É Hɛn Xomɛ Tɔ́ Tɔn kpo Jehovah kpo Tɔn Hun

A ka mɔ ɖyɔvǐvu e ɖò ɖiɖe ɔ mɛ é à?— Nya e nɔ nyí Jɛfutée é sín vǐ nyɔnu wɛ. Biblu ɖɔ nyikɔ tɔn nú mǐ ǎ, amɔ̌, mǐ tuùn ɖɔ é hɛn xomɛ tɔ́ tɔn kpo Jehovah kpo tɔn hun. Nǔ mǐ ni kplɔ́n nǔ dó é kpo tɔ́ tɔn Jɛfutée kpo wu.

Nya ɖagbe ɖé wɛ nú Jɛfutée, bɔ é nɔ zán hwenu gegě dó kplɔ́n nǔ vǐ nyɔnu tɔn dó Jehovah wu. É lɛ́ ɖó hlɔnhlɔn bo nyí nukɔntɔ́ ɖagbe ɖé. Enɛ wu ɔ, Izlayɛli-ví lɛ ɖɔ n’i ɖɔ é ni nɔ nukɔn nú emi, bonu emi na fun ahwan xá kɛntɔ́ emitɔn lɛ.

Jɛfutée xoɖɛ sɛ́dó Jehovah ɖɔ é ni d’alɔ emi, bonu emi na ɖu ɖò ahwan ɔ jí. É d’akpá nú Jehovah ɖɔ, enyi emi ɖu ɖ’eji ɔ, emi na na ɛ mɛ nukɔntɔn e na tɔ́n sín xwé emitɔn gbè hwenu e emi na lɛkɔ é. Mɛ enɛ na nɔ goxɔ Mawu tɔn mɛ, bo na nɔ w’azɔ ɖò finɛ kaka jɛ hwenu e é na kú é. Fí e mɛ lɛ nɔ sɛn Mawu ɖè é wɛ nyí goxɔ ɔ. Jɛfutée ɖu ɖò ahwan ɔ jí nǔgbo! A ka tuùn mɛ nukɔntɔn e tɔ́n sín xwé tɔn gbè, hwenu e é lɛkɔ wá xwé é à?—

Vǐ nyɔnu Jɛfutée tɔn wɛ! É wɛ nyí vǐ ɖokpo géé e é ɖó é, bɔ dìn ɔ, é ɖó na gosin akpá tɔn. Nǔ enɛ zɔ́n bɔ wǔ kú i tawun. Amɔ̌, flín ɖɔ é ko d’akpá ɖé. Tlolo ɔ, vǐ nyɔnu tɔn ɖɔ: ‘Daa, a ko d’akpá nú Mawu Mavɔmavɔ, enɛ wu ɔ, a ɖó na ɖè.’

Wǔ kú vǐ nyɔnu Jɛfutée tɔn lɔ, ɖó ɖò goxɔ Mawu tɔn ɔ mɛ ɔ, é sixu d’asú bo jì vǐ ǎ. Amɔ̌, é jló tawun bá wà nǔ e sín akpá tɔ́ tɔn dó é, bo na lɛ́ hɛn xomɛ Jehovah tɔn hun. Enɛ xɔ akwɛ ɖò nukún tɔn mɛ hú asúdida alǒ vǐjiji. Enɛ wu ɔ, é gosin xwé tɔn gbè bo yì nɔ goxɔ Mawu tɔn mɛ kaka jɛ hwenu e é kú é.

A ka lin ɖɔ nǔ e é wà é hɛn xomɛ tɔ́ tɔn kpo Jehovah kpo tɔn hun à?— Ɛɛn, é hɛn xomɛ yetɔn hun. Enyi a sè tónú, bo yí wǎn nú Jehovah ɔ, a sixu cí vǐ nyɔnu Jɛfutée tɔn ɖɔhun. Hwi lɔ na hɛn xomɛ hun mɛjitɔ́ towe lɛ kpo Jehovah kpo tawun.