Fífá kpo Mimɛ̌jininɔ Agun ɔ Tɔn Kpo

XWÈ ɖokpo ɖokpo mɛ ɔ, gbɛtɔ́ afatɔ́n mɔkpan nɔ nyi ahwan wá sinsɛn-biblo mimɛ̌ Jehovah tɔn mɛ, bonu nǔɖɔɖ’ayǐ Biblu tɔn na dó jɛnu. (Micée 4:1, 2) Xomɛ nɔ hun mǐ tawun, bɔ mǐ nɔ yí ye dó “agun Mawu tɔn” mɛ. (Mɛ. 20:28) Ali e hun nú ye bɔ ye na sɛn Jehovah xá mǐ é nɔ sù nukún yetɔn mɛ, bɔ ye nɔ ɖu vivǐ palaɖisi gbigbɔ tɔn mǐtɔn e nyí fí ɖé bo mɛ́, bɔ fífá lɛ́ tíìn ɖè é tɔn. Gbigbɔ mímɛ́ Mawu tɔn kpo wěɖexámɛ e ɖò Xó tɔn mɛ bɔ nǔnywɛ kpé lɛ é kpo nɔ d’alɔ mǐ bɔ mǐ nɔ jɛhun dó fífá jí bo nɔ hɛn agun ɔ ɖó mimɛ̌ jí.—Ðɛh. 119:105; Zak. 4:6.

² Gbɔn nǔgbododó Biblu tɔn lɛ zinzan gblamɛ ɔ, mǐ nɔ sɔ́ “gbɛtɔ́ yɔyɔ̌” ɔ dó. (Kolo. 3:10) Mǐ nɔ myɔ nukún dó gbemanɔkpɔ́ klewun klewun lɛ. Linlin e Jehovah nɔ ɖó dó nǔ lɛ wu é ɖiɖó na zɔ́n bɔ mǐ na ɖu ɖò linlin gbɛ̀ ɔ tɔn e nɔ klán mɛ lɛ é jí, bo na nɔ bǔ bo w’azɔ̌ nɔví nɔví ɖɔhun gbɔn gbɛ̀ ɔ bǐ mɛ.—Mɛ. 10:34, 35.

³ É ɖò mɔ̌ có, sín hweɖenu jɛ hweɖenu ɔ, tagba lɛ nɔ xwetɔ́n bo nɔ wà nǔ dó fífá kpo bǔninɔ agun ɔ tɔn kpo wu. Etɛ ka nɔ zɔ́n mɔ̌? Ðò ninɔmɛ gegě mɛ ɔ, wěɖexámɛ Biblu tɔn lɛ ma xwedó wɛ nɔ zɔ́n. Mǐ ɖó na kpó ɖò xwi ɖí xá nǔ e hwɛhuhu gbaza mǐtɔn nɔ jló lɛ é wɛ. Mǐ mɛ bǐ wɛ nɔ hu hwɛ. (1 Jaan 1:10) Mɛɖé sixu ɖè afɔ nyi dò, bɔ é na dɔn nǔ e blí ɖò walɔ alǒ gbigbɔ lixo é wá agun ɔ mɛ. Nǔ e mǐ ma lin tamɛ cobo ɖɔ alǒ wà ǎ lɛ é sixu vɛ́ nú mɛɖé, alǒ mǐ sixu klɛ́n afɔ, ɖó nǔ e mɛɖé ɖɔ alǒ wà é wu. (Hlɔ. 3:23) Nǔ wá nyí mɔ̌ ɔ, etɛ mǐ ka sixu wà dó ɖeɖɛ tagba lɛ?

⁴ Nǔ enɛ lɛ bǐ nɔ ɖu ayi mɛ nú Jehovah wanyiyinɔ ɔ. Xó tɔn ɖè wě xá mǐ dó nǔ e mǐ na wà hwenu e tagba lɛ na xwetɔ́n é wu. Lɛngbɔ̌nyitɔ́ gbigbɔ tɔn wanyiyinɔ lɛ nɔ d’alɔ mɛ, ye wɛ nyí mɛxo agun tɔn lɛ. Gbɔn wěɖexámɛ yetɔn e jinjɔn Biblu jí lɛ é zinzan gblamɛ ɔ, mǐ sixu vɔ́ kancica e ɖò mǐ kpo mɛ ɖevo lɛ kpo tɛntin é blóɖó, bo na lɛ́ kpó ɖò kancica ɖagbe ɖé ɖó xá Jehovah wɛ. Enyi è dɔn tó nú mǐ alǒ gbɛ́ nǔ nú mǐ ɖó hwɛ e mǐ hu é ɖé wu ɔ, mǐ sixu ɖeji ɖɔ tódɔnnúmɛ mɔhun nyí wǎn e Tɔ́ mǐtɔn jixwé tɔn ɔ yí nú mǐ é sín xlɛ̌ ɖé.—Nǔx. 3:11, 12; Ebl. 12:6.

GBEMANƆKPƆ́ KLEWUN KLEWUN LƐ ÐIÐEÐƐ

⁵ É sixu wá sù hweɖelɛnu, bɔ hwɛgbe alǒ tagba klewun klewun lɛ na tíìn ɖò mɛ e ɖò agun ɔ mɛ lɛ é tɛntin. È ɖó na yawǔ sɔ́ wanyiyi nɔví nɔví tɔn sín linlin dó ɖeɖɛ ye. (Efɛ. 4:26; Fili. 2:2-4; Kolo. 3:12-14) A na mɔ ɖɔ tagba mɛɖesunɔ tɔn ɖěɖee kúnkplá kancica e a ɖó xá Klisanwun hatɔ́ ɖé é sixu gbò, hwenu e a zán wěɖexámɛ mɛsɛ́dó Piyɛ́ɛ tɔn elɔ é: “Mi ni ɖó wanyiyi ɖaxó nú miɖée; ɖó wanyiyi ɔ nɔ súnsún hwɛ wɔbuwɔbu e è hu ɔ sín kɔ nú mɛ.” (1 Pi. 4:8) Biblu ɖɔ: “Mǐ mɛ bǐ wɛ nɔ wà nǔ nyi dò gbɔn alɔkpa gegě mɛ.” (Ja. 3:2) Enyi mǐ nɔ nyi Sɛ́n Siká tɔn ɔ, bo nɔ wà nǔ ɖěɖee mǐ jló ɖɔ mɛ ɖevo lɛ ni wà nú mǐ é nú ye ɔ, hwɛhwɛ wɛ mǐ na nɔ sɔ́ hwɛ klewun klewun e è hu dó mǐ lɛ é kɛ mɛ, bo na nɔ wɔn.—Mat. 6:14, 15; 7:12.

