XÓÐƆÐÓKPƆ́ ÐÉ BÍBƐ́
NǓKPLƆ́NKPLƆ́N 6
Nɔ gbó adɔ
Nǔgbódodó: “Mawu mǐtɔn bló bɔ mǐ gbó adɔ, bo jlá wɛn ɖagbe Mawu tɔn ɔ mi.”—1 Tɛ. 2:2.
Nǔ e Jezu wa é
1. Kpɔ́n VIDEO ɔ, alǒ xa Luki 19:1-7. Énɛ́ gúdo hǔn, lin tamɛ dó nǔkanbyɔ́ élɔ́ lɛ́ jí:
Étɛ́wú mɛɖé lɛ́ ka sixú ko hɔn nú Zacée?
Étɛ́ ka sísɛ́ Jezu b’ɛ ma kpɔ́n dó nǔtí wú ǎ bo jlá wɛn ɔ ɛ?
Étɛ́ kpɔ́ndéwú Jezu tɔn ka sixú kplɔ́n mǐ?
2. Mǐ ɖó hudó adɔgbígbó tɔn cóbó ná jlá wɛn ɖagbe Axɔ́súɖuto ɔ tɔn mɛ bǐ agba.
Xwedó kpɔ́ndéwú Jezu tɔn
3. Nɔ ɖeji dó Jexóva wú. Gbigbɔ Mawu tɔn ná hlɔ̌nhlɔ́n Jezu bɔ é jlá wɛn ɔ, é sixú ná hlɔ̌nhlɔ́n hwi lɔmɔ̌. (Mat. 10:19, 20; Luk. 4:18) Byɔ̌ adɔgbígbó Jexóva, bá dó jlá wɛn ɔ mɛ ɖěɖěe a sixú mɔ ɖɔ yě dó xɛsi lɛ́ é.—Mɛ. 4:29.
4. Ma nɔ ɖó linlin agɔ dó mɛ lɛ́ wú ó. Mǐ sixú nɔ xo nǔ kpɔ́n dó mɛɖé lɛ́ sisɛkpɔ́ wú, ɖó lěe yě cí ɖo wěxo é, ninɔmɛ yětɔn, dɔkunnɔ alǒ yatɔ́nɔ e yě nyí é, nǔsísɔ́ yětɔn, alǒ nǔ e yě ɖi nǔ ná ɖo sinsɛn linu lɛ́ é wú. Amɔ̌, flín nǔ élɔ́ lɛ́:
Jexóva kpó Jezu kpó sixú mɔ nǔ jɛ ayi mɛ, mǐdɛɛ lɛ́ ka sixú ǎ.
Mɛ alɔkpa lɛ́ bǐ wɛ Jexóva sixú kú nǔbláwǔ ná.
5. Gbǒ adɔ, amɔ̌, nɔ lɛ́ wlí yɛ̌yi nú mɛ, bo nɔ lɛ́ nɔ acéjí. (Mat. 10:16) Nyi alɔ nú nǔdindɔn. Nú mɛ ɔ ma yí wɛn ɖagbe ɔ ǎ, alǒ a mɔ ɖɔ émí kún ɖo ayijayǐ mɛ ó hǔn, ɖǒ nǔ xóɖɔɖókpɔ́ ɔ nu kpó sísí kpó.—Nǔx. 17:14.