Fí E Mǐ Nɔ Sɛn Mawu Ðè lɛ É

È ÐEGBE nú Jehovah sɛntɔ́ lɛ ɖɔ ye ni nɔ kplé ɖó kpɔ́, bonu è na na alixlɛ́mɛ ye, bɔ ye na nɔ lɛ́ dó wusyɛn lanmɛ nú yeɖée. (Ebl. 10:23-25) È ylɔ́ fí nukɔntɔn e Izlayɛli-ví lɛ, ee nyí togun ɖé bɔ Mawu sɔ́ é nɔ sɛn ɛ ɖè é ɖɔ ‘Mawu xwé, nɔtɛn Jehovah tɔn.’ (Tín. 39:32, 40) Nukɔnmɛ ɔ, Davidi ví Salomɔ́ɔ gbá xwé ɖé, alǒ tɛmpli ɔ nú susu Mawu tɔn. (1 Axɔ́. 9:3) Ee è sú kún dó nú tɛmpli enɛ ɖò 607 J.H.M. tɔn gudo é ɔ, Jwifu lɛ bló tuto bo nɔ kplé ɖò xɔ ɖěɖee è ylɔ́ ɖɔ kplɔ́ngbasá lɛ é mɛ, bo nɔ sɛn Mawu. Nukɔnmɛ ɔ, è wá vɔ́ tɛmpli ɔ gbá, bɔ é lɛ́ wá nyí hɔ̌nkan sinsɛn-biblo nǔgbo ɔ tɔn ɖé. Jezu kplɔ́n nǔ mɛ ɖò kplɔ́ngbasá lɛ kpo tɛmpli ɔ kpo mɛ. (Luk. 4:16; Jaan 18:20) Jezu tlɛ bló kplé ɖé ɖò só ɖé jí.—Mat. 5:1–7:29.

² Ðò kú Jezu tɔn gudo ɔ, Klisanwun lɛ nɔ kplé ɖò fí e ɖò agbawungba lɛ é kpo xwé mɛɖesunɔ tɔn lɛ gbè kpo, bo nɔ kplɔ́n mɛ Mawuxówema ɔ, lobo nɔ lɛ́ ɖu vivǐ gbɛ̌didó xá nǔɖitɔ́ hatɔ́ lɛ tɔn. (Mɛ. 19:8, 9; Hlɔ. 16:3, 5; Kolo. 4:15; File. 2) Hweɖelɛnu ɔ, é nɔ byɔ ɖɔ Klisanwun nukɔntɔn lɛ ni kplé ɖò fí e jɛ zɔ lɛ é, bonu yadonúmɛtɔ́ lɛ ni ma mɔ ye ó. Nǔgbo ɔ, Mawu sɛntɔ́ gbejinɔtɔ́ hwexónu tɔn lɛ ɖó jlǒ ɖaxó, bo na nɔ kplé ɖò nɔtɛn sinsɛn-biblo tɔn lɛ, bonu Jehovah na “kplɔ́n nǔ” ye.—Eza. 54:13.

³ Égbé ɖesu ɔ, è nɔ bló kplé Klisanwun tɔn lɛ ɖò fí e ɖò agbawungba lɛ é kpo xwé mɛɖesunɔ tɔn lɛ gbè kpo. Hwɛhwɛ ɔ, è nɔ bló kplé kúnnuɖegbé tɔn lɛ ɖò xwé mɛɖesunɔ tɔn lɛ gbè. Mɛ ɖěɖee nɔ yí gbè bɔ è nɔ bló kplé enɛ lɛ ɖò xwé yetɔn gbè lɛ é nɔ mɔ enɛ dó mɔ wǔjɔmɛ ɖé. Ye mɛ gegě mɔ ɖɔ mɔ̌ biblo hɛn lè wá nú emi ɖò gbigbɔ lixo.

