Tasuna

1, 2. Etɛwu é ka nyí nǔ taji ɖɔ mǐ ni tɛnkpɔn bo ɖó nùɖiɖi dìn? Jlɛ̌ dó nùɖé wu.

NÙÐIÐI. Jujɔ taji ɖokpo wɛ. Amɔ̌, enyi mǐ ɖò nùɖiɖi xó ɖɔ wɛ ɔ, mǐ ɖó na lɛ́ lin tamɛ kpɔ́n dó xókwin ɖevo jí, é wɛ nyí: “Dandan!” Ðó enyi mǐ ma ɖó nùɖiɖi ǎ ɔ, é ɖò dandan ɖɔ mǐ ni tɛnkpɔn bo ɖó. Enyi mǐ ka ko ɖó wɛ ɔ, é lɛ́ ɖò dandan ɖɔ mǐ ni nɔ nya xɛ ɖ’eji bo nɔ na ɛ nùɖuɖu. Etɛwu?

² Mǐ ni ɖɔ ɖɔ a ɖò yiyi wɛ ɖò gbetótló ɖaxó ɖé mɛ, bo ɖó hudo sìn tɔn tawun. Enyi a yì mɔ kpɛɖé ɔ, a ɖó na nya xɛ ɖ’eji bonu hwesivɔ ma xwí ó. Enɛ gudo ɔ, a ɖó na lɛ́ ba gɔ́ na, bonu é na kpé bo na hɛn we kaka yì fí e a xwè é. Égbé ɔ, mǐ ɖò gbɛ̀ e cí gbetótló ɖɔhun é ɖé mɛ ɖò gbigbɔ sín akpáxwé. É sín enɛ wu ɔ, é nɔ yá bonu è nɔ mɔ nùɖiɖi adodwé e cí sìn enɛ ɖɔhun é ǎ, lobɔ kpɛ e ka tíìn é nɔ lɛ́ yawu ɖekpo, afi nú è nya xɛ ɖ’eji bo na ɛ nùɖuɖu. Nùɖiɖi sín hudo ɔ mya nukún dìn tawun, ɖó ɖi lee mǐ ma sixu nɔ gbɛ̀ sìn mɛvo ǎ é ɔ, mɔ̌ jɛn nùɖiɖi mɛvo ɔ, mǐ na kú ɖò gbigbɔ sín akpáxwé é nɛ.—Hlɔ. 1:17.

3. Etɛ Jehovah ka ko na mǐ b’ɛ na d’alɔ mǐ bɔ mǐ na sɔnǔ nú nùɖiɖi? Nǔ wè tɛ lɛ mǐ ka ɖó na flín bo wà?

³ Jehovah tuùn lee mǐ ɖó hudo nùɖiɖi tɔn égbé dìn sɔ é, bo lɛ́ tuùn lee é vɛwǔ bɔ è na sɔnǔ nú nùɖiɖi bo nya xɛ ɖ’eji gbɔn é. Enɛ wu wɛ é na mǐ xlɛ̌ lɛ bɔ mǐ na xwedó. Jehovah sɔ́ dó ayi mɛ nú mɛsɛ́dó Pɔlu bɔ é wlan ɖɔ: “Xwedó xlɛ̌ mɛ e ɖi nǔ bo ɖó sɔxwixwe, bo nɔ mɔ nǔ e sín akpá Mawu dó ɔ yí, ɖó enɛ wu lɛ é tɔn.” (Ebl. 6:12) Enɛ wu wɛ tutoblonunu Jehovah tɔn lɔ dó wusyɛn lanmɛ nú mǐ ɖɔ mǐ ni dó gǎn, bo ɖi nǔ sunnu kpo nyɔnu kpo gbejinɔtɔ́ lɛ ɖɔhun, ɖi mɛ ɖěɖee xó mǐ ɖɔ wá yì lɛ é. É ɖò mɔ̌ có, etɛ mǐ ka ɖó na wà dìn? Mi nú mǐ ni flín nǔ wè elɔ lɛ: (1) Mǐ ɖó na bló bɔ nùɖiɖi mǐtɔn na ɖò dǒ li wɛ; (2) mǐ ɖó na hɛn nukúnɖiɖo mǐtɔn d’ayi mɛ ganji.

