Mawu E Sɛn Wɛ Mǐ ɖè É ‘Nɔ Kú Nǔblawu nú Mɛ Tawun’

1. Enyi è ɖɔ mɛɖé nyí nǔblawukúnúmɛtɔ́ ɔ, etɛ lɛ ka sixu wá ayi mǐtɔn mɛ?

ENYI è ɖɔ mɛɖé nyí nǔblawukúnúmɛtɔ́ ɔ, ayi mǐtɔn nɔ yawǔ yì mɛ e nɔ nyɔ́ xomɛ, sè wuvɛ̌ xá mɛ, bo nɔ lɛ́ hun alɔ dó na nǔ mɛ é ɖé jí. Tan e Jezu kpi dó Samalíinu nɔzo ɖagbe ɔ wu é lɔ sixu wá ayi mɛ nú mǐ. Nya enɛ e gosin akɔta ɖevo mɛ é “kú nǔblawu” nú Jwifu e jɛ ajotɔ́ lɛ sín alɔ mɛ é ɖé. Nya Jwifu e gblewǔ é sín nǔ blawǔ nú Samalíinu ɔ, b’ɛ kpé nukún wǔ tɔn kpo wanyiyi kpo. (Luk. 10:29-37) Nǔjlɛdonǔwu enɛ ɖè jijɔ ɖaaɖagbe Mawu mǐtɔn tɔn ɖé xlɛ́, enɛ wɛ nyí nǔblawukúnúmɛ. Wǎn e é yí nú mǐ é wu wɛ zɔ́n bɔ é nɔ kú nǔblawu nú mǐ, bɔ ali gegě nu wɛ é nɔ lɛ́ kú nǔblawu nú mǐ ɖè ayihɔngbe ayihɔngbe.

2. Ali ɖevo tɛ nu è ka sixu ɖexlɛ́ ɖɔ è nɔ kú nǔblawu nú mɛ ɖè?

² Mɛɖé sixu nɔ lɛ́ ɖexlɛ́ ɖò ali ɖevo nu ɖɔ emi nɔ kú nǔblawu nú mɛ. Enyi é tlɛ ɖó hwɛjijɔ e wu é na dɔn tó nú mɛ é ɔ, é sixu wá gbeta ɔ kɔn ɖɔ emi kún na wà mɔ̌ ó. Ðò ali enɛ nu ɔ, é ɖò gaan ɖɔ Jehovah ɖexlɛ́ ɖɔ emi kú nǔblawu nú mǐ tawun. Ðɛhanwlantɔ́ ɔ ɖɔ: “É nɔ kpɔ́n dó hwɛ e mǐ hu é wu, bo nɔ wà nǔ tɔn xá mǐ ǎ.” (Ðɛh. 103:10) Amɔ̌, ɖò ninɔmɛ ɖevo lɛ mɛ ɔ, Jehovah sixu dɔn tó nú mɛ e hu hwɛ é ɖé dó nǔjɔnǔ mɛ.

3. Nǔkanbyɔ tɛ lɛ jí mǐ ka na ɖɔ xó dó?

³ Ðò xóta elɔ mɛ ɔ, mǐ na ɖɔ xó dó nǔkanbyɔ atɔn jí: Etɛwu Jehovah ka nɔ kú nǔblawu nú mǐ? Kancica ɖé ka ɖò tódɔnnúmɛ syɛnsyɛn kpo nǔblawukúnúmɛ kpo tɛntin à? Etɛ ka sixu d’alɔ mǐ bɔ mǐ na nɔ kú nǔblawu nú mɛ? Mi nú mǐ ni kpɔ́n lee Xó Mawu tɔn na xósin nú nǔkanbyɔ enɛ lɛ gbɔn é.

NǓ E WU JEHOVAH NƆ KÚ NǓBLAWU NÚ MƐ É

4. Etɛwu Jehovah ka nɔ kú nǔblawu nú mɛ?

⁴ Jehovah nɔ ba na kú nǔblawu nú mɛ. Mɛsɛ́dó Pɔlu wlán ɖɔ “xomɛnyínyɔ́ Mawu tɔn d’agba.” Nǔ e lɛlɛ̌ dó wemafɔ ɔ lɛ é xlɛ́ ɖɔ tintinmɛ wɛ Pɔlu ɖè ɖɔ Mawu nyí nǔblawukúnúmɛtɔ́, ɖó é bló bɔ mɛ yí ami dó ɖè ɖěɖee nyí hwɛhutɔ́ lɛ é ɖó nukúnɖiɖó jixwé tɔn. (Efɛ. 2:4-7) Amɔ̌, nǔblawukúnúmɛ Jehovah tɔn tlɛ lɛ́ gbló ada hú mɔ̌. Ðɛhanwlantɔ́ Davidi wlán ɖɔ: “Jehovah nyɔ́ nú mɛ bǐ, nǔblawukúnúmɛ tɔn nɔ jɛ wě ɖò nǔ e é bló lɛ é bǐ mɛ.” (Ðɛh. 145:9, nwt) Ðó Jehovah yí wǎn nú gbɛtɔ́ lɛ wutu ɔ, é nɔ kú nǔblawu nú ye hweɖebǔnu e é ɖó hwɛjijɔ e wu é na wà mɔ̌ é é.

