Wǎn Yí nú Jehovah Nɔ Sísɛ́ Mɛ Bɔ È Nɔ Bló Baptɛm

1-2. Lee Mɛsɛ́dó 8:27-31, 35, 36, 38 ɖexlɛ́ gbɔn é ɔ, etɛ ka sísɛ́ agooɖojǐe Etiopíinu ɔ, bɔ é bló baptɛm?

A KA ba na bló baptɛm, bo huzu ahwanvu Klisu tɔn ɖé à? Wanyiyi kpo nǔsumɛnukúnmɛ kpo ko sísɛ́ mɛ gegě bɔ ye wá gbeta enɛ kɔn. Kpɔ́n kpɔ́ndéwú axɔ́suzɔ́watɔ́ ee nɔ w’azɔ̌ nú axɔ́su nyɔnu Etiopíi tɔn é tɔn.

² Etiopíinu ɔ yawǔ wà nǔ sɔgbe xá nǔ e é kplɔ́n ɖò Mawuxówema ɔ mɛ é. (Xà Mɛsɛ́dó 8:27-31, 35, 36, 38.) Etɛ ka sísɛ́ ɛ? É ɖò wɛn ɖɔ Xó Mawu tɔn sù nukún tɔn mɛ; hwenu e é ɖò kɛkɛví ɖé mɛ é ɔ, é ɖò akpáxwé wema Ezayíi tɔn tɔn ɖé xà wɛ. Bɔ hwenu e Filipu wá ɖɔ xó n’i é ɔ, nǔ e Jezu wà n’i é sù nukún tɔn mɛ. Etiopíinu ɔ lɛ́ yí wǎn nú Jehovah tawun. Nɛ̌ mǐ ka wà gbɔn bo tuùn? Kɔ wɛ é lɛ́ sín Jehovah sɛn gbé ɖò Jeluzalɛmu tlolo. É cí ɖɔ nya enɛ jó sinsɛn e mɛ è jì i dó é dó ɖɔhun, bo wá gɔ́ nú akɔta ɖokpo e zé éɖée jó nú Mawu nǔgbo ɔ é. Wanyiyi e é ɖó nú Jehovah é ɖokpo ɔ wɛ lɛ́ sísɛ́ ɛ jɛ nukɔn bɔ é ɖè afɔ taji ɖevo, enɛ wɛ nyí ɖɔ é bló baptɛm, bo huzu ahwanvu Klisu tɔn ɖé.—Mat. 28:19.

3. Etɛ ka sixu gbò kpò nyi ali jí nú mɛɖé bɔ é na gbɔ baptɛm bló? (Kpɔ́n gbǎví “Ayikúngban Alɔkpa Tɛ Ðɔhun Ayi Ce ka Cí?”)

³ Wǎn yí nú Jehovah sixu sísɛ́ we bɔ a na bló baptɛm. Amɔ̌, wanyiyi sixu lɛ́ gbò kpò nyi ali jí nú we bɔ a na gbɔ mɔ̌ wà. Gbɔn nɛ̌ é? Kpɔ́n kpɔ́ndéwú ɖé lɛ. A sixu yí wǎn nú xwédo towe kpo xɔ́ntɔn towe lɛ kpo e ma nɔ sɛn Mawu ǎ é tawun, bɔ ado sixu ɖò huhu we wɛ ɖɔ enyi emi bló baptɛm ɔ, ye na gbɛ́ wǎn nú emi. (Mat. 10:37) Alǒ, a sixu yí wǎn nú nǔwalɔ e a tuùn ɖɔ Mawu gbɛ́ wǎn na lɛ é, bo sixu mɔ ɖɔ ye jijodó vɛwǔ. (Ðɛh. 97:10) Alǒ, a sixu ko nɔ ɖu xwè e cá kan xá sinsɛn nǔvú é ɖé lɛ sín kpɛví. A sixu yí wǎn nú nǔ ɖagbe ɖěɖee a nɔ flín dó xwè enɛ ɖuɖu wu lɛ é. Wǎgbɔ tɔn ɔ, a sixu mɔ ɖɔ aca ɖěɖee Jehovah gbɛ́ wǎn na lɛ é jijodó vɛwǔ. (1 Kɔ. 10:20, 21) Nǔ e a ɖó na kanbyɔ hwiɖée dìn é wɛ nyí ɖɔ, “Etɛ alǒ mɛ̌ un ka yí wǎn na hugǎn?”

