NǓKPLƆNKPLƆN 37
Nǔ E Biblu Ðɔ Dó Azɔ̌ kpo Akwɛ kpo Wu É
Ado ka ko hu we dó azɔ̌ alǒ akwɛ wu kpɔ́n à? É sixu vɛwǔ bɔ mǐ na kpé nukún dó hudo mǐtɔn lɛ wu bo lɛ́ sɛn Jehovah lee é jɛxa gbɔn é ɖò hwe ɖokpo ɔ nu. Wěɖexámɛ tawun tawun ɖé lɛ ɖò Biblu mɛ bo sixu d’alɔ mǐ.
1. Etɛ Biblu ka ɖɔ dó azɔ̌ wu?
Mawu jló ɖɔ mǐ ni ɖu azɔ̌ mǐtɔn sín vivǐ. Biblu ɖɔ: ‘Nǔɖe sɔ́ nyɔ́ nú gbɛtɔ́ ɖò gbɛ̀ mɛ zɛ é ni ɖu azɔ̌ e é wà ɔ sín gbɛ̀ wu ǎ.’ (Nǔnywɛtɔ́xó 2:24) Jehovah nɔ wà azɔ̌ syɛnsyɛn. Enyi mǐ xwedó kpɔ́ndéwú tɔn, bo nɔ w’azɔ̌ kpo kanɖodónǔwu kpo ɔ, nǔ mǐtɔn nɔ nyɔ́ nukún tɔn mɛ bɔ xomɛ nɔ hun mǐ dó mǐɖée wu.
Azɔ̌ ɖò taji. Amɔ̌, mǐ ɖó na lɔn gbeɖé bɔ é na wá ɖò taji hugǎn Jehovah sinsɛn mǐtɔn ǎ. (Jaan 6:27) É d’akpá ɖɔ enyi mǐ sɔ́ emi ɖó tɛn nukɔntɔn ɔ mɛ ɔ, emi na kpé nukún dó hudo agbaza tɔn mǐtɔn lɛ wu.
2. Linlin e ɖo jlɛ̌ jí é tɛ è ka ɖó na ɖó dó akwɛ wu?
Nǔgbo wɛ ɖɔ Biblu ɖɔ ɖɔ “akwɛ nɔ nya xɛ ɖò mɛ jí.” Amɔ̌, é lɛ́ gb’akpá nú mǐ ɖɔ akwɛ kɛɖɛ kún sixu zɔ́n bɔ mǐ ɖó awǎjijɛ ó. (Nǔnywɛtɔ́xó 7:12) Enɛ wu ɔ, Biblu dó wusyɛn lanmɛ nú mǐ ɖɔ mǐ ni ma yí wǎn nú akwɛ ó, lobo ɖɔ: “Nǔ e ɖò mi sí ɔ ni kpé mi.” (Xà Eblée lɛ 13:5.) Enyi nǔ e mǐ ɖó é nɔ kpé mǐ ɔ, akpɔ sɔ́ na ɖó mǐ ɖɔ mǐ kún ɖó nǔ gegě ó ǎ. Mǐ nɔ nyi alɔ nú axɔ́ e ma ɖò dandan ǎ lɛ é. (Nǔnywɛxó 22:7) Mǐ nɔ lɛ́ xogló awovínú e ɖò akɔnyinyi kpo dɔkun zogbe jijɛ sín tuto lɛ kpo mɛ lɛ é.
3. Nɛ̌ mǐ ka sixu nɔ hun alɔ dó na nǔ mɛ gbɔn?
Jehovah nyí Mawu alɔhundónanǔmɛtɔ́ ɖé, bɔ enyi mǐ nɔ ɖò “gbesisɔmɛ, bo na má nǔ e [mǐ] ɖó ɔ xá mɛ ɖě lɛ” hǔn, kpɔ́ndéwú tɔn xwedó wɛ mǐ ɖè nɛ. (1 Timɔtée 6:18) Mǐ sixu zán akwɛ mǐtɔn dó nɔ gudo nú agun ɔ, bo lɛ́ zán dó d’alɔ mɛ ɖevo e ɖò hudo mɛ lɛ é, ɖò taji ɔ, Mawusɛntɔ́ hatɔ́ mǐtɔn lɛ. É nyí akwɛ nabi e mǐ na é wɛ Jehovah nɔ kpɔ́n ǎ, loɔ, nǔ e sísɛ́ mǐ bɔ mǐ na é wɛ é nɔ kpɔ́n. Enyi mǐ hun alɔ dó na nǔ mɛ kpo ayi bǐ kpo ɔ, mǐ na ɖó awǎjijɛ, bo na lɛ́ hɛn xomɛ Jehovah tɔn hun.—Xà Mɛsɛ́dó 20:35.
BA DÒ NÚ NǓ D’EJI
Kpɔ́n lè ɖěɖee ɖò linlin e sɔgbe é ɖiɖó dó azɔ̌ wu kpo nǔ e ɖò mɛ sí é ni kpé mɛ kpo mɛ lɛ é.
4. Wlǐ yɛ̌yi nú Jehovah gbɔn lee a nɔ w’azɔ̌ gbɔn é gblamɛ
Linlin e mǐ nɔ ɖó dó azɔ̌ wu é ɖó na jinjɔn xɔ́ntɔn e mǐ zun xá Jehovah é jí. Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
Ðò video ɔ mɛ ɔ, etɛ ka jiwǔ nú we ɖò linlin e Jason nɔ ɖó é kpo nǔwalɔ tɔn ɖò azɔ̌ tɔn jí kpo mɛ?