⁶ Enyi a mɔ ɖɔ emi ɖɔ alǒ wà nǔ nyi dò nú mɛɖé ɔ, a ɖó na ɖè afɔ nukɔntɔn ɔ, bo yì dóhwɛ gbɔ xá ɛ dó mɛhwenu. Flín ɖɔ enɛ kúnkplá kancica e ɖò hwi kpo Jehovah kpo tɛntin é. Jezu ɖè wě xá ahwanvu tɔn lɛ, bo ɖɔ: “Hǔn, enyi a wá vɔsakpe nukɔn, bo ja nǔɖe xwlé Mawu gbé, bo flín ɖɔ hwɛgbe ɖé ɖò nɔzo emitɔn kpodo emi kpo tɛntin hǔn, jǒ vɔsanú e xwlé Mawu gbé wɛ a ja ɔ dó nyi vɔsakpe ɔ nukɔn, bo yì dóhwɛ gbɔ xá nɔzo towe hwɛ̌; enɛ ɔ gudo ɔ, lɛ̌kɔ bo wá zé vɔsanú towe xwlé Mawu.” (Mat. 5:23, 24) É sixu nyí nukúnnúmɔjɛnǔmɛ agɔ ɖé. Nǔ nyí mɔ̌ hǔn, hun xóɖɔɖókpɔ́ sín ali. Enyi xóɖɔɖókpɔ́ ɖagbe tíìn ɖò mɛ e ɖò agun ɔ mɛ lɛ é tɛntin ɔ, é nɔ zɔ́n bɔ è nɔ ɖó mɔjɛmɛ agɔ ǎ, bɔ è nɔ lɛ́ ɖeɖɛ tagba ɖěɖee nɔ xwetɔ́n ɖó hwɛhuhu gbaza mǐtɔn wutu lɛ é.

WĚÐEXÁMƐ JINJƆN BIBLU JÍ E ÐÒ DANDAN LƐ É

⁷ Hweɖelɛnu ɔ, nukúnkpénuwutɔ́ lɛ sixu mɔ ɖɔ é ɖò dandan ɖɔ è ni ɖè wě xá mɛɖé, bo na dó jla linlin tɔn ɖó. Enɛ nɔ bɔwǔ hwebǐnu ǎ. Mɛsɛ́dó Pɔlu wlan sɛ́dó Klisanwun e ɖò Galati lɛ é ɖɔ: “Nɔví lɛ mi! Mi mɛ e ko ɖó nukɔnyiyi ɖò nǔɖiɖi mɛ lɛ ɔ, enyi mɛɖé ɖò nǔ ɖebǔ wà nyi dò wɛ, bonu è gbò è dó hǔn, mi ɖè è ɖó ali jí; mi ka bló kpodo xomɛfífá kpo.”—Ga. 6:1.

⁸ Gbɔn ali xíxlɛ́ lɛngbɔ̌kpó ɔ gblamɛ ɔ, nukúnkpénuwutɔ́ lɛ sixu cyɔn alɔ agun ɔ jí ɖò awovínú gbigbɔ tɔn gegě nukɔn, bo sixu bló bɔ tagba syɛnsyɛn lɛ na vunkan ǎ. Mɛxo agun tɔn lɛ nɔ tɛ́n kpɔ́n bo nɔ wà sinsɛnzɔ́ yetɔn ɖò agun ɔ mɛ, bɔ é nɔ sɔgbe xá akpá elɔ e Jehovah dó gbɔn Ezayíi jí é: “Mɛ ɖokpo ɖokpo na cí fí e è nɔ bɛ̀ yɛ ɖè bo nɔ gló jɔhɔn é ɖɔhun; ye na cí fí e è nɔ bɛ̀ sin ɖè é ɖɔhun; ye na cí tɔhwín e ɖò ayikúngban xúxú jí é ɖɔhun, ye na cí só ɖaxó ɖé sín yɛtɛn ɖɔhun ɖò tò e mɛ hwesivɔ nɔ hun ɖè ganji é.”—Eza. 32:2.

KƐ́N ÐIÐÓ NǓ HANNYAHANNYAWATƆ́ LƐ JÍ

⁹ Mɛsɛ́dó Pɔlu gb’akpá nú mɛ dó mɛ ɖěɖee sixu hɛn nǔ gblé dó agun ɔ wu lɛ é wu. Pɔlu ɖɔ: “Mǐ ɖò byɔbyɔ mi wɛ . . . ɖɔ mi nɔ nɔ zɔ nú nɔví mǐtɔn e nɔ nɔ fɔnlín gbɛmɛ [alǒ nyí nǔ hannyahannyawatɔ́], bo ma nɔ jló na wà nǔɖe ǎ, bo ma nɔ xwedó nǔ e mǐ kplɔ́n ye ɔ ǎ lɛ bǐ.” É wlan nǔ elɔ lɛ dó tinmɛ xó enɛ: “Nǔ e kplɔ́n mi wɛ mǐ ɖè ɖò wema elɔ mɛ ɔ, enyi mɛɖé ma bló ɖ’eji ǎ hǔn, mi ɖó kɛ́n jǐ tɔn, bo ma dó gbɛ̌ tɔn ó, bonu winnya na hu i. Amɔ̌ mi ma ka sɔ́ ɛ dó ɖó kɛntɔ́ na ó; loɔ, mi kplɔ́n nǔ i nɔví ɖɔhun.”—2 Tɛ. 3:6, 14, 15.

¹⁰ Hweɖelɛnu ɔ, mɛɖé sixu ɖó aca ɖé, b’ɛ ka na nyí hwɛ syɛnsyɛn e na zɔ́n bɔ è sixu ɖè è sín agun mɛ é ǎ, bo ka na nyí sísí ɖaxó ma ɖó nú nǔgbododó e nɔ xlɛ́ ali Klisanwun lɛ é. É sixu nyí fɔnlín ɖiɖi, mɛnúɖiɖɔ, alǒ jikwikwi zɛ xwé wu. É sixu nɔ “ɖò nu dó mɛ ɖevo xó mɛ wɛ.” (2 Tɛ. 3:11) Alǒ, é sixu nyí mɛɖé bo nɔ ba wlɛnwín bá táfú mɛ ɖevo lɛ, alǒ nɔ ɖ’alɔ ɖò ayiɖeɖayǐ masɔgbe ɖé mɛ. Nǔ hannyahannya wiwa nyí nǔ baɖabaɖa ɖé, bo nɔ hɛn agun ɔ blí, lobo tlɛ sixu wà nǔ dó Klisanwun ɖevo lɛ wu.

