NǓKPLƆNKPLƆN 11
Lee A Sixu Ðu Biblu Xixa Sín Lè Hugǎn Gbɔn É
A ka ko jló na tɔ́ dó azɔ̌ ɖaxó ɖé wu, lobo ka mɔ ɖɔ é vɛwǔ dín kpɔ́n à? Vlafo bonu é na bɔkun nú wɛ ɔ, a nɔ bló kpɛɖé kpɛɖé sín mɛ. Nú è ɖò Biblu xixa xó ɖɔ wɛ ɔ, nǔ ɖokpo ɔ sixu jɛ. A sixu kanbyɔ ɖɔ, ‘Fitɛ un ka na bɛ́sín tawun?’ Ðò nǔkplɔnkplɔn elɔ mɛ ɔ, mǐ na ɖɔ xó dó nǔ klewun klewun e a sixu wà é ɖé lɛ jí. Nǔ enɛ lɛ na d’alɔ we bɔ a na ɖu Biblu xixa kpo kplɔnkplɔn tɔn kpo sín vivǐ.
1. Etɛwu mǐ ka ɖó na nɔ xà Biblu gbè bǐ gbè?
Mɛ e nɔ xà Biblu, alǒ “kplɔ́n Mawu Mavɔmavɔ tɔn” gbè bǐ gbè é na ɖó awǎjijɛ lobɔ gbɛ̀ tɔn na lɛ́ ɖó nu. (Xà Ðɛhan 1:1-3.) Ðò bǐbɛ̌mɛ ɔ, tɛ́n kpɔ́n bo nɔ xà nú cɛju yɔywɛ ɖé ɖò azǎn ɖokpo ɖokpo jí. Bǎ e mɛ a ɖò nukúnnú mɔ jɛ Xó Mawu tɔn mɛ yì ɖó wɛ é ɔ, bǎ enɛ mɛ wɛ a na ɖu Biblu xixa towe sín vivǐ yì ɖó.
2. Etɛ ka na d’alɔ we bɔ a na ɖu Biblu xixa sín lè?
Nú mǐ na ɖu Biblu xixa sín lè hugǎn ɔ, mǐ ɖó na nɔ yì agbɔ̌n jí bo lin tamɛ dó nǔ e xà wɛ mǐ ɖè é jí. Mǐ ɖó na xà bo lɛ́ “lin tamɛ d’ewu.” (Jozuwée 1:8) Nú a ɖò xixa wɛ hǔn, nɔ kan nǔ lěhun lɛ byɔ hwiɖée: ‘Etɛ nǔ elɔ ka kplɔ́n mì dó Jehovah Mawu wu? Nɛ̌ un ka sixu zán nǔ elɔ ɖò gbɛzán ce mɛ gbɔn? Nɛ̌ un ka sixu zán wemafɔ elɔ lɛ dó d’alɔ mɛ ɖevo lɛ gbɔn?’
3. Nɛ̌ a ka sixu mɔ hwenu bo xà Biblu gbɔn?
É nɔ vɛwǔ nú we bonu a na mɔ hwenu bo xà Biblu wɛ à? Nǔ nɔ nyí mɔ̌ nú mǐ mɛ gegě. Tɛ́n kpɔ́n bo nɔ “hwlɛndó hwenu lɛ, bo wà nǔ.” (Efɛzinu lɛ 5:16) Bonu a na wà mɔ̌ hǔn, ɖè hwenu ɖé ɖó vo bo na nɔ xà Biblu na ɖò azǎn ɖokpo ɖokpo jí. Mɛɖé lɛ nɔ xà Biblu ɔ zǎnzǎn tɛɛn lɛ. Mɛ ɖevo lɛ nɔ xà hweɖevonu ɖò kéze ɔ mɛ, vlafo hwenu e ye yí gbɔjɛ hwemɛ tɔn é. É ɖò mɔ̌ có, mɛ ɖevo lɛ nɔ xà Biblu ɔ gbadanu lɛ cobo nɔ yì mlɔ́ ayǐ. Hwetɛnu ka na nyɔ́ nú hwɛ hugǎn?
