Nùflínmɛ Kpléɖókpɔ́ Ðaxó Tɔn Lɛ
◼ Ganmɛ Lɛ: Gan 8:00 mɛ zǎnzǎn wɛ è na hun fí e na bló kpléɖókpɔ́ ɖaxó ɔ ɖè wɛ è ɖè é sín hɔntogbo lɛ. Gan 9:20 mɛ zǎnzǎn wɛ nùxixo na bɛ́ ɖò azǎn atɔn lɛ bǐ jí. Hwenɛnu ɔ, mǐ bǐ ɖó na yì jinjɔn tɛn mǐtɔn lɛ mɛ, bonu tuto ɔ na dó sixu bɛ́ kpo yɛ̌yi kpan. Gan 5:00 mɛ mɔ̌ hwelɛkɔ wɛ è na sú ta nú tuto ɔ ɖò Axɔsuzángbe kpo Síbígbe kpo, bo na sú ta na ɖò gan 4:00 mɛ mɔ̌ hwelɛkɔ ɖò Aklunɔzángbe.
◼ ‘Kpa Susu nú Jehovah Dó Han Mɛ’: Togun Mawu tɔn hwexónu tɔn ɔ nɔ kpa susu nú Jehovah dó han mɛ, bɔ kaka jɛ égbé ɔ, nùxixo kpó ɖò akpáxwé taji ɖé nyí wɛ ɖò sinsɛn-biblo nugbǒ ɔ mɛ. (Ðɛh. 28:7) Akpáxwé kpléɖókpɔ́ ɖaxó mǐtɔn lɛ tɔn ɖokpo ɖokpo nɔ bɛ́ kpo nùxixo ɖé kpo. É nyí nùxixo ɖé kpowun ǎ, nǔ tɔn wɛ è sɔ́ bonu mǐ na dó sixu kplɔ́n nǔ dó Jehovah wu bo sɛ̀n ɛ. Enɛ wu ɔ, enyi zinkponɔ ɔ ɖɔ ɖɔ nùxixo ɔ ko ɖò na bɛ́ wɛ ɔ, é jɛ ɖɔ mǐ ni jinjɔn ayǐ hwenɛnu, bo ɖótó nùxixo ɔ bonu é ni sù nukún mǐtɔn mɛ, é na nyɔ́ hugǎn ɖɔ mǐ ni ɖò xó ɖɔ kpo mɛ e ɖò akpà mǐtɔn lɛ é kpo wɛ. Mɔ̌ wiwa mǐtɔn nɔ xlɛ́ ɖɔ gǎn e hanjigbɛta Watchtower tɔn dó lɛ é xɔ akwɛ ɖò nukún mǐtɔn mɛ. Nɔví sunnu kpo nɔví nyɔnu enɛ lɛ kpo nɔ zán akwɛ yeɖesunɔ tɔn dó sɛ̀ tɛn yì Patterson ɖò New York, azɔn we ɖò xwè ɖokpo mɛ, bo nɔ sɔnǔ nú nùxixo ɖagbeɖagbe e sín vivǐ mǐ na ɖu lɛ é. Enyi mǐ ɖótó nùxixo ɔ ganji gudo ɔ, mǐ bǐ ɖó na jihan Axɔsuɖuto ɔ tɔn mǐtɔn lɛ dó kpa susu nú Jehovah.
◼ Fí E È Nɔ Gán Kɛkɛ lɛ kpo Mɔ̌to lɛ kpo Ðó É: Ðò nɔtɛn kpléɖókpɔ́ ɖaxó tɔn e mǐɖesunɔ nɔ kpé nukún dó fí e è nɔ gán kɛkɛ lɛ kpo mɔ̌to lɛ kpo ɖó é ɔ, tɛnmɛ na tíìn vɔ̌nu bɔ è na tò kɛkɛ lɛ kpo mɔ̌to lɛ kpo mɛjijɛmɛjijɛ. Ðó tɛnmɛ nɔ sukpɔ́ ɖò fí e è nɔ gán mɔ̌to lɛ ɖó é ǎ wutu ɔ, é na nyɔ́ ɖɔ è ni dó hǔn ɖó kpɔ́, enyi é nyɔ́ bló ɔ nɛ. Wà nǔ alɔ ɖò alɔ mɛ kpo mɛ e nɔ kpé nukún dó fí enɛ lɛ wu lɛ é kpo bonu awovinú ni ma jɛ ó.
