Gbeyiɖɔ lɛ Ni Nyí Kpɔ́ndéwú nú We: Xabakuku
1. Etɛwu mǐ ka sixu ɖó linlin ɖokpo ɔ Xabakuku ɖɔhun?
1 Ðó nǔnyanyawiwa fɔ́n bo ɖò jijɛji wɛ lɛlɛ̌ dó mǐ wutu ɔ, mǐ sixu ɖó linlin ɖokpo ɔ Xabakuku ɖɔhun; éyɛ kanbyɔ Jehovah ɖɔ: “Etɛwu a ka gbɔ bɔ nukún ce ɖò nǔ nyanya mɔ wɛ sɔmɔ̌? Nɛ̌ awě na ɖò mɛ xò wɛ mɔ̌, bɔ é ka na nɔ nyɔ́ kpɔ́n nú we gbɔn?” (Xab. 1:3; 2 Tim. 3:1, 13) Ee mǐ ɖò te kpɔ́n hwɛɖɔzán Jehovah tɔn é ɔ, tamɛ linlin dó wɛn Xabakuku tɔn kpo nùɖiɖi tɔn sín kpɔ́ndéwú kpo jí sixu na hlɔnhlɔn mǐ.—2 Pi. 3:7.
2. Nɛ̌ mǐ ka sixu xlɛ́ ɖɔ mǐ nɔ zán nùɖiɖi gbɛ̀ gbɔn ɖò égbé?
2 Nɔ Gbɛ̀ Gbɔn Nùɖiɖi Gblamɛ: Xabakuku lɔn bonu ninɔmɛ nyanya e mɛ é ɖè lɛ é ɖu ɖò jǐ tɔn ǎ, é nyɔ́ wà ɔ, é nɔ acéjí ɖò gbigbɔ lixo bo kpó ɖò azɔ̌ tɔn wà wɛ. (Xab. 2:1) Jehovah na jiɖe gbeyiɖɔ ɔ ɖɔ Xó emitɔn na jɛnu ɖò hwetɔnnu jɛn wɛ, bɔ ‘hwɛjijɔnɔ na nɔ gbɛ̀ gbɔn nùɖiɖi tɔn gblamɛ.’ (Xab. 2:2-4) Etɛ ka nyí tinmɛ enɛ tɔn nú Klisanwun ɖěɖee ɖò gbɛ̀ ɖò azǎn gudogudo tɔn e ko sɛyi tawun dìn lɛ é mɛ é? Nǔ e ɖò taji hú hwenu e vivɔnu ɔ na wá é tuùntuùn é wɛ nyí ɖɔ è ni kudeji ɖɔ é na wá. Nùɖiɖi nɔ sísɛ́ mǐ bɔ mǐ nɔ nɔ acéjí bo nɔ sɔ́ sinsɛnzɔ́ ɔ ɖó tɛn nukɔntɔn mɛ.—Ebl. 10:38, 39.
3. Etɛwu mǐ ka ɖó na ɖò Jehovah sɛ̀n wɛ kpo awǎjijɛ kpo zɔn mǐ yì?
3 J’awǎ Ðò Jehovah Mɛ: Ahwan e Gɔgu Magɔgi tɔn na tɔ́n togun Jehovah tɔn é na tɛ́n nùɖiɖi mǐtɔn kpɔ́n. (Ezek. 38:2, 10-12) Ahwan nɔ hɛn wuvɛ̌ wá nú mɛ bǐ, kaka jɛ mɛ e tlɛ nɔ wá ɖu ɖ’eji lɛ é jí. Nùɖuɖu sixu hán, nǔɖokan lɛ sixu bú, bɔ gbɛ̀ ninɔ sixu vɛwǔ tawun. Nɛ̌ mǐ ka na wà nǔ gbɔn hwenu e tagba lɛ na fɔ́n é? Xabakuku ɖó nukún wuvɛ̌ lɛ, enɛ wu ɔ, é kudeji bo na ɖò Jehovah sɛ̀n wɛ kpo awǎjijɛ kpo zɔn mǐ yì. (Xab. 3:16-19) “Awǎjijɛ e nɔ gosin Mawu Mavɔmavɔ gɔ́n ɔ” na lɛ́vɔ d’alɔ mǐ bɔ mǐ na dɛ ɖò mɛtɛnkpɔn sɔgudo tɔn lɛ nu.—Nɛɛ. 8:10; Ebl. 12:2.
4. Awǎjijɛ tɛ mǐ ka sixu mɔ dìn kpo sɔgudo kpo?
4 Mɛ ɖěɖee Jehovah na hwlɛn ɖò hwɛɖɔzán tɔn e jawě gbè lɛ é na kpó ɖò gbɛzán e nyɔ́ Mawu nukúnmɛ é sín kplɔ́n yí wɛ. (Xab. 2:14) Mɛ e è na fɔ́n sín kú lɛ é lɔmɔ̌ na kplɔ́n nǔ dó Jehovah wu. É na bo tlɛ nyí dìn ɔ, mi nú mǐ ni zán ali e hun nú mǐ lɛ é bǐ bo jla xó Jehovah tɔn kpo nùjiwǔ tɔn lɛ kpo mɛ lɛ!—Ðɛh. 34:2; 71:17.