Cyan Ayiɖeɖayǐ E Nɔ Hɛn Xomɛ Jehovah Tɔn Hun lɛ É

Jehovah wɛ nyí “Mawu awǎjijɛnɔ ɔ.” (1 Timɔtée 1:11, nwt) É ba ɖɔ mǐ ni ɖó awǎjijɛ bo ɖu gbɛ̀ sín vivǐ. Nú mǐ yí gbɔjɛ ɖò azɔ̌mɛ bo ɖè hwenu ɖó vo, lobo ɖè ayi ɖ’ayǐ ɔ, é nɔ hun xomɛ n’i. Ðò nǔkplɔnkplɔn elɔ mɛ ɔ, mǐ na mɔ lee mǐ sixu zán ayiɖeɖayǐ sín hwenu mǐtɔn ɖò ali ɖé nu, b’ɛ na hɛn awǎjijɛ wá nú mǐ bɔ mǐ na lɛ́ ɖu lè tɔn ganji gbɔn é, kpo lee é na lɛ́ hɛn xomɛ Jehovah tɔn hun gbɔn é kpo.

1. Etɛ jí mǐ ka ɖó na lin tamɛ dó hwenu e mǐ na ɖò ayiɖeɖayǐ mǐtɔn lɛ cyan wɛ é?

Nú a ɖò ayi ɖè ɖ’ayǐ wɛ ɔ, etɛ lɛ a ka yí wǎn na bo nɔ wà? Mɛɖé lɛ yí wǎn nú ayiɖeɖayǐ sín hwenu yetɔn zinzán ɖò xwégbe. Ye nɔ yí wǎn nú wema ɖé xixa mɔ̌, han sise, fímu ɖé kpínkpɔ́n, alǒ Ɛntɛnɛti jí yiyi. Mɛ ɖevo lɛ yí wǎn nú nǔɖe lɛ wiwa ɖó kpɔ́ xá xɔ́ntɔn yetɔn lɛ, ɖi zɔnlin gaga ɖiɖi dó dɛn afɔkanmɛ, tɔ̀ linlin, alǒ lɔnyiji-fɔnkan sín ayihun ɖé dida ɖó kpɔ́. Nǔ ɖebǔ wɛ mǐ na bo yí wǎn na bo nɔ wà ɔ, mǐ ɖó na mɔ nǔ jɛ wu ɖɔ ayiɖeɖayǐ e mǐ nɔ cyan lɛ é nyí “nǔ e nɔ nyɔ́ Aklunɔ nukúnmɛ é.” (Efɛzinu lɛ 5:10) É ɖò taji ɖɔ mǐ ni mɔ nukúnnú jɛ enɛ mɛ, ɖó ɖò ayiɖeɖayǐ e tíìn ɖò kpaa mɛ ɖò égbé lɛ é mɛ ɔ, nǔ e Jehovah gbɛ́ wǎn na lɛ é nɔ ɖò ye mɛ, ɖi adakaxixo, nǔbliblíwiwa, alǒ awovínúwiwa. (Xà Ðɛhan 11:5.) Etɛ lɛ ka na d’alɔ mǐ, bɔ mǐ na cyan ayiɖeɖayǐ mǐtɔn lɛ kpo nǔnywɛ kpo?

Nú mǐ nɔ cyan xɔ́ntɔn e yí wǎn nú Jehovah lɛ é ɔ, ye na kplɔ́n nǔ ɖagbe lɛ mǐ, bo na lɛ́ d’alɔ mǐ bɔ mǐ na cyan ayiɖeɖayǐ ɖagbe lɛ. Lee mǐ ko kplɔ́n gbɔn wá yì ɖò Nǔkplɔnkplɔn 48gɔ́ ɔ mɛ é ɔ, “a dó nǔnywɛtɔ́ há ɔ, a na huzu nǔnywɛtɔ́.” Ðò alɔ ɖevo mɛ ɔ, nú mǐ ɖó aca bo nɔ dó gbɛ̌ xá mɛ ɖěɖee ma yí wǎn nú nǔgbododó Mawu tɔn ǎ lɛ é ɔ, mǐ ‘na wà nǔ dó mǐɖée wu.’—Nǔnywɛxó 13:20.

