Mǐ Bǐ Sixu D’alɔ Biblu Kplɔntɔ́ lɛ Bɔ Ye Na Yì Nukɔn Bo Bló Baptɛm

1-2. Mɛ ɖětɛ lɛ ka sixu d’alɔ Biblu kplɔntɔ́ ɖé, b’ɛ na yì nukɔn bo bló baptɛm?

AMY ee nɔ nɔ Fidji é ɖɔ: “Un yí wǎn nú nǔ e è nɔ kplɔ́n mì ɖò Biblu kplɔnkplɔn ce hwenu é. Un tuùn ɖɔ nǔgbo ɔ wɛ. Amɔ̌, hwenu e un jɛ hwenu zán ɖó kpɔ́ xá nɔví lɛ jí é ɔ, é d’alɔ mì bɔ un bló huzuhuzu lɛ bo bló baptɛm.” Kpɔ́ndéwú Amy tɔn tɛɖɛ̌ nǔgbo taji elɔ jí: Enyi nɔví e ɖò agun ɔ mɛ lɛ é nɔ d’alɔ Biblu kplɔntɔ́ ɖé ɔ, enɛ na zɔ́n bɔ é na kpò ɖò nukɔn yì wɛ, bo na wá bló baptɛm.

² Wɛnjlatɔ́ lɛ ɖokpo ɖokpo sixu gɔ́ sò nú nukɔnyiyi agun ɔ tɔn. (Efɛ. 4:16) Gbexosin-alijitɔ́ e nɔ nyí Leilani bo nɔ nɔ Vanuatu é ɖɔ: “Lǒ ɖé ɖɔ ɖɔ tò wɛ nɔ kplɔ́n vǐ. Un lin ɖɔ nǔgbo wɛ nyí xó enɛ ɖò nǔ kplɔnkplɔn mɛ lɛ bonu ye na huzu ahwanvu lɔ sín akpáxwé. Hwɛhwɛ ɔ, agun ɔ bǐ wɛ nɔ bló bɔ mɛɖé nɔ wá nǔgbo ɔ mɛ.” Mɛ e ɖò xwédo ɖé mɛ lɛ é, xɔ́ntɔn lɛ, kpo mɛ̌si lɛ kpo bǐ wɛ nɔ w’azɔ̌ bǔnɔ ɖé dó d’alɔ vǐ ɖé b’ɛ na zin. Ye nɔ wà mɔ̌, gbɔn wusyɛn didó lanmɛ nú vǐ ɔ, kpo nǔ taji lɛ kpinkplɔn ɛ kpo gblamɛ. Mɔ̌ ɖokpo ɔ, wɛnjlatɔ́ lɛ sixu nɔ ɖè wě xá Biblu kplɔntɔ́ lɛ, nɔ dó wusyɛn lanmɛ nú ye, lobo lɛ́ sɔ́ kpɔ́ndéwú ɖagbe e na d’alɔ ye bɔ ye na yì nukɔn bo bló baptɛm lɛ é ɖ’ayǐ nú ye.—Nǔx. 15:22.

3. Etɛ xó e Ana, Dorin kpo Leilani kpo ɖɔ é ka kplɔ́n we?

³ Etɛwu wɛnjlatɔ́ e ɖò nukún kpé dó Biblu kplɔnkplɔn ɖé wu wɛ é ka na yí gbè nú alɔ e wɛnjlatɔ́ ɖevo lɛ sixu dó Biblu kplɔntɔ́ ɔ é? Ð’ayi nǔ e Ana e nyí gbexosin-alijitɔ́ titewungbe ɖé bo nɔ nɔ Moldavie é ɖɔ é wu: “Enyi Biblu kplɔntɔ́ ɖé jɛ nukɔn yì jí ɔ, é nɔ vɛwǔ tawun ɖɔ mɛ ɖokpo ni sú nǔ e nɔ hudo è lɛ é sín dò.” Dorin e nyí gbexosin-alijitɔ́ titewungbe bo ɖò tò enɛ ɖokpo ɔ mɛ é ɖó ayi wu ɖɔ: “Hwɛhwɛ ɔ, wɛnjlatɔ́ ɖevo lɛ nɔ ɖɔ nǔ e un ma tlɛ lin gbeɖé na ɖɔ nú nǔkplɔntɔ́ ɔ ǎ é, b’ɛ nɔ byɔ ayi mɛ nú nǔkplɔntɔ́ ɔ.” Leilani ɖɔ xó dó hwɛjijɔ ɖevo wu, bo ɖɔ: “Enyi Biblu kplɔntɔ́ lɛ nɔ ɖu vivǐ wanyiyi nɔví lɛ tɔn, kpo nukún e ye nɔ kpé dó ye wu é kpo tɔn ɔ, é nɔ d’alɔ ye bɔ ye nɔ mɔ nǔ jɛ wu ɖɔ togun Jehovah tɔn wɛ mǐ nyí nǔgbo.”—Jaan 13:35.

