‘Mi Bló Nǔ Bǐ, Bo Dó Sɔ́ Mawu Sù’

ÐÓ MǏ zé mǐɖée jó nú Mawu wutu ɔ, dandan wɛ ɖɔ mǐ ni ɖè susu Jehovah tɔn xlɛ́ ɖò nǔ e mǐ nɔ ɖɔ lɛ é kpo nǔ e mǐ nɔ wà lɛ é kpo mɛ. Mɛsɛ́dó Pɔlu ɖɔ nǔgbododó e na xlɛ́ ali mǐ é ɖé, hwenu e é wlan xó elɔ é: “Nǔ ɖu wɛ mi ɖè oo, ahan nu wɛ mi ɖè oo, abǐ nǔ ɖebǔ wà wɛ mi ɖè hǔn, mi bló bǐ, bo dó sɔ́ Mawu sù.” (1 Kɔ. 10:31) Enɛ byɔ ɖɔ mǐ ni tɛ́dó nǔgbododó jlɔjlɔ Jehovah tɔn lɛ wu, ɖó ye wɛ nɔ ɖè mɛ alɔkpa e é nyí tawun é xlɛ́. (Kolo. 3:10) Ðó mǐ nyí togun mímɛ́ ɖé wutu ɔ, mǐ ɖó na nɔ wà nǔ Mawu ɖɔhun.—Efɛ. 5:1, 2.

² Hwenu e mɛsɛ́dó Piyɛ́ɛ ɖò enɛ flín Klisanwun lɛ wɛ é ɔ, é wlan ɖɔ: “Mi setónú nú Mawu, vǐ e setónú ɔ ɖɔhun, bonu nǔwiwa mitɔn lɛ ni ma sɔgbe xá jlǒ e mi nɔ ɖó ɖ’ayǐ hwenu e mi lɛ́ kpó ɖò manywɛ mɛ ɔ lɛ ó. Loɔ, mi ni nyí mɛ mímɛ́ ɖò nǔwiwa mitɔn bǐ mɛ, lee Mawu e ylɔ́ mi ɔ nyí mɛ mímɛ́ gbɔn é. Nǔgbo ɔ, nǔ e è wlan dó Mawuxówema ɔ mɛ ɔ ɖɔ: ‘Mi nyí mɛ mímɛ́, ɖó mɛ mímɛ́ wɛ un nyí.’” (1 Pi. 1:14-16) Lee é nyí gbɔn ɖò Izlayɛli hwexónu tɔn é ɔ, è byɔ mɛ e ɖò agun Klisanwun tɔn mɛ lɛ é bǐ ɖɔ ye ni nɔ mimɛ̌ jí. Tinmɛ enɛ tɔn wɛ nyí ɖɔ ye ɖó na nɔ zɔ bǐ, bo na lɔn bɔ hwɛhuhu kpo gbɛ̀ ɔ sín nǔ lɛ kpo na hɛn ye blí ǎ. Mɔ̌ mɛ ɔ, è sɔ́ ye ɖó vo nú sinsɛnzɔ́ mímɛ́ ɖé.—Tín. 20:5.

³ Tónúsíse nú sɛ́n Jehovah tɔn lɛ kpo nǔgbododó tɔn lɛ kpo, ɖěɖee ɖò wɛn ɖò Wema Mímɛ́ lɛ mɛ lɛ é nɔ zɔ́n, bɔ è nɔ nɔ mimɛ̌ jí. (2 Tim. 3:16) Gbɔn Biblu kplɔnkplɔn gblamɛ ɔ, mǐ nɔ kplɔ́n nǔ dó Jehovah kpo ali tɔn lɛ kpo wu, bo nɔ lɛ́ sɛkpɔ́ ɛ. Nǔkplɔnkplɔn mǐtɔn nɔ zɔ́n bɔ mǐ nɔ kúdeji ɖɔ mǐ ɖó na ba Axɔ́suɖuto Mawu tɔn jɛ nukɔn, lobɔ jlǒ Jehovah tɔn wiwa ɖó na ɖò taji hú nǔ bǐ ɖò gbɛzán mǐtɔn mɛ. (Mat. 6:33; Hlɔ. 12:2) Enɛ byɔ ɖɔ mǐ ni sɔ́ gbɛtɔ́ yɔyɔ̌ ɔ dó.—Efɛ. 4:22-24.

