A Sixu Wá Gbeta Sɔgudo Alɔkpa E A Ba Na Ðó É Tɔn Kɔn

É ko ɖó xwè 3 500 mɔ̌ dìn bɔ Jehovah Mawu ɖɔ nǔ e mɛ e ɖò sinsɛn ɛ wɛ lɛ é ɖó na wà bo na ɖó sɔgudo ɖagbe hugǎn ɖé é. É ɖɔ: “Un sɔ́ kú kpo gbɛ̀ kpo ɖó nukɔn mitɔn; dìn ɔ, mi sɔ́ gbɛ̀ ɔ, bonu vǐ mitɔn lɛ kpo mi kpo na nɔ gbɛ̀.”—Sɛ́nflínmɛ 30:19.

Mawusɛntɔ́ enɛ lɛ ɖó na wá gbeta e sɔgbe é ɖé kɔn, cobɔ sɔgudo yetɔn na zawě. Mǐ lɔmɔ̌ ɖó na wá gbeta ɖé kɔn yeɖɔhun ɖò égbé. Biblu tinmɛ lee è na wá gbeta sɔgudo ɖagbe hugǎn ɖé tɔn kɔn gbɔn é gbɔn lě: “Bo na nɔ yí wǎn nú Mawu Mavɔmavɔ, Mawu mitɔn, bo na nɔ sè Xó tɔn.”—Sɛ́nflínmɛ 30:20.

NƐ̌ MǏ KA SIXU YÍ WǍN NÚ JEHOVAH BO NƆ LƐ́ SÈ XÓ TƆN GBƆN?

NǓ BIBLU NI KPLƆ́N NǓ WE: Bo na dó yí wǎn nú Jehovah ɔ, a ɖó na kplɔ́n nǔ dó wǔ tɔn ɖò Biblu mɛ hwɛ̌. Nú a ɖò mɔ̌ wà wɛ ɔ, a na wá ɖ’ayi wu ɖɔ Mawu wanyiyinɔ e nǔ towe nɔ ɖu ayi mɛ na é ɖé wɛ n’i. É nyi gbehwan sɛ́dó we ɖɔ hwi ni xoɖɛ sɛ́dó emi, “ɖó é ɖò nukún kpé dó [wǔ we] wɛ.” (1 Piyɛ́ɛ 5:7) Biblu d’akpá ɖɔ enyi a dó gǎn bo sɛkpɔ́ ɛ ɔ, “é na sɛkpɔ́ [we.]”—Jaki 4:8.

NƆ ZÁN NǓ E A KPLƆ́N LƐ É: Tóɖiɖó Mawu nɔ byɔ ɖɔ è ni xwedó wěɖexámɛ tɔn e ɖò Biblu mɛ lɛ é. Enyi a ɖò mɔ̌ wà wɛ ɔ, “a sɔ́ nǔɖe bo na wà ɔ, a na mɔ nu tɔn. Lee nǔ na nyɔ́ nú we gbɔn ɔ nɛ.”—Jozuwée 1:8.