4. Etɛ lɛ jí mǐ ka na ɖɔ xó dó ɖò xóta elɔ mɛ?

⁴ É ɖò mɔ̌ có, a sixu kanbyɔ hwiɖée ɖɔ, ‘Enyi nyiɖesu ma ɖó Biblu kplɔnkplɔn ɖé bo ɖò nukún kpé d’ewu wɛ ǎ ɔ, nɛ̌ un ka sixu d’alɔ Biblu kplɔntɔ́ ɖé b’ɛ na yì nukɔn gbɔn?’ Mi nú mǐ ni gbéjé nǔ e mǐ sixu wà hwenu e mɛɖé byɔ mǐ ɖɔ mǐ ni kplá emi yì Biblu kplɔnkplɔn ɖé domɛ é, kpo nǔ e mǐ sixu wà hwenu e Biblu kplɔntɔ́ ɖé jɛ kplé lɛ wá jí é kpo kpɔ́n. Mǐ na lɛ́ mɔ lee mɛxo agun tɔn lɛ sixu d’alɔ Biblu kplɔntɔ́ lɛ bɔ ye na yì nukɔn bo bló baptɛm gbɔn é.

HWENU E A KPLÁ MƐÐÉ YÌ BIBLU KPLƆNKPƆN ÐÉ DOMƐ É

5. Enyi mɛɖé byɔ we ɖɔ hwi ni wá kplá emi yì Biblu kplɔnkplɔn ɖé domɛ ɔ, etɛ a ka ɖó na wà?

⁵ Ðò Biblu kplɔnkplɔn ɖé domɛ ɔ, nǔkplɔnmɛtɔ́ ɔ wɛ nyí mɛ nukɔntɔn e jɛxa bo na d’alɔ nǔkplɔntɔ́ ɔ b’ɛ na mɔ nǔ jɛ Xó Mawu tɔn mɛ é. Enyi nǔkplɔnmɛtɔ́ ɔ byɔ we ɖɔ hwi ni kplá emi hɛn yì ɔ, a ɖó na tuùn ɖɔ azɔ̌watɔ́gbɛ́ tɔn wɛ emi nyí. (Nǔt. 4:9, 10) Ðò Biblu kplɔnkplɔn ɖé domɛ ɔ, etɛ a ka sixu wà bo na nyí alɔdómɛtɔ́ ɖagbe ɖé?

6. Enyi a jló na kplá mɛɖé hɛn yì nǔkplɔnkplɔn ɖé domɛ ɔ, nɛ̌ a ka sixu zán nǔgbododó e ɖò Nǔnywɛxó 15:22 mɛ é gbɔn?

⁶ Sɔnǔ nú nǔkplɔnkplɔn ɔ. Jɛ nukɔn hwɛ̌ ɔ, byɔ̌ nǔkplɔnmɛtɔ́ ɔ ɖɔ é ni tinmɛ nǔɖe lɛ nú we dó nǔkplɔntɔ́ ɔ wu. (Xà Nǔnywɛxó 15:22.) A sixu kanbyɔ ɛ ɖɔ: “Etɛ a ka tuùn dó nǔkplɔntɔ́ ɔ wu? Etɛ jí na kplɔ́n nǔ dó wɛ mi ka ɖè? Etɛ mɛ a ka ba ɖɔ nǔkplɔntɔ́ ɔ ni mɔ nǔ jɛ ɖò nǔkplɔnkplɔn enɛ hwenu? Nǔɖe ka ɖè bɔ un na wà, alǒ gbɔ wiwa ɖò nǔkplɔnkplɔn ɔ hwenu à? Kabǐ nǔɖe ka ɖè bɔ un ɖó na ɖɔ abǐ gbɔ ɖiɖɔ à? Etɛ ka sixu dó wusyɛn lanmɛ nú nǔkplɔntɔ́ ɔ b’ɛ na yì nukɔn?” É ɖò wɛn ɖɔ nǔkplɔnmɛtɔ́ ɔ kún na ɖɔ kpáxó Biblu kplɔntɔ́ ɔ tɔn lɛ nú we ó, amɔ̌, nǔ e sixu nyɔ́ zán nú we lɛ é wɛ é na ɖɔ nú we. Mɛsɛ́dó e nɔ nyí Joy é nɔ ɖɔ xó dó nǔ enɛ lɛ wu xá mɛ ɖěɖee nɔ kplá ɛ yì Biblu kplɔnkplɔn ɖé domɛ lɛ é. É yí gbè ɖɔ: “Xóɖɔɖókpɔ́ enɛ lɛ nɔ d’alɔ mɛ e kpo nyi kpo zɔn é, b’ɛ nɔ ba na d’alɔ nǔkplɔntɔ́ ɔ, bo nɔ sɔnǔ nú nǔ ɖěɖee é jló na ɖɔ ɖò nǔkplɔnkplɔn ɔ domɛ lɛ é.”