MIMƐ̌JININƆ ÐÒ GBIGBƆ KPO WALƆ KPO LINU

⁴ É nɔ bɔkun bonu è na tɛ́dó nǔgbododó jlɔjlɔ Jehovah tɔn lɛ wu hwebǐnu ǎ. Satáan Awoví e nyí kɛntɔ́ mǐtɔn é nɔ ba na lilɛ jɔ nú mǐ sín nǔgbo ɔ mɛ. Hweɖelɛnu ɔ, nǔnyanyawiwa gbɛ̀ ɔ tɔn lɛ kpo jlǒ hwɛhuhu tɔn mǐtɔn lɛ kpo nɔ zɔ́n bɔ nǔ lɛ nɔ vɛwǔ nú mǐ. Gbɛ̀ ninɔ sɔgbe xá zě e mǐ zé mǐɖée jó nú Mawu é nɔ byɔ ɖɔ mǐ ni ɖí xwi ɖò gbigbɔ lixo. Biblu ɖɔ nú mǐ ɖɔ enyi mǐ ɖò gbeklánxámɛ alǒ mɛtɛnkpɔn lɛ mɔ wɛ hǔn, é ni ma kpaca mǐ ó. Mǐ ɖó na jiya, ɖó mǐ nyí nǔjlɔjlɔwatɔ́ wutu. (2 Tim. 3:12) Hwenu e mǐ ɖò mɛtɛnkpɔn lɛ mɔ wɛ é ɔ, xomɛ ɖó na hun mǐ, bɔ mǐ na tuùn ɖɔ mɛtɛnkpɔn mɔhun lɛ nɔ xlɛ́ ɖɔ mǐ ɖò jlǒ Mawu tɔn wà wɛ.—1 Pi. 3:14-16; 4:12, 14-16.

⁵ Jezu nyí mɛ maɖóblɔ̌ có, é kplɔ́n tónúsíse gbɔn ya e é jì lɛ é gblamɛ. É jó éɖée dó nú mɛtɛnkpɔn Satáan tɔn lɛ alǒ nya nǔ gbɛ̀ ɔ tɔn lɛ gbé kpɔ́n ǎ. (Mat. 4:1-11; Jaan 6:15) Jezu tlɛ lin bo na jó gbè kpɔ́n gbeɖé ǎ. Gbejininɔ tɔn zɔ́n bɔ gbɛ̀ ɔ gbɛ́ wǎn n’i có, é tɛ́dó nǔgbododó jlɔjlɔ Jehovah tɔn lɛ wu. Táan kpɛɖé jɛ nukɔn nú kú Jezu tɔn ɔ, é gb’akpá nú ahwanvu tɔn lɛ ɖɔ gbɛ̀ ɔ na gbɛ́ wǎn nú ye lɔ. Sín hwenɛnu ɖidó ɔ, ahwanvu Jezu tɔn lɛ gbɔn tɛnkpɔn gegě mɛ, amɔ̌, ye kpankɔ́n, bo tuùn ɖɔ Vǐ Mawu tɔn ko ɖu ɖò gbɛ̀ ɔ jí.—Jaan 15:19; 16:33; 17:16.

⁶ Bonu mǐ ma na nyí gbɛ̀ ɔ tɔn ǎ ɔ, é byɔ ɖɔ mǐ ni tɛ́dó nǔgbododó jlɔjlɔ Jehovah tɔn lɛ wu, lee Gǎn mǐtɔn bló gbɔn é. Gɔ́ nú alɔ nyinyi nú nu ɖiɖó ɖò toxóɖiɖɔ kpo nǔ gbɛ̀ ɔ tɔn lɛ kpo mɛ ɔ, mǐ ɖó na lɛ́ ɖí xwi xá walɔ gblégblé tɔn e gbakpé lɛ é. Mǐ nɔ sɔ́ wěɖexámɛ e ɖò Jaki 1:21 mɛ é sɔ́ ylɔ́ ɖɔ nǔjɔnǔ: “Mi ni jó nǔ e na hɛn mɛ kwiji é bǐ kpodo azɔ̌ nyanya bǐ kpan dó. Mi yí xó e Mawu sɔ́ dó ayi mitɔn mɛ ɔ kpo xomɛfífá kpo; ɖó xó ɔ hɛn ɔ, é na hwlɛn mi gán.” Gbɔn nǔkplɔnkplɔn kpo kplé lɛ yiyi kpo gblamɛ ɔ, xó nǔgbo ɔ na byɔ linlin kpo ayi mǐtɔn kpo mɛ, bɔ mǐ tlɛ sɔ́ na jɛ nǔ e gbɛ̀ ɔ nɔ xwlé mɛ lɛ é jló jí ǎ. Ahwanvu Jaki wlan ɖɔ: “Mi tuùn ɖɔ è zun xɔ́ntɔn xá gbɛ̀ ɔ, Mawu sín kɛntɔ́ wɛ è nyí à cé? Mɛ e jló na nyí gbɛmɛ fí sín nǔ lɛ sín xɔ́ntɔn ɔ nɔ sɔ́ éɖée dó huzu Mawu sín kɛntɔ́.” (Ja. 4:4) Hwɛjijɔ enɛ wu wɛ Biblu gb’akpá nú mǐ syɛnsyɛn ɖɔ mǐ ni tɛ́dó nǔgbododó jlɔjlɔ Jehovah tɔn lɛ wu, bo ɖó wǔ zɔ nú gbɛ̀ ɔ.