¹¹ Mɛxo agun tɔn lɛ na tɛ́n kpɔ́n jɛ nukɔn, bo d’alɔ nǔ hannyahannyawatɔ́ ɖé, gbɔn wě e jinjɔn Biblu jí lɛ é ɖiɖe xá ɛ gblamɛ. Amɔ̌, enyi è ko gb’akpá nú mɛ ɔ azɔn mɔkpan có, é ka kpó ɖò afɔ tɛ nǔgbododó Biblu tɔn lɛ jí wɛ ɔ, mɛxo lɛ sixu wá gbeta ɔ kɔn bo xwlé xóɖiɖɔ akpágbánúmɛ tɔn ɖé agun ɔ. Mɛxo agun tɔn lɛ na zán nukúnnúmɔjɛnǔmɛ dó kpɔ́n ɖɔ ninɔmɛ bǔnɔ ɖé ka syɛn sɔmɔ̌, bo na wà nǔ dó mɛ ɖevo lɛ wu à jí, cobo xwlé xóɖiɖɔ akpágbánúmɛ tɔn ɖé mɛ. Xóɖɔtɔ́ ɔ na xwlé wěɖexámɛ e jɛxa lɛ é mɛ dó nǔ hannyahannya sín walɔ ɔ wu, amɔ̌, é ka na ylɔ́ nǔ hannyahannyawatɔ́ ɔ sín nyikɔ ǎ. Mɔ̌ mɛ ɔ, mɛ ɖěɖee tuùn ninɔmɛ e xó ɖɔ wɛ è ɖè ɖò xóɖiɖɔ ɔ mɛ lɛ é na nyi alɔ nú gbɛ̌didó xá mɛ mɔhun, enyi ye tlɛ na kpó ɖò nǔ gbigbɔ tɔn lɛ wà ɖó kpɔ́ xá ɛ wɛ, bo na nɔ “kplɔ́n nǔ i nɔví ɖɔhun” ɔ nɛ.

¹² Nukúnɖiɖó tíìn ɖɔ wǔ e Klisanwun gbejinɔtɔ́ lɛ na ɖó zɔ nú nǔ hannyahannyawatɔ́ ɔ tawun é na zɔ́n bɔ winnya na hu i dó nǔ e wà wɛ é ɖè é wu, bɔ enɛ na sísɛ́ ɛ b’ɛ na huzu. Enyi é wá ɖò wɛn ɖɔ mɛ ɔ jó gbɛ̀ hannyahannya e zán wɛ é ɖè é dó ɔ, é sɔ́ byɔ ɖɔ è ni kpó ɖò nǔ wà xá ɛ wɛ mɛ e jí è ɖó kɛ́n é ɖé ɖɔhun ǎ.

NUKÚNKPÍKPÉ DÓ HWƐ SYƐNSYƐN ÐÉ LƐ WU

¹³ Jlǒ sísɔ́ dó myɔ nukún dó nǔwanyido lɛ, bo sɔ́ ye kɛ mɛ xlɛ́ ɖɔ mǐ kún kéya na ó, alǒ é nyɔ́ nukún mǐtɔn mɛ ǎ. È sixu sɔ́ nǔ e mǐ nɔ wà nyi dò lɛ é bǐ kplá kɔ nú hwɛhuhu sín gǔ e mǐ ɖu é ǎ; mɔ̌ jɛn é ma ka sɔgbe ɖɔ è ni myɔ nukún dó nǔwanyido e hugǎn klewun klewun lɛ é lɔ ǎ é nɛ. (Lev. 19:17; Ðɛh. 141:5) Akɔjijɛsɛ́n ɔ xlɛ́ ɖɔ hwɛ ɖé lɛ tíìn, bo syɛn hú ɖevo lɛ, bɔ mɔ̌ wɛ é ka lɛ́ nyí gbɔn ɖò tuto Klisanwun tɔn ɔ mɛ.—1 Jaan 5:16, 17.

¹⁴ Jezu tɛɖɛ̌ afɔ tawun tawun e è na ɖè dó ɖeɖɛ tagba syɛnsyɛn e sixu xwetɔ́n ɖò Klisanwun hatɔ́ lɛ kpo mǐ kpo tɛntin lɛ é jí. Ð’ayi nǔ ɖěɖee è na wà bɔ é ɖɔ lɛ é wu: “Enyi mɛ e nyí nɔví towe ɖò nǔɖiɖi mɛ ɔ ɖě wà nǔ nyi dò nú we hǔn, [1] yì mɔ ɛ, bo ɖɔ nǔ e é wà nyi dò ɔ n’i, bonu hwi kpo é kpo we lɛ ni ɖɔ gbò, ɖò miɖée tɛntin. Nú é sè xó towe hǔn, a ɖè è ɖó ali jí nɛ. Nú é ma ka jló na sè xó towe ǎ hǔn, [2] kplá mɛ ɖokpo abǐ mɛ we dó hwiɖée jí, bonu mi ɖɔ xó ɔ gbò, ɖò kúnnuɖetɔ́ we abǐ atɔn nukɔn, lee sɛ́n ɔ zɔ́n gbɔn é. Nú é ma lɛ́ sè xó yetɔn hwenɛnu ǎ ɔ, [3] ɖɔ nú agun ɔ, bonu ye ni ɖɔ nǔ e é wà nyi dò ɔ n’i; nú é ma lɛ́ sè ye lɔmɔ̌ tɔn ǎ jɛn wɛ hǔn, bo sɔ́ ɛ dó mɔ mɛ e ma nyí Jwifu ǎ é na, bo lɛ́ sɔ́ ɛ dó mɔ tokwɛyitɔ́ na.”—Mat. 18:15-17.

¹⁵ Sɔgbe kpo nǔjlɛdonǔwu Jezu tɔn e è wlan dó Matie 18:23-35 mɛ é kpo ɔ, é jɛ wě ɖɔ hwɛ ɖěɖee xó ɖɔ wɛ Matie 18:15-17 ɖè lɛ é sixu kúnkplá akwɛ, alǒ ayikúngban kpo nǔɖokan mɛɖesunɔ tɔn lɛ kpo, ɖi axɔ́ e è ɖu bo ma sú ǎ é ɖé, alǒ ahizi ɖuɖu. Alǒ, é sixu nyí xókpadómɛnu, ee hɛn nyikɔ mɛɖé tɔn blí tawun é.

¹⁶ Enyi a mɔ gannaganna ɖɔ mɛɖé ɖò agun ɔ mɛ, bo hu hwɛ mɔhun ɖé dó we hǔn, ma hwlɛndo bo yì mɔ mɛxo agun tɔn lɛ, bo byɔ ye ɖɔ ye ni gbò hwɛ ɔ nú emi ó. Lee Jezu ɖè wě tɔn xá mɛ gbɔn é ɔ, ɖɔ xó xá mɛ e hu hwɛ dó we é jɛ nukɔn hwɛ̌. Tɛ́n kpɔ́n bonu mi ɖɔ xó ɔ gbò ɖò mi mɛ we lɛ kɛɖɛ tɛntin. Hɛn dó ayi mɛ ɖɔ Jezu kún ɖɔ ‘yì mɔ ɛ ɖokpo kpowun, bo ɖɔ nǔ e é wà nyi dò ɔ n’i’ ó. Enɛ wu ɔ, enyi mɛ ɔ ma yí gbè nú hwɛ tɔn, bo byɔ hwɛsɔ́kɛ ǎ ɔ, é sixu nyɔ́ ɖɔ a ni lɛkɔ yì ɖɔ xó xá ɛ hweɖevonu. Enyi mi sixu ɖɔ xó ɔ gbò gbɔn mɔ̌ ɔ, é ɖò wɛn ɖɔ jla e a ma jla hwɛ e mɛ ɔ hu dó we é, alǒ hɛn e a ma hɛn nyikɔ ɖagbe e é ɖó é blí ɖò agun ɔ mɛ ǎ é na sù nukún tɔn mɛ. A na “ɖè è ɖó ali jí.”

