A ka Ðò Gbesisɔmɛ Bo Na Yì Wemaxɔmɛ nú Wɛnɖagbejlatɔ́ Axɔ́suɖuto ɔ Tɔn lɛ À?

Xwè towe ɖò 23 jɛ 65 vlamɛ, bɔ a lɛ́ ɖò sinsɛnzɔ́ hwebǐnu tɔn mɛ wɛ à? Lanmɛ towe ɖò ganji, bɔ a lɛ́ ɖò gbesisɔmɛ bo na wà sinsɛnzɔ́ ɖò fí ɖebǔ e hudo sukpɔ́ ɖè é à? Enyi ɛɛn wɛ nyí xósin towe nú nǔkanbyɔ enɛ lɛ ɔ, a ka ko lin tamɛ bo na d’alɔ wema mɛ bo na yì Wemaxɔmɛ nú Wɛnɖagbejlatɔ́ Axɔ́suɖuto ɔ tɔn lɛ à? Sín hwenu e wemaxɔmɛ enɛ bɛ́ é ɔ, asú kp’asì kpo, gɔ́ nú nɔví sunnu kpo nɔví nyɔnu kpo tlɛnnɔ lɛ afatɔ́n mɔ̌kpan wɛ ko wà mɔ̌. É ɖò mɔ̌ có, nɔví sunnu tlɛnnɔ lɛ sín hudo wɛ mǐ ɖó hugǎn. Byɔ Jehovah ɖɔ é ni bló bonu jlǒ e a ɖó bo na wà nǔ gegě d’eji ɖò sinsɛnzɔ́ ɔ mɛ, bo lɛ́ xwedó kpɔ́ndéwú Vǐ tɔn tɔn é ni jɛji. (Ðɛ 40:9; Mt 20:28; Eb 10:7) Enɛ gudo hǔn, kpɔ́n ɖɔ agban ɖé lɛ ɖò kɔ jí nú we vlafo wɛ à jí, ɖi nukúnkpíkpé xwédo towe wu, agbazazɔ́ alǒ axɔ́ lɛ mɔ̌. Enyi mɔ̌ wɛ ɔ, a ka sixu bló huzuhuzu ɖé lɛ bá mɔ tɛn dó jɛxa à?

Sinsɛnzɔ́ ɔ sín ali tɛ lɛ ka nɔ hun nú mɛ e è kplɔ́n azɔ̌ ɖò wemaxɔmɛ enɛ lɛ é? È ko sɛ́ mɛ e yí kúnnuɖewema é ɖé lɛ dó bɔ ye nɔ wà sinsɛnzɔ́ ɖò fí e è nɔ dó gbè gegě ɖè lɛ é, alǒ ɖ’alɔ ɖò kúnnuɖiɖe agbawungba tɔn bǔnɔ lɛ mɛ ɖò toxo ɖaxó lɛ mɛ. Mɛ ɖevo lɛ nɔ wá nyí nukúnkpénuwutɔ́ lɛdo tɔn tɛnmɛkpɔ́nnumɛtɔ́, nukúnkpénuwutɔ́ lɛdo tɔn, alǒ mɛsɛ́dó ɖò nukɔnmɛ. Ee a na ɖò tamɛ lin dó nǔ ɖěɖee a sixu wà ɖò sinsɛnzɔ́ Jehovah tɔn mɛ lɛ é jí wɛ é ɔ, é na nyɔ́ ɖɔ a ni ɖó linlin e gbeyiɖɔ Ezayíi ɖó é: “Nyɛ na yì, sɛ́ mì dó.”—Eza 6:8.

KPƆ́N VIDEO MƐSƐ́DÓ LƐ NƆ Ð’ALƆ ÐÒ NǓKÚN-YIYAZƆ́ Ɔ MƐ Ɔ, ENƐ GUDO HǓN, NǍ XÓSIN NÚ NǓKANBYƆ ELƆ LƐ:

• 

  Nɛ̌ è ka nɔ cyan mɛsɛ́dó lɛ gbɔn?

• 

  Azɔ̌ ɖagbe tɛ mɛsɛ́dó lɛ ka ɖò wiwa wɛ?

• 

  Nyɔna tɛ lɛ mɔ̌ è ka nɔ mɔ ɖò mɛsɛ́dózɔ́ wiwa mɛ?