MƐ E È ÐÓ NA YÍ WǍN NA HUGǍN É

4. Etɛ ka nyí nǔ nukɔntɔn e na sísɛ́ we bɔ a na bló baptɛm é?

⁴ Nǔ ɖagbe gegě wɛ tíìn bɔ a yí wǎn na, bɔ ye lɛ́ sù nukún towe mɛ. Ði kpɔ́ndéwú ɔ, cobonu a tlɛ na jɛ nǔ kplɔ́n xá Kúnnuɖetɔ́ Jehovah tɔn lɛ jí ɔ, a sixu ko nɔ ɖó sísí ɖaxó nú Biblu. A sixu ko lɛ́ yí wǎn nú Jezu. Dìn e a wá tuùn Kúnnuɖetɔ́ Jehovah tɔn lɛ é ɔ, a sixu ko yí wǎn nú kpɔ́ninɔ xá ye. Amɔ̌, nǔ ɖagbe enɛ lɛ ko kpé bonu a na ba na zé hwiɖée jó nú Jehovah bo bló baptɛm ǎ. Wǎn yí nú Jehovah Mawu wɛ nyí nǔ nukɔntɔn e na sísɛ́ we bɔ a na bló baptɛm é. Enyi a yí wǎn nú Jehovah hugǎn nǔ bǐ ɔ, a na lɔn nú nǔ ɖebǔ alǒ mɛ ɖebǔ na gbò kpò nyi ali jí nú we bɔ a na gbɔ sinsɛn ɛ ǎ. Wǎn yí nú Jehovah wɛ na sísɛ́ we bɔ a na bló baptɛm, é wɛ na lɛ́ d’alɔ we bɔ a na nɔ gbeji n’i ɖò baptɛm towe gudo.

5. Etɛ mǐ ka na kplɔ́n ɖò xóta elɔ mɛ?

⁵ Jezu ɖɔ ɖɔ mǐ ɖó na sɔ́ ayi, lindɔ̌n, linlin gɔ́ nú hlɔnhlɔn mǐtɔn bǐ dó yí wǎn nú Jehovah. (Mak. 12:30) Nɛ̌ a ka sixu kplɔ́n bo ɖó wanyiyi kpo sísí kpo nú Jehovah ɖó bǎ enɛ mɛ gbɔn? Tamɛ linlin dó wǎn e Jehovah yí nú mǐ é jí nɔ sísɛ́ mǐ, bɔ mǐ lɔ nɔ yí wǎn n’i. (1 Jaan 4:19) Enɛ wu ɔ, ɖò xóta elɔ mɛ ɔ, mǐ na kplɔ́n nǔ ɖěɖee mǐ ɖó na wà bo na ɖó wanyiyi ɖaxó nú Jehovah bo na bló baptɛm é.b

6. Sɔgbe xá Hlɔmanu lɛ 1:20 ɔ, ɖɔ ali e nu a sixu kplɔ́n nǔ dó Jehovah wu ɖè é ɖokpo.

⁶ Kplɔ́n nǔ dó Jehovah wu gbɔn nǔɖiɖó tɔn lɛ gblamɛ. (Xà Hlɔmanu lɛ 1:20; Nǔɖe. 4:11) Lin tamɛ dó atín kpo kanlin kpo e Jehovah bló lɛ é kpo lee ye xlɛ́ ɖɔ é ɖó nǔnywɛ tawun gbɔn é kpo jí. Kplɔ́n nǔ klewun ɖé dó ali jiwǔ e nu è bló agbaza towe ɖè é wu. (Ðɛh. 139:14) Lɛ̌ lin tamɛ dó hlɔnhlɔn e Jehovah glɔ́n dó hwesivɔ mɛ é jí, bo tuùn ɖɔ sunví ɖokpo kpowun wɛ é nyí ɖò sunví liva mɔkpan e tíìn lɛ é mɛ.c (Eza. 40:26) Nú a nɔ wà mɔ̌ ɔ, sísí e a ɖó nú Jehovah é na gɔ́ngɔ́n d’eji. É ɖò mɔ̌ có, tuùn e a tuùn ɖɔ Jehovah ɖó nǔnywɛ kpo hlɔnhlɔn kpo é ɔ, dodónú kancica e ɖò hwi kpo é kpo tɛntin é tɔn sín akpáxwé ɖé kpowun wɛ. Bo na dó ɖó wanyiyi syɛnsyɛn ɖé nú Jehovah ɔ, a ɖó na tuùn nǔ gegě dó wǔtu tɔn.