7. Etɛwu hwi mɛ e kplá mɛ xwè Biblu kplɔnkplɔn ɖé domɛ é ka ɖó na sɔnǔ nú nǔkplɔnkplɔn ɔ?

⁷ Enyi è byɔ we ɖɔ hwi ni wá kplá emi yì nǔkplɔnkplɔn ɖé domɛ ɔ, é na nyɔ́ ɖɔ a ni sɔnǔ nú nǔ e jí na ɖɔ xó dó wɛ mi ɖè é. (Ɛsd. 7:10, nwt) Dorin e xó mǐ ɖɔ wá yì é ɖɔ: “Enyi mɛ e kpo nyɛ kpo zɔn é sɔnǔ nú nǔkplɔnkplɔn ɔ ɔ, é nɔ sù nukún ce mɛ. Enɛ ɔ, é sixu ɖɔ xó e na nyɔ́ zán lɛ é.” Gɔ́ na ɔ, enɛ na zɔ́n bɔ nǔkplɔntɔ́ ɔ na mɔ ɖɔ ye mɛ we lɛ sɔnǔ ganji, b’ɛ na nyí kpɔ́ndéwú ɖagbe ɖé n’i. Enyi a ma tlɛ sɔnǔ nú nǔkplɔnkplɔn ɔ bǐ ǎ hǔn, é hwe bǐ ɔ, ba hwenu klewun ɖé bo sɔ́ kɛ́n nǔ taji e ɖò nǔkplɔnkplɔn ɔ mɛ lɛ é tɔn.

8. Nɛ̌ a ka sixu kúdeji ɖɔ ɖɛ e a xò ɖò Biblu kplɔnkplɔn ɖé domɛ é xwè ali gbɔn?

⁸ Akpáxwé taji ɖé wɛ ɖɛ nyí ɖò Biblu kplɔnkplɔn ɖé hwenu, enɛ wu ɔ, enyi è byɔ we ɖɔ hwi na xoɖɛ hǔn, lin tamɛ dó nǔ ɖěɖee a na ɖɔ lɛ é jí jɛ nukɔn. Enɛ ɔ, ɖɛ towe na byɔ ayi nǔkplɔntɔ́ ɔ tɔn mɛ. (Ðɛh. 141:2) Hanae e nɔ nɔ Japon é kpò ɖò ɖɛ e nɔví nyɔnu e xwedó mɛ e kplɔ́n Biblu xá ɛ é xò é flín wɛ. É ɖɔ: “Un mɔ ɖɔ é ɖó kancica syɛnsyɛn ɖé xá Jehovah, bɔ un ba na cí éɖɔhun. Hwenu e é ylɔ́ nyikɔ ce dó ɖɛ ɔ mɛ é ɔ, un lɛ́ mɔ ɖɔ é yí wǎn nú mì.”