¹⁷ Enyi mɛ e hu hwɛ ɔ é yí gbè tɔn, byɔ hwɛsɔ́kɛ, bo ɖè afɔ e jɛxa lɛ é bá jla nǔwanyido ɔ ɖó ɔ, é sɔ́ byɔ ɖɔ a ni bló nǔ wegɔ́ ɔ ǎ. Hwɛ ɔ syɛn có, mɛ ɖěɖee nǔwanyido mɔhun kan lɛ é sixu ɖɔ gbò ɖò yeɖée tɛntin.

¹⁸ Enyi a ma kpéwú bo ɖè nɔví towe ɖó ali jí, gbɔn hwɛ e é hu dó we é ɖiɖɔ n’i ɖò “hwi kpo é kpo we lɛ” tɛntin gblamɛ ǎ ɔ, a sixu wà nǔ e Jezu ɖɔ bɔ d’ewu é, a na “kplá mɛ ɖokpo abǐ mɛ we dó hwiɖée jí,” bɔ mi na lɛ́vɔ ɖɔ xó xá nɔví towe. Nǔ e gbé mɛ ɖěɖee a na kplá dó hwiɖée jí lɛ é lɔmɔ̌ ɖó na nya é wɛ nyí ye na ɖè nɔví towe ɖó ali jí. É na nyɔ́ ɖɔ ye lɔ ni nyí kúnnuɖetɔ́ hwɛ e è hu é tɔn, amɔ̌, enyi mɛɖé ma mɔ nǔ e jɛ lɛ é ǎ ɔ, a sixu byɔ mɛ ɖokpo alǒ mɛ we ɖɔ ye ni wá nɔ xóɖɔɖókpɔ́ ɔ tɛnmɛ. Ye sixu ko mɔ nǔ kpɔ́n ɖò nǔ e jɛ é linu, bo na kpéwú bá ɖexlɛ́ ɖɔ nǔ e jɛ é nyí hwɛ bɔ è hu nǔgbo alǒ é nyí mɔ̌ ǎ. Mɛxo agun tɔn e è sɔ́ bɔ ye na nɔ tɛn tɔn mɛ lɛ é sɔ́ agun ɔ sín afɔ ɖó te ǎ, ɖó kplékplé mɛxo lɛ tɔn wɛ sɔ́ ye bonu ye na wà mɔ̌ ǎ wutu.

¹⁹ Enyi a dó gǎn bo mɔ ɛ azɔn mɔkpan (hwiɖokponɔ yì ɖɔ xó xá ɛ, bo lɛ́ kplá mɛ ɖokpo alǒ mɛ we ɖevo dó hwiɖée jí yì gɔ̌n tɔn) có xó ɔ ma ka gbò ǎ, bɔ a mɔ ɖɔ emi kún sixu jó xó ɔ dó ó ɔ, a ɖó na yì tinmɛ nú nukúnkpénuwutɔ́ agun ɔ tɔn lɛ. Flín ɖɔ nǔ e gbé nya wɛ ye ɖè é wɛ nyí ɖɔ ye na bló bɔ agun ɔ na nɔ fífá mɛ, bo lɛ́ nɔ mimɛ̌ jí. Nú a tinmɛ xó ɔ nú mɛxo agun tɔn lɛ gudo ɔ, a ɖó na jó xó ɔ dó alɔ yetɔn mɛ, bo lɛ́ ɖeji dó Jehovah wu. A ɖó na lɔn gbeɖé bɔ walɔ mɛɖé tɔn na nyí afɔklɛ́nnú nú we, alǒ fin awǎjijɛ e a ɖó ɖò sinsɛnzɔ́ Jehovah tɔn mɛ é sín así we ǎ.—Ðɛh. 119:165.

²⁰ Lɛngbɔ̌nyitɔ́ lɛngbɔ̌kpó ɔ tɔn lɛ na ba dò nú xó ɔ. Enyi é wá ɖò wɛn ɖɔ hwɛ syɛnsyɛn ɖé wɛ mɛ ɔ hu dó we nǔgbo, bo ka gbɛ́ ɖɔ emi kún na lɛkɔ sín gudo, lobo sɔ́ jlǒ dó jla nǔ lɛ ɖó lee é jɛxa gbɔn é ó ɔ, é sixu byɔ ɖɔ wěɖegbɛ́ nukúnkpénuwutɔ́ lɛ tɔn ɖé ni ɖè hwɛhutɔ́ ɔ sín agun ɔ mɛ. Mɔ̌ mɛ ɔ, ye nɔ cyɔn alɔ lɛngbɔ̌kpó ɔ jí, bo nɔ nya xɛ ɖò mimɛ̌ jí e agun ɔ ɖè é jí.—Mat. 18:17.

NUKÚNKPÍKPÉ DÓ NǓNYANYAWIWA SYƐNSYƐN LƐ WU

²¹ Nǔwanyido syɛnsyɛn ɖé lɛ, ɖi agalilɛ, afɔdógbě alǒ nyɔnu ɖevo biba, sunnu na ɖóxó xá sunnu, abǐ nyɔnu na ɖóxó xá nyɔnu, gǔfínfɔ́n, vodunsinsɛn kpo hwɛ ɖaxó mɔhun lɛ kpo, byɔ nǔ hú mɛ e è wà nǔ nyi dò na é ni sɔ́ hwɛ kɛ mɛ kpowun. (1 Kɔ. 6:9, 10; Ga. 5:19-21) Ðó hwɛ syɛnsyɛn mɔhun lɛ nɔ wà nǔ dó mimɛ̌ jí e agun ɔ ɖè ɖò walɔ kpo gbigbɔ kpo lixo é wu wutu ɔ, è ɖó na ɖɔ ye nú mɛxo agun tɔn lɛ bɔ ye na kpé nukún d’ewu. (1 Kɔ. 5:6; Ja. 5:14, 15) Mɛɖé lɛ sixu sɛkpɔ́ mɛxo agun tɔn lɛ, bo ɖɔ hwɛ e yeɖesunɔ hu é, alǒ nǔ e ye tuùn dó hwɛ e mɛ ɖevo lɛ hu é wu é nú ye. (Lev. 5:1; Ja. 5:16) Ðebǔ wɛ mɛxo agun tɔn lɛ na bo sè hwɛ syɛnsyɛn e mɛ e ko bló baptɛm bo nyí Kúnnuɖetɔ́ é ɖé hu é gbɔn ɔ, mɛxo agun tɔn we na ba dò nú xó ɔ hwɛ̌. Enyi xó e è sè é nyí nǔgbo, bɔ kúnnuɖenú lɛ xlɛ́ ɖɔ è hu hwɛ syɛnsyɛn ɖé ɔ, kplékplé mɛxo lɛ tɔn na ɖó wěɖegbɛ́ hwɛɖiɖɔ tɔn ɖé ayǐ, bɔ é hwe bǐ ɔ, mɛxo agun tɔn atɔn na ɖ’emɛ, bɔ ye na kpé nukún dó xó ɔ wu.

