Nɔ zán akpáxwé bǐbɛ́mɛ tɔn JW.ORG tɔn ɖo sinsɛnzɔ́ towe mɛ

È sɔ́ nǔ nú xóta kpó video kpó e ná dɔn ayijlɔ́jlɔ́nɔ lɛ́ é bɔ yě ɖo akpáxwé bǐbɛ́mɛ tɔn tɛn Ɛntɛnɛ́ti tɔn mǐtɔn jí. (Mɛ 13:48) Hwɛhwɛ ɔ, nǔ e jɛ ɖo to lɛ́ é, alǒ nǔ e jí lin tamɛ dó wɛ mɛ lɛ́ ɖe, bo ɖo xó ɖɔ dó wɛ lɛ́ é jí wɛ yě nɔ tɛ ɖɛ̌.

Nɛ̌ a ka sixú zán akpáxwé bǐbɛ́mɛ tɔn jw.org tɔn ɖo sinsɛnzɔ́ towe mɛ gbɔn?

• Nɔ yi tɛn Ɛntɛnɛ́ti tɔn ɔ jí hwɛhwɛ. Nɔ sɔ́ kɛ́n nǔ e tɔ́n agaɖanu lɛ́ é tɔn, bo nɔ kpɔ́n lěe a sixú zán yě dó d’alɔ jlǒɖótɔ́ ɖé gbɔn é. (Ényí a ná mɔ nǔ ɖěvo e tɔ́n agaɖanu lɛ́ é ɖo akpáxwé bǐbɛ́mɛ tɔn ɔ jí hǔn, zǐn “Kpɔ́n nǔ ɖěvo lɛ́.”) Nǔ gǔdo gúdo tɔn e tɔ́n ɖo tɛn Ɛntɛnɛ́ti tɔn ɔ jí lɛ́ é tuuntuun ná d’alɔ we bɔ a ná nɔ ɖó linlin yɔ̌yɔ́ lɛ́ bo ná zán ɖo sinsɛnzɔ́ towe mɛ.

• Nɔ zán xóta kpó video kpó e è sɔ́ nǔ ná bɔ yě ɖo akpáxwé bǐbɛ́mɛ tɔn ɔ jí lɛ́ é dó bɛ́ xóɖɔɖókpɔ́. Nǔ énɛ́ lɛ́ sixú d’alɔ mǐ bɔ mǐ ná tuun nǔ e jí mɛ e ɖo fí e mǐ nɔ ɖe kúnnu gbɔn lɛ́ é sixú ɖo tamɛ lin dó wɛ lɛ́ é.

• Nɔ xlɛ́ akpáxwé bǐbɛ́mɛ tɔn ɔ mɛ lɛ́. Nɔ tɛ ɖɛ̌ xóta tají tají ɖé lɛ́ jí nú mɛ lɛ́ bo nɔ xlɛ́ yě lěe yě sixú ba do nú nǔ d’é jí ɖo tɛn Ɛntɛnɛ́ti tɔn ɔ jí gbɔn é.

• Sɛ́ fí e è ná gbɔn bo mɔ é dó. Mɛɖé lɛ́ nɔ ba ná ɖɔ xó xá mǐ tlɔlɔ lě ǎ, amɔ̌, yě nɔ ɖo gbesisɔmɛ bá yi tɛn Ɛntɛnɛ́ti tɔn mǐtɔn jí. Énɛ́ wú ɔ, ma nɔ xo nǔ kpɔ́n dó fí e è ná gbɔn bo yi akpáxwé bǐbɛ́mɛ tɔn ɔ jí, alǒ mɔ xóta tají ɖé, kabǐ video ɖé é sísɛ́ dó jlǒɖótɔ́ ɖé wú ó.