Azɔwanúgbá Mɛkplɔnkplɔn Tɔn Mǐtɔn
1. Nɛ̌ Klisanwun e nɔ jla wɛnɖagbe ɔ lɛ é ka cí alɔnuzɔwatɔ́ lɛ ɖɔhun gbɔn?
1 Alɔnuzɔ́watɔ́ lɛ nɔ zán azɔwanú vovo. Azɔwanú ɖé lɛ tíìn bɔ è nɔ zán ye ayanuɖé ɖò azɔ̌ tawun tawun ɖé lɛ hwenu, bɔ taji ɖevo lɛ ka tíìn bɔ è nɔ zán yedɛɛ lɛ hwɛhwɛ. Alɔnuzɔ́watɔ́ alɔsekpɛ́nnanɔ lɛ nɔ ɖó azɔwanú taji enɛ lɛ ɖò azɔwanúgbá yetɔn mɛ hwebǐnu lobɔ enɛ lɛ nɔ bí alɔ nú ye hú ɖě lɛ bǐ. Biblu dó wusyɛn lanmɛ nú Klisanwun lɛ ɖɔ ye ni sɔ́ yeɖée bǐ jó nú sinsɛnzɔ́ ɔ, lobo nyí “azɔ̌watɔ́ e winnya ma na hú dó azɔ̌ e é wà lɛ wu ǎ é.” (2 Tim. 2:15) Azɔwanú tɛ ka nyí azɔwanú taji ɖò azɔwanúgbá mǐtɔn mɛ? Xó Mawu Tɔn wɛ, é wɛ nyí azɔwanú taji e mǐ nɔ zán bo nɔ dó ‘kplɔ́n nǔ akɔta lɛ bǐ, bɔ ye nɔ huzu ahwanvu’ é. (Mat. 28:19, 20) Enɛ wu ɔ, mǐ ɖó na tɛnkpɔn bo na nyí “azɔ̌watɔ́ e nɔ jla nugbǒ wɛn ɔ ganji é.” É ɖò mɔ̌ có, azɔwanú ɖevo lɛ lɛ́ ɖò azɔwanúgbá mǐtɔn mɛ bɔ mǐ nɔ zán ye hwɛhwɛ. Klisanwun lɛ bǐ ɖó na kplɔ́n bɔ azɔwanú enɛ lɛ na bí alɔ nú ye.—Nùnywɛxó 22:29.
2. Azɔwanú mɛkplɔnkplɔn tɔn taji tɛ lɛ mǐ ka ɖó?
2 Azɔwanú Taji Mɛkplɔnkplɔn Tɔn Mǐtɔn Lɛ: Gbɔn vo nú Biblu ɔ, azɔwanú ɖevo tɛ lɛ mǐ ka ɖó na zán? Azɔwanú nukɔn nukɔntɔn e mǐ nɔ zán dó kplɔ́n nugbǒ Biblu tɔn lɛ mɛ é wɛ nyí Etɛ Biblu ka Kplɔ́n Mɛ Tawun? Enyi mǐ kplɔ́n wema enɛ xá nùkplɔntɔ́ ɖé fó ɔ, mǐ nɔ zán Mì Gbọṣi Owanyi Jiwheyẹwhe Tọn Mẹ, bo nɔ dó kplɔ́n ɛ lee é na zán nugbodòdó Biblu tɔn lɛ ɖò gbɛzinzan tɔn ayihɔngbe ayihɔngbe tɔn mɛ gbɔn é. Enɛ wu ɔ, wema wè enɛ lɛ zinzan ɖó na bí alɔ nú mǐ. Alɔnuwema ɖé lɛ ɖó na lɛ́ ɖò azɔwanúgbá mɛkplɔnkplɔn tɔn mǐtɔn mɛ. Wɛnɖagbe ɖé Sín Mawu Gɔ́n! ɖò azɔwanú taji e mǐ nɔ zán dó bɛ́ Biblu kplɔnkplɔn xá mɛ lɛ é mɛ. Enyi nùxixa nɔ vɛwǔ nú mɛ lɛ ɖò fí e mǐ nɔ ɖékunnu ɖè é, alǒ enyi wema mǐtɔn kpɛɖé jɛn ɖò gbè e mɛ lɛ nɔ dó é mɛ abǐ ɖebǔ ma ɖ’emɛ ǎ ɔ, mǐ sixu lɛ́ zán Dotoaina Jiwheyẹwhe alǒ Ðǒtó Mawu Bo Nɔ Gbɛ̀ Kaka Sɔyi. Azɔwanú mɛkplɔnkplɔn tɔn taji e nɔ xlɛ́ tutoblonunu ɔ sín ali Biblu kplɔntɔ́ lɛ é wɛ nyí Mɛ Ðè Tɛ lɛ ka Ðò Jlǒ Jehovah Tɔn Wà Wɛ Ðò Égbé? Video e nɔ d’alɔ mɛ bɔ è nɔ kplɔ́n nǔ mɛ lɛ bɔ ye nɔ huzu ahwanvu é ɖé lɛ wɛ nyí Etɛwu È ka Ðó Na Kplɔ́n Biblu?, Nɛ̌ Nǔ lɛ ka Nɔ Yì Gbɔn Ðò Kpléxɔ Axɔsuɖuto ɔ Tɔn ɖé Mɛ? kpo Dieu a-t-il un nom? kpo. Mǐ ɖó na kplɔ́n azɔwanú enɛ lɛ lɔ zinzan ganji.
3. Etɛ Sinsɛnzɔ́ Axɔsuɖuto ɔ Tɔn Mǐtɔn e na wá tɔ́n lɛ é ka na d’alɔ mǐ bɔ mǐ na wà?
3 Sinsɛnzɔ́ Axɔsuɖuto ɔ Tɔn Mǐtɔn e na wá tɔ́n lɛ é na d’alɔ mǐ bɔ wema taji enɛ lɛ é ɖò azɔwanúgbá mɛkplɔnkplɔn tɔn mǐtɔn mɛ lɛ é zinzan na bí alɔ nú mǐ. Enyi mǐ ɖò tintɛnkpɔn wɛ bo ɖò azɔwanú mǐtɔn enɛ lɛ zán wɛ ganji ɔ, wě e Pɔlu ɖè xá Timɔtée é xwedó wɛ mǐ ɖè nɛ, é ɖɔ: “Hɛn ayixa dó hwiɖée wu, bo hɛn ayixa dó nǔ e kplɔ́n mɛ wɛ a ɖè ɔ wu. Ðǒkan dó nǔ enɛ lɛ bǐ wu; ɖó nú a ɖò nǔ wà gbɔn mɔ̌ wɛ ɔ, a na hwlɛn hwiɖée gán, bo na hwlɛn mɛ e ɖò tó ɖó we wɛ lɛ bǐ gán.”—1 Tim. 4:16.