4. Nɛ̌ Satáan ka xlɛ́ ɖɔ emi nyí kɛntɔ́ nùɖiɖi tɔn gbɔn? Amɔ̌, etɛwu mǐ ma ka ɖó na ɖi xɛsi ǎ?

⁴ Blǒ bonu nùɖiɖi towe ni ɖò dǒ li wɛ. Nùɖiɖi ɖó kɛntɔ́ ɖaxó ɖokpo, é wɛ nyí Satáan. Gǎn gbɛ̀ elɔ tɔn bló bɔ xɛ nyinya ɖò nùɖiɖi mɛtɔn jí nɔ vɛwǔ. É ɖ’agbɔ̌n hú mǐ tawun. Mǐ ka ɖó na ɖi xɛsi ɖɔ mǐ kún sixu tɛnkpɔn bo ɖó nùɖiɖi, bo lɛ́ bló bonu é lidǒ ó wɛ à? Gbeɖé kpɔ́n! Ðó Jehovah nyí Xɔ́ntɔn vívɛ́ mɛ ɖěɖee ba na ɖó nùɖiɖi adodwé lɛ é bǐ tɔn. É na mǐ ganjɛwu ɖɔ enyi emi ɖò alɔ dó mǐ wɛ ɔ, mǐ hɛn ɔ, mǐ na huzu nukúnmɛ dó Awovi jí, bo tlɛ na bló bɔ é na hɔn yì zɔ nú mǐ! (Ja. 4:7) Enyi mǐ nɔ zán hwenu dó hɛn nùɖiɖi mǐtɔn lidǒ gbè bǐ gbè ɔ, nukúnmɛ huzu dó jǐ tɔn wɛ mǐ ɖè nɛ. Nɛ̌ mǐ ka sixu wà enɛ gbɔn?

5. Tinmɛ lee sunnu kpo nyɔnu kpo gbejinɔtɔ́ e xó Biblu ɖɔ lɛ é wà gbɔn bo ɖó nùɖiɖi é.

⁵ Lee mǐ ko mɔ gbɔn é ɔ, sunnu kpo nyɔnu kpo e ɖó nùɖiɖi bɔ Biblu xlɛ́ lɛ é jɔ kpo é kpo ǎ. Gbɛzinzan yetɔn xlɛ́ ɖɔ gbigbɔ mímɛ́ Jehovah tɔn sín sínsɛ́n wɛ nyí nùɖiɖi. (Ga. 5:22, 23) Ye xoɖɛ bo byɔ alɔdo, bɔ Jehovah sè ɖɛ yetɔn bo bló bɔ nùɖiɖi yetɔn nɔ ɖò dǒ li wɛ. Mǐ ni bo xwedó kpɔ́ndéwú yetɔn, bo nɔ flín hwebǐnu ɖɔ Jehovah nɔ hun alɔ dó na gbigbɔ mímɛ́ tɔn mɛ ɖěɖee xoɖɛ bo byɔ bo ka nɔ wà nǔ sɔgbe xá ɖɛ yetɔn lɛ é. (Luk. 11:13) É ka lɛ́ kpò nǔ ɖevo lɛ bɔ mǐ sixu wà wɛ à?

6. Nɛ̌ mǐ ka sixu ɖu tan Biblu tɔn lɛ kpinkplɔn sín lè hugǎn gbɔn?

⁶ Mɛ ɖěɖee ɖó nùɖiɖi bɔ nùɖiɖi yetɔn jiwǔ lɛ é kpɛɖé sín xó jɛn mǐ ɖɔ ɖò wema elɔ mɛ. É lɛ́ kpò mɛ gègě ɖevo lɛ! (Xà Eblée lɛ 11:32.) Nǔ gègě wɛ mǐ hɛn ɔ, mǐ na kplɔ́n dó mɛ enɛ lɛ ɖokpo ɖokpo wu. Enyi mǐ nɔ xà nùɖitɔ́ enɛ lɛ sín tan wá yì kplala kpowun ɔ, nùɖiɖi mǐtɔn sixu lidǒ ganji ǎ. Enyi mǐ na ɖu nǔ e xà wɛ mǐ ɖè é sín lè ganji ɔ, mǐ ɖó na zán hwenu dó kije xó ɖěɖee lɛlɛ̌ dó tan ɔ é. Enyi mǐ nɔ flín hwebǐnu ɖɔ sunnu kpo nyɔnu kpo hwɛhutɔ́ enɛ lɛ ɔ, “gbɛtɔ́ wɛ [ye] nyí mǐ ɖɔhun” ɔ, kpɔ́ndéwú yetɔn na wá huzu nùjɔnǔ nú mǐ hú ɖ’ayǐ tɔn. (Ja. 5:17) Mǐ sixu sɔ́ mǐɖée ɖó tɛn yetɔn mɛ, bo kpɔ́n lee ye wà nǔ gbɛn hwenu e ye mɔ wuvɛ̌ kpo tagba mǐtɔn ɖɔhun lɛ kpo é.

