AKPÁXWÉ 5

Lɛ̌kɔ Wá ‘Mɛ E Nyí Lɛngbɔ̌nyitɔ́ Towe, Bo Nɔ Cɔ́ We ɔ Gɔ́n’

A ka mɔ hwiɖée ɖò wuvɛ̌ e xó è ɖɔ ɖò alɔnuwema elɔ mɛ é ɖé alǒ gegě mɛ wɛ à? Enyi mɔ̌ hǔn, é nyí hwiɖokpo ǎ. Mɛsɛntɔ́ Mawu tɔn gbejinɔtɔ́ gegě, ɖò Biblu sín táan mɛ kpo hwe mǐtɔn nu kpo ko ɖí xwi xá wuvɛ̌ mɔhun lɛ. Lee Jehovah d’alɔ ye bɔ ye ɖu ɖò wuvɛ̌ enɛ lɛ jí gbɔn é ɔ, é sixu nyí mɔ̌ nú hwi lɔ.

Enyi a lɛkɔ wá Jehovah gɔ́n ɔ, é na nɔ kpɔ́ xá we

ÐǑ GANJƐWU ɖɔ enyi a lɛkɔ wá Jehovah gɔ́n ɔ, é na nɔ kpɔ́ xá we. É na d’alɔ we bɔ a na ɖí xwi xá linkpɔ́n, ɖu ɖò akpɔ mimɔ jí, bo na mɔ fífá ayi mɛ tɔn e ayixa mímɛ́ ɖé ɖiɖó nɔ na mɛ é. Enɛ ɔ, a na lɛ́ ɖó jlǒ bo na sɛn Jehovah ɖó kpɔ́ xá mɛsɛntɔ́ tɔn hatɔ́ lɛ. Ninɔmɛ towe na cí Klisanwun xwè kanweko nukɔntɔn ɔ tɔn lɛ tɔn ɖɔhun. Mɛsɛ́dó Piyɛ́ɛ wlan sɛ́dó ye ɖɔ: “Lɛngbɔ̌ e bú lɛ ɖɔhun wɛ mi cí ɖ’ayǐ; amɔ̌ dìn ɔ, è ko lɛ́ kplá mi wá mɛ e nyí lɛngbɔ̌nyitɔ́ mitɔn, bo nɔ cɔ́ mi ɔ gɔ́n.”—1 Piyɛ́ɛ 2:25.

Kɔlilɛ wá Jehovah gɔ́n wɛ nyí nǔ ɖagbe hugǎn e a sixu wà é. Etɛwu? A na hɛn xomɛ Jehovah tɔn hun. (Nǔnywɛxó 27:11) Lee a tuùn gbɔn é ɔ, nǔwiwa mǐtɔn lɛ sixu hɛn xomɛ hun Jehovah alǒ dó xomɛsin n’i. Nǔgbo wɛ ɖɔ Jehovah nɔ hɛn mǐ gannugánnú bonu mǐ na yí wǎn n’i, bo sɛn ɛ ǎ. (Sɛ́nflínmɛ 30:19, 20) Akɔwé Biblu tɔn ɖé ɖɔ ɖɔ: “Mɛɖé sixu hun ayi towe nú we ǎ. Hwiɖesunɔ wɛ ɖó na hun i.” Mǐɖesunɔ nɔ hun ayi mǐtɔn gbɔn Jehovah sinsɛn kpo wanyiyi ɖaxó kpo gblamɛ. Enyi mǐ wà mɔ̌ ɔ, mǐ nɔ na ajɔ xɔ akwɛ ɖé Jehovah, é wɛ nyí gbejininɔ mǐtɔn, bo nɔ hɛn xomɛ tɔn hun tawun. Nǔgbo ɔ, enyi mǐ sɛn Jehovah lee é jɛxa gbɔn é ɔ, è sixu jlɛ́ nǔ ɖebǔ dó awǎjijɛ e mǐ nɔ mɔ é wu ǎ.—Mɛsɛ́dó 20:35; Nǔɖexlɛ́mɛ 4:11.

