Nɔ zán nǔ e ɖo jijɛ wɛ ɖo alɔ nu lɛ́ é ɖo sinsɛnzɔ́ towe mɛ

Jezu zán nǔ e ɖo jijɛ wɛ ɖo alɔ nu lɛ́ é dó kplɔ́n nǔ mɛ ɖo sinsɛnzɔ́ tɔn mɛ. (Lk 13:1-5) Hwi lɔ sixú zán nǔ e ɖo jijɛ wɛ ɖo alɔ nu lɛ́ é dó bló bɔ wɛn Axɔ́súɖuto ɔ tɔn ná nɔ dɔn mɛ lɛ́. Ényí a ɖɔ xó dó akwɛ́yózo, adla j’ayǐ ɖé, hunnyahunnya to tɔn, kannumɔ nyínyí nú gěe, alǒ nǔ mɔ̌hun ɖé wú gúdo hǔn, kan nǔ e ná zɔ́n tamɛ lin mɛ é ɖé byɔ́. A sixú kanbyɔ́ ɖɔ: “Mi ka lin ɖɔ . . . ná wá nɔ te gbeɖé a?” alǒ “Étɛ́ mi ka lin ɖɔ é sixú ɖe ɖɛ . . . ?” Énɛ́ gúdo hǔn, xa wěmafɔ Biblu tɔn e ɖɔ xó dó xóta ɔ wú é ɖokpó n’i. Ényí mɛ ɔ ɖe jlǒ xlɛ́ ɔ, dɔn ayi tɔn wá video alǒ wěma e ɖo azɔ̌wanúgbá mɛkplɔ́nkplɔ́n tɔn mǐtɔn mɛ é ɖé jí. Ée mǐ ná ɖo gǎn dó wɛ bó ná bló bɔ xó ɔ ná byɔ́ ayi mɛ nú mɛ e nɔ nɔ fí e mǐ nɔ ɖɔ Mawuxó gbɔn lɛ́ é ɔ, mi nú mǐ ní nɔ ‘wa nǔ lɛ́ bǐ ɖó wɛn ɖagbe ɔ wú.’—1Kɔ 9:22, 23.

Xóta tɛ́ lɛ́ ka sixú dɔn mɛ e nɔ nɔ fí e a nɔ ɖɔ Mawuxó gbɔn lɛ́ é?