Zǎn Xó Mawu Tɔn Ðò Sinsɛnzɔ́ ɔ Mɛ
1. Etɛ ka sixu d’alɔ mǐ bɔ mǐ na zán Xó Mawu Tɔn ɖò sinsɛnzɔ́ ɔ mɛ?
1 Wema mǐtɔn lɛ sixu d’alɔ mǐ bɔ mǐ na zán Xó Mawu Tɔn ɖò sinsɛnzɔ́ ɔ mɛ. Wemafɔ e jɛxa lɛ é nɔ ɖò ye mɛ hwɛhwɛ, bo sixu fɔ́n jlǒ mɛ lɛ tɔn nyite. Ði kpɔ́ndéwú ɔ, mi nú mǐ ni kpɔ́n lee alɔnuwema Wɛnɖagbe ɖé Sín Mawu Gɔ́n sixu d’alɔ mǐ bɔ mǐ na mɔ wemafɔ enɛ lɛ gbɔn é.
2. Nɛ̌ mǐ ka sixu zán xota 8gɔ́ ɔ gbɔn ɖò sinsɛnzɔ́ ɔ mɛ?
2 A sixu zán wemafɔ e ɖò xota 8gɔ́ ɔ mɛ lɛ é, bo ɖɔ: “Mǐ wá ba mi kpɔ́n klewun, ɖó mɛ gègě nɔ kanbyɔ yeɖée ɖɔ: ‘Aniwu wɛ nǔnyanyawiwa kpo wuvɛ̌ mimɔ kpo ka tíìn?’ [Ðò xá ɖé lɛ mɛ ɔ, é nɔ nyɔ́ hugǎn ɖɔ è ni xlɛ́ nùkanbyɔ ɔ xwétɔ́ ɔ.] Etɛ ka nyí linlin mitɔn? [Jǒ é dó nú é na xósin.] Biblu na xósin e sɔgbe é ɖé nú nùkanbyɔ enɛ.” Xà wemafɔ ɖěɖee ɖò finɛ é ɖokpo alǒ hú mɔ̌ sín Biblu mɛ tlɔlɔ, bo ɖɔ xó d’eji. Enyi xwétɔ́ ɔ ɖè jlǒ xlɛ́ ɔ, a sixu byɔ ɛ ɖɔ emi na kplɔ́n xota ɔ xá ɛ.
3. Nɛ̌ mǐ ka sixu zán xota 9gɔ́ ɔ dó bɛ́ xóɖɔɖókpɔ́ ɖò xá ɖěɖee mɛ mɛ lɛ ma nyí Klisanwun ɖè ǎ é gbɔn?
3 Xota 9gɔ́ ɔ sín nùkanbyɔ 2gɔ́ ɔ sixu nyɔ́ zán tawun hwenu e è ɖò yɛhwexó ɖɔ wɛ ɖò xá ɖěɖee mɛ mɛ lɛ ma nyí Klisanwun ɖè ǎ é. Ði kpɔ́ndéwú ɔ, a sixu ɖɔ: “Mǐ wá ba mi kpɔ́n klewun ɖó mǐ ɖò xó ɖɔ dó nǔ e na d’alɔ xwédo lɛ é jí wɛ. Mi yí gbè ɖɔ xwédo lɛ nɔ kpé tagba gègě ɖò égbé à cé? [Jǒ é dó nú é na xósin.] Xó elɔ lɛ e nùnywɛ kpé é ko d’alɔ xwédo gègě: “Nyɔnu ɖokpo ɖokpo ɖó na sí asú tɔn.” [Dandan wɛ ɖɔ a ni ɖɔ nú mɛ ɔ ɖɔ Efɛzinu lɛ 5:33 mɛ wɛ xó enɛ gosin ǎ. Enyi nyɔnu ɖé ɖɔ xó na wɛ a ɖè ɔ, é na nyɔ́ ɖɔ a ni ɖɔ xó e ɖò Efɛzinu lɛ 5:28 mɛ é pɛ́pɛ́pɛ́ n’i.] Mi ka lin ɖɔ wěɖexámɛ enɛ xwixwedó na d’alɔ ɖò alɔwliwli mɛ à?”
4. Etɛ a ka sixu wà ɖò xóɖɔɖókpɔ́ ɖé sín vivɔnu nú mɛ e ma nyí Klisanwun ǎ é ɖé?
4 Ðò xóɖɔɖókpɔ́ mitɔn sín vivɔnu hǔn, blǒ tuto bonu mi na gbɛ̀ kàn d’enu hweɖevonu. Vlafo a sixu bló tuto bo na ɖɔ xó dó wemafɔ ɖevo e kpò ɖò nùkanbyɔ e a zán é glɔ lɛ é ɖokpo jí. Nǔ xwétɔ́ ɔ ni mɔ nǔ jɛ wu ɖɔ xó ɖagbe ɖagbe enɛ e má xá ɛ wɛ a ɖè é gosin Biblu mɛ, ɖò hwenu e é jɛxa dó é. Zɔn dó xó e mi ɖɔ ɖó kpɔ́ wá yì lɛ é kpo linlin e mɛ ɔ nɔ ɖó dó Biblu wu é kpo jí bo xwlé é wema e a mɔ ɖɔ é na dɔn ɛ é ɖé.—Kpɔ́n Sinsɛnzɔ́ Axɔsuɖuto ɔ Tɔn Mǐtɔn Woosun 2013 tɔn, wexwɛ 3-6.