7. Bonu wǎn e a yí nú Jehovah é na gɔ́ngɔ́n ɔ, etɛ jí a ka ɖó na kú dó?

⁷ A ɖó na kúdeji ɖɔ Jehovah nɔ kpé nukún dó wǔ we. É nɔ vɛwǔ nú we bɔ a na ɖi ɖɔ Mɛ e ɖó jinukúnsin kpo ayikúngban kpo é tuùn ɖɔ a tíìn, bo nɔ lɛ́ kpé nukún dó wǔ we wɛ à? Enyi mɔ̌ hǔn, flín ɖɔ Jehovah kún “lín dó ɖokpo ɖokpo mǐtɔn [ó].” (Mɛ. 17:26-28) É “nɔ mɔ nukúnnú jɛ ayixa lɛ bǐ mɛ,” bo d’akpá elɔ nú we, lee Davidi ɖɔ nú Salomɔ́ɔ gbɔn é: “Enyi a ba ɛ ɔ, é na jó éɖée dó bɔ a na mɔ ɛ.” (1 Tan 28:9) Nǔgbo ɔ, Jehovah ‘dɔn we’ wɛ zɔ́n bɔ a ɖò Biblu kplɔ́n wɛ dìn. (Jaan 6:44) Bǎ e mɛ nǔ ɖěɖee Jehovah nɔ wà nú we lɛ é nɔ sù nukún towe mɛ ɖó é ɔ, bǎ enɛ mɛ wɛ wǎn e a yí n’i é na gɔ́ngɔ́n ɖó.

8. Nɛ̌ a ka sixu yí gbè nú wanyiyi Mawu tɔn gbɔn?

⁸ Lee a na yí gbè nú wanyiyi Mawu tɔn gbɔn é ɖokpo wɛ nyí gbɔn ɖɛxixo sɛ́dó è gblamɛ. Enyi a nɔ ɖɔ nǔ e ɖò ayi mɛ ɖu nú we wɛ lɛ é nú Mawu, bo nɔ lɛ́ dókú n’i nú nǔ e é wà nú we lɛ é bǐ ɔ, wǎn e a yí n’i é na jɛji. Nú a nɔ mɔ lee Jehovah nɔ na sinkɔn nú ɖɛ towe lɛ gbɔn é ɔ, kancica e ɖò hwi kpo é kpo tɛntin é na syɛn. (Ðɛh. 116:1) A na wá kúdeji ɖɔ é nɔ mɔ nǔ jɛ ninɔmɛ emitɔn mɛ. Amɔ̌, bo na dó vɛ́ kpo Jehovah kpo ɔ, a ɖó na tuùn lee é nɔ lin nǔ gbɔn é. A ɖó na lɛ́ tuùn nǔ e ba ɖò así towe wɛ é ɖè lɛ é. Gbɔn Xó tɔn Biblu ɔ kplɔnkplɔn gblamɛ kɛɖɛ jɛn a na ɖó nukúnnúmɔjɛnǔmɛ enɛ.

9. Nɛ̌ a ka sixu ɖexlɛ́ ɖɔ Biblu ɔ sù nukún towe mɛ gbɔn?

⁹ Kplɔ́n bonu Xó Mawu tɔn Biblu ɔ ni nɔ sù nukún towe mɛ. Biblu kɛɖɛ mɛ wɛ nǔgbo e kúnkplá Jehovah kpo linlin e é ɖó nú we é kpo ɖè. Gbɔn Biblu xixa gbè bǐ gbè, nǔsisɔ nú Biblu kplɔnkplɔn towe kpo nǔ e a kplɔ́n lɛ é zinzan kpo gblamɛ wɛ a na ɖexlɛ́ ɖɔ Biblu ɔ sù nukún emitɔn mɛ ɖè. (Ðɛh. 119:97, 99; Jaan 17:17) A ka ɖó tuto Biblu xixa mɛɖesunɔ tɔn tɔn ɖé à? A ka nɔ xwedó tito enɛ bo nɔ kúdeji ɖɔ emi nɔ xà Biblu ɔ gbè bǐ gbè à?