BA DÒ NÚ NǓ D’EJI
Kplɔ́n lee a sixu bló gbɔn bɔ Biblu xixa towe na víví hugǎn é. Kpɔ́n lee a sixu sɔnǔ ganji, bo na mɔ tɛn dó ɖu Biblu kplɔnkplɔn towe sín lè hugǎn gbɔn é.
Mǐ sixu kplɔ́n bo na nɔ ɖu nǔɖuɖu vovo lɛ. Mɔ̌ ɖokpo ɔ, mǐ hɛn ɔ mǐ na ɖu Biblu xixa sín vivǐ
4. Kplɔ́n lee a na ɖu Biblu xixa sín vivǐ gbɔn é
É sixu vɛwǔ nú mǐ bɔ mǐ na jɛ Biblu xà jí. É ɖò mɔ̌ có, mǐ hɛn ɔ, mǐ na “nɔ ba” na wà mɔ̌, lee mɛɖé sixu kplɔ́n bo na yí wǎn nú nǔɖuɖu e é ma ko ɖu kpɔ́n ǎ é ɖé gbɔn é ɖɔhun. Xà 1 Piyɛ́ɛ 2:2, 3, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
A ka lin ɖɔ nú a nɔ xà Biblu ɔ gbè bǐ gbè ɔ, a na nɔ ɖu vivǐ tɔn kaka bɔ akpakpa na nɔ sɔ́ we dó xixa tɔn wu à?
Xò VIDEO ɔ bá kpɔ́n lee mɛɖé lɛ jɛ Biblu xixa sín vivǐ ɖu jí gbɔn é. Enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
Wuvɛ̌ tɛ lɛ jí mɛ winnyawinnya ɖěɖee xó video ɔ ɖɔ lɛ é ka ɖu ɖè?
Etɛ lɛ ka d’alɔ ye bɔ ye kpò ɖò Biblu ɔ xà wɛ gbè bǐ gbè?
Nɛ̌ ye ka bló gbɔn bo nɔ ɖu Biblu xixa yetɔn sín vivǐ hugǎn?
Wlɛnwín e a sixu zán dó bɛ́ lɛ é:
Sɔ́ lilɛdógbeɖevomɛ hwe mǐtɔn nu tɔn e wu è sixu ɖeji dó é ɖé. Tɛ́n Lẹdogbedevomẹ Aihọn Yọyọ Tọn kpɔ́n, enyi é ɖè ɖò gbè towe alǒ gbè e a sè ganji é ɖé mɛ ɔ nɛ.
Bɛ̌ xixa tɔn sín akpáxwé e dɔn we hugǎn lɛ é jí. A sixu mɔ kpɔ́ndéwú ɖé lɛ ɖò gbǎví “Jɛ Biblu Xà Jí” ɔ mɛ.
Sɔ́ kɛ́n akpáxwé e a ko xà lɛ é tɔn. Zǎn gbǎví “Sɔ́ Kɛ́n Biblu Xixa Towe Tɔn” e ɖò wema elɔ mɛ é.
Zǎn azɔ̌wanú JW Library® ɔ. Kpo azɔ̌wanú enɛ kpo ɔ, a sixu zán alokan alǒ nǔ mɔ̌hun ɖevo lɛ dó xà Biblu ɔ, bo lɛ́ ɖótó xóyidókanji tɔn ɖò gbè gegě mɛ ɖò fí ɖebǔ.
Zǎn nudọnamẹ dogọ ɖěɖee ɖò Lẹdogbedevomẹ Aihọn Yọyọ Tọn mɛ lɛ é. Ðiɖe tò tɔn lɛ, gbǎví nǔtinmɛ tɔn lɛ kpo xógbe ɖé lɛ sín tinmɛ kpo ɖò ye mɛ, bo sixu d’alɔ we bɔ a na ɖu nǔxixa towe sín vivǐ hugǎn.
