Enyi È Nyí Mɛ Ðagbe ɔ, Enɛ ka Na Zɔ́n Bɔ È Na Ðó Sɔgudo Ðagbe Hugǎn ɖé À?
Sín xwè kanweko mɔ̌kpan ɖíe wɛ mɛ gegě nɔ lin ɖɔ enyi è nyí mɛ ɖagbe, bo ma lɛ́ ɖó walɔ blíblí ɖé ǎ ɔ, enɛ na zɔ́n bɔ è na ɖó sɔgudo ɖagbe hugǎn ɖé. Ði kpɔ́ndéwú ɔ, mɛ e nɔ nɔ Azíi gbéjí lɛ é nɔ ɖó sísí nú xó elɔ e tamɛnúkplɔnmɛtɔ́ Confucius ee nɔ gbɛ̀ ɖò xwè 551 jɛ 479 J.H.M. tɔn vlamɛ é ɖɔ é: “Nǔ e a ma nɔ ba ɖɔ mɛ ɖevo lɛ ni wà nú we ǎ é ɔ, ma nɔ wà nú mɛ ɖevo lɛ ó.”a
ALI E MƐ GEGĚ MLƐ́ É ÐÉ
Kaka jɛ égbé ɔ, mɛ gegě kpò ɖò linlin wɛ ɖɔ nǔwalɔ ɖagbe ɖé ɖiɖó na zɔ́n bɔ è na ɖó sɔgudo ɖagbe hugǎn ɖé. Ye nɔ tɛ́n kpɔ́n bo nɔ sí mɛ, nɔ sɔnǔ nú nǔwalɔ ɖagbe lɛ, nɔ tuùn tɛn yetɔn mɛ, bo nɔ lɛ́ ɖó ayixa mímɛ́ ɖé. Nawe ɖé nɔ nɔ Viêt Nam bo nɔ nyí Linh bo ɖɔ: “Un kánɖeji bǐ mlɛ́mlɛ́ ɖɔ enyi un nɔ ɖɔ nǔgbo ɔ, un na ɖu lè tɔn.”
Nǔ e mɛɖé lɛ ɖi nǔ na ɖò sinsɛn linu lɛ é wɛ nɔ sísɛ́ ye bɔ ye nɔ ba na wà nǔ ɖagbe. Nya ɖé nɔ nyí Hsu-Yun, bo nɔ nɔ Taïwan bo ɖɔ: “È kplɔ́n mì ɖɔ nǔ e mɛɖé wà hwenu e é ɖò gbɛ̀ é wɛ na xlɛ́ ɖɔ ɖò kú tɔn gudo ɔ, é na ɖu gbɛ̀ kaka sɔyi, alǒ jiya ɖò zojimací mɛ.”
ETƐ MƐ É KA NƆ TƆ́N KƆ DÓ?
Nǔgbo wɛ ɖɔ nú mǐ wà nǔ ɖagbe nú mɛ ɖevo lɛ ɔ, mǐ nɔ ɖu lè tɔn tawun. Amɔ̌, mɛ e nɔ dó gǎn bo na dó nyɔ́ ɖò mɛ ɖevo lɛ sí é gegě mɔ ɖɔ mɔ̌ wiwa kún nɔ zɔ́n bonu è nɔ mɔ nǔ e ɖó nukún wɛ è ɖè é hwebǐnu ó. Nawe ɖé nɔ nyí Shiu Ping, bo nɔ nɔ Hong Kong, bo ɖɔ: “Nǔ e jɛ dó nyiɖesu jí é xlɛ́ mì ɖɔ mɛ ɖěɖee nɔ ba na wà nǔ ɖagbe nú mɛ ɖevo lɛ é ɔ, è kún nɔ wà nǔ ɖagbe dó sú axɔ́ ye hwebǐnu ó. Un dó gǎn e wu un kpé é bǐ bo dó kpé nukún dó xwédo ce wu, bo nɔ lɛ́ wà nǔ ɖagbe. Amɔ̌, xwédo ce gbà, bɔ asú ce jó nyi kpo vǐ sunnu ce kpo dó.”
