“Dìn ɔ, Un Yí Wǎn nú Sinsɛnzɔ́ Ɔ!”

UN BA AWǍJIJƐ CE KPO

É blawǔ ɖɔ hwenu e un byɔ winnyawinnya mɛ é ɔ, kancica syɛnsyɛn e un ɖó xá Jehovah é jɛ da vɔ́ jí. É cí ɖɔ wemaxɔmɛvígbɛ́ ce lɛ ɖibla ɖò yeɖée kannu bǐ mlɛ́mlɛ́ wɛ ɖɔhun, bɔ un nɔ lin ɖɔ nǔɖe ɖò wǔ ce dín wɛ. Un nɔ mɔ ɖɔ sɛ́n e mɛjitɔ́ ce lɛ dó lɛ é kpo nǔgbododó Klisanwun tɔn lɛ kpo kpɛn agban mɛ, bɔ nǔ gbigbɔ tɔn e mǐ nɔ wà lɛ é lɔ vɛwǔ dín. Nǔgbo wɛ ɖɔ un xò nǔ kpɔ́n ɖɔ Jehovah ka tíìn à jí gbeɖé ǎ, amɔ̌ un mɔ ɖɔ un kún sɔ́ vɛ́ kpo é kpo ó.

Un gɔn wɛnɖagbe ɔ jlá bǐ mlɛ́mlɛ́ ǎ, amɔ̌, hwenu e é jló mì dó é wɛ un nɔ yì. Nú un xwè Mawuxó ɖɔ gbé ɔ, un nɔ sɔnǔ gbeɖé ǎ, enɛ wu ɔ, xó ɖɔ ɖó kpɔ́ xá mɛ lɛ nɔ fá dó mì ɖebǔ ǎ. Wǎgbɔ tɔn ɔ, un sɔ́ ɖó mɛbakpɔ́n alǒ Biblu kplɔnkplɔn ɖě ǎ, un ka sɔ́ ɖó awǎjijɛ ɖě ɖò sinsɛnzɔ́ ɔ mɛ ǎ, bɔ enɛ zɔ́n bɔ un sɔ́ nɔ ba na jlá wɛnɖagbe ɔ ɖebǔ lɔ ǎ. Un nɔ kanbyɔ nyiɖée ɖɔ, ‘Nɛ̌ mɛɖé ka sixu wà éyɛ gbɔn ɖò aklunɔzán gbla lɛ bǐ mɛ, ɖò sun lɛ bǐ mɛ?’

Hwenu e un ɖó xwè 17 é ɔ, un jló na jɛ nyiɖée sí. Enɛ wu ɔ, un bɛ́ agban ce lɛ, bo tɔ́n sín xwégbe, bo yì jɛ Australie. É vɛ́ nú mɛjitɔ́ ce lɛ tawun hwenu e un sɛ̀ tɛn é. Ado ɖò ye hu wɛ, amɔ̌, ye mɔ ɖɔ nyi kún na jó Jehovah dó ɖó mɔ̌ wu ó.

Ee un yì Australie é ɔ, nǔ lɛ lɛ́ wá vántán bǐ ɖò gbigbɔ lixo. Vlafo wɛ un nɔ wá yì kplé lɛ. Un wá yì zun xɔ́ntɔn xá mɛ winnyawinnya ɖé lɛ, bɔ nyi ɖɔhun ɔ, ye nɔ ba na yì kplé gbadanu ɖé, bɔ ayihɔngbe tɔn ɔ, ye na yì nu ahan, lobo yì ɖúwe ɖò zǎnweɖutɛn ɖé. Nú un kpɔ́n gudo sɛ́dó ɔ, un nɔ mɔ ɖɔ, afɔ ce ɖě ɖò nǔgbo ɔ mɛ, bɔ ɖě ɖò gbɛ̀ ɔ mɛ; amɔ̌, nyiɖesu tuùn tɔ̀ e mɛ hwe ɖa wɛ un ɖè é ǎ.

