Nya Xɛ Ðò Alɔwliwli Towe Jí

Jehovah nɔ sɔ́ alɔwliwli sín akpádídó dó d’ayihun na ǎ. É ɖɔ ɖɔ asú kpo asì kpo ɖé ɖó na tɛ́dó yeɖée wu. (Mt 19:5, 6) Alɔwliwli awǎjijɛnɔ gegě wɛ ɖò togun Mawu tɔn mɛ. É ɖò mɔ̌ có, alɔwliwli ɖě gɔn xó ɖó ǎ. Tagba lɛ nɔ wá xwetɔ́n. Enyi tagba byɔ alɔwliwli ɖé mɛ ɔ, mǐ ɖó na mɔ ɖɔ kínklán kpo mɛɖée gbigbɛ́ kpo wɛ na ɖeɖɛ tagba lɛ, lee mɛ lɛ nɔ lin gbɔn ɖò kpaa mɛ é ɖɔhun ǎ. Nɛ̌ asú kpo asì kpo Klisanwun lɛ ka sixu nya xɛ ɖò alɔwliwli yetɔn jí gbɔn?

Afɔɖiɖe taji atɔ́ɔ́n ɖé lɛ ɖíe:

1. Nyi alɔ nú alɔlwɛ́ ɖúɖú kpo ayiɖeɖayǐ blíblí lɛ kpo dó hɛn ayi towe, alɔwliwli mɛtɔn wɛ ye nɔ hɛn gbà.—Mt 5:28; 2Pi 2:14.

2. Hɛn kancica e ɖò hwi kpo Mawu kpo tɛntin é lidǒ, bo w’azɔ̌ syɛnsyɛn bonu alɔwliwli towe na nyɔ́ nukún tɔn mɛ.—Ðɛ 97:10.

3. Kpò ɖò gbɛtɔ́ yɔyɔ̌ ɔ sɔ́ dó wɛ, bo nɔ wà xomɛnyínyɔ́ sín nǔ klewun klewun e na hɛn gbɛ̀ bɔkun nú mɛ e a da é lɛ é.—Kolo 3:8-10, 12-14.

4. Nɔ ɖɔ xó ɖó kpɔ́ hwɛhwɛ xá wegɔ́ towe dó nǔjɔnǔ mɛ kpo sísí kpo.—Kolo 4:6.

5. Nɔ wà asúzɔ́ towe nú asì towe kpo wanyiyi kpo; nɔ wà asizɔ́ towe nú asú towe kpo wanyiyi kpo.—1Kɔ 7:3, 4; 10:24.

Enyi Klisanwun lɛ nɔ wlí yɛ̌yi nú alɔwliwli ɔ, Dǒwatɔ́ tɔn, Jehovah, wlí yɛ̌yi na wɛ ye ɖè.

KPƆ́N VIDEO MǏ ÐÓ NA ‘DƐ ÐÒ WEZUN Ɔ NU’: SETÓNÚ NÚ WEZUN KÍNKÁN Ɔ SÍN SƐ́N LƐ Ɔ, ENƐ GUDO HǓN, NǍ XÓSIN NÚ NǓKANBYƆ ELƆ LƐ:

• 

  Nú alɔwliwli ɖé na bo bɛ́ ganji ɔ, tagba tɛ lɛ ka sixu wá xwetɔ́n?

• 

  Nɛ̌ nǔgbododó Biblu tɔn lɛ ka sixu d’alɔ mɛ ɖěɖee nɔ lin ɖɔ wanyiyi kún ɖò alɔwliwli yetɔn mɛ ó lɛ é gbɔn?

• 

  Sɛ́n tɛ lɛ Jehovah ka dó dó alɔwliwli wu?

• Nú alɔwliwli ɖé na yì ta ɔ, etɛ asú kpo asì kpo ɔ ka ɖó na wà?