²² Mɛxo agun tɔn lɛ nɔ ɖó ayi te dó kpé nukún dó lɛngbɔ̌kpó ɔ wu, bo nɔ ba na cyɔn alɔ jí sín nǔ ɖebǔ e na hɛn nǔ gblé dó wǔ tɔn ɖò gbigbɔ lixo é sí. Ye nɔ lɛ́ tɛ́n kpɔ́n bo nɔ zán Xó Mawu tɔn kpo azɔ̌tuùntuùn kpo, dó gbɛ́ nǔ nú mɛɖebǔ e ɖò ali bú wɛ é, b’ɛ nɔ lɛ́ mɔ kanmɛsyɛn ɖò gbigbɔ lixo. (Ju. 21-23) Enɛ sɔgbe xá alixlɛ́mɛ ɖěɖee mɛsɛ́dó Pɔlu na Timɔtée lɛ é, é wlan ɖɔ: “Un ɖò zinzɔ́n we wɛ syɛnsyɛn ɖò Mawu nukɔn, bo ɖò zinzɔ́n we wɛ ɖò Klisu Jezu e na ɖɔhwɛ xá mɛ e ɖò gbɛ̀ lɛ kpodo mɛ e ɖò kú lɛ kpan ɔ nukɔn . . . ɖɔ: . . . a na nɔ sɔ́ xomɛfífá dó kɛnu dó nǔ wu nú mɛ, dó gbɛ́ nǔ nú mɛ, bo dó na akɔ́nkpinkpan mɛ ɖò nǔkplɔnmɛ towe lɛ mɛ.” (2 Tim. 4:1, 2) Mɔ̌ wiwa sixu byɔ hwenu gegě, amɔ̌, azɔ̌ syɛnsyɛn e mɛxo agun tɔn lɛ nɔ wà é sín akpáxwé ɖé wɛ. Gǎn ɖěɖee ye nɔ dó lɛ é nɔ sù agun ɔ nukúnmɛ, bɔ é nɔ mɔ ɖɔ “è na sú axɔ́ weɖobǔ” ye.—1 Tim. 5:17.

²³ Ðò ninɔmɛ e mɛ è mɔ ɖɔ è hu hwɛ ɖè lɛ é bǐ mɛ ɔ, nǔ nukɔntɔn e nukúnkpénuwutɔ́ lɛ nɔ tɛ́n kpɔ́n bá wà é wɛ nyí ɖɔ ye na vɔ́ kanmɛsyɛn na hwɛhutɔ́ ɔ ɖò gbigbɔ lixo. Enyi é lɛkɔ nǔgbo nǔgbo sín hwɛ tɔn lɛ gudo, bonu ye kpéwú bo d’alɔ ɛ ɔ, nǔ e ye gbɛ́ n’i ɖò nǔglɔ, alǒ ɖò kúnnuɖetɔ́ ɖebǔ e nɔ hwɛɖiɖɔ ɔ tɛnmɛ lɛ é nukɔn é, na ɖè è ɖó ali jí, bo na zɔ́n bɔ mɛ e sè xó ɔ lɛ é bǐ na ɖi xɛsi. (2 Sam. 12:13; 1 Tim. 5:20) Ðò ninɔmɛ e mɛ è gbɛ́ nǔ nú mɛ ɖè lɛ é bǐ mɛ ɔ, è nɔ ɖó dogbó ɖé lɛ nú hwɛhutɔ́ ɔ. Mɔ̌ mɛ ɔ, é sixu d’alɔ hwɛhutɔ́ ɔ bɔ é na lɛ́ wá “ali jlɔjlɔ” jí. (Ebl. 12:13) Táan ɖé lɛ gudo ɔ, è nɔ ɖò dogbó lɛ ɖè síìn wɛ, hwenu e huzuhuzu e bló wɛ mɛ ɔ ɖè ɖò gbigbɔ lixo lɛ é ɖò wě jɛ wɛ é.

NǓGBƐNÚMƐ Ɔ ÐIÐƆ NÚ AGUN Ɔ

²⁴ Enyi wěɖegbɛ́ hwɛɖiɖɔ tɔn ɖé mɔ ɖɔ hwɛhutɔ́ ɖé lɛkɔ sín hwɛ tɔn lɛ gudo, bɔ é ka cí ɖɔ agun ɔ, alǒ mɛ ɖevo e ɖò xá ɔ mɛ lɛ é na wá sè xó ɔ, kabǐ enyi é byɔ ɖɔ agun ɔ ni cɔ́ éɖée dó hwɛhutɔ́ e lɛkɔ sín hwɛ tɔn lɛ gudo é wu ɔ, è na xwlé ɖɔnúese klewun ɖé mɛ ɖò Kplé Gbɛzán kpo Sinsɛnzɔ́ kpo tɔn hwenu. È ɖó na ɖɔ: “È gbɛ́ nǔ nú [nyikɔ mɛ ɔ tɔn].”

MƐ ÐIÐE SÍN AGUN MƐ

²⁵ Ðò ninɔmɛ ɖé lɛ mɛ ɔ, hwɛhutɔ́ ɔ na ván kan dó hwɛ e hu wɛ é ɖè é wu, bo na xò gǎn ɖěɖee dó wɛ è ɖè bo na d’alɔ ɛ lɛ é bǐ nyi kɛ́n. Ðò hwɛɖiɖɔ ɔ hwenu ɔ, kúnnuɖenú e xlɛ́ ɖɔ mɛ ɔ ‘wà nǔ e na ɖexlɛ́ ɖɔ é lɛkɔ sín hwɛ tɔn lɛ gudo’ é sixu nɔ ma jɛ wě. (Mɛ. 26:20) Etɛ ka na bɔ d’ewu? Ðò ninɔmɛ mɔhun lɛ mɛ ɔ, é byɔ ɖɔ è ni ɖè hwɛhutɔ́ e ma lɛkɔ sín hwɛ tɔn lɛ gudo ǎ é sín agun ɔ mɛ, mɔ̌ mɛ ɔ, è na sɛ́n kan nú gbɛ̌ e é nɔ dó xá togun mímɛ́ Jehovah tɔn é. È nɔ ɖè nǔ e walɔ hwɛhutɔ́ ɔ tɔn na hɛn gblé dó wǔ nú agun ɔ é síìn, bɔ mɔ̌ mɛ ɔ, è nɔ nya xɛ ɖò mimɛ̌ jí e agun ɔ ɖè ɖò walɔ kpo gbigbɔ kpo lixo é jí, bo nɔ lɛ́ cyɔn alɔ nyikɔ ɖagbe e é ɖó é jí. (Sɛ́n. 21:20, 21; 22:23, 24) Ee mɛsɛ́dó Pɔlu wá sè ɖɔ mɛɖé ɖò agun Kɔlɛnti tɔn mɛ bo wà winnyanú é ɔ, é byɔ mɛxo agun tɔn lɛ ɖɔ ye ni “jó nya enɛ ɔ nú Satáan,” bonu agun ɔ na kpó ɖò mimɛ̌ jí. (1 Kɔ. 5:5, 11-13) È ɖè mɛ ɖevo lɛ sín agun mɛ ɖò xwè kanweko nukɔntɔn ɔ mɛ, ɖó ye fɔ́n gǔ dó nǔgbo ɔ jí wutu, bɔ Pɔlu lɛ́vɔ ɖɔ xó yetɔn.—1 Tim. 1:20.

