Lee Mǐ Na Nɔ Ðè Wanyiyi Xlɛ́ Nɔzo Mǐtɔn lɛ Gbɔn É

Ðó kúnkan gbɛtɔ́ nukɔntɔn ɔ Adamu tɔn wɛ mǐ nyí wutu ɔ, mǐ bǐ wɛ nyí xwédo ɖé. È nɔ ɖó nukún ɖɔ mɛ e ɖò xwédo ɖé mɛ lɛ é ni yí wǎn nú yeɖée lobo lɛ́ ɖó sísí nú yeɖée, amɔ̌ égbé ɔ, é nɔ vɛwǔ bɔ è na mɔ mɔ̌. Nǔ e ba wɛ Mawu wanyiyinɔ ɔ ka ɖè é nɛ ǎ.

NǓ E NǓWLANWLÁN MÍMƐ́ LƐ ÐƆ DÓ WANYIYI WU É

“Mɛ ɖokpo ɖokpo ɖó na yí wǎn nú nɔzo tɔn éɖesunɔ ɖɔhun.”—LEVÍI VÍ LƐ 19:18.

“Mi yí wǎn nú kɛntɔ́ mitɔn lɛ.”—MATIE 5:44.

NǓ E WǍN YÍ NÚ NƆZO NYÍ É

Kpɔ́n lee Mawu tinmɛ nǔ e wanyiyi nyí é gbɔn ɖò Xó tɔn mɛ ɖò 1 Kɔlɛntinu lɛ 13:4-7 mɛ é:

“Wanyiyi nɔ kú hǔn; é nɔ nyɔ́ xomɛ.”

Lin tamɛ d’eji: Enyi mɛ ɖevo lɛ ɖó suúlu, bo nyɔ́ xomɛ dó wǔ we, bo ma wà nǔ xá we kpo xomɛsin kpo ɖó nǔwanyido towe lɛ wu ǎ ɔ, nɛ̌ é ka nɔ cí nú we?

Wanyiyi “nɔ jló mɛ nú ǎ.”

Lin tamɛ d’eji: Enyi mɛ ɖevo lɛ nɔ vɛ nǔ dó we dín alǒ gbɛ̀ towe nɔ jló ye tawun ɔ, nɛ̌ é ka nɔ cí nú we?

Wanyiyi “nɔ ba ɖɔ emiɖokponɔ géé tɔn jɛn na nyɔ́ ǎ.”

Lin tamɛ d’eji: Enyi mɛ ɖevo lɛ nɔ ɖó sísí nú linlin e a nɔ ɖó dó nǔ lɛ wu é, bo ma nɔ zyan vǎ dó linlin yeɖesunɔ tɔn lɛ jí hwebǐnu ǎ ɔ, nɛ̌ é ka nɔ cí nú we?

Wanyiyi nɔ “hɛn mɛ dó xomɛ ǎ.”

Lin tamɛ d’eji: Mawu ɖò gbesisɔmɛ bo na sɔ́ hwɛ kɛ mɛ ɖěɖee hu hwɛ dó è, bo ka lɛkɔ sín hwɛ yetɔn lɛ gudo lɛ é. “É nɔ dóhwɛ mɛ kaka sɔyi ǎ, é nɔ nɔ xomɛsin jí kaka sɔyi ǎ.” (Ðɛhan 103:9) Enyi mɛ e mǐ jɛ agɔ dó é ɖé sɔ́ hwɛ kɛ mǐ ɔ, é nɔ sù nukún mǐtɔn mɛ. Enɛ wu ɔ, enyi mɛ ɖevo lɛ jɛ agɔ dó mǐ ɔ, mǐ ɖó na nɔ ɖò gbesisɔmɛ bo na nɔ sɔ́ hwɛ kɛ ye.—Ðɛhan 86:5.

“Nǔagɔwiwa wɛ nɔ hun xomɛ nú mɛ e ɖó wanyiyi é ǎ.”

Lin tamɛ d’eji: Enyi nǔ nyanya ɖé jɛ dó mǐ jí ɔ, mǐ nɔ ba nú mɛ ɖevo lɛ ni j’awǎ ɖó wuvɛ̌ mǐtɔn wu ǎ. Enɛ wu ɔ, enyi mɛ ɖevo lɛ ɖò wuvɛ̌ sè wɛ ɔ, xomɛ ɖó na nɔ hun mǐ ǎ; enyi ye na bo tlɛ ko wà nǔ agɔ xá mǐ ɔ nɛ.

Bonu mǐ na ɖu nyɔna Mawu tɔn lɛ sín vivǐ ɔ, mɔ̌ wɛ mǐ ɖó na yí wǎn nú mɛ ɖevo lɛ gbɔn, nú ye na bo nyí mɛ alɔkpa ɖebǔ ɔ nɛ. Ali tawun tawun e nu mǐ sixu wà mɔ̌ ɖè é ɖokpo wɛ nyí ɖɔ mǐ na nɔ d’alɔ mɛ e ɖò hudo mɛ lɛ é.