NǓMAÐÓNUKÚN E KPLƆ́N NǓ TAJI ÐÉ MƐ É

Xwè we mɔ̌ gudo ɔ, un xò gò nɔví nyɔnu ɖé, bɔ mǐ nɔ kpɔ́ nú táan klewun ɖé, lobɔ ɖò manywɛ mɛ ɔ, é bló bɔ un jɛ tamɛ lin dó ali e gbɛzán ce mlɛ́ é jí jí. Nyi kpo nɔví nyɔnu tlɛnnɔ atɔ́ɔ́n kpo wɛ ɖò kpɔ́ ɖò xwé ɖokpo ɔ gbè, bɔ mǐ ylɔ́ nukúnkpénuwutɔ́ lɛdo tɔn mǐtɔn kpo asì tɔn Tamara kpo ɖɔ ye ni wá nɔ xwé mǐtɔn gbè nú aklunɔzán gbla ɖokpo. Hwenu e Tamara sín asú yì nukún kpé dó agunxó lɛ wu gbé é ɔ, é kpo mǐ mɛ e kpò lɛ é kpo nɔ kpɔ́ bo ɖɔ fanfún. É jɛji nú mì. Gbɛtɔ́ nú nɔ yawǔ blawǔ n’i, bɔ è sixu lɛ́ vo bo ɖɔ xó n’i. É jiwǔ nú mì tawun; un lin ɖɔ mɛ e xwetɛ́ ɖò gbigbɔ lixo mɔ̌ é, na ɖɔ fanfún sɔmɔ̌ kpɔ́n ǎ.

Akpakpa nɔ sɔ́ Tamara tawun. Wǎn e é yí nú nǔgbo ɔ kpo sinsɛnzɔ́ ɔ kpo é nɔ dɔn mɛ tawun. Xomɛ nɔ hun i tawun ɖɔ é na nǔ e wu é kpé é bǐ Jehovah. Nyɛ ka ɖó awǎjijɛ ǎ, ɖó kpoɖeji ɔ wɛ un nɔ na Jehovah. Jijɔ ɖagbe kpo awǎjijɛ adodwé kpo e é ɖó é wà ɖagbe nú mì tawun ɖò gbɛzán ce mɛ. Kpɔ́ndéwú tɔn zɔ́n bɔ un lin tamɛ dó nǔgbo taji elɔ jí: Jehovah nɔ jló ɖɔ mǐ bǐ ni sɛn emi “kpo xomɛhunhun kpo” “kpo awǎjijɛ kpo.”—Ðɛh. 100:2.

UN LƐ́ JƐ WǍN YÍ NÚ MAWUXÓÐIÐƆZƆ́ Ɔ JÍ

Un jló na ɖó awǎjijɛ e Tamara ɖó é ɖɔhun, amɔ̌, bo na dó ɖó awǎjijɛ enɛ ɔ, un ɖó na bló huzuhuzu ɖaxó ɖé lɛ. É nɔ byɔ hwenu. Amɔ̌, un wá jɛ afɔ lɛ ɖè jí kpɛɖé kpɛɖé. Un jɛ nǔ sɔ́ nú sinsɛnzɔ́ ɔ jí, bo nɔ nyí gbexosin-alijitɔ́ alɔgɔtɔ́ sín hweɖenu jɛ hweɖenu. Enɛ d’alɔ mì bɔ un sɔ́ nɔ mɔ akpɔ sɔmɔ̌ ǎ, bo nɔ lɛ́ ɖeji dó nyiɖée wu hugǎn. Ðó un jɛ Biblu zán jí hwɛhwɛ ɖò sinsɛnzɔ́ ɔ mɛ wutu ɔ, un ɖu vivǐ sinsɛnzɔ́ ɔ tɔn tawun. É lín ǎ bɔ sun lɛ bǐ mɛ ɔ, un nɔ nyí gbexosin-alijitɔ́ alɔgɔtɔ́.