²⁶ Enyi wěɖegbɛ́ hwɛɖiɖɔ tɔn ɖé mɔ ɖɔ è ɖó na ɖè hwɛhutɔ́ e ma lɛkɔ sín hwɛ tɔn lɛ gudo ǎ é ɖé sín agun mɛ ɔ, é ɖó na ɖɔ gbeta ɔ n’i, bo na ɖɔ hwɛjijɔ Biblu tɔn ɖěɖee zɔ́n bɔ è ɖè è sín agun mɛ lɛ é n’i céɖécéɖé. Nú wěɖegbɛ́ hwɛɖiɖɔ tɔn ɔ ɖɔ gbeta ɔ nú hwɛhutɔ́ ɔ gudo ɔ, é na ɖɔ n’i ɖɔ enyi é lin ɖɔ è gbò hwɛ ɔ nyi dò tawun, bɔ é jló na vɔ́ hwɛ ylɔ́ ɔ, é ɖó na wlan wema bo byɔ mɔ̌, lobo tinmɛ hwɛjijɔ ɖěɖee wu é vɔ́ hwɛ ɔ ylɔ́ é céɖécéɖé. Bɛ́sín hwenu e wěɖegbɛ́ ɔ ɖɔ gbeta ɔ n’i é ɔ, azǎn tɛnwe wɛ è na na ɛ b’ɛ na vɔ́ hwɛ ylɔ́. Enyi kplékplé mɛxo lɛ tɔn mɔ wema hwɛ-vɔ́-ylɔ́ tɔn ɖé ɔ, é na ɖɔ nú nukúnkpénuwutɔ́ lɛdo tɔn, bɔ éyɛ na cyan mɛxo agun tɔn e jɛxa bá nɔ wěɖegbɛ́ hwɛ-vɔ́-ylɔ́ tɔn ɖé mɛ lɛ é, bɔ ye na vɔ́ xó ɔ gbéjé kpɔ́n. Ye na dó gǎn lɛ bǐ bo vɔ́ hwɛ ɔ ɖɔ cobɔ azǎn tɛnwe na wá yì dó hwenu e ye mɔ wema hwɛ-vɔ́-ylɔ́ tɔn ɔ é gudo. Enyi è vɔ́ hwɛ ylɔ́ ɔ, è na sɛ̀ ɖɔnúese mɛ ɖiɖe sín agun mɛ tɔn ɔ dó nukɔn. Ðò avla enɛ mɛ ɔ, è na gbɛ́ ɖɔ mɛ e sín hwɛ ɖɔ wɛ è ɖè é kún sɔ́ na na xósin alǒ xoɖɛ ɖò kplé lɛ jí ɖě ó, é sɔ́ na lɛ́ wà wǔjɔmɛzɔ́ bǔnɔ lɛ ɖě ǎ.

²⁷ Hwɛ-vɔ́-ylɔ́ sín tuto ɔ nyí xomɛnyínyɔ́ sín nǔ ɖé, bo nɔ zɔ́n bɔ è nɔ ɖótó nǔ e ɖò ayi mɛ ɖu nú mɛ e dóhwɛ wɛ è ɖè é d’eji. Mɔ̌ mɛ ɔ, enyi hwɛhutɔ́ ɔ jló bo gɔn hwɛ-vɔ́-ylɔ́ ɔ tɛnmɛ ɔ, è na ɖɔ nú agun ɔ ɖɔ è ɖè é sín agun mɛ, hwenu e è ko dó gǎn e jɛxa lɛ é bǐ bá mɔ ɛ b’ɛ gló gudo é.

²⁸ Enyi hwɛhutɔ́ ɔ ma jló na vɔ́ hwɛ ylɔ́ ǎ ɔ, wěɖegbɛ́ hwɛɖiɖɔ tɔn ɔ na tinmɛ ɖɔ é ɖó na lɛkɔ sín hwɛ tɔn lɛ gudo, bo na lɛ́ ɖɔ afɔ ɖěɖee é sixu ɖè bɔ è na lɛ́ wá yí i dó agun mɛ lɛ é n’i. Enɛ nyí alɔdómɛ kpo xomɛnyínyɔ́ kpo sín nǔ, bɔ è ɖó na bló kpo nukúnɖiɖó ɔ kpo ɖɔ é na huzu jijɔ, bɔ nukɔnmɛ ɔ, é na jɛxa bá lɛkɔ wá tutoblonunu Jehovah tɔn mɛ.—2 Kɔ. 2:6, 7.

MƐ ÐIÐE SÍN AGUN MƐ ÐIÐƆ NÚ AGUN Ɔ

²⁹ Enyi é byɔ ɖɔ è na ɖè hwɛhutɔ́ e ma lɛkɔ sín hwɛ tɔn lɛ gudo ǎ é ɖé sín agun mɛ ɔ, è nɔ xwlé ɖɔnúese klewun ɖé mɛ, bo nɔ ɖɔ: “[Nyikɔ mɛ ɔ tɔn] sɔ́ nyí ɖokpo ɖò Kúnnuɖetɔ́ Jehovah tɔn lɛ mɛ ǎ.” Enɛ na zɔ́n bɔ gbejinɔtɔ́ e ɖò agun ɔ mɛ lɛ é sɔ́ na nɔ dó gbɛ̌ xá mɛ enɛ ɖě ǎ.—1 Kɔ. 5:11.