10. Ðɔ nǔ e zɔ́n bɔ Biblu nyí wema bǔnɔ ɖé é ɖokpo.

¹⁰ Nǔ e zɔ́n bɔ Biblu nyí wema bǔnɔ ɖé é ɖokpo wɛ nyí ɖɔ nǔ e mɛ e mɔ Jezu lɛ é ɖɔ lɛ é ɖ’emɛ. É wɛ nyí wema ɖokpo e sɔgbe bo tinmɛ nǔ e Jezu wà nú we é é. Enyi a nɔ kplɔ́n nǔ e Jezu ɖɔ bo wà lɛ é ɔ, enɛ na ɖibla sísɛ́ we bɔ a na ɖó kancica ɖé xá ɛ.

11. Nɛ̌ a ka sixu kplɔ́n bo yí wǎn nú Jehovah gbɔn?

¹¹ Kplɔ́n bo yí wǎn nú Jezu, enɛ ɔ, wǎn e a yí nú Jehovah é na jɛji. Etɛwu? Ðó Jezu nɔ ɖè jijɔ Tɔ́ tɔn tɔn lɛ xlɛ́ bɔ nǔ bǐ nɔ vɔ ɖ’ewu. (Jaan 14:9) Enɛ wu ɔ, bǎ e mɛ a nɔ kplɔ́n nǔ dó Jezu wu ɖó é ɔ, bǎ enɛ mɛ wɛ a na tuùn Jehovah bo na lɛ́ sɛkpɔ́ ɛ ɖó. Lin tamɛ dó wuvɛ̌ e Jezu sè xá mɛ ɖěɖee mɛ ɖevo lɛ ma nɔ kéya na ǎ lɛ é jí; ye wɛ nyí wamamɔnɔ lɛ, azinzɔnnɔ lɛ kpo mɛ e ma ɖó gǎn ǎ lɛ é kpo. Lɛ̌ lin tamɛ dó wě tawun tawun e é ɖè xá we lɛ é kpo lee tónúsíse n’i na zɔ́n bɔ gbɛzán towe na kpɔ́n te gbɔn é kpo jí.—Mat. 5:1-11; 7:24-27.

12. Enyi a kplɔ́n nǔ dó Jezu wu ɔ, etɛ enɛ ka sixu sísɛ́ we bɔ a na wà?

¹² Enyi a nɔ lin tamɛ dó vɔ̌ e Jezu sá bonu è na dó sɔ́ hwɛ mǐtɔn lɛ kɛ mǐ é jí ganji ɔ, wǎn e a yí n’i é na ɖibla syɛn. (Mat. 20:28) Enyi a mɔ nǔ jɛ mɛ ɖɔ Jezu sɔ́ jlǒ dó kú dó ta towe mɛ ɔ, enɛ sixu sísɛ́ we bɔ a na lɛkɔ sín hwɛ towe lɛ gudo bo byɔ hwɛsɔ́kɛ Jehovah. (Mɛ. 3:19, 20; 1 Jaan 1:9) Enyi a wá yí wǎn nú Jezu kpo Jehovah kpo ɔ, a na nɔ ba na sɛkpɔ́ mɛ ɖevo e nɔ wà mɔ̌ lɛ é lɔ.

13. Etɛ Jehovah ka na we?

¹³ Kplɔ́n bo yí wǎn nú xwédo Jehovah tɔn. Xwédo towe sín mɛ e ma nɔ sɛn Mawu ǎ lɛ é kpo xɔ́ntɔn towe xóxó lɛ kpo sixu nɔ ma mɔ nǔ jɛ nǔ e wu a jló na zé hwiɖée jó nú Jehovah é mɛ. Ye tlɛ sixu klán gbè xá we. Jehovah ka na d’alɔ we gbɔn xwédo gbigbɔ tɔn ɖé nina we gblamɛ. Nú a tɛ́dó xwédo gbigbɔ tɔn enɛ wu ɔ, a na mɔ wanyiyi kpo alɔdó kpo e sín hudo a ɖó é. (Mak. 10:29, 30; Ebl. 10:24, 25) É wá yá ɔ, xwédo towe sín mɛ lɛ sixu wá gɔ́ nú we ɖò Jehovah sinsɛn kpo tónúsíse nú nǔgbododó tɔn lɛ kpo mɛ.—1 Pi. 2:12.