◼ Tɛnmɛ Yíyí Ð’ayǐ nú Mɛ: Enyi ayǐ ɖokpo ɖokpo hɔ́n bonu è hun nɔtɛn kpléɖókpɔ́ ɔ tɔn sín hɔn lɛ hǔn, ma kanwezun yì zinkpo lɛ kɔn mɛ ɖò agba hwlɛn xá kpléɖókpɔ́watɔ́ hàtɔ́ towe lɛ wɛ ɖɔhun ó. Kɛnklɛn bonu nǔ mɛ ɖevo lɛ tɔn ni nɔ ɖu ayi mɛ nú we, enyi é tlɛ byɔ ɖɔ mǐ na sɔ́ nǔ e nɔ nyɔ́ nukún mǐtɔn mɛ lɛ é dó savɔ̌ dó nɔví mǐtɔn lɛ tamɛ ɔ nɛ. Mɛɖesunɔ sísɔ́ dó savɔ̌ dó mɛ ɖevo lɛ tamɛ nɔ xlɛ́ ɖɔ Klisanwun nugbǒ lɛ wɛ nú mǐ, bo nɔ lɛ́ sísɛ́ nǔkpɔntɔ́ lɛ bɔ ye nɔ kpa susu nú Mawu. (Jaan 13:34, 35; 1 Kɔ. 13:5; 1 Pi. 2:12) Mɛ e kpo hwi kpo dó hǔn ɖokpo ɔ lɛ é, nɔ dɔ xwé ɖokpo ɔ gbè lɛ é, alǒ mɛ e a jɛ Biblu kplɔ́n xá jí lɛ é kɛɖɛ jɛn a sixu yí tɛnmɛ ɖ’ayǐ na. Kɛnklɛn ma fɔ nǔ ɖó zinkpo e a ma yí ɖ’ayǐ nú mɛ ǎ lɛ é jí ó. Nǔwaɖókpɔ́ ɖò ali enɛ nu na zɔ́n bɔ mɛ ɖevo lɛ na mɔ ɖɔ zinkpo enɛ lɛ ɖò vɔ̌. È sɔnǔ nú tɛnmɛ bunɔ ɖé lɛ nú mɛxomɔ lɛ kpo wɔ̌nɖowǔnanɔ lɛ kpo. Ðó tɛnmɛ enɛ lɛ sukpɔ́ ǎ wutu ɔ, mɛ e ɖò nukún kpé dó mɛxomɔ ɖé alǒ wɔ̌nɖowǔnanɔ ɖé wu wɛ é ɖokpo alǒ wè jɛn sixu jinjɔn finɛ xá ɛ.
◼ Nǔsisɔ Ðó Jlɛ̌ Jí: Nǔsisɔ mǐtɔn ɖò kpléɖókpɔ́ ɖaxó ɔ hwenu ɖó na jɛxa, bo ɖò jlɛ̌ jí, lobo ɖó na zɛ̀kpá gbɛ̀ ɔ tɔn ɖɔhun ǎ. (1 Tim. 2:9) É na bo tlɛ nyí hwenu e mǐ ɖò fí e è mɔ xɔ nú mǐ ɖó é alǒ fí ɖevo é, kpo hwenu e mǐ ɖò gbigbɔjɛ wɛ jɛ nukɔn nú akpáxwé lɛ é alǒ ɖò akpáxwé lɛ gudo é kpo ɔ, mǐ ɖó na gbɔ ya ké nú nǔsisɔ mǐtɔn alǒ sɔnǔ bo cí kluyɔɔ ǎ. Mɔ̌ mɛ ɔ, mǐ na gó bo sɔ́ kpléɖókpɔ́ ɔ sín kati akɔ́nnu tɔn mǐtɔn ɖó akɔ́nnu, lobɔ winnya na hu mǐ cobonu mǐ na ɖekúnnu hwenu e ali tɔn na hun nú mǐ dó é ǎ. Nǔsisɔ mǐtɔn kpo walɔ ɖagbe mǐtɔn kpo ɖò kpléɖókpɔ́ ɖaxó e ja lɛ é hwenu na dɔn ayijlɔjlɔnɔ lɛ bɔ ye na sè wɛn Biblu tɔn e nɔ hwlɛn gbɛ̀ gán é, bo na lɛ́ dó xomɛhunhun nú Jehovah.—Sof. 3:17.
