Jelemíi Ðó Xó Jehovah Tɔn Ðiɖɔ Te Ǎ

Hweɖelɛnu ɔ, mɛ lɛ nɔ ɖɔ slamɛ mǐ wu, alǒ nɔ sin xomɛ dó mǐ hwenu e mǐ ɖò xó Jehovah tɔn ɖɔ nú ye wɛ é. Enɛ sixu zɔ́n, bɔ mǐ na jló na ɖó xó Mawu tɔn ɖiɖɔ te. Nǔ mɔhun ko wà we kpɔ́n à?— Dɔnkpɛvu ɖokpo yí wǎn nú Jehovah, bo ka ɖibla ɖó xó tɔn ɖiɖɔ te bɔ Biblu ɖɔ. È nɔ ylɔ́ ɛ ɖɔ Jelemíi. Nǔ mǐ ni kplɔ́n nǔ dó wǔtu tɔn.

Hwenu e Jelemíi ɖò dɔnkpɛvu mɛ é ɔ, Jehovah ɖɔ n’i ɖɔ é ɖó na gb’akpá nú mɛ lɛ ɖɔ ye ni ɖó nǔnyanyawiwa te. Nǔ enɛ vɛwǔ ɖesu nú Jelemíi, bɔ é ɖi xɛsi. É ɖɔ nú Jehovah ɖɔ: ‘Un tuùn nǔ e un na ɖɔ é ǎ. Yɔkpɔvu wɛ ka lɛ́ nú mì.’ Amɔ̌, Jehovah ɖɔ: ‘Ma ɖi xɛsi ó. Un na d’alɔ we.’

Enɛ wu ɔ, Jelemíi jɛ akpá gbá nú mɛ lɛ jí ɖɔ enyi ye ma huzu jijɔ ǎ ɔ, Jehovah na dɔn tó nú ye. A ka lin ɖɔ mɛ lɛ bló nǔ e Jelemíi ɖɔ é à?— Eǒ. Ye ɖɔ slamɛ wǔ tɔn bo lɛ́ sin xomɛ dó è ɖesu. Mɛɖé lɛ tlɛ jló na hu i lɔ! Nɛ̌ a ka lin ɖɔ nǔ na ko cí nú Jelemíi?— É ɖi xɛsi, bo ɖɔ: ‘Un sɔ́ na yì ɖɔ xó Jehovah tɔn ɖě ǎ.’ Amɔ̌, é ka gɔn ɖiɖɔ nǔgbo à?— Eǒ, é gɔn ɖiɖɔ ǎ. É yí wǎn nú Jehovah sɔmɔ̌ bɔ é sixu ɖó xó tɔn ɖiɖɔ te ǎ. Bɔ ɖó Jelemíi gɔn Jehovah xó ɖɔ ǎ wutu ɔ, Jehovah hwlɛn ɛ gán.

Ði kpɔ́ndéwú ɔ, mɛ baɖabaɖa ɖé lɛ nyi Jelemíi dó dotɔ e mɛ babá ɖè é ɖé mɛ gbè ɖokpo. Nǔɖuɖu kpo sin kpo ɖě ɖò finɛ ǎ. Linlin yetɔn wɛ nyí ɖɔ Jelemíi na kú dó finɛ. Amɔ̌, kpo alɔdó Jehovah tɔn kpo ɔ, é gán!

Etɛ kpɔ́ndéwú Jelemíi tɔn ka sixu kplɔ́n we?— É ɖi xɛsi hweɖelɛnu có, é ɖó xó Jehovah tɔn ɖiɖɔ te ǎ. Enyi a ɖò xó Jehovah tɔn ɖɔ wɛ ɔ, mɛ lɛ sixu ɖɔ slamɛ wǔ we, alǒ sin xomɛ dó we. É sixu hu winnya nú we alǒ dó xɛsi we. Amɔ̌, ma gɔn xó Jehovah tɔn ɖɔ gbeɖé ó. É na nɔ d’alɔ we hwebǐnu, lee é d’alɔ Jelemíi gbɔn é.