⁷ Xó Mawu tɔn gb’akpá nú mǐ dó alɔɖiɖó ɖò winnyanú kpo nǔwalɔ blíblí lɛ kpo mɛ wu. É ɖɔ nú mǐ ɖɔ: “È ma sè agalilɛ xó, nǔbliblíwiwa, abǐ nukúnkɛ́ndidó sín xó vɔ́vɔ́ ɖò tɛntin mitɔn ó; ɖó mɛɖeɖóvo Mawu tɔn wɛ mi nyí.” (Efɛ. 5:3) Enɛ wu ɔ, mǐ ɖó na lɔn bo na nɔ lin tamɛ dó nǔbliblí, winnyanú, alǒ nǔ gblégblé lɛ jí ǎ, mǐ ka na lɛ́ jó nǔ mɔhun lɛ dó bonu ye na jɛ xóɖɔɖókpɔ́ mǐtɔn lɛ mɛ byɔ jí kpɛɖé kpɛɖé ǎ. Mɔ̌ mɛ ɔ, mǐ nɔ xlɛ́ ɖɔ mǐ jló na tɛ́dó nǔgbododó walɔ ɖagbe tɔn Jehovah tɔn e mɛ́, bo lɛ́ jlɔ́ lɛ é wu.

MIMƐ̌JININƆ ÐÒ AGBAZA LIXO

⁸ Gɔ́ nú mimɛ̌jininɔ ɖò gbigbɔ kpo walɔ kpo linu ɔ, Klisanwun lɛ tuùn lee mimɛ̌jininɔ ɖò agbaza lixo ɖò taji sɔ́ é. Ðò Izlayɛli hwexónu tɔn ɔ, Mawu mimɛ̌jinɔtɔ́ ɔ byɔ ɖɔ Izlayɛli-ví lɛ ni hɛn fí e ye ɖó gɔnu ɖó lɛ é ɖó mimɛ̌ jí. Mǐɖesu ɖó na nɔ mimɛ̌ jí, bonu Jehovah ma wá mɔ ‘nǔ e na fyɔ́n wǔ n’i é’ ɖě ɖò gbɛzán mǐtɔn mɛ ó.—Sɛ́n. 23:15.

⁹ Mɛ mímɛ́ nyínyí kpo mimɛ̌jininɔ ɖò agbaza lixo kpo cá kan xá yeɖée tawun ɖò Biblu mɛ. Ði kpɔ́ndéwú ɔ, Pɔlu wlan ɖɔ: “Mɛ vívɛ́ná ce lɛ mi, . . . mǐ ni slá wǔ nú agbaza kpo [gbigbɔ] kpo, bo dó gǎn, bo ɖi xɛsi nú Mawu ɖò gbɛzán mǐtɔn mɛ, lobo na nyí mɛ mímɛ́ yì fó.” (2 Kɔ. 7:1) Enɛ wu ɔ, Klisanwun sunnu lɛ kpo nyɔnu lɛ kpo ɖó na dó gǎn, bo hɛn agbaza yetɔn ɖó mimɛ̌ jí, gbɔn wǔlilɛ kpo avɔ yetɔn lɛ nyinya kpo gblamɛ. Ninɔmɛ lɛ nɔ gbɔn vo sín tò ɖé mɛ jɛ ɖevo mɛ có, hwɛhwɛ ɔ, mǐ sixu mɔ aɖǐ kpo sin kpo bo na dó hɛn agbaza mǐtɔn ɖó mimɛ̌ jí, lobo na lɛ́ bló bɔ vǐ mǐtɔn lɛ na nɔ ɖò mimɛ̌ jí.

¹⁰ Ðó Kúnnuɖiɖezɔ́ e mǐ nɔ wà é wutu ɔ, hwɛhwɛ wɛ mɛ lɛ nɔ tuùn mǐ tawun ɖò fí e mǐ nɔ nɔ é. Enyi xwé mǐtɔn gbè nɔ mɛ́, bo lɛ́ ɖò tuto jí, ɖò xomɛ kpo kɔ́xota kpo ɔ, é nɔ ɖekúnnu nú nɔzo mǐtɔn lɛ. Azɔ̌ ɖé wɛ bo kan xwédo ɔ bǐ. Nɔví sunnu lɛ ɖó na nɔ sɔ́ ayi ɖó xwé ɔ kpo lɛdo tɔn lɛ kpo jí tawun, bo na tuùn ɖɔ kɔ́xota e mɛ́ ganji é kpo xwé e gbè è sɛ̀ nǔ xwè ɖè ganji é ɖé kpo nɔ sɔ́ linlin ɖagbe dó ayi mɛ nú mɛ ɖevo lɛ. Azɔ̌ enɛ kpo gbigbɔ sín nǔ lɛ kpo e tatɔ́ xwédo tɔn lɛ nɔ nɔ nukɔn na é nɔ xlɛ́ ɖɔ ye ɖò nukún kpé dó xwédo yetɔn wu wɛ ganji. (1 Tim. 3:4, 12) Nɔví nyɔnu lɛ lɔ ɖó na kpé nukún dó nǔ lɛ wu, ɖò taji ɔ, nǔ e ɖò xwé ɔ gbè lɛ é. (Ti. 2:4, 5) Vǐ ɖěɖee è kplɔ́n ganji lɛ é nɔ wà nǔ e wu ye kpé lɛ é bo nɔ nɔ mimɛ̌ jí, lobo nɔ lɛ́ hɛn xɔ yetɔn lɛ mɛ ɖó mimɛ̌ jí. Mɔ̌ mɛ ɔ, xwédo ɔ nɔ w’azɔ̌ ɖó kpɔ́, bo nɔ sɔnǔ nú aca mimɛ̌jininɔ tɔn ɖěɖee na sɔgbe xá gbɛ̀ yɔyɔ̌ ɔ ɖò Axɔ́suɖuto Mawu tɔn mɛ lɛ é.