14. Lee 1 Jaan 5:3 ɖɔ gbɔn é ɔ, etɛ a ka wá mɔ dó nǔgbododó Jehovah tɔn lɛ wu?

¹⁴ Kplɔ́n bonu nǔgbododó Jehovah tɔn lɛ ni nɔ xɔ akwɛ nú we, bonu a nɔ xwedó. Cobonu a na wá tuùn Jehovah ɔ, a sixu ko nɔ ɖɔ nǔ e nyɔ́ é kpo nǔ e nyla é kpo nú hwiɖée, amɔ̌ dìn ɔ, a mɔ ɖɔ nǔgbododó Jehovah tɔn lɛ wɛ nyɔ́ hugǎn. (Ðɛh. 1:1-3; xà 1 Jaan 5:3.) Lin tamɛ dó wě e Biblu ɖè xá asú lɛ, asì lɛ, mɛjitɔ́ lɛ kpo vǐ lɛ kpo é jí. (Efɛ. 5:22–6:4) Ee a ɖò wěɖexámɛ enɛ lɛ zán wɛ é ɔ, gbɛzán xwédo towe tɔn kpɔ́n te à é? Ee a ɖò tónú sè nú alixlɛ́mɛ Jehovah tɔn lɛ wɛ dó xɔ́ntɔn towe lɛ cyancyan kpo nǔnywɛ kpo wu é ɔ, nǔwalɔ hwiɖesunɔ tɔn lɛ kpɔ́n te à é? A ɖó awǎjijɛ à é? (Nǔx. 13:20; 1 Kɔ. 15:33) Ɛɛn wɛ na ɖibla nyí xósin towe nú nǔkanbyɔ enɛ lɛ.

15. Enyi a ɖò alɔdó ba wɛ, bo na zán nǔgbododó Biblu tɔn lɛ ɔ, etɛ a ka sixu wà?

¹⁵ Hweɖelɛnu ɔ, lee a na zán nǔgbododó Biblu tɔn e kplɔ́n wɛ a ɖè lɛ é gbɔn é sixu vɛwǔ nú we. Nǔ e wu Jehovah nɔ zán tutoblonunu tɔn, bo nɔ sɔnǔ nú wema jinjɔn Biblu jí e sixu d’alɔ we bɔ a na tuùn nǔ e nyɔ́ é ɖó vo nú nǔ e nyla é nɛ. (Ebl. 5:13, 14) Enyi a nɔ xà wema enɛ lɛ, bo nɔ lɛ́ kplɔ́n ye ɔ, a na mɔ lee ye nyɔ́ zán sɔ́ é kpo ninɔmɛ e mɛ a sixu zán ye ɖè ɖò gbɛzán towe mɛ é kpo; enɛ na lɛ́ zɔ́n bɔ a na ɖibla ba na nɔ tutoblonunu Jehovah tɔn mɛ.

16. Nɛ̌ Jehovah ka bló tuto nú togun tɔn gbɔn?

¹⁶ Kplɔ́n bo yí wǎn nú tutoblonunu Jehovah tɔn, lobo lɛ́ nɔ gudo na. Jehovah bló tuto nú togun tɔn bo má ye dó agun lɛ mɛ; Vǐ tɔn Jezu wɛ nyí gǎn nú agun lɛ bǐ. (Efɛ. 1:22; 5:23) Jezu cyan sunnu yí ami dó ɖè klewun ɖé, bonu ye na nɔ nukɔn, bo na bló tuto nú azɔ̌ ɖěɖee é ba na wà égbé lɛ é. Jezu ylɔ́ sunnu enɛ lɛ ɖɔ “[deví] gbejinɔtɔ́, ayiɖotenanɔ” ɔ, bɔ ye nɔ ylɔ́ azɔ̌ e ye ɖó bo na na nǔɖuɖu we, lobo lɛ́ cyɔn alɔ jǐ we ɖò gbigbɔ lixo é ɖɔ nǔjɔnǔ. (Mat. 24:45-47) Ali e nu deví gbejinɔtɔ́ ɔ nɔ kpé nukún dó wǔ we ɖè é ɖokpo wɛ nyí ɖɔ é nɔ kúdeji ɖɔ è sɔ́ sunnu e jɛxa lɛ é bɔ ye nyí mɛxo agun tɔn, bo nɔ xlɛ́ ali we. (Eza. 32:1, 2; Ebl. 13:17; 1 Pi. 5:2, 3) Mɛxo agun tɔn lɛ ɖò gbesisɔmɛ, bo na sɔ́ yeɖée jó dó ta towe mɛ, dó gbɔ nú we, lobo lɛ́ d’alɔ we bɔ a na sɛkpɔ́ Jehovah hugǎn. Amɔ̌, nǔ taji hugǎn e ye sixu wà nú we é ɖokpo wɛ nyí ɖɔ ye na d’alɔ we, bonu a na kplɔ́n nǔ mɛ ɖevo lɛ dó Jehovah wu.—Efɛ. 4:11-13.