7-9. (a) Enyi ali hun nú sunnu kpo nyɔnu kpo nùɖitɔ́ e xó Biblu ɖɔ lɛ é bonu ye na sɛ̀n Jehovah lee mǐ ɖ’ewu gbɔn ɖò égbé é ɔ, nɛ̌ ye ka sixu wà nǔ gbɔn? (b) Etɛwu mǐ ka ɖó na hɛn nùɖiɖi mǐtɔn lidǒ gbɔn nǔwiwa mǐtɔn lɛ gblamɛ?

⁷ Mǐ nɔ lɛ́ hɛn nùɖiɖi mǐtɔn lidǒ gbɔn nǔwiwa mǐtɔn lɛ gblamɛ. Ðó, “nùɖiɖi e ma nɔ ɖè éɖée xlɛ́ gbɔn nǔwiwa lɛ mɛ ǎ ɔ nyí nǔ kúkú.” (Ja. 2:26) Enyi è sɔ́ azɔ̌ e Jehovah zɔ́n mǐ égbé é d’alɔ mɛ nú sunnu kpo nyɔnu kpo ɖěɖee sín xó mǐ ɖɔ wá yì lɛ é ɔ, kpɔ́n lee xomɛ na hun ye sɔ́ é!

⁸ Ði kpɔ́ndéwú ɖé ɔ, enyi è ɖɔ nú Ablaxamu ɖɔ é ni sɛ̀n Jehovah ɖò tutoblonunu e mɛ Mawu sɛntɔ́ hàtɔ́ tɔn lɛ ɖè é, ɖò Kpléxɔ Axɔsuɖuto ɔ Tɔn ɖagbeɖagbe lɛ mɛ kpo kpléɖókpɔ́ ɖaxó lɛ kpo jí, fí e è nɔ tinmɛ akpá ɖěɖee é mɔ ɖɔ ‘ye na jɛ’ lɛ é hlɛ́nhlɛ́n ɖè é, bɔ é ma na nyí ɖò vɔsakpe ɖěɖee è sɔ́ awinnya dó bló ɖò gbetótló mɛ é jí ǎ ɔ, nɛ̌ é ka na ko wà nǔ gbɔn? (Xà Eblée lɛ 11:13.) Enyi è ɖɔ nú Elíi ɖɔ é ni zɔn fɛɛ mɛ bo yì dó wɛn gbɔdónúmɛ kpo nukúnɖiɖo kpo tɔn togun ɔ, b’ɛ ma na nyí ɖɔ hunnɔ Baalu tɔn lɛ wɛ é na hu bo na dó gǎn bo sɛ̀n Jehovah ɖò axɔsu gǔfɔndómawujitɔ́ ɖé sín acɛkpikpa glɔ ǎ ɔ, nɛ̌ é ka na ko wà nǔ gbɔn? É ɖò wɛn ɖɔ blewun wɛ sunnu kpo nyɔnu kpo nùɖitɔ́ e xó Biblu ɖɔ lɛ é na yí gbè bo na sɛ̀n Jehovah lee mǐ ɖ’ewu gbɔn égbé é.

⁹ Enɛ wu ɔ, mǐ ni kpó ɖò nùɖiɖi mǐtɔn lɛ hɛn lidǒ wɛ gbɔn nǔwiwa mǐtɔn lɛ gblamɛ. Enyi mǐ ɖò mɔ̌ wà wɛ ɔ, sunnu kpo nyɔnu kpo nùɖitɔ́ e xó Mawuxówema ɔ ɖɔ lɛ é sín kpɔ́ndéwú xwedó wɛ mǐ ɖè nɛ. Lee mǐ ko ɖɔ gbɔn ɖò Xónusɔ́ɖóte ɔ mɛ é ɔ, mǐ na wá mɔ ɖɔ mǐ tuùn ye ganji xɔ́ntɔn xɔ́ntɔn lɛ ɖɔhun. Amɔ̌, mǐ kpo ye kpo na nɔ kpɔ́ sɔgudo bɔ ye na nyí xɔ́ntɔn jɔ xɔ́ntɔn mǐtɔn lɛ.

10. Awǎjijɛ nahun mǐ ka na ɖó ɖò Palaɖisi mɛ?

¹⁰ Hɛn nukúnɖiɖo towe d’ayi mɛ ganji. Sunnu kpo nyɔnu kpo gbejinɔtɔ́ lɛ nɔ mɔ hlɔnhlɔn hwebǐnu ɖó nukúnɖiɖo e Mawu na ye é wu. Hwɛ ka lo? Ði kpɔ́ndéwú ɔ, hwenu e “Mawu na wá fɔ́n mɛ ɖagbe lɛ” bɔ a na nɔ kpɔ́ xá gbejinɔtɔ́ e xó mǐ ɖɔ lɛ é ɔ, kpɔ́n lee awǎjijɛ na tíìn sɔ́ é! (Xà Mɛsɛ́dó 24:15.) Nǔ ɖětɛ lɛ mɔ̌ a ka jló na kanbyɔ ye?