¹¹ Égbé ɔ, mɛ gegě ɖò togun Jehovah tɔn mɛ bo nɔ hɛn mɔ̌to alǒ kɛkɛ yì kplé lɛ. Ðò xá ɖé lɛ mɛ ɔ, è ɖó hudo mɔ̌to alǒ kɛkɛ tɔn nú sinsɛnzɔ́ ɔ. È ɖó na hɛn mɔ̌to lɛ alǒ kɛkɛ lɛ ɖó mimɛ̌ jí, bɔ ye na lɛ́ ɖò ninɔmɛ ɖagbe mɛ. Xwé mǐtɔn lɛ, mɔ̌to mǐtɔn lɛ, kpo kɛkɛ mǐtɔn lɛ kpo ɖó na xlɛ́ ɖɔ mǐ ɖò togun mímɛ́ Jehovah tɔn mɛ. Nǔgbododó ɖokpo ɔ lɛ́ nyɔ́ zán nú sáki kúnnuɖegbé tɔn mǐtɔn kpo Biblu mǐtɔn kpo.

¹² Nǔsisɔ kpo acɔ́biba mǐtɔn kpo ɖó na sɔgbe xá nǔgbododó Mawu tɔn lɛ. Mǐ na jló na dó nǔ e ɖò kluyɔɔ é alǒ nǔ e wló é ɖé, bo yì gbɛtɔ́ nukúnɖeji ɖé nukɔn ǎ. Kpɔ́n lee mǐ ɖó na kéya nú nǔ e mǐ nɔ dó hwenu e mǐ nɔ sɔ́ afɔ Jehovah tɔn ɖó te ɖò sinsɛnzɔ́ ɔ mɛ alǒ ɖò atáa jí é sɔ́ é! Acɔ́biba mǐtɔn kpo lee mǐ nɔ sɔnǔ gbɔn é kpo sixu wà nǔ dó linlin e mɛ ɖevo lɛ nɔ ɖó dó Jehovah sinsɛn mǐtɔn wu é wu. É ɖò wɛn ɖɔ é kún na nyɔ́ ɖɔ mǐ ni gɔn jlɛ̌ jí nɔ alǒ gɔn ya ké nú mɛ ɖevo lɛ ó. (Micée 6:8; 1 Kɔ. 10:31-33; 1 Tim. 2:9, 10) Enɛ wu ɔ, enyi mǐ ɖò nǔ sɔ́ wɛ bo na yì sinsɛnzɔ́ ɔ mɛ alǒ yì kplé agun tɔn lɛ, kpléɖókpɔ́ lɛdo tɔn lɛ, alǒ kpléɖókpɔ́ ɖaxó lɛ ɔ, mǐ ɖó na hɛn nǔ e Mawuxówema ɔ ɖɔ dó mimɛ̌jininɔ ɖò agbaza lixo kpo nǔsisɔ e ɖò jlɛ̌ jí é kpo wu é dó ayi mɛ. Mǐ jló na kpa susu nú Jehovah hwebǐnu.

¹³ Nǔgbododó ɖokpo ɔ lɛ́ nyɔ́ zán hwenu e mǐ ɖi sà yì hɔ̌nkan gbɛ̀ ɔ tɔn alǒ alaxɔ Kúnnuɖetɔ́ Jehovah tɔn lɛ tɔn ɖé mɛ é. Flín ɖɔ, nyikɔ Betɛli ɔ sín tinmɛ wɛ nyí “Xwé Mawu tɔn.” Enɛ wu ɔ, mǐ ɖó na sɔnǔ, bo lɛ́ wà nǔ lee mǐ na bló gbɔn ɖò kplé lɛ jí ɖò Kpléxɔ Axɔ́suɖuto ɔ tɔn mɛ é ɖɔhun.

¹⁴ É na bo tlɛ nyí hwenu e mǐ ɖò ayiɖeɖayǐ wɛ é ɔ, mǐ nɔ jló na sɔ́ ayi ɖó nǔsisɔ kpo acɔ́biba mǐtɔn kpo jí. Mǐ sixu kanbyɔ mǐɖée ɖɔ: ‘Winnya ka na hu mì dó kúnnuɖiɖe e ma nyí aca tɔn ǎ é wu, ɖó lee un sɔnǔ gbɔn é wu wɛ à?’

AYIHUNDIDA KPO AYIÐEÐAYǏ ÐAGBE LƐ KPO

¹⁵ Cobonu è na nɔ gbɛ̀, lobɔ lanmɛ mɛtɔn na lɛ́ nɔ ganji ɔ, gbɔjɛyiyi kpo ayiɖeɖayǐ kpo ɖò dandan. Jezu byɔ ahwanvu tɔn lɛ gbè ɖokpo ɖɔ ye ni xwedó emi yì fí e jɛ vo é ɖé, bá “gbɔjɛ kpɛɖé.” (Mak. 6:31) Gbɔjɛyiyi kpo ayihundida alǒ ayiɖeɖayǐ ɖagbe lɛ kpo sixu dó wǔyá lanmɛ nú mɛ. É sixu fá kɔ nú mǐ bɔ mǐ na mɔ hlɔnhlɔn bo gbɛkan dó azɔ̌ mǐtɔn nu.

