Gbeyiyi nú Tɛn E Mɛ Klisu Ðè Ðò Tuto Mawu Tɔn Mɛ É

“ÐÒ BǏBƐ̌MƐ ɔ, . . . Mawu ɖó wɛkɛ ɔ,” bɔ nǔ e é bló lɛ é bǐ ɔ, “nǔ ɖagbe wɛ ye nyí tawun.” (Bǐb. 1:1, 31) Jehovah dá gbɛtɔ́ lɛ bo na ye nukúnɖiɖó jiwǔ ɖé dó sɔgudo wu. É ɖò mɔ̌ có, gǔfínfɔ́n Edɛni mɛ tɔn hɛn ninɔmɛ awǎjijɛ tɔn gbɛtɔ́ lɛ tɔn gblé nú táan ɖé. Amɔ̌, linlin e Jehovah ɖó nú ayikúngban ɔ kpo gbɛtɔ́ lɛ kpo é huzu ǎ. Mawu ɖexlɛ́ ɖɔ è na hwlɛn kúnkan Adamu tɔn e na setónú lɛ é gán. È na vɔ́ sinsɛn-biblo mimɛ̌ ɔ ɖ’ayǐ, bɔ Mawu na sú kún dó nú mɛ nyanya ɔ kpo azɔ̌ tɔn lɛ kpo. (Bǐb. 3:15) Nǔ lɛ na lɛ́ vɔ́ wá nyí ‘nǔ ɖagbe tawun.’ Jehovah na wà nǔ enɛ gbɔn Vǐ tɔn Jezu Klisu jí. (1 Jaan 3:8) Enɛ wu ɔ, é ɖò taji tawun ɖɔ mǐ ni tuùn azɔ̌ e nyí Klisu tɔn ɖò tuto Mawu tɔn mɛ é.—Mɛ. 4:12; Fili. 2:9, 11.

AZƆ̌ E NYÍ KLISU TƆN É

² Enyi mǐ lin tamɛ dó azɔ̌ e nyí Klisu tɔn ɖò tuto Mawu tɔn mɛ é jí ɔ, mǐ na mɔ ɖɔ azɔ̌ tɔn kún nyí ɖokpo ó. Jezu nyí Mɛhwlɛngántɔ́ nú gbɛtɔ́ lɛ, nyí Vɔsanúxwlémawutɔ́ Ðaxó, nyí Gǎn nú agun Klisanwun tɔn, bɔ dìn ɔ, é nyí Axɔ́su nú Axɔ́suɖuto Mawu tɔn. Tamɛ linlin dó azɔ̌ enɛ lɛ jí na zɔ́n bɔ tuto Mawu tɔn na sù nukún mǐtɔn mɛ d’eji, bɔ wǎn e mǐ yí nú Jezu Klisu é na lɛ́ syɛn d’eji. Biblu kɛnu dó azɔ̌ vovo e é ɖó é ɖé lɛ wu.

³ Ðò sinsɛnzɔ́ e Klisu wà ɖò ayikúngban jí é hwenu ɔ, é wá ɖò wɛn ɖɔ Jezu jí wɛ gbɛtɔ́ lɛ na gbɔn bo dóhwɛ gbɔ xá Mawu. (Jaan 14:6) Ðó Jezu nyí Mɛhwlɛngántɔ́ nú gbɛtɔ́ lɛ wutu ɔ, é sɔ́ éɖée jó dó xɔ gbɛ̀ nú mɛ gegě. (Mat. 20:28) Enɛ wu ɔ, kpɔ́ndéwú jijɔ Mawu tɔn lɛ tɔn ɖé kpowun wɛ Jezu nyí nú mǐ ǎ. É wɛ nyí mɛ e na bló bɔ linlin Mawu tɔn nú gbɛtɔ́ lɛ na jɛ jlɔ́ é. Éɖokponɔ jí jɛn mǐ sixu gbɔn bɔ nǔ mǐtɔn na nyɔ́ Mawu nukúnmɛ. (Mɛ. 5:31; 2 Kɔ. 5:18, 19) Vɔsisa gbɛxɔnúmɛ tɔn Jezu tɔn kpo fínfɔ́n sín kú tɔn kpo hun ali nú gbɛtɔ́ tónúsétɔ́ lɛ, bɔ ye na ɖu nyɔna mavɔmavɔ lɛ sín vivǐ ɖò Axɔ́suɖuto Mawu tɔn jixwé tɔn ɔ glɔ́.