KPLÉXƆ AXƆ́SUÐUTO Ɔ TƆN

⁴ Fí taji e Kúnnuɖetɔ́ Jehovah tɔn lɛ nɔ bló kplé ɖè é wɛ nyí Kpléxɔ Axɔ́suɖuto ɔ tɔn mɛ. Ðò kpaa mɛ ɔ, è nɔ xɔ ayikúngban bo nɔ gbá Kpléxɔ Axɔ́suɖuto ɔ tɔn yɔyɔ̌ ɖé ɖ’eji, alǒ è nɔ jla xɔ e ko ɖò ayǐ é ɖé ɖó. Bonu è ma na gú akwɛ ǎ, bo na lɛ́ zán xɔ mǐtɔn lɛ ganji ɔ, agun gegě sixu zán Kpléxɔ Axɔ́suɖuto ɔ tɔn ɖokpo ɔ, enyi é nyɔ́ bló ɔ nɛ. Ðò xá ɖé lɛ mɛ ɔ, é ɖò dandan ɖɔ è ni xáya xɔ ɖé. Nú è gbá Kpléxɔ Axɔ́suɖuto ɔ tɔn yɔyɔ̌ lɛ, alǒ nú è jla nǔ gegě ɖó ɖò ye wu ɔ, é sɔgbe ɖɔ è ni sɔ́ xɔ ɔ d’alɔ mɛ nú Mawu. Amɔ̌, enyi nǔ klewun ɖé jɛn è jlaɖó ɖò Kpléxɔ Axɔ́suɖuto ɔ tɔn xóxó ɖé wu ɔ, é byɔ ɖɔ è ni bló tuto xɔ ɔ sísɔ́ d’alɔ mɛ nú Mawu tɔn ǎ.

⁵ Kpléxɔ Axɔ́suɖuto ɔ tɔn ɖó na nyí xɔ gɛnnyigɛnnyi e è gbá, bo na dó dɔn ayi mɛ ɖevo lɛ tɔn é ɖé ǎ. Lee è gbá ɖó é sixu gbɔn vo sín fí ɖé jɛ fí ɖevo, amɔ̌, linlin e wu è nɔ gbá é nɔ ɖyɔ gbeɖé ǎ. (Mɛ. 17:24) Sɔgbe kpo ninɔmɛ xá ɔ mɛ tɔn lɛ kpo ɔ, é ɖó na nyí fí e è na vo ɖè é ɖé, bo lɛ́ nyí nɔtɛn e jɛxa kplé Klisanwun tɔn lɛ é ɖé.

⁶ Kúnnuɖetɔ́ Jehovah tɔn lɛ sín agun ɖěɖee nɔ kplé ɖò Kpléxɔ Axɔ́suɖuto ɔ tɔn ɖé mɛ lɛ é bǐ wɛ nɔ na nǔnina e xɔ ɔ zinzan, jijlaɖó tɔn kpo nukúnkpíkpé d’ewu kpo nɔ byɔ lɛ é. È nɔ yí agbǎnmɛkwɛ ɖě ǎ; è ka nɔ lɛ́ byɔ akwɛ ǎ. Gbǎví nǔnina tɔn ɖé nɔ ɖò xɔ ɔ mɛ, bɔ mɛ ɖěɖee nɔ wá kplé lɛ é sixu jɔ fún dó akwɛzinzan e ɖò dandan, bo cá kan xá xɔ ɔ zinzan lɛ é mɛ. Ye nɔ sɔ́ jlǒ dó bló mɔ̌, bɔ é nɔ gosin ayi yetɔn mɛ.—2 Kɔ. 9:7.

⁷ Agun ɔ bǐ nɔ mɔ ɖɔ wǔjɔmɛ ɖé wɛ é nyí ɖɔ è ni nɔ gudo nú Kpléxɔ Axɔ́suɖuto ɔ tɔn ɖò akwɛzinzan linu, lobo lɛ́ ɖ’alɔ ɖò mimɛ̌jininɔ tɔn kpo nukúnkpíkpé d’ewu ganji kpo mɛ. Hwɛhwɛ ɔ, è nɔ sɔ́ mɛxo agun tɔn ɖé alǒ devízɔ́watɔ́ sinsɛnzɔ́wiwa tɔn ɖé bɔ é nɔ bló tuto azɔ̌ enɛ tɔn. Ðò kpaa mɛ ɔ, gbɛ̌ta kúnnuɖegbé tɔn lɛ wɛ nɔ jla nǔ lɛ ɖó, bɔ nukúnkpénuwutɔ́ gbɛ̌ta ɔ tɔn alǒ alɔgɔtɔ́ tɔn nɔ nɔ nukɔn na. Kpléxɔ Axɔ́suɖuto ɔ tɔn sín xomɛ kpo kɔ́xo tɔn ta kpo bǐ ɖó na wlí yɛ̌yi nú Jehovah kpo tutoblonunu tɔn kpo lee é jɛxa gbɔn é.

