Wǎ Gbeta ɔ Kɔn Bo Nɔ Gudo nú Axɔ́suɖuto Mawu Tɔn Dìn!
Mǐ ni ɖɔ ɖɔ è ɖó ayi wu ɖɔ ayikúngban jló na dánwǔ ɖò fí e a ɖè é. Acɛkpikpa ɔ sín mɛ lɛ jla wɛn akpágbánúmɛ tɔn myɔɖowǔ elɔ gbɔn televiziɔn kpo hladio kpo jí: “MI HƆN! MI BA BIBƐTƐN DÌN!” Etɛ a ka na wà? É ɖò gaan ɖɔ a na yì fí e ayijayǐ tíìn ɖè é ɖé.
Ðò ali ɖé nu ɔ, fí e ayikúngban jló na dánwǔ ɖè é wɛ mǐ bǐ ɖò gbɛ̀ nɔ ɖè wɛ; Jezu ɖɔ dó enɛ wu ɖɔ “adǎn e na wá gbò gbɛtɔ́ lɛ hwenɛnu ɔ na syɛn dín.” (Matie 24:21) Fí hɔn gbɔn ɖebǔ na tíìn ɖò adǎngbomɛ enɛ hwenu ǎ. Amɔ̌, mǐ sixu wà nǔɖe dó nya xɛ ɖò mǐɖée jí. Etɛ lɛ mǐ ka sixu wà?
Ðò Mawuxóɖiɖɔ Só Jí tɔn ɔ hwenu ɔ, Jezu Klisu na alixlɛ́mɛ elɔ: “Enɛ wu ɔ, mi nɔ ɖò Axɔ́suɖuto ɔ kpo nǔjlɔjlɔwiwa Mawu tɔn kpo ba wɛ jɛ nukɔn.” (Matie 6:33, nwt) Nɛ̌ mǐ ka nɔ wà mɔ̌ gbɔn?
Ba Axɔ́suɖuto Mawu tɔn jɛ nukɔn. Enɛ sín tinmɛ wɛ nyí ɖɔ Axɔ́suɖuto Mawu tɔn ɔ ɖó na mya nukún nú mǐ hú nǔ ɖevo ɖebǔ. (Matie 6:25, 32, 33) Etɛwu é ka ɖó na mya nukún nú mǐ sɔmɔ̌? Ðó gbɛtɔ́ lɛ sixu kpéwú bo ɖeɖɛ tagba gbɛ̀ ɔ tɔn lɛ ǎ. Axɔ́suɖuto Mawu tɔn kɛɖɛ jɛn sixu wà azɔ̌ syɛnsyɛn enɛ.
Ba nǔjlɔjlɔwiwa Mawu tɔn. Mǐ ɖó na dó gǎn bo zán gbɛ̀ sɔgbe xá sɛ́n kpo nǔgbododó kpo jlɔjlɔ Mawu tɔn lɛ. Aniwu? Ðó enyi mǐ wá gbeta nǔ e sɔgbe abǐ nyla é tɔn kɔn nú mǐɖesunɔ ɔ, é na nyla tawun. (Nǔnywɛxó 16:25) Ðò alɔ ɖevo mɛ ɔ, enyi mǐ nɔ zán gbɛ̀ sɔgbe xá nǔgbododó Mawu tɔn lɛ ɔ, mǐ na hɛn xomɛ Mawu tɔn hun, bɔ é ka na lɛ́ hɛn lè wá nú mǐɖesu.—Ezayíi 48:17, 18.
Nɔ ɖò Axɔ́suɖuto Mawu tɔn kpo nǔjlɔjlɔwiwa Mawu tɔn kpo ba wɛ jɛ nukɔn. Jezu gb’akpá nú mɛ ɖɔ nǔɖe lɛ sixu fɛ́ ayi mɛɖé lɛ tɔn bɔ ye na lin ɖɔ enyi emi jɛ dɔkun ɔ wɛ emi na nɔ ayijayǐ mɛ. Mɛɖé lɛ sixu jó yeɖée dó bɔ adohu adohu gbɛmɛ tɔn lɛ na ɖí bú ye kaka bɔ ye sɔ́ na mɔ hwenu bo na ba Axɔ́suɖuto Mawu tɔn ǎ.—Matie 6:19-21, 25-32.
É ɖò mɔ̌ có, Jezu d’akpá ɖɔ mɛ ɖěɖee nɔ nɔ gudo nú Axɔ́suɖuto Mawu tɔn lɛ é na ɖó nǔ e sín hudo ye ɖó lɛ é dìn, bo na lɛ́vɔ ɖu vivǐ nyɔna mavɔmavɔ lɛ tɔn ɖò sɔgudo.—Matie 6:33.