Nɔví nyɔnu Klisanwun e awakanmɛ ko kú é ɖé lɛkɔ wá agun ɔ mɛ, bɔ nɔví lɛ ɖò kúabɔ dó n’i wɛ kpo akpakpa sɔ́ mɛ kpo

Gɔ́ na ɔ, enyi a lɛ́vɔ jɛ Jehovah sɛn jí lee Klisanwun ɖé nɔ bló gbɔn é ɔ, a na sú hudo gbigbɔ tɔn towe lɛ sín dò. (Matie 5:3, nwt) Gbɔn nɛ̌ é? Gbɔn gbɛ̀ ɔ bǐ mɛ ɔ, gbɛtɔ́ lɛ nɔ kanbyɔ yeɖée ɖɔ: ‘Etɛwu mǐ ka ɖò ayikúngban jí fí?’ Xósin nǔkanbyɔ e kúnkplá nǔ e wu mǐ ɖò gbɛ̀ é tɔn nɔ vɛ́ adɔ̌ ye. Gbɛtɔ́ lɛ ɖó hudo xósin enɛ tɔn ɖó Jehovah wɛ dá ye gbɔn mɔ̌. É dá mǐ bɔ sinsɛn-biblo sɛ́dó è nɔ na mǐ awǎjijɛ. Mǐ sixu mɔ awǎjijɛ ɖebǔ b’ɛ na zɛ ee tuùntuùn ɖɔ wanyiyi wɛ nɔ sísɛ́ mǐ bɔ mǐ ɖò Jehovah sɛn wɛ é nɔ hɛn wá é wu ǎ.—Ðɛhan 63:2-6.

Kɛnklɛn tuùn ɖɔ Jehovah jló ɖɔ a ni lɛkɔ wá emi gɔ́n. Nɛ̌ a ka sixu ganjɛ enɛ wu gbɔn? Lin tamɛ d’eji: Ðɛ gegě wɛ è xò hwɛ̌ cobo sɔnǔ nú alɔnuwema elɔ. É sixu ko nyí mɛxo agun tɔn ɖé, alǒ nǔɖitɔ́ hatɔ́ ɖevo wɛ sɔ́ nú we. Enɛ gudo ɔ, a xà, bɔ nǔ e è wlan d’emɛ lɛ é byɔ ayi mɛ nú we. Nǔ enɛ lɛ bǐ wɛ xlɛ́ ɖɔ Jehovah kún wɔn we ó. É nyɔ́ wà ɔ, é ɖò dindɔn we wɛ kpo xomɛnyínyɔ́ kpo bonu a na lɛkɔ wá gɔ̌n tɔn.—Jaan 6:44.

Tuùn e mǐ tuùn ɖɔ Jehovah kún nɔ wɔn mɛsɛntɔ́ tɔn e bú lɛ e gbeɖé ó é sixu zɔ́n bɔ agbɔ̌n mǐtɔn jɛ dò. Nǔ e sù nɔví nyɔnu e nɔ nyí Donna é nukúnmɛ é nɛ. É ɖɔ: “Kpɛɖé kpɛɖé wɛ un jɛ zɔ nú nǔgbo ɔ, amɔ̌, un gɔn tamɛ lin dó nǔ e è ɖɔ ɖò Ðɛhan 139:23, 24 mɛ é jí ǎ. É ɖɔ: ‘Mawu ce, kpɔ́n xò ce mɛ bǐ! Kpɔ́n lee un ɖè é, kpɔ́n nǔ e ɖò gbigbo mì wɛ ɖò ayi mɛ é! Kpɔ́n ɖɔ ali nyanya wɛ un wlí à jí, bo dɔn mì ɖó ali e nyí towe é jí, ali e nyí towe kaka sɔyi é jí.’ Un tuùn ɖɔ un kún nyí gbɛ̀ ɔ tɔn ó. Un vo ganji ɖò dɔ̌n kpɔ́n gbeɖé ǎ. Un lɛ́ tuùn ɖɔ tutoblonunu Jehovah tɔn mɛ wɛ un ɖó na nɔ. Un jɛ mimɔ jí ɖɔ Jehovah kún wɔn mì gbeɖé ó; un ɖó na ba ali e un na gbɔn bo lɛkɔ yì gɔ̌n tɔn é kpowun wɛ. É víví nú mì tawun ɖɔ un wà mɔ̌!”

“Un jɛ mimɔ jí ɖɔ Jehovah kún wɔn mì gbeɖé ó; un ɖó na ba ali e un na gbɔn bo lɛkɔ yì gɔ̌n tɔn é kpowun wɛ”

Ðɛ vívɛ́ e mǐ nɔ xò é wɛ nyí ɖɔ hwi lɔ ni lɛ́ wá ɖu vivǐ “awǎjijɛ e nɔ gosin [Jehovah] gɔ́n ɔ” tɔn. (Nɛɛmíi 8:10) Kɔ e a lɛ́ wá Jehovah gɔ́n é na vɛ́ nú we kpɔ́n gbeɖé ǎ.

Nǔkanbyɔ ɖé lɛ Dó Kɔ Lilɛ Wá Jehovah Gɔ́n Wu Sín Xósin

FITƐ UN KA NA BƐ́SÍN?