MƐÐÉE ÐIÐE SÍN AGUN MƐ

³⁰ Xógbe “mɛɖée ɖiɖe sín agun mɛ” ɔ, è nɔ zán nú mɛ e ko bló baptɛm bo nyí Kúnnuɖetɔ́ lobo gbɛ́ Klisanwun e é nyí é, lobo ɖɔ ɖɔ emi kún sɔ́ nyí ɖokpo ɖò Kúnnuɖetɔ́ Jehovah tɔn lɛ mɛ ó é. Alǒ, é sixu gbɛ́ tɛn e mɛ é ɖè ɖò agun Klisanwun tɔn mɛ é gbɔn nǔwiwa tɔn lɛ gblamɛ, vlafo é byɔ tutoblonunu gbɛ̀ ɔ tɔn e nɔ nya nǔ e jɛ agɔ dó nǔkplɔnmɛ Biblu tɔn lɛ é gbé, bɔ Jehovah Mawu na ɖó hwɛ na é ɖé mɛ.—Eza. 2:4; Nǔɖe. 19:17-21.

³¹ Mɛsɛ́dó Jaan wlan dó mɛ ɖěɖee gbɛ́ nǔɖiɖi Klisanwun tɔn yetɔn ɖò hwetɔnnu lɛ é wu ɖɔ: “Mɛ enɛ lɛ gosin mǐ mɛ, ɖó ye nyí mɛ mǐtɔn ɖě ɖ’ayǐ ǎ; ɖó nú ye ko nyí mɛ mǐtɔn wɛ ɔ, ye na ko nɔ mǐ mɛ.”—1 Jaan 2:19.

³² Enyi mɛɖé ɖè éɖée sín agun mɛ ɔ, ninɔmɛ tɔn nɔ gbɔn vo tawun nú Klisanwun e sín awakanmɛ gbɔjɔ, b’ɛ ma sɔ́ nɔ yì kúnnuɖegbé ɖě ǎ é tɔn ɖò Jehovah nukɔn. Awakanmɛ mɛɖé tɔn sixu gbɔjɔ ɖó é sɔ́ nɔ kplɔ́n Xó Mawu tɔn ɖò gbesisɔmɛ ǎ wutu. Alǒ vlafo é mɔ tagba ɖé lɛ alǒ è dóya n’i, bɔ kan e é nɔ ɖó dó nǔ wu ɖò Jehovah sinsɛn mɛ é bú. Mɛxo agun tɔn lɛ kpo mɛ ɖevo e ɖò agun ɔ mɛ lɛ é kpo na kpó ɖò alɔ e jɛxa é dó Klisanwun e awakanmɛ gbɔjɔ na é ɖé wɛ ɖò gbigbɔ lixo.—Hlɔ. 15:1; 1 Tɛ. 5:14; Ebl. 12:12.

³³ Amɔ̌, enyi Klisanwun ɖé jló, bo ɖè éɖée sín agun mɛ ɔ, è nɔ xwlé ɖɔnúese klewun ɖé agun ɔ, bo nɔ ɖɔ: “[Nyikɔ mɛ ɔ tɔn] sɔ́ nyí ɖokpo ɖò Kúnnuɖetɔ́ Jehovah tɔn lɛ mɛ ǎ.” Lee è nɔ wà nǔ xá mɛ e è ɖè sín agun mɛ é ɖé gbɔn é wɛ è na wà xá mɛ mɔhun gbɔn.

MƐYÍYÍ DÓ AGUN MƐ

³⁴ Enyi mɛ e è ɖè sín agun mɛ é, alǒ mɛ e ɖè éɖée sín agun mɛ é ɖé xlɛ́ céɖécéɖé ɖɔ emi lɛkɔ sín hwɛ emitɔn lɛ gudo, bo lɛ́ ɖexlɛ́ nú táan e jɛxa é ɖɔ emi jó ali nyanya e emi wlí é dó ɔ, è sixu yí i dó agun mɛ. É ɖexlɛ́ ɖɔ emi jló na ɖó kancica ɖagbe ɖé xá Jehovah. Mɛxo agun tɔn lɛ nɔ nɔ acéjí, bo nɔ jó hwenu e kpé é dó nú mɛ ɔ, b’ɛ nɔ xlɛ́ ɖɔ emi lɛkɔ sín hwɛ emitɔn lɛ gudo nǔgbo nǔgbo, é sixu nyí sun gegě, xwè ɖokpo, alǒ hú mɔ̌, sɔgbe xá ninɔmɛ lɛ. Enyi mɛɖé sɛ́ wema dó kplékplé mɛxo lɛ tɔn bo byɔ ɖɔ è ni yí emi dó agun mɛ ɔ, wěɖegbɛ́ mɛyíyí dó agun mɛ tɔn ɖé na ɖɔ xó xá mɛ ɔ. Wěɖegbɛ́ ɔ na gbéjé kúnnuɖenú e xlɛ́ ɖɔ mɛ ɔ ‘wà nǔ e ɖexlɛ́ ɖɔ é lɛkɔ sín hwɛ tɔn lɛ gudo’ lɛ é kpɔ́n, bo na kpɔ́n ɖɔ è sixu yí i dó agun mɛ táan enɛ mɛ alǒ gbɔ à jí.—Mɛ. 26:20.

³⁵ Enyi mɛ e byɔ ɖɔ è ni yí emi dó agun mɛ é ɔ, agun ɖevo mɛ wɛ è ɖè é sín agun mɛ ɖè ɔ, agun e mɛ é ɖè dìn é sín wěɖegbɛ́ mɛyíyí dó agun mɛ tɔn ɖé na jinjɔn ayǐ xá ɛ, bo gbéjé nǔbyɔbyɔ tɔn kpɔ́n. Enyi mɛ e ɖò wěɖegbɛ́ mɛyíyí dó agun mɛ tɔn ɔ mɛ lɛ é mɔ ɖɔ è ɖó na yí i dó agun mɛ ɔ, ye na ɖɔ sɛ́dó kplékplé mɛxo lɛ tɔn agun e kpé nukún dó xó ɔ wu ɖ’ayǐ é tɔn. Wěɖegbɛ́ e xó ɔ kan lɛ é na w’azɔ̌ ɖó kpɔ́, bo na mɔ ɖɔ è mɔ nukúnnú jɛ nǔ lɛ bǐ wu, bo na wá gbeta e sɔgbe é ɖé kɔn. É ɖò mɔ̌ có, wěɖegbɛ́ mɛyíyí dó agun mɛ tɔn agun e kpé nukún dó xó ɔ wu ɖ’ayǐ é tɔn wɛ na wá gbeta ɔ kɔn ɖɔ è ni yí i dó agun mɛ.

MƐYÍYÍ DÓ AGUN MƐ ÐIÐƆ NÚ AGUN Ɔ

³⁶ Enyi wěɖegbɛ́ mɛyíyí dó agun mɛ tɔn ɔ kúdeji ɖɔ mɛ e è ɖè sín agun mɛ é, alǒ mɛ e ɖè éɖée sín agun mɛ é lɛkɔ sín hwɛ tɔn lɛ gudo nǔgbo nǔgbo, bɔ è ɖó na yí i dó agun mɛ ɔ, è na xwlé mɛyíyí dó agun mɛ sín ɖɔnúese ɖé mɛ, ɖò agun e kpé nukún dó xó ɔ wu ɖ’ayǐ é mɛ. Enyi agun ɖevo mɛ wɛ mɛ ɔ ɖè dìn ɔ, è na xwlé ɖɔnúese ɔ mɛ ɖò finɛ lɔmɔ̌. È ɖó na ɖɔ kpowun ɖɔ: “È yí [nyikɔ mɛ ɔ tɔn] dó agun mɛ, bɔ é nyí ɖokpo ɖò Kúnnuɖetɔ́ Jehovah tɔn lɛ mɛ.”