9. Sɔgbe xá Jaki 1:19 ɔ, nɛ̌ a ka sixu nyí alɔdómɛtɔ́ ɖagbe ɖé ɖò Biblu kplɔnkplɔn ɖé domɛ gbɔn?

⁹ Nɔ d’alɔ nǔkplɔnmɛtɔ́ ɔ ɖò nǔkplɔnkplɔn ɔ hwenu. Omamuyovbi ee nyí gbexosin-alijitɔ́ titewungbe ɖé ɖò Nigéria é ɖɔ: “Alɔdómɛtɔ́ ɖagbe ɖé nɔ tɛ́tó ganji ɖò nǔkplɔnkplɔn ɔ hwenu. É nɔ na xósin ɖagbe lɛ, bo ka nɔ lɛ̀ xógle ǎ, ɖó é tuùn ɖɔ nǔkplɔnmɛtɔ́ ɔ wɛ ɖò nukún kpé dó nǔkplɔnkplɔn ɔ wu wɛ.” Nɛ̌ a ka sixu wà gbɔn bo tuùn hwenu e a na ɖɔ xó dó ɖò Biblu kplɔnkplɔn ɖé hwenu é kpo nǔ e a na ɖɔ é kpo? (Nǔx. 25:11) Tɛ́tó ganji, hwenu e nǔkplɔnmɛtɔ́ ɔ kpo nǔkplɔntɔ́ ɔ kpo ɖò xó ɖɔ wɛ é. (Xà Jaki 1:19.) Enɛ gudo jɛn a na ɖò gbesisɔmɛ, bo na d’alɔ ɖò hwenu e jɛxa dó é. É ɖò wɛn ɖɔ a ɖó na lin tamɛ cobo ɖɔ xó. Ði kpɔ́ndéwú ɔ, a na ba na ɖɔ xó dín, gbò xó dó nu nú nǔkplɔnmɛtɔ́ ɔ hwenu e é ɖò nǔɖe tinmɛ wɛ é alǒ jɛ xó ɖɔ dó xóta ɖevo jí jí ǎ. Amɔ̌, gbɔn xó klewun ɖé ɖiɖɔ, kpɔ́ndéwú ɖé nina, alǒ nǔ klewun ɖé kinkanbyɔ gblamɛ ɔ, a sixu bló bɔ nǔ e jí ɖɔ xó dó wɛ mi ɖè é na zawě. Hweɖelɛnu ɔ, a sixu mɔ ɖɔ emi kún ɖó nǔ kaka ɖé bo na ɖɔ dó nǔkplɔnkplɔn ɔ mɛ ó. Amɔ̌, enyi a nɔ kpa nǔkplɔntɔ́ ɔ, bo nɔ lɛ́ ɖexlɛ́ ɛ ɖɔ nǔ tɔn nɔ ɖu ayi mɛ nú we ɔ, enɛ na d’alɔ ɛ hugǎn b’ɛ na yì nukɔn.

10. Nɛ̌ nǔ e a mɔ kpɔ́n lɛ é ka sixu d’alɔ Biblu kplɔntɔ́ ɖé gbɔn?

¹⁰ Mǎ nǔ e a mɔ kpɔ́n lɛ é xá ɛ. Enyi é nyɔ́ bló hǔn, ɖɔ lee a mɔ nǔgbo ɔ gbɔn é, lee a ɖu ɖò wuvɛ̌ ɖé jí gbɔn é, alǒ lee Jehovah d’alɔ we gbɔn ɖò gbɛzán towe mɛ é nú nǔkplɔntɔ́ ɔ klewun. (Ðɛh. 78:4, 7) É sixu nyí nǔ e ba na sè wɛ nǔkplɔntɔ́ ɔ ɖè é pɛ́ɛ nɛ. É sixu hɛn nǔɖiɖi tɔn lidǒ, alǒ dó wusyɛn lanmɛ n’i b’ɛ na kpò ɖò nukɔn yì wɛ bo bló baptɛm. Gɔ́ na ɔ, é sixu ɖè lee é na ɖu ɖò wuvɛ̌ e mɔ wɛ é ɖè é ɖé jí gbɔn é xlɛ́ ɛ. (1 Pi. 5:9) Gabriel e nɔ nɔ Brésil, bo nyí gbexosin-alijitɔ́ dìn é flín nǔ e d’alɔ ɛ hwenu e é ɖò Biblu kplɔ́n wɛ é. É ɖɔ: “Enyi un sè tan nɔví lɛ tɔn ɔ, é nɔ kplɔ́n mì ɖɔ Jehovah nɔ mɔ wuvɛ̌ e mɔ wɛ mǐ ɖè lɛ é. Bɔ enyi ye sixu kpéwú bo ɖu ɖò ye jí ɔ, nyi lɔ sixu kpéwú.”

HWENU E BIBLU KPLƆNTƆ́ Ɔ JƐ KPLÉ LƐ WÁ JÍ É

11-12.Etɛwu mǐ ka ɖó na nɔ yí Biblu kplɔntɔ́ ɖěɖee nɔ wá kplé lɛ é kpo akpakpa sɔ́ mɛ kpo?