5. Sɔnǔ ɖ’ayǐ nú Biblu kplɔnkplɔn towe
Xà Ðɛhan 119:34, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Etɛwu é ka nyɔ́ ɖɔ a ni nɔ xoɖɛ cobo nɔ xà Biblu, alǒ sɔnǔ nú Biblu kplɔnkplɔn towe?
Nɛ̌ a ka sixu ɖu Biblu kplɔnkplɔn ɖokpo ɖokpo sín lè hugǎn gbɔn? Nú a ɖò nǔ sɔ́ nú nǔkplɔnkplɔn ɖé wɛ hǔn, tɛ́n wlɛnwín e bɔ d’ewu é kpɔ́n:
Xà akpáxwé bǐbɛ̌mɛ tɔn nǔkplɔnkplɔn ɔ tɔn lɛ.
Hun wemafɔ lɛ bo xà, lobo tɛ́n kpɔ́n bo mɔ nukúnnú jɛ lee ye cá kan xá nǔkplɔnkplɔn ɔ gbɔn é mɛ.
Ðǒ wuntun xókwín taji e na xósin nú nǔkanbyɔ ɖokpo ɖokpo lɛ é; enɛ na d’alɔ we bɔ a na ɖɔ xó ɖó kpɔ́ xá nǔkplɔnmɛtɔ́ towe dó nǔkplɔnkplɔn ɔ jí.
A ka tuùn à?
Kúnnuɖetɔ́ Jehovah tɔn lɛ ko zán lilɛdógbeɖevomɛ Biblu tɔn vovo lɛ. Amɔ̌, mǐ yí wǎn nú Owe Wiwe lẹ—Lẹdogbedevomẹ Aihọn Yọyọ Tọn hugǎn, ɖó é sɔgbe, zawě bo lɛ́ zán nyikɔ Mawu tɔn.—Kpɔ́n xóta Ɛntɛnɛti jí tɔn “Kúnnuɖetɔ́ Jehovah Tɔn lɛ Ðó Biblu Yeɖesunɔ Tɔn Wɛ À?”
MƐÐÉ LƐ ÐƆ: “Biblu kplɔnkplɔn vɛwǔ dín. Un ɖó táan tɔn alǒ nǔwukpíkpé tɔn ǎ.”
Etɛ a ka lin d’ewu?
ETƐ LƐ A KA KPLƆ́N?
Nú a na ɖu Biblu sín lè hugǎn hǔn, nɔ ɖè hwenu ɖó vo dó xà, nɔ xoɖɛ bo na dó mɔ nukúnnú jɛ nǔ e a xà é mɛ, lobo nɔ sɔnǔ nú Biblu kplɔnkplɔn towe ɖokpo ɖokpo.
Vɔ̌gbɔnji
Etɛ lɛ ka na d’alɔ we bɔ a na ɖu Biblu sín lè hugǎn?
Hwetɛnu a ka sixu nɔ xà Biblu bo nɔ lɛ́ kplɔ́n?
Etɛwu é ka nyɔ́ ɖɔ a ni nɔ sɔnǔ nú Biblu kplɔnkplɔn towe ɖokpo ɖokpo?
KÍJÉ
Vɔ̌ nǔ e sixu d’alɔ we bɔ a na ɖu Biblu xixa towe sín lè hugǎn é ɖé lɛ jí gbɔn.
Kplɔ́n lee a na xà Biblu ɔ gbɔn é ɖò ali atɔn nu.
“Nɛ̌ Biblu ka Sixu D’alɔ Mì Gbɔn?: Akpáxwé 1: Nɔ Kíjé Biblu Towe” (Xóta Ɛntɛnɛti jí tɔn)
Ba dò nú lee a sixu ɖu Biblu xixa sín vivǐ gbɔn é.
“Nɛ̌ Biblu ka Sixu D’alɔ Mì Gbɔn?: Akpáxwé 2: Ðu Biblu Xixa Sín Vivǐ” (Xóta Ɛntɛnɛti jí tɔn)
Kpɔ́n wlɛnwín nǔkplɔnkplɔn tɔn e ye mɛ e ko xà Biblu ɔ nú xwè gegě é zán é ɖé lɛ.