⁴ Ðó Jezu nyí Vɔsanúxwlémawutɔ́ Ðaxó wutu ɔ, é kpéwú bo na “jiya xá mǐ ɖò gǎnmaɖó mǐtɔn lɛ mɛ,” lobo súnsún hwɛ ahwanvu tɔn ayikúngban jí tɔn lɛ tɔn. Mɛsɛ́dó Pɔlu tinmɛ ɖɔ: “Vɔsanúxwlémawutɔ́ ɖaxó e ma sixu kpéwú bo jiya xá mǐ ɖò gǎnmaɖó mǐtɔn lɛ mɛ ǎ ɔ wɛ mǐ ɖó ǎ. É nyɔ́ wà ɔ, vɔsanúxwlémawutɔ́ ɖaxó mǐtɔn ɔ, è tɛ́n ɛ kpɔ́n mǐ ɖɔhun ɖò nǔ bǐ mɛ; amɔ̌, é hu hwɛ ǎ.” Enɛ gudo ɔ, Pɔlu dó wusyɛn lanmɛ nú mɛ e ɖi nǔ nú Jezu Klisu lɛ é ɖɔ ye ni ɖu lè tuto hwɛdógbɔ xá Mawu tɔn enɛ tɔn bǐ mlɛ́mlɛ́, bo ɖɔ: “Hǔn, mi bo nú mǐ na sɛkpɔ́ axɔ́suzinkpo Mawu tɔn, fí e fɛ́nú ɖè ɔ, kpodo jiɖiɖe kpan; é na sɔ́ hwɛ kɛ mǐ ɖò finɛ. Mǐ na mɔ fɛ́nú ɖò finɛ, bonu é na d’alɔ mǐ ɖò nǔ e hudo mǐ lɛ mɛ, ɖò hwetɔnnu.”—Ebl. 4:14-16; 1 Jaan 2:2.

⁵ Jezu lɛ́vɔ nyí Gǎn nú agun Klisanwun tɔn. Lee ahwanvu tɔn xwè kanweko nukɔntɔn ɔ tɔn lɛ ma ɖó nukɔntɔ́ ɖé ǎ gbɔn é ɔ, mɔ̌ ɖokpo ɔ wɛ mǐ lɔ ma ɖó hudo nukɔntɔ́ ɖé tɔn ɖò égbé ǎ é nɛ. Jezu nɔ na alixlɛ́mɛ lɛ gbɔn gbigbɔ mímɛ́ kpo lɛngbɔ̌nyitɔ́ kpɛví nǔwukpétɔ́ lɛ kpo jí; ye na ɖó gbè nú é kpo Tɔ́ tɔn jixwé tɔn ɔ kpo dó lee ye kpé nukún dó lɛngbɔ̌kpó Mawu tɔn wu gbɔn é wu. (Ebl. 13:17; 1 Pi. 5:2, 3) Gbɔn nǔɖɔɖ’ayǐ gblamɛ ɔ, Jehovah ɖɔ dó Jezu wu ɖɔ: “É nyí acɛkpikpa ce sín kpɔ́ndéwú nú togun lɛ; é wɛ un sɔ́ bɔ é nyí gǎn, bo kpa acɛ nú togun lɛ.” (Eza. 55:4) Jezu ɖexlɛ́ ɖɔ nǔɖɔɖ’ayǐ enɛ jɛnu nǔgbo hwenu e é ɖɔ xó elɔ nú ahwanvu tɔn lɛ é: “Mi ma ka lɔn nú mɛɖé ni ylɔ́ mi ɖɔ: ‘Gǎn’ ó, ɖó Klisu ɖokponɔ géé wɛ nyí Gǎn mitɔn.”—Mat. 23:10.