2. Etɛwu é ka ɖò taji ɖɔ mǐ ni nɔ ɖó dogbó nú táan nabi e mǐ nɔ zán ɖò ayiɖeɖayǐ kɔn é?

Nú ayiɖeɖayǐ e mǐ nɔ cyan lɛ é na bo ma tlɛ nɔ hɛn nǔ gblé dó mǐ wu ǎ ɔ, mǐ ka ɖó na ɖó ayi te tawun bo na zán táan gegě ɖò ye kɔn ǎ. É ma nyí mɔ̌ ǎ ɔ, mǐ sɔ́ na ɖó hwenu kaka ɖé bo na zán dó nǔ taji lɛ tamɛ ǎ. Biblu dó wusyɛn lanmɛ nú mǐ ɖɔ, mǐ ni “hwlɛndó hwenu lɛ, bo wà nǔ.”—Xà Efɛzinu lɛ 5:15, 16.

BA DÒ NÚ NǓ D’EJI

Mǐ ni kplɔ́n lee a na wá gbeta ɖagbe lɛ kɔn dó yiɖeɖayǐ towe lɛ wu gbɔn é.

3. Nyi alɔ nú ayiɖeɖayǐ nyanya lɛ

Etɛwu mǐ ka ɖó na nɔ cyan ayiɖeɖayǐ mǐtɔn lɛ kpo sɔxwixwe kpo? Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.

VIDEO: Ayiɖeɖayǐ Tɛ lɛ Un ka Ðó Na Cyan? (4:39)

• Nɛ̌ ayihundida Hlɔma hwexónu tɔn tɔn lɛ ka cí égbé tɔn ɖé lɛ ɖɔhun gbɔn?

• Ðò video ɔ mɛ ɔ, etɛ Danny ka kplɔ́n dó ayiɖeɖayǐ wu?

Xà Hlɔmanu lɛ 12:9, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ wemafɔ enɛ ka na d’alɔ we bɔ a na cyan ayiɖeɖayǐ towe lɛ ganji gbɔn?

Etɛ lɛ mɔ̌ Jehovah ka gbɛ́ wǎn na? Xà Nǔnywɛxó 6:16, 17 kpo Galatinu lɛ 5:19-21 kpo. Mi xà wemafɔ lɛ ɖokpo hǔn, mi nɔ ɖɔ xó ɖó kpɔ́ dó nǔkanbyɔ elɔ jí:

• Nǔ ɖěɖee è slɛ́ ɖò wemafɔ elɔ lɛ mɛ lɛ é ɖětɛ lɛ ka sukpɔ́ ɖò ayiɖeɖayǐ égbé tɔn lɛ mɛ?

Lee a sixu cyan ayiɖeɖayǐ towe lɛ kpo nǔnywɛ kpo gbɔn é

Kanbyɔ hwiɖée ɖɔ:

• Etɛ wu é ka ɖɔ xo dó? Nǔ e Jehovah gbɛ́ wǎn na lɛ é ɖě ka ɖ’emɛ wɛ à?

• Hwetɛnu? É yí nǔ taji hugǎn lɛ sín hwenu wɛ à?

• Kpo mɛ̌ mɛ̌ kpo? É na zɔ́n bɔ un na vɛ́ kpo mɛ ɖěɖee ma yí wǎn nú Jehovah ǎ lɛ é kpo, alǒ un na zán hwenu ɖó kpɔ́ xá ye hwɛhwɛ wɛ à?

