wɛ ɖò ali enɛ jí ɖò jǐ ɔ mɛ; é ɖò wezun ɔ jí kaka bo xwedó kɛkɛví axɔsu ɔ tɔn wu lobo dín zɛ wutu tɔn!

19. (a) Akpá tɛ lɛ hlɔnhlɔn kpo nǔwukpikpé e Mawu na Elíi é kpo ka sixu flín mǐ? (b) Hwenu e Elíi ɖò wezun jí xwè Izleyɛli é ɔ, etɛ é ka tuùn ganji?

¹⁹ Nyɔna ɖaxó ɖé wɛ enɛ ɖó na ko nyí nú Elíi! É wá mɔ hlɔnhlɔn aditi, wá ɖó nǔwukpikpé ɖaxó, lobo dɛ ɖò wezun ɔ nu; vlafo nǔ tlɛ ko nyí mɔ̌ n’i kpɔ́n sín hwenu e é winnya é ǎ; nǔ enɛ ɖó na ko víví n’i tawun. Enɛ sixu flín akpá ɖěɖee Mawu dó bo ɖɔ dandan ɔ, gbejinɔtɔ́ lɛ na ɖò jogunjogun bɔ agbɔ̌n na ɖò ye wǔ ɖò Palaɖisi mɛ ɖò ayikúngban jí é mǐ. (Xà Ezayíi 35:6.) Hwenu e Elíi ɖò wezun kán gbɔn jǐ tó enɛ gbè wɛ é ɔ, é tuùn ganji ɖɔ nǔ emitɔn nyɔ́ Tɔ́ emitɔn jixwé tɔn Jehovah e nyí Mawu nugbǒ ɖokpo ɔ é nukúnmɛ!

20. Nɛ̌ mǐ ka sixu mɔ nyɔna Jehovah tɔn lɛ gbɔn?

²⁰ Akpàkpà ɖò Jehovah sɔ́ wɛ bonu é na dó nú mǐ. Nyɔna tɔn lɛ xɔ akwɛ; enɛ wu ɔ, mi nú mǐ ni wà nǔ e wu mǐ kpé lɛ é bǐ bo na dó mɔ nyɔna enɛ lɛ. Mǐ ɖó na ɖò acéjí bo na ɖò ayi ɖó wuntun e ɖò xlɛ́xlɛ́ wɛ ɖɔ é na vɔ gbɛ̀ ɔ ɖò malin malin mɛ dìn é wu wɛ Elíi ɖɔhun. Mǐ ɖó hwɛjijɔ lɛ bǐ Elíi ɖɔhun bo na ɖeji bǐ mlɛ́mlɛ́ dó akpá e Jehovah “Mawu gbejinɔtɔ́” ɔ dó lɛ é wu.—Ðɛh. 31:6.