Etɛ é ka wà bo dó sɔ́ azɔ̌ ɖó tɛn e jɛxa é mɛ?
Xà Kolosinu lɛ 3:23, 24, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Etɛwu linlin e mǐ nɔ ɖó dó azɔ̌ wu é ka ɖò taji?
Azɔ̌ ɖò taji. Amɔ̌, mǐ ɖó na lɔn gbeɖé bonu é na wá ɖò taji hugǎn Jehovah sinsɛn mǐtɔn ǎ
5. Enyi nǔ e ɖò mǐ sí é nɔ kpé mǐ ɔ, mǐ nɔ ɖu lè Tɔn
Mɛ gegě nɔ tɛ́n kpɔ́n bo na xò akwɛ gegě kplé lee ye kpéwú gbɔn é. Amɔ̌, wě ɖevo wɛ Biblu ɖè xá mǐ. Xà 1 Timɔtée 6:6-8, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Etɛ Biblu ka dó wusyɛn lanmɛ nú mǐ ɖɔ mǐ ni wà?
Enyi mǐ na bo tlɛ ɖó nǔ kpɛví tíwúntíwún ɖé ɔ, mǐ sixu ɖó awǎjijɛ. Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Xwédo enɛ lɛ ɖó nǔ kaka ɖé ǎ có, etɛwu ye ka ɖó awǎjijɛ?
Enyi mǐ ɖó nǔ gegě bo ka lɛ́ ɖò biba d’eji wɛ ɔ ka lo? Jezu jlɛ́ awovínú e ɖ’emɛ é dó nǔɖe wu. Xà Luki 12:15-21, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Etɛ nǔjlɛdonǔwu Jezu tɔn ka kplɔ́n we? —Kpɔ́n wemafɔ 15.
Xà Nǔnywɛxó 10:22, nwt kpo 1 Timɔtée 6:10 kpo, bo jlɛ́ ɖě dó ɖě wu. Enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Etɛ ka ɖò taji hugǎn bɔ a lin? Xɔ́ntɔn zunzun xá Jehovah wɛ à alǒ akwɛ gegě ɖiɖó? Etɛwu?
Tagba tɛ lɛ wezun kínkán ɖò akwɛ gudo ka nɔ hɛn wá?
6. Jehovah na kpé nukún dó hudo mǐtɔn lɛ wu
Azɔ̌ kpo akwɛ kpo sín tagba lɛ sixu tɛ́n nǔɖiɖi e mǐ ɖó nú Jehovah é kpɔ́n. Xò VIDEO ɔ bá kpɔ́n nǔ e mǐ sixu wà, hwenu e tagba enɛ lɛ na xwetɔ́n é. Enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
Ðò video ɔ mɛ ɔ, tagba tɛ lɛ nɔví sunnu ɔ ka mɔ?
Etɛ lɛ é ka wà bo ɖu ɖò tagba enɛ lɛ jí?
Xà Matie 6:25-34, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Etɛ lɛ Jehovah ka d’akpá bo na wà nú mɛ e sɔ́ ɛ ɖó tɛn nukɔntɔn ɔ mɛ lɛ é?
MƐÐÉ LƐ ÐƆ: “Un ɖó na w’azɔ̌ syɛnsyɛn bá hɛn xwédo ce. Un sixu yì kplé agun tɔn lɛ ɖò aklunɔzán gbla lɛ bǐ mɛ ǎ.”
Wemafɔ tɛ wu a ka kúdeji ɖɔ Jehovah sinsɛn sísɔ́ ɖó tɛn nukɔntɔn ɔ mɛ wɛ nyí gbeta ɖagbe hugǎn e kɔn a na wá é?
ETƐ LƐ A KA KPLƆ́N?
Agbazazɔ́ kpo akwɛ kpo ɖò dandan, amɔ̌, ye ɖó na fɛ́ ayi mǐtɔn sín Jehovah sinsɛn jí gbeɖé ǎ.
Vɔ̌gbɔnji
Etɛ ka sixu d’alɔ we bɔ a na ɖó linlin e ɖò jlɛ̌ jí é dó azɔ̌ wu?
Enyi nǔ e a ɖó é nɔ kpé we ɔ, lè tɛ a ka na mɔ ɖ’emɛ?
Nɛ̌ a ka sixu xlɛ́ ɖɔ emi ɖeji dó akpá e Jehovah dó ɖɔ emi na kpé nukún dó togun emitɔn wu é wu gbɔn?
KÍJÉ
Kpɔ́n ɖɔ Biblu ɖɔ ɖɔ akwɛ nyí nǔ nyanya alǒ gbɔ wɛ à jí.
“Akwɛ Wɛ Nyí Nǔ Nyanya lɛ Bǐ Sín Ðɔ À?” (Xóta Ɛntɛnɛti jí tɔn)
Kpɔ́n nǔnamɛ alɔkpa e nɔ nyɔ́ Mawu nukúnmɛ é.
Akɔnyinyi nyla ǎ wɛ à?
Kpɔ́n nǔ e sísɛ́ nya ɖé bɔ é jó akɔnyinyi kpo ajojija kpo dó é.
“Biblu Nɔ Huzu Gbɛzán Mɛtɔn” (Atɔxwɛ [Gungbe], 1er janvier 2012)