Un jɛ xɔ́ntɔn zun xá mɛ e ɖó xwè vovo lɛ é jí; ye mɛ enɛ lɛ nɔ wà nǔ e wu ye kpé é bǐ nú Jehovah, lobo nɔ lɛ́ ɖu vivǐ sinsɛnzɔ́ yetɔn tɔn. Kpɔ́ndéwú ɖagbe yetɔn d’alɔ mì, bɔ un vɔ́ nǔ e nyí nǔjɔnǔ hugǎn nú mì lɛ é da kpɔ́n, bo lɛ́ sɔnǔ nú aca gbigbɔ tɔn ɖagbe ɖé. Un jɛ vivǐ sinsɛnzɔ́ ɔ tɔn ɖu jí d’eji, bɔ gudo mɛ ɔ, un huzu gbexosin-alijitɔ́ hwebǐnu tɔn ɖé. Azɔn nukɔntɔn ɔ nɛ ɖò xwè lɛ vlamɛ, bɔ un ɖó awǎjijɛ, bo lɛ́ mɔ ɖɔ un vo ɖò agun ɔ mɛ.

UN MƆ WEGƆ́ CE

Xwè ɖokpo gudo ɔ, un xò gò Alex; é nyɔ́ xomɛ, nɔ ɖɔ nǔgbo, bo lɛ́ yí wǎn nú Jehovah kpo sinsɛnzɔ́ ɔ kpo. Devízɔ́watɔ́ sinsɛnzɔ́wiwa tɔn ɖé wɛ n’i, b’ɛ ko ɖò gbexosin-alijitɔ́zɔ́ wà wɛ sín xwè ayizɛ́n ɖíe. Gɔ́ na ɔ, Alex ko wà sinsɛnzɔ́ ɖò fí e hudo sukpɔ́ ɖè ɖò Malawi é nú táan ɖé. É lɛ́ nɔ kpɔ́ xá mɛsɛ́dó ɖé lɛ ɖò dɔ̌n, bɔ ye nyí kpɔ́ndéwú ɖagbe ɖé n’i, bo lɛ́ dó wusyɛn lanmɛ n’i, bonu é na gbɛkan dó nǔ Axɔ́suɖuto ɔ tɔn lɛ sísɔ́ ɖó tɛn nukɔntɔn ɔ mɛ nu.

Ðò 2003 ɔ, nyi kpo Alex kpo wlí alɔ, bɔ sín hwenɛnu ɔ, mǐ ɖò sinsɛnzɔ́ hwebǐnu tɔn ɔ mɛ. Mǐ kplɔ́n nǔ ɖaaɖagbe gegě, bɔ Jehovah kɔn nyɔna dó mǐ jí, b’ɛ vɛ́ jlɛ́.

JEHOVAH LƐ́ KƆN NYƆNA DÓ MǏ JÍ D’EJI

Ðò 2009 ɔ, è byɔ mǐ ɖɔ mǐ ni yì wà mɛsɛ́dózɔ́ ɖò Timor Oriental; tò kpɛví ɖé wɛ ɖò tɔtɛntinto Indonésie tɔn lɛ mɛ. É jiwǔ nú mǐ tawun; akpakpa sɔ́ mǐ, bɔ xɛsi lɛ́ ɖi mǐ, nǔ enɛ lɛ bǐ wɛ wà mǐ zɛɛn. Sun atɔ́ɔ́n gudo ɔ, mǐ wá azinkan tò ɔ, é wɛ nyí Dili.