¹¹ Nú Biblu kplɔntɔ́ ɖé na yì nukɔn bo bló baptɛm ɔ, é ɖó na nɔ yì kplé agun tɔn lɛ ɖò gbesisɔmɛ, lobo ɖu vivǐ yetɔn. (Ebl. 10:24, 25) Vlafo nǔkplɔnmɛtɔ́ ɔ wɛ na ylɔ́ ɛ azɔn nukɔntɔn ɔ wá kplé. Enyi é wá ɔ, mǐ bǐ sixu dó wusyɛn lanmɛ n’i ɖɔ é ni kpò ɖò Kpléxɔ Axɔ́suɖuto ɔ tɔn mɛ wá wɛ. Ali tɛ lɛ nu mǐ ka sixu wà mɔ̌ ɖè?

¹² Dǒ doo nú nǔkplɔntɔ́ ɔ kpo akpakpa sɔ́ mɛ kpo. (Hlɔ. 15:7) Enyi nǔkplɔntɔ́ ɔ nɔ mɔ ɖɔ è nɔ yí emi ɖò kplé lɛ jí ɔ, é na ɖibla na ba na kpò ɖò Kpléxɔ Axɔ́suɖuto ɔ tɔn mɛ wá wɛ. Dǒ gbè nǔkplɔntɔ́ ɔ kpo akpakpa sɔ́ mɛ kpo, bo lɛ́ dó è gesí nú mɛ ɖevo lɛ; ka bló ɖò ali ɖé nu nú é ni vo ganji. Ðɔ xó xá ɛ, ɖó nǔkplɔnmɛtɔ́ tɔn sixu ko gbɔhwenu, alǒ ɖò azɔ̌ ɖevo lɛ wà wɛ ɖò Kpléxɔ Axɔ́suɖuto ɔ tɔn mɛ. Tɛ́tó ganji hwenu e nǔkplɔntɔ́ ɔ ɖò xó ɖɔ wɛ é, bo xlɛ́ ɛ ɖɔ nǔ tɔn nɔ ɖu ayi mɛ nú we. Ðagbe tɛ yǐ e a yí nǔkplɔntɔ́ ɔ kpo akpakpa sɔ́ mɛ kpo é ka sixu wà n’i? Ðǒ ayi kpɔ́ndéwú Dmitrii e bló baptɛm xwè ɖé lɛ ɖíe, bo nyí devízɔ́watɔ́ sinsɛnzɔ́wiwa tɔn dìn é tɔn wu. É flín azɔn nukɔntɔn e é yì kplé é bo ɖɔ: “Un ɖò te ɖò kɔ́xo ɔ ta bɔ ado ɖò huhu mì wɛ, bɔ nɔví sunnu ɖé wá kplá mì byɔ kpléxɔ ɔ mɛ kpo xomɛnyínyɔ́ kpo. Mɛ gegě wá dó gbè nú mì. É kpaca mì tawun. É víví nú mì tawun, kaka bɔ un tlɛ ba ɖɔ mǐ ni nɔ bló kplé lɛ ɖò azǎn lɛ bǐ jí. Un mɔ nǔ mɔ̌hun ɖò fí ɖě kpɔ́n ǎ.”

13. Ðagbe tɛ nǔwalɔ towe ka sixu wà nú Biblu kplɔntɔ́ ɖé?

¹³ Sɔ́ kpɔ́ndéwú ɖagbe ɖ’ayǐ. Kpɔ́ndéwú ɖagbe e a nɔ sɔ́ ɖ’ayǐ é sixu d’alɔ nǔkplɔntɔ́ ɔ b’ɛ na kúdeji ɖɔ mǐ wɛ nyí Klisanwun nǔgbo lɛ. (Mat. 5:16) Vitalii e nyí gbexosin-alijitɔ́ ɖò Moldavie é ɖɔ: “Lee mɛ ɖevo e ɖò agun ɔ mɛ lɛ é nɔ zán gbɛ̀, lin tamɛ kpɔ́n, bo nɔ lɛ́ wà nǔ gbɔn é nɔ kplɔ́n nǔ mì. Enɛ zɔ́n bɔ un kúdeji ɖɔ Kúnnuɖetɔ́ Jehovah tɔn lɛ wɛ nyí sinsɛn nǔgbo ɔ.”