Mɛ gegě mɔ ɖɔ sinsɛn kún nɔ zɔ́n hwebǐnu bonu gbɛ̀ gbɛtɔ́ lɛ tɔn nɔ kpɔ́n te ó. Nawe ɖé nɔ nɔ Japon bo nɔ nyí Etsuko, bo ɖɔ: “Un byɔ gbɛ̌ta sinsɛn tɔn ɖé mɛ, bo nyí gǎn ɖò gbɛ̌ta mɛ winnyawinnya lɛ tɔn nú. Amɔ̌, mɔ e un mɔ bɔ mɛ e ɖò sinsɛn ɔ mɛ é ɖé lɛ nɔ zán walɔ blíblí, nɔ ɖò gǎn tɛn hwlɛn wɛ, bo nɔ lɛ́ zán akwɛ e nyí sinsɛn ɔ tɔn lɛ nyi dò é cí kliwun nú mì.”
“Un dó gǎn e wu un kpé é bǐ bo dó kpé nukún dó xwédo ce wu, bo nɔ lɛ́ wà nǔ ɖagbe. Amɔ̌, xwédo ce gbà, bɔ asú ce jó nyi kpo vǐ sunnu ce kpo dó.”—SHIU PING, HONG KONG
Enyi mɛ e ɖò gǎn dó wɛ bo nɔ wà nǔ ɖagbe lɛ é ɖ’ayi wu ɖɔ gǎn e dó wɛ emi ɖè é kún ɖò nǔɖe na wɛ ó ɔ, awakanmɛ nɔ kú ye. Nawe ɖé nɔ nyí Van bo nɔ nɔ Viêt Nam, bɔ mɔ̌ wɛ nǔ cí n’i. É ɖɔ: “Gbè bǐ gbè wɛ un nɔ xɔ atín sínsɛ́n lɛ, folowa lɛ kpo nǔɖuɖu kpo bo nɔ hɛn yì tɔ́gbó ce lɛ sín yɔ ta, bo na dó ɖu sɔgudo ɖagbe ɖé sín vivǐ. Xwè mɔ̌kpan wɛ un wà nǔ ɖagbe na, bo nɔ lɛ́ fɔ́n bo nɔ ɖò yɛsu fɔ wɛ, é ka ɖò mɔ̌ có, asú ce bɛ́ azɔn syɛnsyɛn. Gɔ́ na ɔ, wemaxɔmɛ yì wɛ vǐ nyɔnu ce xwè 20 mɛví ɔ ɖè ɖò tò ɖevo mɛ bo kú.”
Enyi mɛ ɖagbe nyínyí ma ko kpé bonu è na ɖó sɔgudo ɖagbe hugǎn ɖé ǎ ɔ, nǔ ɖevo tɛ è ka ɖó na lɛ́ wà? Bo na dó mɔ xósin nǔkanbyɔ enɛ tɔn ɔ, mǐ ɖó hudo alixlɛ́mɛnú e ɖò jlɛ̌ jí é ɖé tɔn, enɛ wɛ nyí fí e mǐ sixu mɔ xósin nǔkanbyɔ mǐtɔn lɛ tɔn ɖè é; alixlɛ́mɛnú enɛ ɖɔ ali e mǐ na mlɛ́ bo na ɖó sɔgudo e nyɔ́ hugǎn é é. Fitɛ mǐ ka sixu mɔ alixlɛ́mɛnú enɛ ɖè?
a Bo na dó mɔ tinmɛ ɖevo lɛ dó lee nǔkplɔnmɛ Confucius tɔn lɛ gbà nǔ sɔ é wu hǔn, kpɔ́n xóta 7gɔ́ wema L’humanité à la recherche de Dieu tɔn, ee Kúnnuɖetɔ́ Jehovah tɔn lɛ ɖetɔ́n é, wexwɛ 31 jɛ 35; é ɖò www.jw.org jí.