⁶ Jezu ɖè linlin kpo jlǒ e é ɖó bo na d’alɔ mǐ é kpo xlɛ́ gbɔn gbehwan elɔ gblamɛ: “Mi wá gɔ̌n ce; mi mɛ e agban kpinkpɛn hinhɛn cikɔ na lɛ é bǐ, bonu má na gbɔjɛ mi. Mi yí nǔkplɔnmɛ ce lɛ sè, bonu lindɔ̌n mitɔn lɛ na vo, ɖó mɛfífá wɛ un nyí, bo nyí xomɛnyɔtɔ́. Ðó nǔkplɔnmɛ ce lɛ vɛwǔ ǎ, sù ce lɛ ka vɛ́ nyi ǎ.” (Mat. 11:28-30) Ðó Jezu ɖò nukún kpé dó agun Klisanwun tɔn ɔ wu wɛ kpo xomɛnyínyɔ́ kpo, ɖò ali e nɔ fá kɔ nú mǐ é nu wutu ɔ, é ɖexlɛ́ ɖɔ emi nyí “lɛngbɔ̌nyitɔ́ ɖagbe ɔ,” Tɔ́ tɔn jixwé tɔn Jehovah Mawu ɖɔhun.—Jaan 10:11; Eza. 40:11.

⁷ Ðò wema nukɔntɔn e Pɔlu wlan sɛ́dó Kɔlɛntinu lɛ é mɛ ɔ, é tinmɛ azɔ̌ ɖevo e nyí Jezu Klisu tɔn é ɖò xógbe elɔ lɛ mɛ: “Ðó Klisu ɖó na ɖò axɔ́su ɖu wɛ kaka bɔ Mawu na ɖu ɖò kɛntɔ́ lɛ bǐ jí, bo na bɛ́ ye dó afɔ tɔn lɛ glɔ́. Hwenu e Mawu na hwíhwɛ́ nǔ bǐ dó Klisu glɔ́ ɔ, éɖesu Vǐ ɔ na hwíhwɛ́ éɖée dó Mawu e hwíhwɛ́ nǔ bǐ dó glɔ̌ tɔn ɔ glɔ́; enɛ ɔ, Mawu na nyí nǔ bǐ nú mɛ bǐ.” (1 Kɔ. 15:25, 28) Cobonu Jezu na wá ayikúngban jí ɔ, é w’azɔ̌ xá Mawu “azɔ̌gán” ɖɔhun, bo nyí nǔɖiɖó Mawu tɔn nukɔntɔn ɔ. (Nǔx. 8:22-31) Hwenu e Mawu sɛ́ Jezu dó ayikúngban jí é ɔ, é wà jlǒ Mawu tɔn hwebǐnu. É dɛ ɖò mɛtɛnkpɔn ɖaxó bǐ ɔ nu, lobo nɔ gbeji nú Tɔ́ tɔn kaka yì kú. (Jaan 4:34; 15:10) Ðó Vǐ Mawu tɔn nɔ gbeji n’i kaka yì kú wutu ɔ, é fɔ́n ɛ dó jixwé bo na ɛ acɛ bɔ é huzu Axɔ́su nú Axɔ́suɖuto jixwé tɔn ɔ. (Mɛ. 2:32-36) Gbɔn acɛ enɛ nina Klisu Jezu gblamɛ ɔ, Mawu ɖè azɔ̌ jiwǔ ɖé n’i, b’ɛ na nɔ nǔɖiɖó gbigbɔ tɔn hlɔnhlɔnnɔ liva mɔkpan nu, bɔ ye na ɖè acɛkpikpa gbɛtɔ́ tɔn kpo nǔnyanyawiwa bǐ kpo sín ayikúngban ɔ jí. (Nǔx. 2:21, 22; 2 Tɛ. 1:6-9; Nǔɖe. 19:11-21; 20:1-3) Enɛ gudo ɔ, Axɔ́suɖuto Mawu tɔn jixwé tɔn e ɖò Klisu sín acɛ mɛ é na nyí acɛkpikpa ɖokpo géé e na ɖò ayikúngban ɔ bǐ jí é.—Nǔɖe. 11:15.

NǓ E AZƆ̌ TƆN TUÙNTUÙN NYÍ É

⁸ Mɛ maɖóblɔ̌ ɖé wɛ Jezu Klisu, Kpɔ́ndéwú mǐtɔn ɔ nyí. É wɛ è sɔ́ b’ɛ na kpé nukún dó mǐ wu. Bo na dó ɖu lè acéjí e é ɖè bo nɔ kpé nukún dó mǐ wu kpo wanyiyi kpo é tɔn ɔ, mǐ ɖó na nɔ gbeji nú Jehovah lobo wà nǔ sɔgbe xá tutoblonunu tɔn e ɖò nukɔn yì wɛ é.