14. Nɛ̌ kpɔ́ndéwú towe ka sixu d’alɔ mɛɖé b’ɛ na kpò ɖò nukɔn yì wɛ gbɔn?

¹⁴ Cobonu nǔkplɔntɔ́ ɖé na jɛxa bo na bló baptɛm ɔ, é ɖó na nɔ zán nǔ ɖěɖee kplɔ́n wɛ é ɖè lɛ é. Enɛ ka nɔ bɔwǔ hwebǐnu ǎ. Enyi Biblu kplɔntɔ́ ɔ nɔ mɔ lè ɖěɖee nǔgbododó Biblu tɔn lɛ zinzan nɔ hɛn wá nú we lɛ é ɔ, enɛ sixu sísɛ́ ɛ, b’ɛ na ba na xwedó kpɔ́ndéwú towe. (1 Kɔ. 11:1) Ðǒ ayi kpɔ́ndéwú Hanae e xó mǐ ɖɔ ɖò bǐbɛ̌mɛ é tɔn wu. É ɖɔ: “Nɔví lɛ ko ɖò nǔ ɖěɖee un ɖò kplɔnkplɔn wɛ bá wà lɛ é wà wɛ. Un mɔ lee un sixu dó wusyɛn lanmɛ nú mɛ, sɔ́ hwɛ kɛ mɛ, lobo lɛ́ ɖè wanyiyi xlɛ́ gbɔn é. Hwebǐnu wɛ ye nɔ ɖɔ xó ɖagbe dó mɛ ɖevo lɛ wu. Un ba na xwedó kpɔ́ndéwú yetɔn.”

15. Enyi Biblu kplɔntɔ́ ɖé kpò ɖò kplé lɛ wá wɛ ɔ, nɛ̌ Nǔnywɛxó 27:17 ka d’alɔ mǐ bɔ mǐ mɔ nǔ e wu mǐ ɖó na dó xɔ́ntɔn ɛ é gbɔn?

¹⁵ Dǒ xɔ́ntɔn nǔkplɔntɔ́ ɔ. Ee nǔkplɔntɔ́ ɔ na kpò ɖò kplé lɛ wá wɛ é ɔ, kpò ɖò xlɛ́xlɛ́ ɛ wɛ ɖɔ nǔ tɔn nɔ ɖu ayi mɛ nú we. (Fili. 2:4) A sixu tɛ́n kpɔ́n bo tuùn i hugǎn. A sixu nɔ ɖɔ n’i ɖɔ huzuhuzu e bló wɛ é ɖè lɛ é nɔ dó xomɛhunhun nú emi. A sixu nɔ lɛ́ kan nǔ byɔ ɛ dó Biblu kplɔnkplɔn ɔ, xwédo tɔn kpo azɔ̌ tɔn kpo wu. Amɔ̌, ɖ’ayi te bo ma wá kan nǔ ɖěɖee sixu kú wǔ n’i lɛ é byɔ ɛ ó. Xóɖɔɖókpɔ́ enɛ lɛ sixu zɔ́n bɔ mi na lɛ́ vɛ́ d’eji. Enyi a dó xɔ́ntɔn nǔkplɔntɔ́ ɔ ɔ, é na bɔwǔ nú we bɔ a na d’alɔ ɛ, b’ɛ na yì nukɔn bo bló baptɛm. (Xà Nǔnywɛxó 27:17.) Gbexosin-alijitɔ́ hwebǐnu tɔn ɖé wɛ Hanae nyí dìn. É flín hwenu e é jɛ kplé lɛ yì jí é bo ɖɔ: “Ðó un zun xɔ́ntɔn lɛ ɖò agun ɔ mɛ wutu ɔ, akpakpa nɔ sɔ́ mì dó kplé lɛ yiyi wu, bɔ enyi nǔ tlɛ cikɔ nú mì ɔ, un nɔ yì. Un ɖu vivǐ xɔ́ntɔn yɔyɔ̌ e un zun lɛ é tɔn, bɔ enɛ d’alɔ mì bɔ un ɖó xɔ́ntɔn zunzun xá mɛ e kpo nyi kpo ma ɖi nǔ nú nǔ ɖokpo ɔ ǎ lɛ é te. Un ba na vɛ́ xá Jehovah kpo nɔví lɛ kpo d’eji. Enɛ wu ɔ, un wá gbeta ɔ kɔn bá bló baptɛm.”