Zɔninɔ nú awovínú lee è kpéwú gbɔn é bǐ nɔ nya xɛ ɖò mɛ jí. Enɛ wu wɛ mǐ ɖó na hɔn nú ayiɖeɖayǐ ɖebǔ e mǐ mɔ ɖɔ é kún sixu wà ɖagbe nú mǐ ó é

4. Zǎn hwenu towe kpo nǔnywɛ kpo

VIDEO: Etɛ lɛ ka Ðó Acɛ Dó Hwenu Towe Jí? (2:45)

• Nɔví e ɖò video ɔ mɛ é ɖò nǔ nyanya ɖebǔ kpɔ́n wɛ ǎ có, nɛ̌ lee é nɔ zán ayiɖeɖayǐ sín hwenu tɔn gbɔn é ka wà nǔ dó wǔ tɔn gbɔn?

Xà Filipunu lɛ 1:10 nwt, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ wemafɔ enɛ ka sixu d’alɔ mǐ, bɔ mǐ na wá gbeta táan nabi e mǐ na nɔ zán ɖò ayiɖeɖayǐ kɔn é tɔn kɔn gbɔn?

5. Cyan ayiɖeɖayǐ e ma nɔ wà nǔ dó mɛ wu ǎ lɛ é

Ayiɖeɖayǐ ɖé lɛ ɖè bo nɔ nyɔ́ Jehovah nukúnmɛ ǎ có, ayiɖeɖayǐ e nɔ dó awǎjijɛ nú mɛ é gegě ka ɖè bo nɔ nyɔ́ nukún tɔn mɛ. Xà Nǔnywɛtɔ́xó 8:15 kpo Filipunu lɛ 4:8 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Ayiɖeɖayǐ e ma nɔ wà nǔ dó mɛ wu ǎ é ɖětɛ a ka yí wǎn na?

ETƐ LƐ A KA KPLƆ́N?

Jehovah ba ɖɔ mǐ ni nɔ cyan ayiɖeɖayǐ e ma nɔ wà nǔ dó mɛ wu ǎ lɛ é, bo nɔ ɖu vivǐ yetɔn.

Vɔ̌gbɔnji

• Ayiɖeɖayǐ tɛ lɛ Klisanwun lɛ ka ɖó na nyi alɔ na?

• Etɛwu mǐ ka ɖó na nɔ acéjí dó táan nabi e mǐ nɔ zán ɖò ayiɖeɖayǐ lɛ kɔn é wu?

• A ka jló na cyan ayiɖeɖayǐ e nɔ nyɔ́ Jehovah nukúnmɛ lɛ é à? Etɛwu?

KÍJÉ

Kpɔ́n mɛ e sín ta ayiɖeɖayǐ e mǐ nɔ cyan lɛ é sín agban ɖè é.

“Kúnnuɖetɔ́ Jehovah Tɔn lɛ Dó Fímu, Wema, Alǒ Han ɖé lɛ Sín Sɛ́n Wɛ À?” (Xota Ɛntɛnɛti jí tɔn)

Kpɔ́n lee a sixu wá gbeta ɖagbe lɛ kɔn dó ayiɖeɖayǐ lɛ wu gbɔn é.

“Ayiɖeɖayǐ Towe lɛ ka Nɔ Hɛn Lè Wá nú We À?” (Atɔxwɛ [Gungbe], 15 octobre 2011)

Ðò tan gbɛzán tɔn “Un Tlɛ Ðu Ðò Wǎn E Un Nɔ Gbɛ́ nú Mɛ É Jí” mɛ ɔ, kpɔ́n lee nya ɖé huzu lee é nɔ cyan ayiɖeɖayǐ tɔn lɛ gbɔn é.

“Biblu Nɔ Huzu Gbɛzán Mɛtɔn” (Atɔxwɛ [Gungbe], 1^er février 2010)

Kpɔ́n lee nɔ ɖé wá gbeta e nǔnywɛ kpé é ɖé kɔn gbɔn é. Gbeta e kɔn é wá é kúnkplá fímu e ɖó kancica xá awovínúwiwa é.

Nyi Alɔ nú Ayiɖeɖayǐ E Mɛ Awovínúwiwa Ðè lɛ É (2:02)