Alixlɛ́mɛnú Ðejid’ewu ɖé ka Ðè nú Sɔgudo À?

Lee mǐ ko ɖɔ gbɔn ɖò xóta e wá yì lɛ é mɛ é ɔ, gbɛtɔ́ lɛ ganjɛ nǔ elɔ lɛ wu, bo na dó ɖó sɔgudo ɖagbe hugǎn ɖé: byɔwá, wema kplɔnkplɔn, dɔkun, kpo mɛ ɖagbe ɖé nyínyí kpo. Amɔ̌, mɛ e xwè fí ɖé bo ka ɖò wuntun tò tɔn e ma sɔgbe ǎ é ɖé zán wɛ é ɖɔhun wɛ nǔ wiwa gbɔn mɔ̌ cí. Xlɛ́xlɛ́ wɛ xó ɔ ɖè ɖɔ alixlɛ́mɛ ɖejid’ewu ɖě kún sɔ́ ɖè nú sɔgudo ó à? Eǒ!

ALIXLƐ́MƐ E GOSIN FÍ ÐAGBE HUGǍN ÐÉ É

Cobonu mǐ na wá gbeta ɖé kɔn ɔ, hwɛhwɛ wɛ mǐ nɔ kan nǔ byɔ mɛ e nyí mɛxo nú mǐ, bo ɖó nǔnywɛ hú mǐ é ɖé. Mɔ̌ ɖokpo ɔ, mǐ sixu mɔ alixlɛ́mɛ ɖejid’ewu lɛ dó sɔgudo mǐtɔn wu, ɖò Mɛ e nyí mɛxo nú mǐ, bo lɛ́ ɖó nǔnywɛ hú mǐ flaflá tɔn é ɖé gɔ́n. Mǐ sixu mɔ alixlɛ́mɛ Mɛ mɔ̌hun tɔn lɛ ɖò wema e è ko bɛ́ wlanwlán sín xwè 3 500 mɔ̌ ɖíe é ɖé mɛ. È nɔ ylɔ́ wema enɛ ɖɔ Biblu.

Etɛwu mǐ ka sixu ɖ’eji dó Biblu wu? Ðó Mɛ e nyí Dǒwatɔ́ tɔn é wɛ nyí Mɛ e nyí mɛxo, bo lɛ́ ɖó nǔnywɛ hú Mɛ lɛ bǐ ɖò wɛkɛ ɔ mɛ é. È ylɔ́ ɛ ɖɔ “degenɔ kpikpoe,” b’ɛ nyí “Mawu . . . bo na nyí Mawu kaka sɔyi.” (Daniyɛli 7:9; Ðɛhan 90:2) É “wɛ bló jinukúnsin. É wɛ nyí Mawu; é wɛ ɖó ayikúngban ɔ. É wɛ bló ayikúngban ɔ ɖó alɔ tɔn wu.” (Ezayíi 45:18) É sɔ́ nyikɔ éɖesunɔ tɔn ee nɔ nyí Jehovah é dó dó gesí éɖée.—Ðɛhan 83:19.

Ðó Mɛ e dá gbɛtɔ́ lɛ bǐ é wɛ nyí Dǒwatɔ́ Biblu ɔ tɔn wutu ɔ, é sɔ́ aca alǒ sinmɛ agbaza tɔn ɖě sù hú ɖevo ǎ. Wěɖexámɛ e ɖ’emɛ lɛ é nɔ wá dó ganmɛ, bo nɔ lɛ́ wà ɖagbe nú mɛ lɛ bǐ. É tíìn dó gbè gegě mɛ, bo lɛ́ nyí wema e è má gbɔn gbɛ̀ ɔ bǐ mɛ, hú wema ɖevo ɖebǔ é.a Enɛ xlɛ́ ɖɔ gbɛtɔ́ e ɖò awa vovo gbɛ̀ ɔ tɔn xwé lɛ é bǐ sixu mɔ nǔ jɛ mɛ faa, b’ɛ na lɛ́ xlɛ́ ali ye. Nǔgbo enɛ lɛ sɔgbe xá xó elɔ lɛ e Biblu ɔ ɖesunɔ ɖɔ é:

“Mawu . . . nɔ ɖè mɛɖé ɖó vo ɖò mɛɖé mɛ [ǎ]. Loɔ, ɖò akɔta ɖebǔ mɛ ɔ, mɛ e nɔ ɖó sísí n’i, bo nɔ xwedó hwɛjijɔ ɔ, mɛ enɛ sín nǔ nɔ nyɔ́ nukún tɔn mɛ.”—MƐSƐ́DÓ 10:34, 35.