⁹ Ahwanvu Jezu tɔn xwè kanweko nukɔntɔn ɔ tɔn lɛ tuùn azɔ̌ e nyí Klisu tɔn ɖò tuto Mawu tɔn mɛ é bǐ mlɛ́mlɛ́. Ye ɖè enɛ xlɛ́ gbɔn bǔninɔ dó w’azɔ̌ ɖò acɛ Klisu tɔn glɔ́ gblamɛ, bo nɔ hwíhwɛ́ yeɖée dó alixlɛ́mɛ e é nɔ na ye gbɔn gbigbɔ mímɛ́ gblamɛ lɛ é glɔ́. (Mɛ. 15:12-21) Mɛsɛ́dó Pɔlu kɛnu dó bǔ e agun Klisanwun yí ami dó ɖè lɛ tɔn ɖè é wu, bo ɖɔ: “Loɔ, mǐ ɖò nǔgbo ɔ jla wɛ kpodo wanyiyi kpo ɔ, mǐ na ɖò nukɔn yì wɛ ɖò nǔ bǐ mɛ, bo na ɖò sisɛkpɔ́ Klisu e nyí ta ɔ wɛ. É wɛ zɔ́n bɔ wǔjɔnú tɛnmɛ tɛnmɛ agbaza tɔn lɛ bǐ ɖò bǔ, bɔ gǒflɛ́mɛ tɛnmɛ tɛnmɛ e ɖò agbaza ɔ wu lɛ hɛn agbaza ɔ ɖó bǔ ganji. Enɛ ɔ, enyi wǔjɔnú lɛ ɖokpo ɖokpo ɖò azɔ̌ tɔn wà wɛ ɔ, agbaza ɔ bǐ nɔ sù, bo nɔ ɖò nukɔn yì wɛ gbɔn wanyiyi mɛ.”—Efɛ. 4:15, 16.

¹⁰ Enyi mɛ e ɖò agun ɔ mɛ lɛ é ɖokpo ɖokpo nɔ w’azɔ̌ xá yeɖée lɛ, bo nɔ nɔ kpɔ́ dó w’azɔ̌ ɖò alixlɛ́mɛ Klisu tɔn glɔ́ ɔ, nukɔnyiyi kpo wanyiyi kpo nɔ tíìn; wanyiyi ɔ ka nɔ ‘dɔn nǔ lɛ bǐ cá, bɔ ye nɔ nɔ bǔ ganji.’—Jaan 10:16; Kolo. 3:14; 1 Kɔ. 12:14-26.

¹¹ Nǔ e ɖò jijɛ wɛ ɖò gbɛ̀ ɔ mɛ bo kúnkplá nǔɖɔɖ’ayǐ Biblu tɔn lɛ é xlɛ́ nyi wɛn ɖɔ sín 1914 wɛ è ko sɔ́ Axɔ́suɖuto ɔ d’alɔ mɛ nú Jezu Klisu. É ɖò acɛ kpa wɛ dìn ɖò kɛntɔ́ tɔn lɛ tɛntin. (Ðɛh. 2:1-12; 110:1, 2) Etɛ ka nyí tinmɛ enɛ tɔn nú mɛ e ɖò gbɛ̀ ɖò ayikúngban jí égbé lɛ é? Zaanɖé dìn ɔ, Jezu na ɖexlɛ́ ɖɔ emi nyí Axɔ́su axɔ́su lɛ tɔn kpo Aklunɔ aklunɔ lɛ tɔn kpo, gbɔn xomɛsin Mawu tɔn ɖiɖexlɛ́ kɛntɔ́ tɔn lɛ gblamɛ. (Nǔɖe. 11:15; 12:10; 19:16) Enɛ gudo ɔ, akpá e Jehovah dó hwenu e gbɛtɔ́ lɛ fɔ́n gǔ tlolo é na jɛnu dó ye mɛ e ɖò ɖisíxwé Klisu tɔn, bɔ è xoɖɛ dó ye jí lɛ é jí. (Mat. 25:34) Nyɔna ɖaxó ɖé wɛ é nyí nú mǐ ɖɔ mǐ tuùn azɔ̌ e nyí Klisu tɔn ɖò tuto Mawu tɔn mɛ é! Mi nú mǐ ni bo nɔ bǔ ɖò sinsɛnzɔ́ e wà wɛ mǐ ɖè gbɔn gbɛ̀ ɔ bǐ mɛ, ɖò alixlɛ́mɛ Klisu tɔn glɔ́, ɖò azǎn gudogudo tɔn elɔ lɛ mɛ é mɛ.