⁸ Enyi agun e nɔ zán kpléxɔ ɖé é hugǎn ɖokpo ɔ, mɛxo agun tɔn agun enɛ lɛ tɔn lɛ nɔ ɖó Wěɖegbɛ́ Nukúnkpíkpé Dó Kpléxɔ Axɔ́suɖuto ɔ Tɔn Wu tɔn ɖé ayǐ, bɔ é nɔ kpé nukún dó nǔ ɖěɖee kan xɔ ɔ kpo ayikúngban ɔ kpo lɛ é wu. Kplékplé mɛxo lɛ tɔn lɛ nɔ sɔ́ nɔví sunnu ɖokpo, b’ɛ nɔ nyí titoblonunutɔ́ nú wěɖegbɛ́ enɛ. Wěɖegbɛ́ ɔ nɔ w’azɔ̌ ɖò kplékplé mɛxo lɛ tɔn lɛ sín alixlɛ́mɛ glɔ́, bo nɔ kpé nukún dó mimɛ̌jininɔ xɔ ɔ tɔn, hinhɛn ɛ ɖó ganji, kpo nǔ e è na zán lɛ é kpo wu. Enɛ nɔ byɔ ɖɔ agun lɛ ni w’azɔ̌ ɖó kpɔ́ ganji.

⁹ Enyi agun gegě nɔ zán Kpléxɔ Axɔ́suɖuto ɔ tɔn ɖokpo ɔ ɔ, ye sixu nɔ ɖyɔ ganmɛ kplé lɛ tɔn sín agun ɖé jí jɛ ɖevo jí. Mɛxo agun tɔn lɛ na w’azɔ̌ dó tuto enɛ jí kpo linlin ɔ kpo ɖɔ nɔví lɛ sín nǔ ɖu ayi mɛ nú ye bɔ ye lɛ́ yí wǎn nú ye. (Fili. 2:2-4; 1 Pi. 3:8) Agun ɖebǔ na site kpowun bo wá gbeta lɛ kɔn dó agun ɖě lɛ tamɛ ǎ. Enyi nukúnkpénuwutɔ́ lɛdo tɔn ba agun e nɔ zán Kpléxɔ Axɔ́suɖuto ɔ tɔn lɛ é ɖokpo kpɔ́n ɔ, agun ɖě lɛ ɖó na lilɛ kplé ganmɛ yetɔn lɛ lee é byɔ gbɔn é ɖò aklunɔzán gbla enɛ mɛ.

¹⁰ È sixu zán Kpléxɔ Axɔ́suɖuto ɔ tɔn nú xóɖiɖɔ alɔwliwli tɔn lɛ kpo cyɔɖiɖi tɔn lɛ kpo, bɔ Wěɖegbɛ́ Sinsɛnzɔ́ tɔn wɛ ka na yí gbè tɔn hwɛ̌. Mɛxo agun tɔn enɛ lɛ na gbéjé nǔ e è byɔ lɛ é kpɔ́n ganji, bɔ gbeta yetɔn na jinjɔn alixlɛ́mɛ e alaxɔ na lɛ é jí.

¹¹ Mɛ ɖěɖee è yí gbè bɔ ye na zán Kpléxɔ Axɔ́suɖuto ɔ tɔn ɖó linlin mɔhun lɛ wu lɛ é ɖó na wà nǔ lee é jɛxa ɖɔ Klisanwun nǔgbo lɛ ni wà nǔ gbɔn é. È ɖó na wà nǔ ɖebǔ ɖò Kpléxɔ Axɔ́suɖuto ɔ tɔn mɛ, bɔ é na nyí afɔklɛ́nnú nú agun ɔ, alǒ hɛn nyikɔ Jehovah kpo agun ɔ kpo tɔn kwiji ǎ. (Fili. 2:14, 15) Ðò alixlɛ́mɛ alaxɔ tɔn glɔ́ ɔ, è sixu zán Kpléxɔ Axɔ́suɖuto ɔ tɔn nú nǔwiwa gbigbɔ tɔn ɖevo lɛ, ɖi Wemaxɔmɛ Sinsɛnzɔ́ Axɔ́suɖuto ɔ tɔn kpo Wemaxɔmɛ Sinsɛnzɔ́ Gbexosin-Alijitɔ́ tɔn kpo.