Lee tɔ́ wanyiyinɔ ɖé nɔ xlɛ́ ali vǐ tɔn lɛ gbɔn é ɔ, mɔ̌ wɛ Jehovah Mawu e nyí Tɔ́ wanyiyinɔ ɖé é nɔ d’alɔ mǐ gbɔn Xó tɔn Biblu ɔ gblamɛ gbɔn. (2 Timɔtée 3:16) A sixu ɖeji dó Xó tɔn wu, è na ɖɔ ɔ, é wɛ dá mǐ, bo lɛ́ tuùn ali e mǐ sixu gbɔn ɖò gbɛzán mǐtɔn mɛ, b’ɛ na nyɔ́ hugǎn é.

ALIXLƐ́MƐ ÐEJID’EWU ÐÉ

Mǐ sixu ɖeji ɖɔ Biblu ɔ, alixlɛ́mɛnú ɖejid’ewu ɖé wɛ é nyí dó sɔgudo wu, ɖó sín xwè 2 000 mɔ̌ ɖíe ɔ, é ko ɖɔ nǔ ɖěɖee ɖò jijɛ wɛ ɖò gbɛ̀ ɔ mɛ dìn lɛ é kpo nǔwalɔ e ɖò gbɛtɔ́ lɛ sín fɛn nu égbé lɛ é kpo ɖ’ayǐ.

NǓ ÐĚÐEE ÐÒ JIJƐ WƐ É ÐÉ LƐ:

“Togun ɖě na site dó ɖě jí; axɔ́suɖuto ɖě na site dó ɖě jí. Ayikúngban na dánwǔ ɖesu, bɔ adɔ kpodo jɛmɛji kpo na wá gbɔn fí tɛnmɛ tɛnmɛ.”—LUKI 21:10, 11.

NǓWALƆ ÐÉ LƐ:

“Ka lɛ́ nywɛ ɖɔ hwenu vɛwǔ lɛ na tíìn ɖò azǎn gudogudo tɔn lɛ mɛ. Hwe enɛ nu ɔ, gbɛtɔ́ lɛ na nɔ ba ɖɔ emitɔn jɛn na nyɔ́; ye na nɔ yí wǎn nú akwɛ; ye na nɔ mɔ yeɖée; ye na nɔ yí gò; ye na nɔ nyla nu dó Mawu wu; ye na nɔ vɛtoli nú mɛjitɔ́ yetɔn lɛ; ye na nɔ dó alɔgudokpɛ́ nú mɛ; ye na nɔ ɖó sísí nú nǔ e nyí Mawu tɔn lɛ ɖě ǎ. Ye na ɖó wanyiyi ɖebǔ ǎ; ye na nɔ kú nǔblawu nú mɛ ǎ; ye na nɔ ɖɔ mɛ nú; ye nɔ sixu ɖu ɖò yeɖée jí ǎ, bo na nɔ nylahun; ye na nɔ gbɛ́ wǎn nú ɖagbewiwa. Ye na nɔ sà mɛ ɖu; ye na nɔ lin tamɛ kpɔ́n cobo na nɔ wà nǔ ǎ; ye na nɔ yí gò zɛ xwé wu; ye na nɔ yí wǎn nú gbɛɖuɖu hú ye na yí wǎn nú Mawu.”—2 TIMƆTÉE 3:1-4.

Enyi a mɔ bɔ nǔ e Biblu ɖɔ sín xwè mɔ̌kpan ɖíe é ɖò jijɛ wɛ pɛ́pɛ́pɛ́ gbɔn mɔ̌ ɖò égbé ɔ, gbeta tɛ kɔn a ka nɔ wá? É ɖò wɛn ɖɔ a na yí gbè nú xó elɔ e Leung ee nɔ nɔ Hong Kong é ɖɔ é: “È wlán nǔɖɔɖ’ayǐ Biblu tɔn enɛ lɛ dìn é ɔ, xwè ko jɛ. Gbɛtɔ́ ɖě sixu ɖɔ nǔ enɛ lɛ ɖ’ayǐ, bɔ ye na jɛnu pɛ́pɛ́pɛ́ mɔ̌ ǎ. Mɛ e ɖó nǔnywɛ tawun é ɖé gɔ́n wɛ Biblu ɔ ɖó na ko gosin.”