16. Nǔ ɖevo tɛ a ka sixu wà dó d’alɔ Biblu kplɔntɔ́ ɖé b’ɛ na vo ɖò agun ɔ mɛ?

¹⁶ Enyi Biblu kplɔntɔ́ ɖé kpò ɖò nukɔn yì wɛ hǔn, d’alɔ ɛ bonu é ni mɔ ɖɔ emi ɖó tɛn ɖé ɖò agun ɔ mɛ. A sixu wà mɔ̌ gbɔn yǐ e a nɔ yí i é gblamɛ. (Ebl. 13:2) Denis e nɔ nɔ Moldavie é flín hwenu e é ɖò Biblu kplɔ́n wɛ é bo ɖɔ: “Azɔn gegě wɛ nɔví lɛ nɔ ylɔ́ nyi kpo asì ce kpo bɔ mǐ nɔ zán hwenu ɖó kpɔ́ xá ye. Ye nɔ ɖɔ lee Jehovah nɔ d’alɔ ye gbɔn é nú mǐ. Enɛ nɔ dó wusyɛn lanmɛ nú mǐ tawun. Ali enɛ lɛ e hun nú mǐ é zɔ́n bɔ mǐ kánɖeji bo na sɛn Jehovah, lobo ka tuùn ɖɔ enyi mǐ wà mɔ̌ ɔ, gbɛ̀ ɖaaɖagbe ɖé ɖò te kpɔ́n mǐ.” Enyi Biblu kplɔntɔ́ ɖé jɛxa bo huzu wɛnjlatɔ́ ɔ, a sixu lɛ́ byɔ ɖɔ é ni wá xwedó we yì kúnnuɖegbé. Diego e nyí wɛnjlatɔ́ ɖé ɖò Brésil é ɖɔ: “Nɔví gegě nɔ byɔ mì ɖɔ nyi kpo emi kpo na zɔn ɖò sinsɛnzɔ́ ɔ mɛ. Ali ɖagbe hugǎn ɖé wɛ nyí enɛ, bo hun nú mì bonu má tuùn ye ganji. Ee mǐ nɔ ɖò azɔ̌ wà ɖó kpɔ́ wɛ é ɔ, un kplɔ́n nǔ gegě ɖò ye gɔ́n, bɔ enɛ zɔ́n bɔ un sɛkpɔ́ Jehovah kpo Jezu kpo d’eji.”

NƐ̌ MƐXO AGUN TƆN LƐ KA SIXU D’ALƆ GBƆN?

17. Nɛ̌ mɛxo agun tɔn lɛ ka sixu d’alɔ Biblu kplɔntɔ́ lɛ gbɔn?

¹⁷ Nɔ zán hwenu ɖó kpɔ́ xá Biblu kplɔntɔ́ lɛ. Mɛxo lɛ mi, enyi mi nɔ ɖè wanyiyi xlɛ́ Biblu kplɔntɔ́ lɛ, bɔ nǔ yetɔn nɔ lɛ́ ɖu ayi mɛ nú mi ɔ, mi sixu d’alɔ ye bɔ ye na yì nukɔn bo bló baptɛm. A ka na sixu kpéwú bo nɔ ɖɔ xó xá Biblu kplɔntɔ́ lɛ hwɛhwɛ ɖò kplé lɛ jí à? Enyi mi nɔ ylɔ́ nyikɔ yetɔn, taji ɔ, hwenu e ye ja xósin na gbé é ɔ, enɛ na zɔ́n bɔ ye na mɔ ɖɔ nǔ yetɔn nɔ ɖu ayi mɛ nú mi. Enyi wɛnjlatɔ́ ɖé ɖó Biblu kplɔnkplɔn ɖé ɔ, mi ka sixu nɔ ba hwenu bo nɔ kplá ɛ yì à? É sixu wà ɖagbe nú nǔkplɔntɔ́ ɔ tawun, hú lee a lin gbɔn é. Gbexosin-alijitɔ́ e nɔ nyí Jackie bo nɔ nɔ Nigéria é ɖɔ: “Enyi Biblu kplɔntɔ́ lɛ sè ɖɔ nɔví e kplá mì wá nǔkplɔnkplɔn yetɔn domɛ é nyí mɛxo agun tɔn ɖé ɔ, é nɔ kpaca ye mɛ gegě. Biblu kplɔntɔ́ ɖé ɖɔ: ‘Agungán cɛ na wà mɔ̌ gbeɖé ǎ. Dɔkunnɔ lɛ kɛɖɛ gɔ́n wɛ é nɔ yì, bɔ axɔ́ jɛn ye ka nɔ sú hwɛ̌!’” Biblu kplɔntɔ́ enɛ ko ɖò kplé lɛ wá wɛ dìn.