◼ Zinzan Ðagbe Ðiɖó Hwenu E Mǐ Ðò Alokan kpo Nǔ Mɔhun Ðevo lɛ kpo Zán Wɛ É: Mǐ nɔ sɔ́ alokan mǐtɔn alǒ nǔ mɔhun ɖevo lɛ ɖó alɔ e jí ye na nɔ bo ma na doya nú mɛ ɖevo lɛ ǎ é jí hwenu e tuto kpléɖókpɔ́ ɔ tɔn ɖò yiyi wɛ é, bo nɔ dó xlɛ́ ɖɔ mǐ ɖó zinzan ɖagbe. Enyi mǐ ɖò fɔtóoɖénú, videoyínú, alǒ nǔ mɔhun ɖevo lɛ zán wɛ ɔ, mǐ nɔ jló na doya nú mɛ ɖevo lɛ alǒ sú nukúnmɛ nú ye ǎ, bo nɔ dó xlɛ́ ɖɔ mǐ ɖó sísí nú ye. Mǐ nɔ lɛ́ ɖò nǔ e ma nyí dandan tɔn ǎ lɛ é wlan sɛ́dó mɛ wɛ gbɔn alokan jí alǒ gbɔn ɛntɛnɛti jí ɖò tuto ɔ hwenu ǎ, bo nɔ xlɛ́ ɖɔ mǐ ɖó zinzan ɖagbe.
◼ Nùɖuɖu Hwemɛ Tɔn: Kɛnklɛn bo hɛn nùɖuɖu towe wá nɔtɛn kpléɖókpɔ́ ɔ tɔn, é na nyɔ́ hú ɖɔ a ni yì ɖò nùɖuɖu ba xɔ wɛ ɖò gbɔjɛ hwenu. È hɛn ɔ, è na zán glasiɛ kpɛví e è sixu sísɛ́ dó zinkpo glɔ é ɖé. È yí gbè nú glasiɛ ɖaxó alǒ nǔzìnzán e sixu gbà lɛ é ɖò kpléɖókpɔ́ xɔ ɔ sá ǎ.
◼ Nùnina Lɛ: Mǐ sixu sɔ́ jlǒ dó na nùnina nú azɔ̌ gbɔn gbɛ̀ ɔ bǐ mɛ tɔn ɔ, bo dó xlɛ́ ɖɔ tuto kpléɖókpɔ́ ɖaxó ɔ tɔn e è bló é sù nukún mǐtɔn mɛ. Nǔ ɖebǔ e è zán akwɛyíwema dó na lɛ é ɔ, è ɖó na sɛ́dó gbɔn nyikɔ e sɛ́n tuùn ɖò xá ɔ mɛ é jí. Ði kpɔ́ndéwú ɔ, A.R.T.J.B. wɛ è ɖó na sɛ́ akwɛyíwema ɔ dó ɖò Bénin.
◼ Amasin: Enyi a ko ɖò amasin ɖé lɛ zán wɛ hǔn, kɛnklɛn bo hɛn ee na kpé we é wá, ɖó amasin enɛ lɛ ɖě na ɖè ɖò kpléɖókpɔ́ ɔ jí ǎ.
◼ Ayijayǐ: Kɛnklɛn bo nyì alɔ nú nǔ ɖěɖee sixu zɔ́n bɔ è ɖiɖi nǔ alǒ gbà afɔ bo gblewu lɛ é. Xwewu xwewu ɔ, awovinú ɖé lɛ nɔ jɛ bɔ é nɔ sín afɔkpa e è dó lɛ é wu, ɖò taji ɔ, afɔkpa gewuncéɖé lɛ. É na nyɔ́ hugǎn ɖɔ è ni dó afɔkpa ɖěɖee ɖò jlɛ̌ jí bo jɛxa lobo na zɔ́n bɔ è na ɖi zɔnlin ganji lɛ é.