Kpɛɖé kpɛɖé wɛ mɛ e jɛ azɔn wá yì é ɖé ɖó na lɛ́ jɛ nǔ e é ko nɔ bló ɖ’ayǐ lɛ é wà jí. Mɔ̌ ɖokpo ɔ, a sixu lɛ́vɔ mɔ hlɔnhlɔn ɖò gbigbɔ lixo, enyi a nɔ tɛ́n kpɔ́n bo nɔ ɖu nǔɖuɖu gbigbɔ tɔn klewun ɖé ɖò azǎn ɖokpo ɖokpo jí ɔ nɛ. Ma mɔ ɖɔ emi ɖó na wà nǔ lɛ bǐ zɛɛn ó. A sixu zán cɛju klewun ɖé dó xà Biblu, alǒ ɖótó Biblu e è xà dó kan jí é, dó kplɔ́n wema mǐtɔn lɛ ɖé, dó ba dò nú nǔ ɖò tɛn Ɛntɛnɛti tɔn jw.org tɔn jí, alǒ dó kpɔ́n tuto televiziɔn jí tɔn jw.org tɔn ɖé. Gɔ́ na ɔ, tɛ́n kpɔ́n bo yawǔ yì kplé agun tɔn ɖé lee é nyɔ́ bló gbɔn é. Ðò taji hugǎn bǐ ɔ, xoɖɛ sɛ́dó Jehovah bo byɔ alɔdó tɔn. ‘Zlɔ̌n nǔ e ɖò linkpɔ́n nyí nú we wɛ lɛ bǐ sín agban ɖó jǐ tɔn, ɖó é ɖò nukún kpé dó wǔ we wɛ.’—1 Piyɛ́ɛ 5:7.

“Ee awakanmɛ kú mì bǐ ɖò sinsɛn-biblo ce mɛ gudo é ɔ, winnya nɔ hu mì tawun, ɖɛxixo lɔ tlɛ nɔ hu winnya nú mì. Ee un kpankɔ́n bo xoɖɛ é ɔ, mɛxo agun tɔn e ɖò agun e ɖò xá ɔ mɛ é ɖé mɛ é wá ba mì kpɔ́n. É d’alɔ mì bɔ un mɔ nǔ jɛ wu ɖɔ Jehovah kún jó mì dó ó. Mɛxo agun tɔn ɔ ɖè wě xá mì ɖɔ nyi ni jɛ Biblu xà jí ayihɔngbe ayihɔngbe. Ee un bló mɔ̌ é ɔ, un mɔ hlɔnhlɔn bo lɛ́ jɛ kplé lɛ yì jí. Nukɔnmɛ ɔ, un jɛ alɔ ɖó ɖò sinsɛnzɔ́ ɔ mɛ jí. É víví nú mì tawun ɖɔ Jehovah kún jó mì dó gbeɖé ó.”—Eeva.

NƐ̌ AGUN Ɔ KA NA YÍ MÌ GBƆN?

A sixu ɖeji ɖɔ hagbɛ̌ agun ɔ tɔn lɛ na dó kúabɔ nú we kpo akpakpa sɔ́ mɛ kpo. Ye na mɔ xó ɖɔ dó wǔ we alǒ dóhwɛ we ǎ, é nyɔ́ wà ɔ, ye na ɖè wanyiyi e ye ɖó nú we é xlɛ́ we, bo na wà nǔ e wu ye kpé é bǐ dó dó wusyɛn lanmɛ nú we.—Eblée lɛ 10:24, 25.

“Kɔlilɛ yì Kpléxɔ Axɔ́suɖuto ɔ tɔn mɛ hu winnya nú mì tawun. Un nɔ kanbyɔ nyiɖée ɖɔ nɛ̌ nɔví lɛ ka na wà nǔ xá mì gbɔn à jí. Nɔví nyɔnu mǐtɔn mɛxomɔ e ko bló xwè 30 ɖò finɛ é ɖé ɖɔ nú mì ɖɔ: ‘Kúabɔ wá xwégbe, vǐ ce!’ Nǔ enɛ byɔ ayi mɛ nú mì tawun. Un wá xwégbe nǔgbo.”—Javier.

“Un yì Kpléxɔ Axɔ́suɖuto ɔ tɔn mɛ bo jinjɔn zinkpo gudogudo tɔn ɔ jí, enɛ ɔ mɛɖé na mɔ mì ǎ. É ɖò mɔ̌ có, mɛ gegě tuùn mì ɖó ɖ’ayǐ e un kpò ɖò vǔ é ɔ, un nɔ yì kplé lɛ. Ye dó kúabɔ nú mì, bo zunfan mì kpo wanyiyi kpo sɔmɔ̌ bɔ un mɔ ɖɔ fífá vunbla mì. É cí ɖɔ xwégbe wɛ un ɖè ɖɔhun.”—Marco.

