Kpléɖókpɔ́ Ðaxó Xwewu Xwewu Tɔn lɛ Nɔ Hun Ali nú Mǐ Bɔ Mǐ Na Ðè Wanyiyi Xlɛ́

Etɛwu kpléɖókpɔ́ ɖaxó xwewu xwewu tɔn mǐtɔn lɛ ka nɔ na mǐ awǎjijɛ sɔmɔ̌? Lee é nɔ nyí gbɔn ɖò Izlayɛli hwexónu tɔn é ɖɔhun ɔ, kpléɖókpɔ́ ɖaxó mǐtɔn lɛ nɔ hun ali nú mǐ hwɛhwɛ, bɔ mǐ nɔ sɛn Jehovah ɖó kpɔ́ xá nǔɖitɔ́ hatɔ́ mǐtɔn kanweko mɔ̌kpan, kaka jɛ afatɔ́n mɔ̌kpan lɛ jí. Mǐ nɔ yí wǎn nú nǔ ɖěɖee è nɔ kplɔ́n mǐ bɔ ye nɔ d’alɔ mǐ bɔ mǐ na sɛkpɔ́ Jehovah lɛ é. Hwenu xɔ akwɛ e mǐ nɔ zán xá xɔ́ntɔn lɛ kpo xwédo lɛ kpo é nɔ lɛ́ xɔ akwɛ nú mǐ. Enɛ wu ɔ, mǐ nɔ ba na nɔ kpléɖókpɔ́ ɖaxó ɔ domɛ nú azǎn atɔn lɛ bǐ.

Enyi ali hun nú mǐ bonu mǐ kplé ɖó kpɔ́ ɔ, mǐ ɖó na lin tamɛ dó ɖagbe e é na hɛn wá nú mǐɖokponɔ é kɛɖɛ jí ǎ, loɔ, mǐ ɖó na lɛ́ lin dó lee mǐ sixu ɖè wanyiyi xlɛ́ mɛ ɖevo lɛ gbɔn é jí. (Ga 6:10; Eb 10:24, 25) Enyi mǐ hun hɔn nú nɔví sunnu alǒ nɔví nyɔnu mǐtɔn lɛ, alǒ sɔ́ tɛn e mɛ mǐ na jinjɔn é kɛɖɛ ɖ’ayǐ ɔ, mǐ nɔ ɖexlɛ́ ɖɔ nǔ mɛ ɖevo lɛ tɔn nɔ ɖu ayi mɛ nú mǐ. (Fili 2:3, 4) Kpléɖókpɔ́ ɖaxó lɛ nɔ hun ali ɖagbe gegě nú mǐ bɔ mǐ na zun xɔ́ntɔn yɔyɔ̌ ɖevo lɛ. Mǐ sixu tɛ́n kpɔ́n bá ɖɔ xó xá mɛ e mǐ ma tuùn ǎ é ɖé jɛ nukɔn nú tuto ɔ, ɖò tuto ɔ gudo, kpo gbɔjɛyiyi hwenu kpo. (2Kɔ 6:13) Xɔ́ntɔn e mǐ nɔ zun ɖò hwe mɔ̌hun nu lɛ é sixu nɔ ayǐ kaka sɔyi! Hugǎn bǐ ɔ, enyi mɛ e ɖò mǐ kpɔ́n wɛ lɛ é mɔ ɖɔ mǐ nɔ ɖè wanyiyi adodwé ɔ xlɛ́ mǐɖée lɛ ɔ, enɛ sixu sísɛ́ ye bɔ ye nà ba na sɛn Jehovah.—Jn 13:35.

KPƆ́N VIDEO “WANYIYI NA VƆ GBEÐÉ Ǎ”! KPLÉÐÓKPƆ́ AKƆJƆKPLÉ TƆN LƐ Ɔ, ENƐ GUDO HǓN, NǍ XÓSIN NÚ NǓKANBYƆ ELƆ LƐ:

• 

  Nɛ̌ è ka ɖè wanyiyi xlɛ́ afɔsɔ́ɖótetɔ́ ɖěɖee yì kpléɖókpɔ́ akɔjɔkplé tɔn 2019 tɔn lɛ é gbɔn?

• 

  Etɛwu bǔninɔ kpo wanyiyi kpo e ɖò togun Jehovah tɔn mɛ é ka jiwǔ sɔmɔ̌?

• 

  Wanyiyi Klisanwun tɔn sín akpáxwé tɛ lɛ jí mɛ e ɖò Hagbɛ̌ Alixlɛ́mɛtɔ́ ɔ mɛ lɛ é ka tɛɖɛ̌?

• 

  Nɛ̌ wanyiyi ka dɔn nɔví mǐtɔn lɛ ɖó bǔ ɖò Allemagne kpo Corée du Sud kpo gbɔn?

• Etɛ jí mǐ ka ɖó na kú dó?