◼ Nùsawǔ kpo Célu Kpo: Wanyiyi sín nǔ wɛ é na nyí ɖɔ mǐ ni kpɔ́n nùsawǔ, célu alǒ nǔ mɔhun ɖevo e wǎn yetɔn nɔ syɛn bo sixu doya nú mɛ ɖevo lɛ é bo zán.—1 Kɔ. 10:24.
◼ Veuillez suivre l’intérêt (S-43): Zǎn Veuillez suivre l’intérêt (S-43) ɔ bo ɖɔ nǔ ɖěɖee kúnkplá mɛɖebǔ e ɖè jlǒ xlɛ́ hwenu e a ɖò kúnnu e ma nyí aca tɔn ǎ é ɖè wɛ ɖò kpléɖókpɔ́ ɔ hwenu é. A sixu sɔ́ Veuillez suivre l’intérêt (S-43) e mɛ a wlan nǔ lɛ dó é jó ɖò Wema-Xɔsa alǒ nú wěgbójínɔtɔ́ agun towe tɔn hwenu e a na jɛ xwé é.
◼ Nùɖuɖusatɛn Lɛ: Kpa susu nú nyikɔ Jehovah tɔn gbɔn walɔ ɖagbe towe gblamɛ ɖò nùɖuɖusatɛn lɛ. Sɔnǔ lee Klisanwun ɖé ɖó na sɔnǔ gbɔn é. Enyi aca xá ɔ mɛ tɔn byɔ ɖɔ è ni nɔ ba nùɖé nú azɔ̌watɔ́ finɛ tɔn lɛ cobo lɛkɔ hǔn, blǒ mɔ̌.
◼ Adɔ̌tɛn Lɛ: Nɔ ɖè xomɛnyínyɔ́, suúluɖiɖo, kpo jlɛjininɔ kpo xlɛ́ ɖò fí ɖebǔ e a mɔ xɔ dó é. Enyi hɛnnumɔ alǒ mɛtuùnmɛ ɖé xwé wɛ a mɔ xɔ dó hǔn, tɛnkpɔn bo ɖ’alɔ ɖò xwégbezɔ́ lɛ kpo akwɛzinzan lɛ kpo mɛ lee é nyɔ́ bló gbɔn é. Kɛnklɛn ɖa nǔ ɖò fí e è na gbè we ɖɔ a ni ɖa nǔ ɖè é kɛɖɛ. Ma zán nǔ e ma nyí towe ǎ lɛ é ó, afi nú a byɔ gbè mɛ e tɔn wɛ é. Mɛjitɔ́ lɛ ɖó na cɔ́ vǐ yetɔn lɛ hwebǐnu ɖò fí ɖebǔ e ye ɖè é. Mi ma lɔn nú ye hɛn nǔ ɖebǔ gblé ɖò fí e è na xɔ mi dó é ó. Enyi tagba ɖé wá fɔ́n ɖò fí e mi mɔ xɔ dó é hǔn, mi kɛnklɛn bonu mɛ e nɔ kpé nukún dó xɔ biba wu lɛ é ni mɔ nǔ jɛ wu. Cobonu a na tɔ́n sín fí e a mɔ xɔ dó é ɖò azǎn gudo tɔn ɔ gbè hǔn, mɔ nǔ jɛ wu ɖɔ xɔ e mɛ a nɔ é ɖò mimɛ̌ jí bo lɛ́ ɖò tito jí.
◼ Mɛɖée Zízé Jó Xɔsa: Mɛɖebǔ e jló na zé éɖée jó é ɖó na yì Mɛɖée Zízé Jó Xɔsa ɖò kpléɖókpɔ́ ɔ jí. Vǐ e ma tlɛ ko ɖó xwè 16 ǎ lɛ é lɔ hɛn ɔ ye na zé yeɖée jó, bo na w’azɔ̌ ɖò alixlɛ́mɛ mɛjitɔ́ ɖé, mɛ e gɔ́n ye ɖè é ɖé, alǒ mɛ ɖevo e mɛ enɛ lɛ yí gbè na é ɖé tɔn glɔ.