¹⁶ Ðó ayiɖeɖayǐ gegě wɛ tíìn ɖò égbé wutu ɔ, é byɔ ɖɔ Klisanwun lɛ ni ɖó ayi te, bo ɖè nǔnywɛ Mawu tɔn xlɛ́ ɖò nǔ e ye nɔ wà lɛ é mɛ. Nǔgbo wɛ ɖɔ ayiɖeɖayǐ ɖó tɛn tɔn, amɔ̌, é wɛ nyí nǔ taji hugǎn ɔ ɖò gbɛmɛ ǎ. È ko gb’akpá nú mǐ ɖɔ ɖò “azǎn gudogudo tɔn lɛ mɛ” ɔ, gbɛtɔ́ lɛ “na nɔ yí wǎn nú gbɛɖuɖu hú ye na yí wǎn nú Mawu.” (2 Tim. 3:1, 4) Nǔ e è nɔ ylɔ́ ɖɔ ayiɖeɖayǐ kpo ayihundida kpo lɛ é gegě sɔgbe xá mɛ ɖěɖee jló na tɛ́dó nǔgbododó jlɔjlɔ Jehovah tɔn lɛ wu é ǎ.

¹⁷ Klisanwun nukɔntɔn lɛ ɖó na ɖí xwi xá wǎn yí nú gbɛɖuɖu sín walɔ e mɛ lɛ ɖó lɛlɛ̌ dó ye lɛ é. Ðò ayihundatɛn Hlɔma tɔn lɛ ɔ, nǔkpɔntɔ́ lɛ nɔ ɖè ayi ɖ’ayǐ gbɔn wuvɛ̌ e sè wɛ mɛ ɖevo lɛ ɖè é kpinkpɔn gblamɛ. Dakaxixo, mɛhuhu, kpo nǔbliblíwiwa kpo wɛ è nɔ mɔ ɖò nɔtɛn ayiɖeɖayǐ tɔn lɛ, amɔ̌, Klisanwun nukɔntɔn lɛ ɖó wǔ zɔ nú nǔ mɔhun lɛ. Égbé ɔ, nǔ e gbɛ̀ ɔ nɔ sɔ́ dó ɖè ayi ɖ’ayǐ na lɛ é gegě nyí nǔ mɔhun lɛ, bɔ ye nɔ sɔ́ dó sú dò jlǒ blíblí e gbɛtɔ́ lɛ nɔ ɖó é tɔn na. É byɔ ɖɔ mǐ ni ‘cɔ́ mǐɖée ganji’ dó lee mǐ nɔ zán gbɛ̀ gbɔn é wu, bo ɖè kɔ sín ayiɖeɖayǐ masɔgbe lɛ wu. (Efɛ. 5:15, 16; Ðɛh. 11:5) Nú ayiɖeɖayǐ ɔ ɖesunɔ ma tlɛ nyla ǎ ɔ, ninɔmɛ e lɛlɛ̌ dó lɛ é sixu nyla.—1 Pi. 4:1-4.

¹⁸ Ayihundida kpo ayiɖeɖayǐ kpo alɔkpa gegě ɖè bo sɔgbe, bɔ Klisanwun lɛ sixu ɖu vivǐ yetɔn. Mɛ gegě ko ɖu lè wěɖexámɛ Biblu tɔn kpo alixlɛ́mɛ e ɖò jlɛ̌ jí bɔ è sixu mɔ ɖò wema mǐtɔn lɛ mɛ lɛ é kpo xwixwedó tɔn.

¹⁹ Ðò hweɖelɛnu ɔ, è sixu ylɔ́ xwédo gegě wá xwé ɖé gbè, bo ɖu vivǐ gbɛ̌didó Klisanwun tɔn tɔn. Alǒ è sixu ylɔ́ nɔví sunnu lɛ kpo nɔví nyɔnu lɛ kpo dó alɔwliwli sín agɔ̌ ɖé tɛnmɛ alǒ dó tɛn mɔhun ɖevo lɛ mɛ. (Jaan 2:2) Jonɔyitɔ́ lɛ ɖó na tuùn ɖɔ nǔ e na jɛ ɖò tɛn ɔ mɛ lɛ é bǐ sín agban ɖò ta emitɔn. É ɖò wɛn ɖɔ hwenu e gbɛtɔ́ gegě kplé ɖó kpɔ́ é ɔ, è ɖó na cɔ́ mɛɖée tawun. Vivo e nɔ tíìn ɖò ayiɖeɖayǐ mɔhun lɛ tɛnmɛ é ko zɔ́n bɔ mɛɖé lɛ wà nǔ zɛ dogbó e walɔ Klisanwun tɔn ɖó é wu, bo ɖ’alɔ ɖò nǔ ɖu dingan kpo ahan nu dingan kpo mɛ, lobo tlɛ lɛ́ hu hwɛ syɛnsyɛn ɖevo lɛ. Klisanwun e nɔ ɖó ayi te lɛ é nɔ hɛn enɛ dó ayi mɛ, bo nɔ mɔ ɖɔ nǔnywɛnú wɛ é nyí ɖɔ è ni ɖè kan kpò nú nǔ lɛ kpo ganmɛ e na zán wɛ è ɖè ɖò ayiɖeɖayǐ mɔhun lɛ tɛnmɛ é kpo. Enyi ahan syɛnsyɛn wá tɛn ɔ mɛ ɔ, è ɖó na nɔ jlɛ̌ jí ɖò zinzan tɔn mɛ. (Fili. 4:5, nwt.) Enyi è dó gǎn lɛ bǐ bo bló bɔ nǔ e sɔgbe lɛ é tɔ́n ɖò tɛn ɔ mɛ, bo lɛ́ fá kɔ nú mɛ ɖò gbigbɔ lixo ɔ, nǔɖuɖu kpo ahan kpo sɔ́ na nyí nǔ taji e jí è na sɔ́ ayi ɖó é ǎ.

