“Xó Elɔ lɛ . . . Na Nɔ Ayixa Towe Mɛ”
Mɛjitɔ́ lɛ cí lɛngbɔnyitɔ́ lɛ ɖɔhun. Ye ɖó na kpé nukún dó vǐ yetɔn lɛ wu ganji, é ma nyí mɔ̌ ǎ ɔ, ye sixu yawu bú ali bo na nyɔ́ wlí ɖu. (Nùnywɛxó 27:23) Nɛ̌ mɛjitɔ́ lɛ ka sixu wà azɔ̌ enɛ gbɔn? Ye ɖó na zán hwenu dó ɖɔ xó ɖó kpɔ́ xá vǐ yetɔn lɛ ayihɔngbe ayihɔngbe, bo na dó sixu tuùn nǔ e ɖò linlin kpo ayi yetɔn kpo mɛ lɛ é. (Nùnywɛxó 20:5) Gɔ́ na ɔ, mɛjitɔ́ lɛ ɖó na zán azɔwanú e nɔ dɛ ɖò myɔ nu lɛ é dó hɛn nùɖiɖi vǐ yetɔn lɛ tɔn lidǒ. (1 Kɔ. 3:10-15) Video «Ces paroles devront être sur ton cœur» (“Xó Elɔ lɛ . . . Na Nɔ Ayixa Towe Mɛ”) tɛɖɛ̌ lee sinsɛn-biblo xwédo tɔn e ɖò gbesisɔmɛ é nyí nǔ taji sɔ́ é jí. Mi kpɔ́n video enɛ ɖó kpɔ́ ɖò xwédo ɔ mɛ, enɛ gudo hǔn, mi ɖɔ xó ɖó kpɔ́ dó nùkanbyɔ elɔ lɛ jí.
(1) Etɛ ka fɛ́ ayi xwédo Roman tɔn tɔn sín nǔ gbigbɔ tɔn lɛ jí? (2) Aniwu sinsɛn-biblo xwédo tɔn nukɔntɔn e sín afɔ Nɔví Roman ɖè é ma ka yì ta ǎ? (3) Xó tɛ Biblu ka ɖɔ b’ɛ sixu zɔ́n bɔ vǐ lɛ kpinkplɔn kpa mɛ? (Sɛ́n. 6:6, 7) (4) Etɛ ka sixu d’alɔ bɔ xóɖɔɖókpɔ́ ɖagbe na nɔ tíìn ɖò xwédo mɛ? (5) Vɔsisa alɔkpa tɛ lɛ mɛjitɔ́ lɛ ka ɖó na bló bɔ vǐ lɛ ɖó hudo tɔn? (6) Nɛ̌ Nɔví Martin kpo asì tɔn Isabelle kpo ka nyí gbɛ̌ ɖagbe ɖé nú xwédo Roman tɔn gbɔn? (Nùnywɛxó 27:17) (7) Nǔ tɛ tatɔ́ xwédo tɔn ɖé ka sixu sɔ́ ɖ’ayǐ jɛ nukɔn bonu sinsɛn-biblo xwédo tɔn ɔ na yì ta? (8) Nɛ̌ Nɔví Roman ka jɛ nǔ lɛ blóɖó jí ɖò xwédo tɔn mɛ gbɔn? (9) Etɛwu sinsɛn-biblo xwédo tɔn ɔ biblo ɖò gbesisɔmɛ ka ɖò taji? (Efɛ. 6:4) (10) Nǔ tɛ lɛ mɔ̌ è ka sixu bló ɖò sinsɛn-biblo xwédo tɔn hwenu? (11) Nɛ̌ Nɔví Roman ka yì agbɔ̌n jí bo lɛ́ kú dó nǔ jí hwenu e é ɖò alɔ dó Mathias wɛ bonu nǔ e sɔgbe é wiwa na ɖò taji n’i é gbɔn? (Jel. 17:9) (12) Nɛ̌ Nɔví Roman kpo asì tɔn kpo ka sɔ́ xó jlɛ́ dó xó wu xá Rébecca bo dó d’alɔ ɛ bonu é na site dó nǔ e sɔgbe é jí ɖò kancica e ɖò é kpo Justin kpo tɛntin é mɛ gbɔn? (Mak. 12:30; 2 Tim. 2:22) (13) Nɛ̌ Nɔví Roman kpo asì tɔn kpo ka ɖè nùɖiɖi xlɛ́ hwenu e ye ɖò huzuhuzu lɛ bló wɛ ɖò gbɛzán yetɔn mɛ é gbɔn? (Mat. 6:33) (14) Nɛ̌ video elɔ ka tɛɖɛ̌ jí ɖɔ é ɖò dandan ɖɔ tatɔ́ xwédo tɔn lɛ ni xò nǔ gbigbɔ tɔn lɛ sín kàn nú xwédo yetɔn lɛ gbɔn? (1 Tim. 5:8) (15) Ðó a nyí tatɔ́ xwédo tɔn ɖé wutu ɔ, etɛ jí a ka kú dó bo na bló?
AYIÐONUWU NÚ TATƆ́ XWÉDO TƆN LƐ: Kpléɖókpɔ́ ɖaxó 2011 tɔn lɛ jí wɛ è xwlé nùkpinkpɔn-dó-kplɔ́n-nǔ hwe mǐtɔn nu tɔn elɔ mǐ ɖè. Ðò hwe enɛ nu ɔ, a ka mɔ ɖɔ emi ɖó na wà nùɖé bonu sinsɛn-biblo xwédo tɔn towe na kpɔ́n te wɛ à? Dìn ɔ ka ló? Enyi huzuhuzu ɖevo lɛ lɛ́ ɖò dandan hǔn, kɛnklɛn xoɖɛ bo bló ye, ɖó nyɔna mavɔmavɔ xwédo towe tɔn wutu.—Efɛ. 5:15-17.