17. Sɔgbe xá Hlɔmanu lɛ 10:10, 13, 14 ɔ, etɛwu mǐ ka ɖó na nɔ ɖɔ xó nú mɛ ɖevo lɛ dó Jehovah wu?

¹⁷ D’alɔ mɛ ɖevo lɛ nú ye ni kplɔ́n bo yí wǎn nú Jehovah. Jezu ɖɔ nú ahwanvu tɔn lɛ ɖɔ ye ni kplɔ́n nǔ mɛ ɖevo lɛ dó Jehovah wu. (Mat. 28:19, 20) Mǐ sixu nɔ xwedó gbeɖiɖe enɛ ɖó mǐ tuùn ɖɔ mǐ ɖó na setónú na kpowun wutu. Amɔ̌, enyi wǎn e a yí nú Jehovah é ɖò jijɛji wɛ ɔ, lee nǔ cí nú mɛsɛ́dó Piyɛ́ɛ kpo Jaan kpo é wɛ é na cí nú hwi lɔ: “Nǔ e mǐ mɔ, lobo sè ɔ, mǐ sixu gɔn ɖiɖɔ gbeɖé ǎ.” (Mɛ. 4:20) Enyi mǐ sixu d’alɔ mɛɖé bɔ é wá yí wǎn nú Jehovah ɔ, enɛ na hɛn awǎjijɛ wá nú mǐ tawun. Hwenu e wɛnɖagbejlatɔ́ Filipu d’alɔ Etiopíinu ɔ bɔ é kplɔ́n nǔgbo e ɖò Mawuxówema ɔ mɛ é, bo bló baptɛm é ɔ, kpɔ́n lee xomɛ na ko hun i sɔ́ é! Enyi a nɔ wà nǔ Filipu ɖɔhun bo nɔ setónú nú gbè e Jezu ɖè ɖɔ è ni nɔ jla wɛn ɔ é ɔ, xíxlɛ́ wɛ a ɖè ɖɔ emi jló na huzu Kúnnuɖetɔ́ Jehovah tɔn nɛ. (Xà Hlɔmanu lɛ 10:10, 13, 14.) Enɛ ɔ, a na ɖibla kan nǔ ɖokpo ɔ byɔ Etiopíinu ɔ ɖɔhun: “Etɛ ka sɔ́ na gbɛ́ ɖɔ un ma [bló baptɛm] ó?”—Mɛ. 8:36.

18. Etɛ lɛ mǐ ka na gbéjé kpɔ́n ɖò xóta e bɔ d’ewu é mɛ?

¹⁸ Enyi a wá gbeta ɔ kɔn bo na bló baptɛm ɔ, enɛ na xlɛ́ ɖɔ a jló na ɖè afɔ taji hugǎn ɔ ɖò gbɛzán towe mɛ nɛ. Ðó afɔ taji hugǎn ɖé wɛ é nyí wutu ɔ, a ɖó na gbéjé nǔ e enɛ byɔ lɛ é kpɔ́n ganji. Etɛ a ka ɖó na tuùn dó baptɛm wu? Etɛ a ka ɖó na wà cobo bló baptɛm? Etɛ a ka ɖó na wà ɖò baptɛm towe gudo? Mǐ na mɔ xósin nú nǔkanbyɔ enɛ lɛ ɖò xóta e bɔ d’ewu é mɛ.