²⁰ É nyɔ́ tawun ɖɔ è ni nɔ yí mɛ. (1 Pi. 4:9) Enyi mǐ ɖò Klisanwun lɛ ylɔ́ wɛ bonu ye na wá ɖu nǔ, nu ahan, d’ayihun, bo ɖu vivǐ gbɛ̌didó tɔn xá mǐ ɖò xwé mǐtɔn gbè ɔ, mǐ na nɔ flín bo ylɔ́ mɛ ɖěɖee ma ɖó nǔɖe ǎ lɛ é lɔmɔ̌. (Luk. 14:12-14) Enyi è ylɔ́ mǐ dó tɛn mɔhun lɛ mɛ ɔ, nǔwalɔ mǐtɔn ɖó na sɔgbe xá wěɖexámɛ e ɖò Maki 12:31 mɛ é. É nyɔ́ hwebǐnu ɖɔ è ni nɔ tuùn xomɛ e mɛ ɖevo lɛ nɔ nyɔ́ dó mǐ wu é nú ye.

²¹ Klisanwun lɛ nɔ ɖu vivǐ nǔ e Mawu nɔ na ye kpo xomɛ kpo lɛ é tɔn, bo nɔ tuùn ɖɔ emi sixu “nɔ ɖu nǔ, bo nɔ nu ahan, bo ɖu azɔ̌ e [emi] jɛ tagba bo wà ɔ sín gbɛ̀.” (Nǔt. 3:12, 13) Enyi mǐ ‘bló nǔ bǐ, bo dó sɔ́ Mawu sù’ ɔ, jonɔyitɔ́ lɛ kpo jonɔ lɛ kpo bǐ sixu nɔ flín ayiɖeɖayǐ sín hwenu enɛ lɛ kpo awǎjijɛ kpo, ɖɔ ye fá kɔ nú emi ɖò gbigbɔ lixo.

NǓWIWA WEMAXƆMƐ TƆN LƐ

²² Kúnnuɖetɔ́ Jehovah tɔn lɛ sín vǐ lɛ nɔ ɖu lè nǔ dodó e è nɔ kplɔ́n ɖò wemaxɔmɛ lɛ é tɔn. Nú ye ɖò wemaxɔmɛ yì wɛ ɔ, ye nɔ kplɔ́n nǔxixa ganji kpo nǔwlanwlán ganji kpo. Nǔ ɖevo e è nɔ lɛ́ kplɔ́n mɛ ɖò wemaxɔmɛ lɛ é sixu nyɔ́ zán nú mɛ winnyawinnya lɛ, hwenu e ye na ɖò nǔ gbigbɔ tɔn lɛ gbé nya wɛ é. Hwenu e ye kpó ɖò wemaxɔmɛ yì wɛ é ɔ, ye ɖó na dó gǎn tawun bo na flín ‘mɛ e ɖó ye é,’ gbɔn nǔ gbigbɔ tɔn lɛ sísɔ́ ɖó tɛn nukɔntɔn ɔ mɛ gblamɛ.—Nǔt. 12:1.

²³ Enyi Klisanwun winnyawinnya ɖé wɛ nú we, bɔ a kpò ɖò wemaxɔmɛ yì wɛ hǔn, cɔ́ hwiɖée bo ma dó gbɛ̌ e ma ɖò dandan ǎ é xá mɛ winnyawinnya gbɛ̀ ɔ tɔn lɛ ó. (2 Tim. 3:1, 2) Ðó Jehovah ko sɔnǔ nú nǔ e na cyɔn alɔ mǐ jí lɛ é wutu ɔ, nǔ gegě wɛ a sixu wà bɔ gbɛ̀ ɔ na wà nǔ dó wǔ we ǎ. (Ðɛh. 23:4; 91:1, 2) Enɛ wu ɔ, nú a na nya xɛ ɖò hwiɖée jí hǔn, nɔ ɖu lè nǔ e Jehovah sɔnǔ na lɛ é tɔn mlɛ́mlɛ́.—Ðɛh. 23:5.