¹² Agun ɔ na nɔ ɖó sísí nú fí e é nɔ bló kplé ɖè é hwebǐnu. Nǔsisɔ, acɔ́biba, kpo acɔ́biba nú xɔ ɔ kpo ɖó na ɖè yɛ̌yi e kúnkplá Jehovah sinsɛn é xlɛ́. (Nǔt. 4:17; 1 Tim. 2:9, 10) Gbɔn wěɖexámɛ e ɖò ali enɛ nu lɛ é xwixwedó gblamɛ ɔ, mǐ nɔ xlɛ́ ɖɔ kplé Klisanwun tɔn mǐtɔn lɛ sù nukún mǐtɔn mɛ.

¹³ Titojininɔ ɖò kplé lɛ hwenu ɖò taji. È byɔ ɖɔ vǐ lɛ ni nɔ jinjɔn mɛjitɔ́ yetɔn lɛ kpá. È sixu dó wusyɛn lanmɛ nú mɛjitɔ́ e ɖó vǐ kpɛví lɛ é ɖɔ ye ni nɔ jinjɔn fí e ye na jinjɔn, bɔ enyi é wá byɔ ɖɔ ye na sɔ́ vǐ lɛ yì kɔ́xo bo gbɛ́ nǔ nú ye, alǒ kpé nukún dó hudo yetɔn ɖevo lɛ wu ɔ, ye ma na dóya nú kpléwatɔ́ lɛ dín ǎ é.

¹⁴ È nɔ sɔ́ nɔví sunnu e jɛxa lɛ é bɔ ye nɔ nyí tɛnmɛnamɛtɔ́ ɖò kplé lɛ jí ɖò Kpléxɔ Axɔ́suɖuto ɔ tɔn mɛ. Ye ɖó na nɔ acéjí, nɔ dɔn mɛ dó wǔ, bo lɛ́ ɖó linlin e sɔgbe é. Nǔ elɔ lɛ ɖò nǔ e ye nɔ wà lɛ é mɛ: ye nɔ dó gbè mɛ yɔyɔ̌ lɛ, nɔ bló bɔ ye nɔ vo, nɔ ba tɛnmɛ nú mɛ e gbɔhwenu lɛ é, bo nɔ kpé nukún dó yǒzo kpo fífá kpo e ɖó na nɔ kpléxɔ ɔ mɛ é wu. Ðò fí e é byɔ ɖè lɛ é ɔ, tɛnmɛnamɛtɔ́ lɛ na flín mɛjitɔ́ lɛ ɖɔ ye ni kpé nukún dó vǐ lɛ wu ganji, bonu ye ni ma kánwezun jɛ nukɔn nú kplé lɛ kpo kplé lɛ gudo kpo, alǒ d’ayihun ɖò atáa ɔ jí ó. Kpo xomɛnyínyɔ́ kpo, kpodo gbè fífá kpo ɔ, tɛnmɛnamɛtɔ́ ɖé sixu byɔ vǐ e ma ɖò xwíi ǎ é ɖé sín mɛjitɔ́ ɖɔ é ni kplá vǐ ɔ yì kɔ́xo, bonu é ma ɖè ayi kpléwatɔ́ lɛ tɔn sín kplé ɔ jí dín ó. Azɔ̌ e tɛnmɛnamɛtɔ́ lɛ nɔ wà é nɔ zɔ́n bɔ mɛ bǐ nɔ ɖu kplé lɛ sín vivǐ tawun. É nyɔ́ ɖɔ mɛxo agun tɔn lɛ kpo devízɔ́watɔ́ sinsɛnzɔ́wiwa tɔn lɛ kpo wɛ na nyí tɛnmɛnamɛtɔ́.