Nǔɖɔɖ’ayǐ kanweko mɔ̌kpan wɛ ɖò Biblu mɛ, bo ko jɛnu.b Nǔ enɛ lɛ xlɛ́ ɖɔ Biblu ɔ Xó Mawu tɔn wɛ nǔgbo. Jehovah ɖɔ: “Nyɛ wɛ nyí Mawu, é sɔ́ kpò mɛɖé ǎ. Mawu nyiɖɔhun ɖě tíìn ǎ. Un ko ɖɔ nǔ e na wà wɛ un ɖè ɔ sín dò.” (Ezayíi 46:9, 10) Enɛ wu ɔ, kpo hwɛjijɔ enɛ lɛ kpo ɔ, a sixu ɖeji dó nǔ e Biblu ɖɔ dó sɔgudo wu lɛ é wu.

ALIXLƐ́MƐ E SIXU WÀ ÐAGBE NÚ WE DÌN, BO NA LƐ́ WÀ NÚ WE KAKA SƆYI LƐ É

Enyi a nɔ xwedó alixlɛ́mɛ e ɖò Nǔwlanwlán Mímɛ́ lɛ mɛ lɛ é ɔ, a na ɖu lè tɔn. Ðé lɛ ɖíe:

LINLIN E ÐÒ JLƐ̌ JÍ É ÐIÐÓ DÓ AKWƐ KPO AZƆ̌ KPO WU

“È ɖó nǔ kpɛɖé bo na agbɔ̌n mɛɖée ɔ, é nyɔ́ hú è ɖò azɔ̌ wà wɛ hwebǐnu, kaka bo ba agbɔ̌n kpò.”—NǓNYWƐTƆ́XÓ 4:6.

GBƐZÁN XWÉDO TƆN

“Sunnu ɖokpo ɖokpo ɖó na yí wǎn nú asì tɔn éɖesunɔ ɖɔhun; nyɔnu ɖokpo ɖokpo ɖó na sí asú tɔn.”—EFƐZINU LƐ 5:33.

NǓ WIWA ÐÓ KPƆ́ XÁ MƐ ÐEVO LƐ

“Jǒ xomɛsin dó, jǒ hunnylanylá dó, ma sin xomɛ ó, a táa wà nǔ nyi dò.”—ÐƐHAN 37:8.

Nǔ e Biblu ɖɔ lɛ é zinzán sixu hɛn lè wá nú we dìn, bo na lɛ́ hun sɔgudo ɖagbe hugǎn ɖé sín ali nú we. Ðò Biblu mɛ ɔ, mǐ mɔ akpá Mawu tɔn e ɖɔ xó dó sɔgudo ɖaaɖagbe e mɛ nǔ elɔ lɛ na tíìn ɖè é wu é

FÍFÁ KPO AYIJAYǏ KPO

“Fífá ma ɖó dogbó e ye na mɔ ɔ wɛ na nyí nǔ e na nɔ víví nú ye é.”—ÐƐHAN 37:11.

È NA SÁ XWÉ, BƆ NǓÐUÐU A LƐ́ TÍÌN NÚ MƐ BǏ

“Ye na sá xwé bo nɔ ɛ mɛ. Ye na tun vǐwun bo na ɖu sínsɛ́n tɔn.”—EZAYÍI 65:21.

AZƆN KPO KÚ KPO SƆ́ NA TÍÌN Ǎ

“Kú sɔ́ na tíìn ǎ, aluwɛ sɔ́ na tíìn ǎ, alěnina sɔ́ na tíìn ǎ, wuvɛ̌ mimɔ sɔ́ na tíìn ǎ; nǔ xóxó lɛ ko bú.”—NǓÐEXLƐ́MƐ 21:4.

Etɛ a ka ɖó na wà bo na dó kúdeji ɖɔ emi na ɖó sɔgudo enɛ? Kpɔ́n xóta e bɔ d’ewu é.

a Bo na dó mɔ tinmɛ ɖevo lɛ dó Biblu e è zin, bo lɛ́ má é wu hǔn, yì www.jw.org jí, lobo zín NǓKPLƆNMƐ BIBLU TƆN LƐ > HWENUXÓ & BIBLU.

b Bo na dó mɔ tinmɛ ɖevo lɛ hǔn, kpɔ́n wema La Bible: Parole de Dieu ou des hommes? sín wemata 9gɔ́ ɔ; Kunnuɖetɔ́ Jehovah tɔn lɛ wɛ ɖetɔ́n, b’ɛ ɖò tɛn Ɛntɛnɛti tɔn mǐtɔn www.jw.org jí. Zǐn NǓSƐXWETƐN > WEMA LƐ & ALƆNUWEMA LƐ