YƆKPƆVU E KO BLÓ BAPTƐM BO HU HWƐ SYƐNSYƐN LƐ É

³⁷ È ɖó na ɖɔ hwɛ syɛnsyɛn e yɔkpɔvu e ko bló baptɛm lɛ é hu é nú mɛxo agun tɔn lɛ. Enyi mɛxo agun tɔn lɛ ɖò nukún kpé dó hwɛ syɛnsyɛn e yɔkpɔvu ɖé hu é wu wɛ ɔ, é na nyɔ́ ɖɔ mɛjitɔ́ tɔn ɖěɖee bló baptɛm lɛ é ni ɖò tɛn tɔn mɛ. Ye ɖó na wà nǔ ɖó kpɔ́ xá wěɖegbɛ́ hwɛɖiɖɔ tɔn ɔ, bo ka na tɛ́n kpɔ́n bá cyɔn alɔ vǐ e hu hwɛ é jí, bɔ è na gɔn tó dɔn n’i lee é byɔ ɖó é ǎ. Wěɖegbɛ́ hwɛɖiɖɔ tɔn ɔ ɖó na tɛ́n kpɔ́n bo gbɛ́ nǔ nú vǐ ɔ, lobo ɖè è ɖó ali jí lee é nɔ nyí gbɔn hwenu e mɛxo ɖé hu hwɛ é ɖɔhun. Amɔ̌, enyi vǐ ɔ ma lɛkɔ sín hwɛ tɔn lɛ gudo ǎ ɔ, è na ɖè è sín agun mɛ.

HWENU E WƐNJLATƆ́ E MA KO BLÓ BAPTƐM Ǎ LƐ É HU HWƐ SYƐNSYƐN É

³⁸ Enyi wɛnjlatɔ́ ɖěɖee ma ko bló baptɛm ǎ lɛ é hu hwɛ syɛnsyɛn ɖé ɔ, etɛ è ka ɖó na wà? Ðó ye ko bló baptɛm bo nyí Kúnnuɖetɔ́ ǎ wutu ɔ, è sixu ɖè ye sín agun mɛ ǎ. É ɖò mɔ̌ có, ye sixu nɔ ma mɔ nukúnnú jɛ nǔgbododó Biblu tɔn lɛ mɛ bǐ mlɛ́mlɛ́, bɔ é na byɔ ɖɔ è ni ɖè wě xá ye kpo xomɛnyínyɔ́ kpo, bonu ye na lɛkɔ wá “ali jlɔjlɔ” jí.—Ebl. 12:13.

³⁹ Enyi mɛxo agun tɔn we tɛ́n kpɔ́n bo d’alɔ wɛnjlatɔ́ e ma ko bló baptɛm ǎ, bo hu hwɛ syɛnsyɛn é ɖé, bonu é ma lɛkɔ sín hwɛ tɔn lɛ gudo ǎ ɔ, è ɖó na ɖɔ nú agun ɔ. È na xwlé ɖɔnúese klewun ɖé mɛ, bo ɖɔ: “[Nyikɔ mɛ ɔ tɔn] sɔ́ nyí wɛnjlatɔ́ e ma ko bló baptɛm ǎ é ɖé ǎ.” Enɛ gudo ɔ, agun ɔ na nɔ kpɔ́n hwɛhutɔ́ ɔ dó mɔ mɛ e nyí gbɛ̀ ɔ tɔn é ɖé. È ɖè hwɛhutɔ́ ɔ sín agun mɛ ǎ có, Klisanwun lɛ nɔ nɔ acéjí dó gbɛ̌didó xá ɛ wu. (1 Kɔ. 15:33) È sɔ́ na nɔ yí wɛnɖagbejijla sín gbeɖiɖó ɖě ɖò así tɔn ǎ.

⁴⁰ Nukɔnmɛ ɔ, mɛ e ma ko bló baptɛm ǎ bɔ è yí wɛnjlatɔ́zɔ́ sín así tɔn é ɖé sixu jló bo na lɛ́ huzu wɛnjlatɔ́. Ðò ninɔmɛ enɛ mɛ ɔ, mɛxo agun tɔn we na ɖɔ xó xá ɛ, bo na gbéjé nukɔnyiyi e é ɖó ɖò gbigbɔ lixo é kpɔ́n. Enyi é jɛxa ɔ, è na xwlé ɖɔnúese klewun ɖé mɛ, bo na ɖɔ: “[Nyikɔ mɛ ɔ tɔn] lɛ́vɔ huzu wɛnjlatɔ́ e ma ko bló baptɛm ǎ é ɖé.”

JEHOVAH NƆ KƆN NYƆNA DÓ SINSƐN-BIBLO E MƐ́, BO ÐÒ FÍFÁ MƐ É JÍ

⁴¹ Mɛ ɖěɖee nɔ dó hǎ xá agun Mawu tɔn égbé lɛ é bǐ sixu ɖu vivǐ palaɖisi gbigbɔ tɔn e Jehovah na togun tɔn é tɔn. É ɖò wɛn ɖɔ fí e ama ɖagbe zɔ́n ɖè é wɛ mǐ ɖè ɖò gbigbɔ lixo, bɔ mǐ ɖó nǔgbo ɔ sín sin e nɔ fá kɔ nú mɛ é b’ɛ túnflá. Jehovah nɔ lɛ́ kpé nukún mǐ wu, gbɔn tuto yɛhwexɔ́suɖuto ɔ tɔn e ɖò acɛkpikpa Klisu tɔn glɔ́ é gblamɛ. (Ðɛh. 23; Eza. 32:1, 2) Palaɖisi gbigbɔ tɔn e mɛ mǐ ɖè ɖò azǎn gudogudo tɔn syɛnsyɛn elɔ lɛ mɛ é zɔ́n bɔ mǐ nɔ ɖò ayijayǐ mɛ.

⁴² Blobló bonu agun ɔ ni nɔ fífá mɛ bo lɛ́ nɔ mimɛ̌ jí, nɔ zɔ́n bɔ nǔgbo Axɔ́suɖuto ɔ tɔn sín weziza nɔ kpó ɖò hinhɔ́n wɛ. (Mat. 5:16; Ja. 3:18) Nyɔna Mawu tɔn na zɔ́n bɔ mǐ na j’awǎ hwenu e mǐ na ɖò mɛ gegě mɔ gɔ́ na wɛ, bɔ ye na nɔ wá tuùn Jehovah, bo na sɛn ɛ xá mǐ, lobo ɖò jlǒ tɔn wà wɛ é.