²⁴ Bonu Kúnnuɖetɔ́ winnyawinnya lɛ na ɖó wǔ zɔ nú gbɛ̀ ɔ hwenu e ye kpó ɖò wemaxɔmɛ yì wɛ é ɔ, ye mɛ gegě nɔ nyi alɔ nú nǔwiwa wemaxɔmɛ gudo tɔn lɛ. É sixu vɛwǔ bɔ wemaxɔmɛvígbɛ́ lɛ kpo mɛ̌si lɛ kpo na mɔ nǔ jɛ enɛ mɛ. Amɔ̌, nǔ wà bo nyɔ́ Mawu nukúnmɛ wɛ ɖò taji. Tinmɛ tɔn wɛ nyí ɖɔ a na zán ayixa towe e è kplɔ́n kpo Biblu kpo é, bo kánɖeji ɖɔ emi kún na ɖó nu ɖò agbahwlɛnhwlɛn alǒ hunjijɛ dó tò mɛtɔn jí e tíìn ɖò gbɛ̀ ɔ mɛ é mɛ ó. (Ga. 5:19, 26) Gbɔn tóɖiɖó wěɖexámɛ e jinjɔn Biblu jí bɔ mɛjitɔ́ e yí wǎn nú Mawu lɛ é nɔ na lɛ é, kpo gbɛ̌ ɖagbe e ɖò agun ɔ mɛ lɛ é didó kpo gblamɛ ɔ, mi mɛ mɛ winnyawinnya lɛ sixu tɛ́dó nǔgbododó jlɔjlɔ Jehovah tɔn lɛ wu.

AGBAZAZƆ́ KPO GBƐ̌DIDÓ LƐ KPO

²⁵ Biblu byɔ ɖò tatɔ́ xwédo tɔn lɛ sí ɖɔ dandan wɛ ye ɖó na kpé nukún dó xwédo yetɔn wu. (1 Tim. 5:8) Nǔ nyí mɔ̌ có, ɖó ye nyí sinsɛnzɔ́watɔ́ wutu ɔ, ye tuùn ɖɔ agbazazɔ́ emitɔn kún ɖó na jɛ nukɔn nú nǔ Axɔ́suɖuto ɔ tɔn lɛ gbé nyinya ó. (Mat. 6:33; Hlɔ. 11:13) Nú ye nɔ ɖó sísí nú Mawu, bɔ nǔɖuɖu kpo avɔ kpo e ye ɖó é nɔ kpé ye ɔ, ye nɔ nyi alɔ nú adohu adohu e nǔ gbɛ̀ ɔ tɔn lɛ gbé nyinya nɔ hɛn wá lɛ é, kpo fɛ́ca e ye nyí é kpo.—1 Tim. 6:6-10.

²⁶ Klisanwun ɖěɖee zé yeɖée jó nú Mawu, bo nɔ wà agbazazɔ́ lɛ é bǐ ɖó na nɔ hɛn nǔgbododó Biblu tɔn lɛ dó ayi mɛ. È ni kpé nukún dó mɛɖée wu kpo gbejininɔ kpo sín tinmɛ wɛ nyí ɖɔ è ni gbɛ́ ɖɔ è kún na ɖ’alɔ ɖò nǔ ɖěɖee gbà Mawu sín sɛ́n lɛ alǒ gbà sɛ́n tò ɔ tɔn lɛ é ɖě mɛ ó. (Hlɔ. 13:1, 2; 1 Kɔ. 6:9, 10) Mǐ nɔ hɛn awovínú e ɖò gbɛ̌ nyanya lɛ didó mɛ lɛ é dó ayi mɛ. Ðó mǐ nyí ahwanfuntɔ́ Klisu tɔn lɛ wutu ɔ, mǐ nɔ lɔn bo nɔ ɖ’alɔ ɖò ajɔ̌wiwa gbɛ̀ ɔ tɔn e na t’afɔ nǔgbododó Mawu tɔn lɛ jí, wà nǔ dó wǔ e mǐ mɛ Klisanwun lɛ nɔ ɖó zɔ é wu, alǒ hɛn ninɔmɛ mǐtɔn gblé ɖò gbigbɔ lixo lɛ é mɛ ǎ. (Eza. 2:4; 2 Tim. 2:4, nwt) Mǐ ka nɔ ɖó kancica xá sinsɛn e nyí kɛntɔ́ Mawu tɔn lɛ é ǎ, ye wɛ è ylɔ́ ɖɔ ‘Babilɔnu ɖaxó ɔ.’—Nǔɖe. 18:2, 4; 2 Kɔ. 6:14-17.

²⁷ Nǔgbododó jlɔjlɔ Mawu tɔn lɛ xwixwedó na zɔ́n bɔ mǐ na nɔ jla ajɔ̌nú lɛ, alǒ nya lè mɛɖesunɔ tɔn ɖevo lɛ gbé, hwenu e mǐ kpo nɔví lɛ kpo kplé bo na sɛn Mawu é ǎ. Linlin ɖokpo géé e wu mǐ nɔ kplé ɖó kpɔ́ xá mɛ ɖevo lɛ ɖò kplé Klisanwun tɔn lɛ, kpléɖókpɔ́ lɛdo tɔn lɛ, kpo kpléɖókpɔ́ ɖaxó lɛ kpo jí é wɛ nyí ɖɔ mǐ na sɛn Jehovah. Mǐ nɔ ɖu nǔ ɖò tavo gbigbɔ tɔn Jehovah tɔn tó, bo nɔ “na akɔ́nkpinkpan mǐɖée.” (Hlɔ. 1:11, 12; Ebl. 10:24, 25) Nǔ gbigbɔ tɔn lɛ kɛɖɛ wɛ è ɖó na nɔ wà ɖò kplékplé mɔhun lɛ hwenu.