Ahwanvu Jezu tɔn xwè kanweko nukɔntɔn ɔ tɔn lɛ ba axɔ́suɖuto Mawu tɔn kpo nǔjlɔjlɔwiwa tɔn kpo jɛ nukɔn có, ye mɔ bonu wuvɛ̌ kpo yajiji lɛ bǐ kpo wá vivɔnu ɖò hwe yetɔn nu ǎ. Amɔ̌, è ka cyɔn alɔ ye jí. Gbɔn nɛ̌ é?
Ye zán gbɛ̀ sɔgbe xá nǔgbododó jlɔjlɔ Mawu tɔn lɛ, enɛ zɔ́n bɔ ye mɔ wuvɛ̌ e mɛ e nɔ wɔn ya nú nǔ e Mawu ɖɔ lɛ é mɔ lɛ é ǎ. Nǔɖiɖi syɛnsyɛn e ye ɖó ɖɔ Axɔ́suɖuto ɔ na wá é zɔ́n bɔ ye dɛ ɖò tagba e tlɛ syɛn hugǎn lɛ é nu. Mawu lɛ́ na ye “hlɔnhlɔn aditi” ɔ, bonu ye na dɛ ɖò tagba yetɔn lɛ nu.—2 Kɔlɛntinu lɛ 4:7-9.
A KA NA BA AXƆ́SUÐUTO Ɔ JƐ NUKƆN À?
Klisanwun e nɔ gbɛ̀ ɖò xwè kanweko nukɔntɔn ɔ mɛ lɛ é setónú nú gbeɖiɖe Jezu tɔn e ɖɔ ɖɔ è ni ba Axɔ́suɖuto ɔ jɛ nukɔn é. Ye jla wɛnɖagbe ɔ gbɔn gbɛ̀ ɔ bǐ mɛ hwenɛnu. (Kolosinu lɛ 1:23) Mɛɖé lɛ ka ɖò mɔ̌ wà wɛ ɖò égbé à?
Ganji! Kúnnuɖetɔ́ Jehovah tɔn lɛ mɔ ɖɔ hwenu klewun ɖé wɛ kpò bɔ Axɔ́suɖuto Mawu tɔn na ɖó nǔ nu nú gbɛ̀ elɔ. Enɛ wu ɔ, ye nɔ dó gǎn e wu ye kpé é bǐ, bo nɔ zán gbɛ̀ sɔgbe xá gbeɖiɖe Jezu tɔn elɔ: “È na jla axɔ́suɖuɖu Mawu tɔn sín Wɛnɖagbe gbɔn gbɛ̀ ɔ bǐ mɛ, bonu é na nyí kúnnuɖiɖe nú gbɛtɔ́ lɛ bǐ. Enɛ ɔ gudo ɔ, gbɛ̀ ɔ na vɔ.”—Matie 24:14.
Nɛ̌ a ka na wà nǔ gbɔn dó wɛnɖagbe ɔ wu? Mǐ byɔ we ɖɔ a ni wà nǔ mɛ ɖěɖee nɔ toxo Masedwani tɔn mɛ ɖò Belée ɖò xwè kanweko nukɔntɔn ɔ mɛ lɛ é ɖɔhun. Hwenu e ye sè wɛnɖagbe e ɖɔ xó dó Axɔ́suɖuto ɔ wu é ɖò mɛsɛ́dó Pɔlu nu gudo é ɔ, ye yí wɛn ɔ “kpodo jlǒ ɖagbe kpan.” Enɛ gudo ɔ, ye nɔ “kíjé Mawuxówema ɔ” ganji bo nɔ kpɔ́n ɖɔ xó e ye sè lɛ é ka sɔgbe à jí, bo nɔ wá wà nǔ sɔgbe xá nǔ ɖěɖee ye kplɔ́n lɛ é.—Mɛsɛ́dó 17:11, 12.
A sixu wà nǔ ye ɖɔhun. Enyi a nɔ ba Axɔ́suɖuto Mawu tɔn kpo nǔjlɔjlɔwiwa Mawu tɔn kpo jɛ nukɔn ɔ, a na mɔ bibɛtɛn dìn bo na lɛ́ ɖu vivǐ fífá kpo ayijayǐ kpo e na nɔ ayǐ sɔyi é tɔn ɖò sɔgudo.