11, 12. Ðò gbɛ̀ yɔyɔ̌ ɔ mɛ ɔ, etɛ a ka sixu kanbyɔ (a) Abɛli? (b) Nɔwée? (c) Ablaxamu? (d) Hwliti? (ɖ) Abigayilu? (e) Ɛsitɛ́ɛ?

¹¹ Hwenu e a na mɔ Abɛli é ɔ, akpàkpà ka na sɔ́ we bɔ a na kàn lee mɛjitɔ́ tɔn lɛ cí é byɔ ɛ wɛ à? Alǒ a sixu kàn nǔ elɔ lɛ byɔ: “A ka ɖɔ xó nú celubɛ́ɛn e ɖò ali e yì jikpá Edɛni tɔn mɛ é cɔ́ wɛ lɛ é kpɔ́n à? Ye ka yí gbè nú we à?” Etɛ a lin na kanbyɔ Nɔwée? A sixu kàn nǔ elɔ lɛ byɔ: “A ka ɖi xɛsi dó Nɛfilimu lɛ wu kpɔ́n à? Nɛ̌ a ka kpé nukún dó kanlin enɛ lɛ bǐ wu ɖò xwè enɛ mɛ ɖò tɔjihun ɔ mɛ gbɔn?” Enyi a mɔ Ablaxamu ɔ, a sixu kàn nǔ elɔ lɛ byɔ ɛ: “A ka mɔ Sɛmu kpɔ́n à? Mɛ̌ ka kplɔ́n nǔ we dó Jehovah wu? Wúu tíntɔ́n sín ka fá à?”

¹² Mǐ ni bo ɖɔ xó dó nǔ e a sixu ba na kanbyɔ nyɔnu gbejinɔtɔ́ e na fɔ́n sín kú lɛ é ɖé lɛ jí lo. “Hwliti, etɛ ka sísɛ́ we bɔ a huzu Jehovah sɛntɔ́?” “Abigayilu, xɛsi ka ɖi we hwenu e a jló na ɖɔ lee a d’alɔ Davidi gbɔn é nú Nabalu wɛ à?” “Ɛsitɛ́ɛ, etɛ ka wá jɛ dó hwi kpo Maadocée kpo wu ɖò tan e mǐ xà ɖò Biblu mɛ é gudo?”

13. (a) Etɛ lɛ mɔ̌ mɛ e na fɔ́n sín kú lɛ é ka sixu kanbyɔ we? (b) Nɛ̌ ali e na hun nú we bɔ a na mɔ sunnu kpo nyɔnu kpo gbejinɔtɔ́ hwexónu tɔn lɛ é ka nɔ cí nú we?

¹³ É ɖò gaàn ɖɔ sunnu kpo nyɔnu kpo gbejinɔtɔ́ enɛ lɛ sixu ɖó nǔ gègě bo na kanbyɔ hwi lɔ. Kpɔ́n lee é na nyí awǎjijɛ sín nǔ nú mǐ sɔ bɔ mǐ na ɖɔ azǎn gudo gudo tɔn lɛ sín xó, kpo lee Jehovah dó nú togun tɔn ɖò hwenu vɛwǔ enɛ lɛ mɛ gbɔn é kpo nú ye é! É ɖò wɛn ɖɔ é na jló ye tawun ɖɔ ye ni mɔ nukúnnú jɛ lee Jehovah ɖè akpá tɔn lɛ bǐ gbɔn é mɛ. Ðò gbɛ̀ yɔyɔ̌ ɔ mɛ ɔ, é sɔ́ na byɔ ɖebǔ ɖɔ mǐ ni lin tamɛ kpɔ́n dó lee Mawu sɛntɔ́ gbejinɔtɔ́ e xó Biblu ɖɔ lɛ é wà nǔ gbɔn é jí ǎ. Mǐ kpo ye kpo na ɖò kpɔ́ ɖò Palaɖisi ɔ mɛ! Enɛ wu ɔ, kpò ɖò nǔ e wu a kpé lɛ é bǐ wà wɛ dìn, bonu ye ni nyí gbɛtɔ́ jɔ gbɛtɔ́ ɖò nukún towe mɛ. Kpò ɖò nǔ ɖi wɛ ye ɖɔhun. Ðò Jehovah sinsɛn sín vivǐ ɖu wɛ ye ɖɔhun bonu ye ni nyí xɔ́ntɔn vívɛ́ towe lɛ kaka sɔyi!