Tɛnsisɛ ɔ zɔ́n bɔ nǔ lɛ huzu tawun ɖò gbɛzán mǐtɔn mɛ hú ɖ’ayǐ tɔn. Mǐ ɖó na huzu sɔgbe xá aca yɔyɔ̌ lɛ, kplɔ́n gbè yɔyɔ̌, ɖu nǔɖuɖu yɔyɔ̌ lɛ, bo lɛ́ zán gbɛ̀ mɛ e ɖò xá ɔ mɛ lɛ é ɖɔhun. Ðò sinsɛnzɔ́ ɔ mɛ ɔ, hwɛhwɛ wɛ è nɔ xò gò yatɔ́nɔ klókló lɛ, vlafo wɛ ye nɔ yì wemaxɔmɛ, bɔ è nɔ lɛ́ gbidí kɔ nú ye. Mǐ nɔ xò gò mɛ gegě, bɔ ye nɔ sè wuvɛ̌ ɖò agbaza kpo lee nǔ nɔ cí nú mɛ é kpo linu ɖó ahwan kpo dakaxomɛwu kpo wu.a

Sinsɛnzɔ́ ɔ vivǐ kpɔ́n! Ði kpɔ́ndéwú ɔ, gbè ɖokpo ɔ, un xò gò ɖyɔvǐ xwè 13 mɛví e nɔ nyí Maria é.b Nɔ tɔn kú xwè ɖé lɛ ɖíe, bɔ vlafo wɛ é nɔ mɔ tɔ́ tɔn, ɖó ye nɔ nɔ kpɔ́ ǎ wutu. Gbɛ̌ tɔn jí lɛ gegě ɖɔhun ɔ, Maria tuùn nǔ e é na wà ɖò gbɛzán tɔn mɛ é ǎ. Un flín ɖɔ gbè ɖokpo ɔ, é y’avǐ hwenu e é ɖò lee nǔ cí n’i é ɖɔ nú mì wɛ é. Un mɔ nǔ jɛ nǔ e ɖɔ wɛ é ɖè é ɖě mɛ ǎ, ɖó hwenɛnu ɔ, un sixu dó gbè tɔn ganji ǎ. Un xoɖɛ sɛ́dó Jehovah ɖɔ é ni d’alɔ mì nú má dó wusyɛn lanmɛ n’i, bɔ enɛ gudo ɔ, un jɛ wemafɔ e nɔ dó gbɔ nú mɛ lɛ é xà n’i jí. Xwè klewun ɖé gudo ɔ, un mɔ bɔ nǔgbo ɔ ɖyɔ nǔwalɔ Maria tɔn lɛ kpo gbɛzán tɔn kpo bǐ. É ko bló baptɛm, bɔ dìn ɔ, é nɔ kpé nukún dó Biblu kplɔnkplɔn éɖesunɔ tɔn lɛ wu. Éhɔnmɛ ɔ, Maria ɖó xwédo gbigbɔ tɔn ɖaxó ɖé, bo nɔ mɔ ɖɔ è yí wǎn nú emi.

Jehovah ɖò nyɔna kɔn dó azɔ̌ ɔ jí wɛ ɖò Timor Oriental. Ðò xwè wǒ e wá yì lɛ é vlamɛ kpowun ɔ, wɛnjlatɔ́ gegě wɛ bló baptɛm, bɔ ye mɛ gegě nyí gbexosin-alijitɔ́, devízɔ́watɔ́ sinsɛnzɔ́wiwa tɔn, alǒ mɛxo agun tɔn. Mɛ ɖevo lɛ nɔ wà azɔ̌ ɖò azɔ̌xɔsa lilɛdógbeɖevomɛ tɔn e ma ɖò Betɛli ǎ é, bo nɔ d’alɔ bonu è na lilɛ wema jinjɔn Biblu jí lɛ dó gbè xá ɔ mɛ tɔn lɛ mɛ. Enyi un sè bɔ ye ɖò han jí wɛ ɖò kplé lɛ jí, bo mɔ bɔ ye ɖò nǔ ko wɛ, bo lɛ́ ɖò nukɔn yì wɛ ɖò gbigbɔ lixo ɔ, xomɛ nɔ hun mì tawun.

