Nǔ E A Sixu Wà Bo Na Nɔ Gbɛ̀ Yɔyɔ̌ ɔ Mɛ É

Xóta e wá yì lɛ é ko xlɛ́ ɖɔ Mawu na sú kún dó nú gbɛ̀ nyanya elɔ kpo tagba e ɖ’emɛ lɛ é bǐ kpo ɖò malin-malin mɛ. Mǐ sixu ɖeji ɖɔ é kún na gbla ó. Etɛwu? Ðó Xó Mawu tɔn Biblu ɔ ko d’akpá ɖɔ:

“Gbɛ̀ elɔ ɔ, wiwa yì wɛ é ɖè.”—1 JAAN 2:17.

Mǐ sixu kúdeji ɖɔ mɛɖé lɛ na gán, ɖó wemafɔ e ɖò aga é lɛ́ d’akpá ɖɔ:

“Mɛ e nɔ bló jlǒ Mawu tɔn ɔ ka nɔ nɔ gbɛ̀ kaka sɔyi.”

Enɛ wu ɔ, enyi mǐ ba na gán ɔ, mǐ ɖó na wà jlǒ Mawu tɔn. Bo na dó mɔ nǔ jɛ nǔ e è ni wà jlǒ Mawu tɔn nyí é wu ɔ, mǐ ɖó na tó kplɔ́n bo tuùn Mawu hwɛ̌.

KPLƆ́N BO “TUÙN” MAWU BÁ XÒ VIVƆNU Ɔ ZLƐ́

Jezu ɖɔ: “Gbɛ̀ mavɔmavɔ ɔ wɛ nyí ɖɔ ye ni tuùn we, bo tuùn ɖɔ hwi wɛ nyí Mawu nǔgbo ɖokpo e tíìn é.” (Jaan 17:3) Bo na dó xò vivɔnu ɔ zlɛ́ lobo nɔ gbɛ̀ kaka sɔyi ɔ, mǐ ɖó na kplɔ́n bo “tuùn” Mawu. Enɛ byɔ nǔ hú è ni ɖi nǔ nú Mawu, alǒ tuùn nǔ klewun klewun ɖé lɛ dó wǔ tɔn kpowun. Mǐ ɖó na zun xɔ́ntɔn xá ɛ. Enyi mǐ ba ɖɔ xɔ́ntɔn e mǐ zun xá mɛɖé é ni vɛ́ ganji ɔ, mǐ ɖó na nɔ zán hwenu ɖó kpɔ́ xá mɛ ɔ. Nǔ ɖokpo ɔ wɛ é nɔ nyí nú xɔ́ntɔn e mǐ zun xá Mawu é. Mǐ na ɖɔ xó dó nǔgbo taji e mǐ kplɔ́n ɖò Biblu mɛ, b’ɛ na d’alɔ mǐ bɔ mǐ na zun xɔ́ntɔn vívɛ́ xá Mawu, bo lɛ́ bló b’ɛ na nɔ ayǐ é ɖé lɛ jí.

NƆ XÀ XÓ MAWU TƆN BIBLU Ɔ AYIHƆNGBE AYIHƆNGBE

Hwɛhwɛ wɛ mǐ nɔ ɖu nǔ bo na dó nɔ gbɛ̀. Amɔ̌, Jezu ɖɔ: “Nǔɖuɖu kɛɖɛ wɛ gbɛtɔ́ nɔ ɖu bo nɔ nɔ gbɛ̀ ǎ; loɔ, xó e ko tɔ́n sín Mawu nu mɛ ɔ bǐ wɛ nɔ hɛn mɛ ɖó gbɛ̀.”—Matie 4:4.

Égbé ɔ, mǐ nɔ mɔ xó Jehovah tɔn lɛ ɖò Biblu mɛ. Enyi a nɔ kplɔ́n wema mímɛ́ enɛ ɔ, a na mɔ nǔ e Mawu ko wà wá yì é, nǔ e wà wɛ é ɖè dìn é kpo nǔ e é na wà ɖò sɔgudo é kpo ɖ’emɛ.

NƆ XOÐƐ SƐ́DÓ MAWU DÓ BYƆ ALƆDO

Enyi a ba na xwedó alixlɛ́mɛ Mawu tɔn lɛ, bo mɔ ɖɔ nǔ e é ɖɔ ɖɔ é nyla lɛ é jijodó vɛwǔ nú we ɔ, etɛ a ka sixu wà? Ðò ninɔmɛ enɛ mɛ ɔ, enyi a kplɔ́n bo tuùn Mawu ganji ɔ, é sixu d’alɔ we tawun.

Mǐ ni ɖɔ xó dó nawe e mǐ na ylɔ́ ɖɔ Sandra é wu; gbɛ̀ bliblí wɛ é nɔ zán. Hwenu e é jɛ Biblu kplɔ́n jí é ɔ, é kplɔ́n ɖɔ Mawu ɖegbe ɖɔ è ni “hɔn nú agalilɛ.” (1 Kɔlɛntinu lɛ 6:18) Sandra xoɖɛ sɛ́dó Mawu bá mɔ hlɔnhlɔn, lobo wá kpéwú bo jó walɔ kwijikwiji enɛ dó. Amɔ̌, é ɖó na kpò ɖò xwi ɖí xá mɛtɛnkpɔn lɛ wɛ. É ɖɔ: “Enyi linlin bliblí lɛ wá ayi ce mɛ ɔ, un nɔ ɖɔ bǐ nú Jehovah nyi wɛn, ɖó un tuùn ɖɔ un kún sixu ɖí xwi xá nyiɖokpo ó. Hlɔnhlɔn e ɖɛ ɖó é zɔ́n bɔ un sɛkpɔ́ Jehovah d’eji.” Sandra ɖɔhun ɔ, gbɛtɔ́ livi mɔ̌kpan wɛ ɖò kplɔnkplɔn wɛ bá tuùn Mawu. É ɖò hlɔnhlɔn e sín hudo ye ɖó bo na bló huzuhuzu lɛ, lobo lɛ́ zán gbɛ̀ e nyɔ́ nukún tɔn mɛ é na ye wɛ.—Filipunu lɛ 4:13.

Lě dò a kplɔ́n bo tuùn Mawu sɔ é ɔ, mɔ̌ dò wɛ ‘Mawu na tuùn’ ɖɔ a nyí xɔ́ntɔn xɔ akwɛ ɖé nú emi sɔ. (Galatinu lɛ 4:9; Ðɛhan 25:14) Enɛ ɔ, a na jɛxa bo na nɔ gbɛ̀ ɖò gbɛ̀ yɔyɔ̌ Mawu tɔn mɛ. Amɔ̌, nɛ̌ gbɛ̀ yɔyɔ̌ enɛ ka na cí? Xóta e bɔ d’ewu é na tinmɛ.