Mɛ Winnyawinnya lɛ Mi: Mi Nɔ Ðɔ Xomɛ nú Mɛjitɔ́ Mitɔn Lɛ

Etɛwu a ka ɖó na nɔ ɖɔ nǔ e ɖò linlin towe mɛ lɛ é nú mɛjitɔ́ towe lɛ? (Nǔx 23:26) Ðó Jehovah wɛ zɔ́n azɔ̌ ye ɖɔ ye ni kpé nukún dó wǔ we bo lɛ́ xlɛ́ ali we wutu. (Ðɛ 127:3, 4) Enyi a ma nɔ ɖɔ xomɛ kpo kpáxó towe lɛ kpo nú ye ǎ ɔ, é na vɛwǔ nú ye bɔ ye na d’alɔ we. Gɔ́ na ɔ, nǔ ɖaaɖagbe e ye ko mɔ kpɔ́n ɖò gbɛ̀ mɛ lɛ é na gbɔ wǔ we. É ka nyla ɖɔ a ni hɛn kpáxó ɖé lɛ nú hwiɖée wɛ à? É nyí mɔ̌ dandan ǎ, amɔ̌, ma nɔ hwlá nǔ e mɛjitɔ́ towe lɛ ɖó acɛ bo na tuùn lɛ é dó ye ó.—Nǔx 3:32.

Nɛ̌ a ka sixu nɔ ɖɔ xó xá mɛjitɔ́ towe lɛ gbɔn? Tɛ́n kpɔ́n bo nɔ ba hwenu e na nyɔ́ nú hwi kpo ye kpo é. Enyi enɛ wiwa vɛwǔ nú we ɔ, a sixu wlán nǔ e ɖò ayi mɛ nú we lɛ é dó wema jí, bo sɔ́ nú ye mɛ ɖokpo. Enyi ye ba na ɖɔ xó dó nǔɖe jí bɔ nǔ enɛ ma ka jló hwɛ ǎ ɔ ka lo? Flín ɖɔ alɔ ba na dó we wɛ ye ɖè dó nǔjɔnǔ mɛ. Sɔ́ mɛjitɔ́ towe lɛ dó mɔ xɔ́ntɔn towe lɛ, ni ma nyí kɛntɔ́ towe lɛ ó. Gǎn ɖěɖee a na dó bá ɖɔ xomɛ nú mɛjitɔ́ towe lɛ é na hɛn lè wá nú we nú gbɛhwenu towe bǐ.—Nǔx 4:10-12.

KPƆ́N VIDEO WINNYAWINNYA MƐ CE: NƐ̌ UN KA SIXU ÐƆ XÓ XÁ MƐJITƆ́ CE LƐ GBƆN? Ɔ, ENƐ GUDO HǓN, NǍ XÓSIN NÚ NǓKANBYƆ ELƆ LƐ:

• 

  Etɛ Esther kpo Partik kpo ka yí gbè ɖɔ emi kún nɔ bló ó?

• 

  Etɛ kpɔ́ndéwú Jezu tɔn ka sixu kplɔ́n we?

• 

  Nɛ̌ mɛjitɔ́ towe lɛ ka ko xlɛ́ ɖɔ nǔ towe nɔ ɖu ayi mɛ nú ye gbɔn?

• 

  Nǔgbododó Biblu tɔn tɛ lɛ ka sixu d’alɔ we bɔ a na nɔ ɖɔ xó xá mɛjitɔ́ towe lɛ?