Nɔ Zán Ðu Gbɛ̀ Víví Kaka Sɔyi! Ðò Sinsɛnzɔ́ ɔ Mɛ

É víví nú mǐ tawun ɖɔ mǐ ɖó alɔnuwema yɔyɔ̌ ɖé kpo wema yɔyɔ̌ ɖé kpo bo na nɔ zán dó kplɔ́n Biblu xá mɛ lɛ! Mǐ ɖò ɖɛ xò sɛ́dó Jehovah wɛ ɖɔ é ni dó nú gǎn e dó wɛ mǐ ɖè bo na bló bɔ mɛ gegě ɖevo lɛ na huzu ahwanvu é. (Mt 28:18-20; 1Kɔ 3:6-9) Nɛ̌ mǐ ka na zán azɔ̌wanú yɔyɔ̌ enɛ lɛ gbɔn?

Ðó wlɛnwín nǔ kpinkplɔn mɛ tɔn yɔyɔ̌ lɛ wɛ ɖò Ðu Gbɛ̀ Víví Kaka Sɔyi!, Biblu kplɔnkplɔn e na hɛn lè wá nú mɛ é ɖé mɛ wutu ɔ, nɔ xwedó alixlɛ́mɛ kpaa elɔ lɛ hwenu e a ɖò nǔ sɔ́ wɛ bá kplɔ́n Biblu xá mɛ lɛ é kpo hwenu e a ɖò nǔ kplɔ́n xá ye wɛ é kpo:a

• Nɔ xà xóta ɔ bo nɔ ɖɔ xó dó nǔkanbyɔ lɛ jí

• Nɔ xà wemafɔ ɖěɖee kpá è wlán “xà” dó lɛ é, bo nɔ d’alɔ nǔkplɔntɔ́ ɔ bonu é ni mɔ nǔ jɛ lee é na zán ye gbɔn é wu

• Nɔ xò video lɛ bo nɔ ɖɔ xó dó ye wu, nɔ zán nǔkanbyɔ e zɔn kpɔ́ xá ye lɛ é dó wà mɔ̌

• Enyi hwi kpo nǔkplɔntɔ́ ɔ kpo bɛ́ nǔkplɔnkplɔn ɖé hǔn, tɛ́n kpɔ́n bonu mi nɔ fó ɖò nǔkplɔnkplɔn ɖokpo ɖokpo hwenu

Ðò sinsɛnzɔ́ ɔ mɛ ɔ, nɔ xwlé alɔnuwema ɔ jɛ nukɔn bá kpɔ́n ɖɔ mɛ ɔ ɖó jlǒ à jí. (Kpɔ́n gbǎví “Lee È Na Xwlé Alɔnuwema Ðu Gbɛ̀ Víví Kaka Sɔyi! ɔ Mɛ Ðò Xóɖɔɖókpɔ́ Nukɔntɔn ɔ Hwenu Gbɔn É” ɔ.) Enyi mi kplɔ́n alɔnuwema ɔ fó bɔ nǔkplɔntɔ́ ɔ ba na gbɛkan dó nǔkplɔnkplɔn ɔ nu hǔn, xwlé è wema ɔ bonu mi ni bɛ́ nǔkplɔnkplɔn 04gɔ́ ɔ. Enyi a kpò ɖò nǔ kplɔ́n xá mɛɖé wɛ ɖò wema Kplɔ́n Mǐ alǒ Hɛn Hwiɖée Ðò Wanyiyi Mawu Tɔn Mɛ mɛ hǔn, ba fí e sɔgbe xá fí e mi ɖè ɖò wema enɛ mɛ é ɖò wema Ðu Gbɛ̀ Víví Kaka Sɔyi! ɔ mɛ bonu mi gbɛkan dó nǔkplɔnkplɔn ɔ nu ɖò wema enɛ mɛ.

KPƆ́N VIDEO DOO NÚ WE NÚ BIBLU KPLƆNKPLƆN TOWE Ɔ, ENƐ GUDO HǓN, NǍ XÓSIN NÚ NǓKANBYƆ ELƆ LƐ:

• Etɛ lɛ wema yɔyɔ̌ ɔ ka na kplɔ́n nǔkplɔntɔ́ lɛ?

• Etɛwu a ka ɖó na xlɛ́ video elɔ nǔkplɔntɔ́ yɔyɔ̌ lɛ?

• Nǔ tɛ lɛ a ka ɖó na dó wusyɛn lanmɛ nú nǔkplɔntɔ́ ɔ kpɛɖé kpɛɖé ɖɔ é ni nɔ sɔ́ ɖó nukɔn nú éɖée bo nya gbě yetɔn?—Kpɔ́n gbǎví nǔtinmɛ tɔn “Sin Sɛ̀ Xwè Na kpo Nǔ E Gbé È Na Nya É kpo nú Mimǎmɛ Ðokpo Ðokpo”