KPLÉXƆ AXƆ́SUÐUTO Ɔ TƆN GBIGBÁ

¹⁵ Ðò xwè kanweko nukɔntɔn ɔ mɛ ɔ, Klisanwun ɖé lɛ jɛ dɔkun hú mɛ ɖevo lɛ, enɛ wu ɔ, mɛsɛ́dó Pɔlu wlan ɖɔ: “Dìn ɔ, nǔ ɖò mi sí ganji, bɔ mi hɛn ɔ, mi na gɔ́ alɔ nú mɛ e nǔɖe hudo lɛ. Enɛ ɔ, nú nǔɖe wá hudo mi lɔmɔ̌ gbeɖé, bonu ye lɔ ɖó ganji ɔ, ye na dó alɔ mi. Lee mɛ bǐ na nɔ zɛ̌nzɛ̌n gbɔn ɔ nɛ.” (2 Kɔ. 8:14) Égbé ɖesu ɔ, è nɔ wà “mɛ bǐ na nɔ zɛ̌nzɛ̌n” sín nǔ mɔhun ɖé. È nɔ xò akwɛ ɖěɖee agun e gbɔn gbɛ̀ ɔ bǐ mɛ lɛ é nɔ na lɛ é kplé, bo nɔ dó d’alɔ mɛ ɖò Kpléxɔ Axɔ́suɖuto ɔ tɔn lɛ gbigbá kpo vivɔ́ blóɖó yetɔn kpo linu. Alɔ e nɔví e gbɔn gbɛ̀ ɔ bǐ mɛ lɛ é nɔ hun dó na nǔ é nɔ sù tutoblonunu ɔ kpo agun ɖěɖee nɔ ɖu nǔnina enɛ lɛ sín lè lɛ é kpo nukúnmɛ tawun.

¹⁶ Alaxɔ nɔ kpɔ́n lee xá ɖé mɛ cí é, bo nɔ ɖɔ Kpléxɔ Axɔ́suɖuto ɔ tɔn ɖěɖee mɛ agun lɛ na nɔ bló kplé lɛ ɖè é. Alaxɔ wɛ nɔ lɛ́vɔ ɖɔ hwenu kpo fí e è na gbá Kpléxɔ Axɔ́suɖuto ɔ tɔn yɔyɔ̌ lɛ ɖó é kpo, kpo kpléxɔ e ko tíìn bɔ è na jlaɖó lɛ é kpo, ɖò fí e é ɖó acɛ dó lɛ é. Enyi adla lɛ j’ayǐ ɔ, è nɔ bló tuto lɛ, bo nɔ vɔ́ Kpléxɔ Axɔ́suɖuto ɔ tɔn e gblé lɛ é blóɖó, bɔ enyi ninɔmɛ ɔ byɔ ɔ, è nɔ lɛ́ vɔ́ xwé nɔví lɛ tɔn lɛ blóɖó.

¹⁷ Alaxɔ nɔ zán mɛɖéezejotɔ́ lɛ bɔ ye nɔ d’alɔ ɖò ayikúngban xixɔ, Kpléxɔ Axɔ́suɖuto ɔ tɔn lɛ sín ɖiɖe, wema e yí gbè nú xɔgbigbá é, xɔ lɛ gbigbá, kpo nǔ lɛ jijlaɖó kpo linu. Ðó è ɖó hudo Kpléxɔ Axɔ́suɖuto ɔ tɔn lɛ tɔn ɖò fí gegě wutu ɔ, è lɛ́ ɖó hudo mɛɖéezejotɔ́ gegě tɔn. Wɛnjlatɔ́ e ko bló baptɛm, bo jɛxa, lobo jló na d’alɔ lɛ é bǐ sixu d’alɔ wema ɖé mɛ, bo sɔ́ nú agun yetɔn sín Wěɖegbɛ́ Sinsɛnzɔ́ tɔn. Wɛnjlatɔ́ e ma tlɛ ko bló baptɛm ǎ lɛ é sixu ɖ’alɔ ɖò Kpléxɔ Axɔ́suɖuto ɔ tɔn yetɔn gbigbá alǒ jijlaɖó tɔn mɛ.

KPLÉÐÓKPƆ́ SÍN XƆ LƐ

¹⁸ Ðò kpaa mɛ ɔ, Klisanwun nukɔntɔn lɛ nɔ kplé ɖò gbɛ̌ta klewun klewun lɛ mɛ. Amɔ̌, hweɖelɛnu ɔ, “mɛ gegě” nɔ kplé ɖó kpɔ́. (Mɛ. 11:26) Mɔ̌ ɖokpo ɔ, togun Jehovah tɔn nɔ kplé bo nɔ sukpɔ́ tawun, nú kpléɖókpɔ́ lɛdo tɔn lɛ kpo kpléɖókpɔ́ ɖaxó lɛ kpo. Hwɛhwɛ ɔ, è nɔ xáya fí ɖé lɛ nú nǔwiwa enɛ lɛ, amɔ̌, ɖò fí e enɛ ma nyɔ́ bló ɖè ǎ lɛ é ɔ, è sixu xɔ fí ɖé bo gbá Kpléɖókpɔ́ Sín Xɔ ɖó.