UN SIXU LIN GBEÐÉ ÐƆ UN NA ÐÓ AWǍJIJƐ ÐÒ GBƐZÁN CE MƐ LĚ Ǎ

Lee è nɔ zán gbɛ̀ gbɔn ɖò Timor Oriental é gbɔn vo tawun nú lee è nɔ zán gbɛ̀ gbɔn ɖò Australie é, amɔ̌, un lin gbeɖé ɖɔ é na vivǐ sɔ lě ǎ. Hweɖelɛnu ɔ, mɔ̌to kpɛví ɖé wɛ mǐ nɔ dó bɔ gbɛtɔ́ nɔ gɔ́ mɛ, bɔ hweví xúxú kpo mǎgbán e è xɔ ɖò axi ayǐ ɔ jí tɔn mɛ lɛ é kpo nɔ gɔ́ mɔ̌to ɔ mɛ. Azǎn ɖé lɛ jí ɔ, mǐ nɔ yì kplɔ́n Biblu xá mɛɖé ɖò xwé kpɛví ɖé gbè, bɔ xwé ɔ nɔ hun myɔ gáɖágáɖá bɔ kɔ́xo ɔ ta bǐ nɔ kwiji, lobɔ kokló lɛ nɔ ɖò lɛlɛ̌ wɛ. Wuvɛ̌ lɛ ɖò finɛ có, hwɛhwɛ wɛ un nɔ ɖɔ nú nyiɖée ɖɔ, ‘Gbɛ̀ elɔ jiwǔ mɛ nya!’

Enyi un dó nukún nǔ e jɛ wá yì ɖò gbɛzán ce mɛ lɛ é mɛ kpɔ́n ɔ, é nɔ sù nukún ce mɛ tawun ɖɔ mɛjitɔ́ ce lɛ wà nǔ e wu ye kpé é bǐ bo xlɛ́ mì nǔgbo li ɔ, lobo lɛ́ nɔ gudo nú mì, é na bo tlɛ nyí ɖò winnyawinnyaxwe ce sín hwenu vɛwǔ lɛ mɛ ɔ nɛ. Xó e ɖò Nǔnywɛxó 22:6 mɛ lɛ é nyí nǔgbo ɖò ninɔmɛ ce mɛ. Mamáa ce kpo papa ce kpo nɔ gó tawun dó nyi kpo Alex kpo wu; xomɛ nɔ hun ye ɖɔ mǐ ɖò Jehovah sɛn wɛ. Sín 2016 ɔ, mǐ ɖò nukúnkpénuwutɔ́ sín azɔ̌ wà gbɔn fí ɖěɖee wu alaxɔ Australasie tɔn nɔ kpé nukún dó lɛ é wɛ.

É nɔ kpaca mì dìn tawun ɖɔ hweɖenu wá yì ɔ, un kún yí wǎn nú sinsɛnzɔ́ ɔ ó. Dìn ɔ, un yí wǎn nú sinsɛnzɔ́ ɔ. Un wá mɔ nǔ jɛ wu ɖɔ nǔ ɖebǔ na bo tlɛ ɖò jijɛ wɛ ɖò gbɛzán mǐtɔn mɛ ɔ, Mawu jɛn è sixu sɛn kpo ayi bǐ kpo cobo mɔ awǎjijɛ jɔ awǎjijɛ ɔ. Na ɖɔ xó jɔ xó ɔ, un sixu wɔn xwè 18 e wá yì bɔ nyi kpo Alex kpo zán dó sɛn Jehovah na lɛ é gbeɖé ǎ. Dìn ɔ, un mɔ nǔ jɛ lě dò xó e ɖɛhanwlantɔ́ Davidi ɖɔ é nyí nǔgbo sɔ é wu; é ɖɔ: “Mɛ e hɔn wá sù we lɛ bǐ na nɔ j’awǎ, xomɛ na nɔ ɖò ye hun wɛ tɛgbɛ. . . . Mɛ e yí wǎn nú nyikɔ towe lɛ na nɔ hun xomɛ dó hwi wu.”—Ðɛh. 5:12.