KLISÁNWUN GBƐ ZÍNZÁN

Ð’alɔ mɛ e ma nyí sinsɛnnɔ ǎ lɛ́ é bónú yě ná tuun Gbɛɖótɔ́ yětɔn

A ka ko xo nǔ kpɔ́n dó kúnnuɖiɖe nú mɛ e ma nyí sinsɛnnɔ ǎ lɛ́ é wú, ɖó a lin ɖɔ yě kún ná yí wɛn ɔ ó wútu kpɔ́n a? Nú mɔ̌ wɛ hǔn, flín ɖɔ mɛ e ma nyí sinsɛnnɔ ǎ lɛ́ é gěgé, káká jɛ mɛ e ma ɖi nǔ ɖɔ Mawu tíin ǎ lɛ́ é gěgé jí ko húzú Kúnnuɖetɔ́ Jexóva tɔn. Hwɛhwɛ ɔ, nǔ e sín hudó yě ɖó kpowun é wɛ nyí ɖɔ è ní d’alɔ kpɛɖé yě bónú yě ní gbéjé kúnnuɖenú ɖěɖěe xlɛ́ ɖɔ Mawu tíin lɛ́ é kpɔ́n.—Hlɔ̌ 1:20; 10:14.

KPƆ́N VIDEO FLÍN ÐƆ NǓMAÐITƆ́ LƐ́ SIXÚ WÁ ÐÓ NǓÐIÐI!: MƐ E MA NYÍ SINSƐNNƆ Ǎ LƐ́ É Ɔ, ÉNƐ́ GÚDO HǓN, NǍ XÓSIN NÚ NǓKANBYƆ́ ÉLƆ́:

Nɛ̌ lěe nǔ lɛ́ wá yi gbɔn nú Tommaso é ka d’alɔ we bɔ a ná ɖó linlin ɖagbe dó kúnnuɖiɖe nú mɛ e ma nyí sinsɛnnɔ ǎ lɛ́ é wú gbɔn?

Xósin towe

Lěe è ná bló gbɔn é

Nú mɛɖé ɖɔ ɖɔ émí kún ɖi nǔ nú Mawu ó hǔn, nyɔ̌ xomɛ, ɖǒ ayi te, bo xlɛ́ ɛ ɖɔ linlin tɔn kpó lěe nǔ cí n’i dó xóta ɔ wú é kpó ɖu ayi mɛ nú we nǔgbó nǔgbó. (2Ti 2:24) Ðɔ xó xá ɛ dó xóta e sixú dɔn ɛ lɛ́ é jí. É ka ɖo gbesisɔmɛ bá ɖɔ xó dó kúnnuɖenú ɖěɖěe zɔ́n bɔ mɛ gěgé ɖi nǔ ɖɔ Gbɛɖótɔ́ ɖé tíin lɛ́ é jí a? Nú mɔ̌ wɛ hǔn, zǎn wěma kpó video kpó ɖěɖěe è sɔ́ nǔ ná ɖo ali énɛ́ nú lɛ́ é. È ko sɔ́ alɔnuwéma La vie a-t-elle été créée? kpó Cinq questions à se poser sur l’origine de la vie kpó dó azɔ̌wanúgbá mɛkplɔ́nkplɔ́n tɔn mǐtɔn mɛ bónú mǐ ná dó sixú nɔ yá wǔ mɔ yě.

Tlóló hwɛ̌ ɔ, ado sixú hu we dó xó ɖiɖɔ dó Mawu wú nú mɛ e ma ɖi nǔ n’i ǎ é ɖé. Étɛ́wú a ma ka ná byɔ́ alɔdó wɛnjlátɔ́ e ko mɔ nǔ kpɔ́n é ɖé tɔn ǎ? Lɛ̌ flín ɖɔ Jexóva sixú d’alɔ mǐ bɔ wɛn e jlá wɛ mǐ ɖe é ná byɔ́ mɛ e ɖó ninɔmɛ ayi mɛ tɔn e sɔgbe lɛ́ é sín ayi mɛ, ényí ɖo bǐbɛ́mɛ ɔ, yě ma tlɛ ɖi nǔ ɖɔ Mawu tíin ǎ ɔ nɛ́.—Mɛ 13:48.