18. Nɛ̌ mɛxo agun tɔn lɛ ka sixu wà azɔ̌ e è sɔ́ dó así nú ye bɔ Mɛsɛ́dó 20:28 ɖɔ é gbɔn?

¹⁸ Nɔ kplɔ́n azɔ̌ Biblu kplɔntɔ́ lɛ, bo nɔ lɛ́ dó wusyɛn lanmɛ nú ye. Mɛxo agun tɔn lɛ mi, mi ɖó azɔ̌ kpinkpɛn ɖé bo na d’alɔ wɛnjlatɔ́ lɛ bɔ ye na nɔ ɖɔ Mawuxó, bo lɛ́ kplɔ́n nǔ mɛ ganji. (Xà Mɛsɛ́dó 20:28.) Enyi winnya ɖò mɛɖé hu wɛ, b’ɛ na kpé nukún dó Biblu kplɔnkplɔn ɖé wu, hwenu e a ɖò finɛ é hǔn, byɔ̌ ɛ ɖɔ emi na kpé nukún dó Biblu kplɔnkplɔn ɔ wu. Jackie e xó mǐ ɖɔ wá yì é ɖɔ: “Hwɛhwɛ wɛ mɛxo agun tɔn lɛ nɔ kan nǔ byɔ mì dó Biblu kplɔntɔ́ ce lɛ wu. Enyi un ɖò nukún kpé dó Biblu kplɔnkplɔn ɖé wu wɛ, bo wá jɛ wuvɛ̌ ɖé lɛ mɔ jí ɔ, ye nɔ ɖè wě tawun tawun lɛ xá mì.” Mɛxo agun tɔn lɛ sixu wà nǔ gegě dó dó wusyɛn lanmɛ nú Biblu kplɔnmɛtɔ́ lɛ. (1 Tɛ. 5:11) Jackie ɖɔ gɔ́ na ɖɔ: “Enyi mɛxo agun tɔn lɛ dó wusyɛn lanmɛ nú mì, bo ɖɔ nú mì ɖɔ azɔ̌ syɛnsyɛn e wà wɛ un ɖè é sù nukún emitɔn mɛ ɔ, é nɔ víví nú mì. Xó mɔ̌hun lɛ nɔ fá kɔ nú mì, bo nɔ cí sin fífá e è nɔ nu ɖò hwesivɔ mɛ é ɖɔhun. Mɛ kpikpa yetɔn lɛ zɔ́n bɔ jiɖe e un ɖó é jɛji, bɔ awǎjijɛ e un nɔ mɔ ɖò nǔ kplɔnkplɔn mɛ lɛ sín azɔ̌ ɔ mɛ é lɔ lɛ́ jɛji.”—Nǔx. 25:25.

19. Awǎjijɛ tɛ mǐ mɛ bǐ ka sixu mɔ?

¹⁹ Enyi mǐ ma tlɛ ɖò nukún kpé dó Biblu kplɔnkplɔn ɖé wu wɛ ɖò alɔnu dìn ǎ ɔ, mǐ hɛn ɔ, mǐ na d’alɔ mɛɖé b’ɛ na yì nukɔn ɖò gbigbɔ lixo. Enyi mǐ ma nɔ lɛ̀ xógle ǎ, bo ka sɔnǔ nú nǔ e ɖɔ gbé wɛ mǐ ja lɛ é ganji ɔ, mǐ sixu d’alɔ nǔkplɔnmɛtɔ́ ɔ ɖò Biblu kplɔnkplɔn ɖé hwenu. Mǐ sixu dó xɔ́ntɔn Biblu kplɔntɔ́ lɛ, hwenu e ye wá Kpléxɔ Axɔ́suɖuto ɔ tɔn mɛ é, bo lɛ́ sɔ́ kpɔ́ndéwú ɖagbe ɖ’ayǐ nú ye. Mɛxo agun tɔn lɛ sixu dó wusyɛn lanmɛ nú Biblu kplɔntɔ́ lɛ gbɔn hwenu zinzan ɖó kpɔ́ xá ye gblamɛ. Ye sixu lɛ́ dó wusyɛn lanmɛ nú Biblu kplɔnmɛtɔ́ lɛ gbɔn azɔ̌ kpinkplɔn ye kpo ye kpikpa kpo gblamɛ. Enyi mǐ sixu wà nǔɖe, é na bo tlɛ nyí nǔ kpɛví ɖé dó d’alɔ mɛɖé bonu é yí wǎn nú Jehovah lobo nɔ sɛn ɔ, enɛ nɔ dó awǎjijɛ nú mǐ tawun!