¹⁹ Hweɖelɛnu ɔ, è nɔ xɔ fí e è ko gbá é ɖé, bo nɔ jlaɖó, lobɔ é nɔ nyí Kpléɖókpɔ́ Sín Xɔ ɖé. Amɔ̌ hwɛhwɛ ɔ, ayikúngban ɖé wɛ è nɔ xɔ, bo nɔ gbá xɔ yɔyɔ̌ ɖé ɖ’eji. Kpléɖókpɔ́ Sín Xɔ lɛ nɔ gbɔn vo nú yeɖée sɔgbe xá hudo xá ɔ mɛ tɔn lɛ. Cobonu alaxɔ na wá gbeta ɔ kɔn bo na xɔ alǒ gbá xwé mɔhun ɖé ɔ, é nɔ tó gbéjé akwɛ nabi e é na ɖu é kpo azɔn nabi e è na nɔ zán ɖò xwè ɖokpo mɛ é kpo kpɔ́n ganji.

²⁰ Alaxɔ nɔ sɔ́ nɔví sunnu lɛ bɔ ye nɔ kpé nukún dó Kpléɖókpɔ́ Sín Xɔ lɛ zinzan kpo nukúnkpíkpé d’ewu kpo wu. È nɔ bló tuto bɔ lɛdo lɛ nɔ kpé nukún dó mimɛ̌jininɔ fí ɔ tɔn wu hwɛhwɛ, bo nɔ lɛ́ bló mɔ̌ azɔn we ɖò xwè ɖokpo mɛ, kpo nǔvɔjlaɖó klewun klewun lɛ kpo. Enyi nɔví lɛ sɔ́ yeɖée jó bo wà azɔ̌ enɛ ɔ, é nɔ hɛn lè wá. Enɛ wu ɔ, é na nyɔ́ ɖɔ agun lɛ ni nɔ nɔ gudo nú tuto enɛ lɛ kpo ayi bǐ kpo.—Ðɛh. 110:3, nwt; Mal. 1:10.

²¹ Hweɖelɛnu ɔ, è sixu lɛ́ zán Kpléɖókpɔ́ Sín Xɔ ɔ nú nǔwiwa yɛhwexɔ́suɖuto ɔ tɔn ɖevo lɛ, ɖi wemaxɔmɛ Biblu kplɔnkplɔn tɔn lɛ kpo kplé bǔnɔ ɖěɖee è nɔ bló xá nukúnkpénuwutɔ́ lɛdo tɔn lɛ, alǒ mɛxo agun tɔn lɛdo ɖé tɔn lɛ é kpo. Kpléxɔ Axɔ́suɖuto ɔ tɔn ɖɔhun ɔ, Kpléɖókpɔ́ Sín Xɔ nyí xɔ ɖé bɔ è sɔ́ ɖó vo bo na nɔ sɛn Mawu ɖ’emɛ. Enyi mǐ kplé ɖò Kpléɖókpɔ́ Sín Xɔ ɖé mɛ ɔ, walɔ mǐtɔn, nǔsisɔ mǐtɔn, kpo acɔ́biba mǐtɔn kpo ɖó na wlí yɛ̌yi, b’ɛ na cí lee mǐ nɔ nɔ gbɛn hwenu e mǐ kplé ɖò Kpléxɔ Axɔ́suɖuto ɔ tɔn mɛ bo na sɛn Mawu é ɖɔhun.

²² Mɛ yɔyɔ̌ gegě ɖò ahwan nyi wá tutoblonunu Mawu tɔn mɛ wɛ, ɖò azǎn gudogudo tɔn elɔ lɛ mɛ. Nyɔna Jehovah tɔn sín xlɛ̌ wɛ nyí enɛ. (Eza. 60:8, 10, 11, 22) Enɛ wu ɔ, mǐ jló na nɔ gudo nú tuto ɖěɖee è nɔ bló bonu mǐ na ɖó fí ɖěɖee mǐ na nɔ vo bo sɛn Mawu ɖè, lobo hɛn ye ɖó mimɛ̌ jí lɛ é. Mɔ̌ mɛ ɔ, mǐ nɔ ɖexlɛ́ ɖɔ alɔ e xɔ mɔhun lɛ nɔ dó mǐ, bɔ mǐ nɔ dó wusyɛn lanmɛ nú mǐɖée d’eji, dìn e azǎn Jehovah tɔn ko ɖò kɛnnɛkɛnnɛ é nɔ sù nukún mǐtɔn mɛ.