BǓNINƆ KLISANWUN TƆN

²⁸ Nǔgbododó jlɔjlɔ Jehovah tɔn lɛ lɛ́ byɔ ɖɔ togun tɔn ni ‘sɔ́ fífá e dɔn ye cá, bɔ ye nyí ɖokpo ɔ dó hɛn bǔténinɔ e [gbigbɔ mímɛ́] na ye ɔ ɖó te.’ (Efɛ. 4:1-3) Ye nɔ ba na nyɔ́ ɖò yeɖée nukúnmɛ kpowun ǎ, loɔ, mɛ ɖokpo ɖokpo nɔ ba na wà ɖagbe nú mɛ ɖevo lɛ. (1 Tɛ. 5:15) É ɖò wɛn ɖɔ nǔ mɔhun wɛ a nɔ mɔ ɖò agun towe mɛ. Mǐ na bo tlɛ yí kplɔ́n ɖebǔ, ɖò ninɔmɛ ɖebǔ mɛ, bo gosin akɔ, alǒ tò ɖebǔ mɛ ɔ, nǔgbododó jlɔjlɔ ɖokpo ɔ lɛ wɛ ɖò ali xlɛ́ mǐ mɛ bǐ wɛ. Mɛ e ma tlɛ ɖò Jehovah sɛn wɛ ǎ lɛ é nɔ ɖó ayi togun Jehovah tɔn sín jijɔ nukúnɖeji enɛ wu.—1 Pi. 2:12.

²⁹ Mɛsɛ́dó Pɔlu tɛɖɛ̌ nǔ e jí bǔninɔ jinjɔn é jí, bo wlan ɖɔ: “Agbaza ɖokpo géé wɛ ɖè, bɔ [gbigbɔ mímɛ́] ɖokpo géé ɖè lee nukúnɖiɖó e wu Mawu ylɔ́ mǐ é lɔ nyí ɖokpo géé gbɔn é. Aklunɔ ɖokpo géé wɛ ɖè, bɔ nǔɖiɖi ɖokpo géé ɖè, bɔ [baptɛm] ɖokpo géé ɖè. Mawu ɖokpo géé wɛ ɖè, bo nyí Tɔ́ nú mɛ bǐ, bo kpa acɛ nú mɛ bǐ, bo ɖò azɔ̌ wà wɛ ɖò mɛ bǐ mɛ, bo ɖò mɛ bǐ mɛ.” (Efɛ. 4:4-6) Enɛ byɔ ɖɔ nukúnnú mimɔ jɛ nǔkplɔnmɛ dodó Biblu tɔn lɛ, kpo nǔkplɔnmɛ Biblu tɔn ɖěɖee gɔ́ngɔ́n bo kúnkplá Nǔbǐwukpétɔ́ e Jehovah nyí é lɛ é mɛ kpo ɖó na nyí ɖokpo ɔ. Jehovah sɔ́ gbè mímɛ́ nǔgbo ɔ tɔn dó nu nú togun tɔn, enɛ zɔ́n bɔ ye nɔ sɛn ɛ alɔ ɖò alɔ mɛ.—Sof. 3:9, nwt.

³⁰ Bǔninɔ kpo fífá kpo e ɖò agun Klisanwun tɔn mɛ é nyí jɔtɛn kɔfánúmɛ tɔn ɖé nú mɛ ɖěɖee nɔ sɛn Jehovah lɛ é bǐ. Mǐ mɔ lee akpá elɔ e Jehovah dó é jɛnu gbɔn é: “Un na kplé mi ɖó kpɔ́, lee è nɔ kplé gbɔ̌ dó wutó mɛ é ɖɔhun.” (Micée 2:12) Mǐ jló na hɛn bǔninɔ kpo fífá kpo enɛ ɔ wu, gbɔn nǔgbododó jlɔjlɔ Jehovah tɔn lɛ wu títɛ́dó gblamɛ.

³¹ Awǎjijɛnɔ wɛ nú mɛ ɖěɖee è yí gbè bɔ ye ɖò agun mímɛ́ Jehovah tɔn mɛ lɛ é! É jɛxa ɖɔ mǐ ni sɔ́ nǔ ɖebǔ e é na byɔ lɛ é dó savɔ̌, bonu è na sɔ́ nyikɔ Jehovah tɔn dó ylɔ́ mǐ. Ee mǐ na kpó ɖò kancica xɔ akwɛ ɖé ɖó xá Jehovah wɛ é ɔ, mǐ na lɛ́ dó gǎn tawun bo na tɛ́dó nǔgbododó jlɔjlɔ tɔn lɛ wu, lobo na lɛ́ byɔ mɛ ɖevo lɛ ɖɔ ye lɔ ni wà mɔ̌.—2 Kɔ. 3:18.