NƐ̌ MƐXO AGUN TƆN LƐ KA NA D’ALƆ MÌ GBƆN?

Mɛxo agun tɔn lɛ na nyɔ́ xomɛ dó wǔ we. Ye na kpa we nú jlǒ e a ɖó bo na flɔ́ zo dó glɔ́ nú “wanyiyi lee a ɖó gbɔn ɖò bǐbɛ̌mɛ é” é. (Nǔɖexlɛ́mɛ 2:4) Ye na d’alɔ we kpo wanyiyi kpo bɔ a na jla nǔ e a ko wà nyi dò lɛ é ɖó, bo na wà mɔ̌ “kpodo xomɛfífá kpo.” (Galatinu lɛ 6:1; Nǔnywɛxó 28:13) Mɛxo agun tɔn lɛ sixu bló tuto bɔ mɛɖé na nɔ kplɔ́n nǔ xá we, vlafo ɖò wema Hɛn Hwiɖée Ðò Wanyiyi Mawu Tɔn Mɛ mɛ. Ganjɛwu ɖɔ mɛxo agun tɔn lɛ na dó gbɔ nú we, bo na kpé nukún wǔ we ɖò ali lɛ bǐ nu.—Ezayíi 32:1, 2.

“Ðò xwè tantɔn ɖěɖee mɛ un ma sɔ́ dó gbɛ̌ xá agun ɔ ǎ lɛ é vlamɛ ɔ, mɛxo agun tɔn lɛ nɔ ba mì kpɔ́n. Gbè ɖokpo ɔ, mɛxo agun tɔn ɖé xlɛ́ fɔtóo ɖěɖee é ɖè nú mǐ lɛ é ɖé lɛ mì. Ye flín mì nǔ ɖagbe gegě sɔmɔ̌ bɔ awǎjijɛ tobutobu e un mɔ hwenu e un kpò ɖò Jehovah sɛn wɛ é ɖiɖó lɛ́ jɛ jlòjló mì jí. Mɛxo agun tɔn lɛ d’alɔ mì kpo wanyiyi kpo bɔ un lɛ́ sɔnǔ nú aca gbigbɔ tɔn lɛ.”—Victor.

É Na Na We Hlɔnhlɔn

Han e sɔ́ akpakpa mɛ é gegě ɖò hanwema mǐtɔn Jihan nú Jehovah kpo Awǎjijɛ Kpo mɛ. Hwenu e a na lɛ́vɔ bɛ́ azɔ̌ gbigbɔ tɔn lɛ é ɔ, ye sixu dó gbɔ nú we, bo lɛ́ dó wusyɛn lanmɛ nú we. Ði kpɔ́ndéwú ɔ, lin tamɛ dó xógbe Han 38gɔ́ ɔ tɔn lɛ jí. Han ɔ jinjɔn 1 Piyɛ́ɛ 5:10 jí, bɔ xóta tɔn nyí “É Na Na We Hlɔnhlɔn.”

Hwɛjijɔ ɖé wu wɛ Jah xlɛ́ nǔgbo ɔ we,

Lobo dɔn we wá weziza tɔn nu.

É kpɔ́n ayi t’we mɛ bo mɔ ɖɔ a ɖó jlǒ,

Bo na tuùn’i, lobo lɛ́ wà nǔ ɖagbe.

A d’akpá dó ɖɛ mɛ bá wà jlǒ tɔn,

É d’alɔ we bo ka na lɛ́ wà mɔ̌.
Mawu sɔ́ Vǐ vívɛ́ná tɔn jó ɖó hwɛ wu;

É ba ɖɔ gbɛzán towe ni yì ta.

É xò nǔ ɖě kpɔ́n cobo na we Vǐ tɔn ǎ,

Ganjɛwu ɖɔ é na na we hlɔnhlɔn.

É na wɔn nǔɖiɖi t’we gbeɖé ǎ;

É na kpé nukún dó mɛ tɔn lɛ wu.

(HANYÍYÍ)

Mawu tɔn wɛ a nyí dìn, ɖó é xɔ gbɛ̀ nú we.

É na na we hlɔnhlɔn, lobɔ a na syɛnlǐn.

É na xlɛ́ ali we bo cyɔn alɔ jǐ towe,

É na na we hlɔnhlɔn, lobɔ a na syɛnlǐn.

Enyi a jló na ɖótó nǔxixo han Axɔ́suɖuto ɔ tɔn elɔ alǒ ɖevo lɛ tɔn hǔn, yì jw.org jí.