5. Nɛ̌ Jezu ka wà gbɔn bo tuùn ɖɔ Jehovah nɔ kú nǔblawu nú mɛ?

⁵ Jezu tuùn lě dò Jehovah nɔ kú nǔblawu nú mɛ gbɔn é hú mɛ ɖevo ɖebǔ. Jehovah kpo Jezu kpo ko nɔ kpɔ́ ɖò jixwé nú xwè afatɔ́n mɔ̌kpan cobɔ Jezu wá ayikúngban jí. (Nǔx. 8:30, 31) Ðò ninɔmɛ gegě mɛ ɔ, Jezu mɔ lee Tɔ́ tɔn nɔ kú nǔblawu nú gbɛtɔ́ hwɛhutɔ́ lɛ gbɔn é. (Ðɛh. 78:37-42) Hwenu e Jezu nɔ ɖò nǔ kplɔ́n mɛ lɛ wɛ é ɔ, hwɛhwɛ wɛ é nɔ tɛɖɛ̌ jijɔ ɖaaɖagbe Tɔ́ tɔn tɔn enɛ jí.

6. Lǒ tɛ Jezu ka dó dó d’alɔ mǐ bɔ mǐ mɔ nǔ jɛ nǔblawukúnúmɛ Tɔ́ tɔn tɔn wu?

⁶ Lee mǐ ko ɖɔ gbɔn ɖò xóta e wá yì é mɛ é ɔ, Jezu dó lǒ dó vǐ ɖuvanɔ ɔ wu bo na dó d’alɔ mǐ bonu mǐ na mɔ nǔ jɛ lě dò Jehovah nɔ ba na kú nǔblawu nú mɛ sɔ é wu. Vǐ ɔ gosin xwégbe, “bo zán nǔ tɔn lɛ dó akpa mɛ.” (Luk. 15:13) Nukɔnmɛ ɔ, é jó gbɛ̀ gblégblé e zán wɛ é ɖè é dó, bo sɔ́ éɖée hwe, lobo lɛkɔ wá xwégbe. Nɛ̌ tɔ́ tɔn ka wà nǔ gbɔn? Jezu ɖɔ: “Hwenu e [vǐ ɔ] ɖò zɔ jawě ɔ, tɔ́ tɔn mɔ ɛ sɛ́dó, bɔ nǔ tɔn blawǔ n’i, bɔ é bɛ́ wezun, bo yì zunfan ɛ, bo kísi n’i.” Tɔ́ ɔ dó winnya vǐ tɔn ǎ. É nyɔ́ wà ɔ, afɔjiafɔji ɔ, é kú nǔblawu n’i gbɔn hwɛ e é sɔ́ kɛ ɛ é kpo yǐ e é yí i dó xwégbe é kpo gblamɛ. Vǐ ɖuvanɔ ɔ hu hwɛ syɛnsyɛn, amɔ̌, ɖó é lɛkɔ sín hwɛ tɔn lɛ gudo wutu ɔ, tɔ́ tɔn sɔ́ hwɛ kɛ ɛ. Jehovah wɛ tɔ́ nǔblawukúnúmɛtɔ́ e xó lǒ ɔ ɖɔ é nɔte na. Jezu gbɔn lǒ enɛ e byɔ lanmɛ nú mɛ tawun é sín yɛkan mɛ dó xlɛ́ ɖɔ Jehovah ba na sɔ́ hwɛ kɛ hwɛhutɔ́ ɖěɖee lɛkɔ sín hwɛ yetɔn lɛ gudo nǔgbo nǔgbo lɛ é.—Luk. 15:17-24.

7. Nɛ̌ lee Jehovah nɔ kú nǔblawu nú mǐ gbɔn é ka xlɛ́ ɖɔ é nyɔ́nǔi tawun gbɔn?

⁷ Jehovah nɔ kú nǔblawu nú mɛ ɖó nǔnywɛ tɔn d’agba tawun wutu. Hwebǐnu wɛ Jehovah nɔ wá gbeta ɖěɖee na wà ɖagbe nú nǔɖiɖó tɔn lɛ é kɔn. Biblu ɖɔ ɖɔ “nǔnywɛ e gosin Mawu gɔ́n ɔ,” nɔ “nyɔ́ xomɛ ɖesu, bo nɔ wà nǔ ɖagbe lɛ.” (Ja. 3:17) Tɔ́ wanyiyinɔ ɖé ɖɔhun ɔ, Jehovah nɔ tuùn ɖɔ nǔblawu e emi nɔ kú nú vǐ emitɔn lɛ é nɔ wà ɖagbe nú ye. (Ðɛh. 103:13; Eza. 49:15) Ye nyí hwɛhutɔ́ có, nǔblawu e Mawu nɔ kú nú ye é zɔ́n bɔ ye ɖó nukúnɖiɖó. Enɛ wu ɔ, nǔblawukúnúmɛ Jehovah tɔn e ma ɖó dogbó ǎ é nɔ sísɛ́ ɛ, b’ɛ nɔ kú nǔblawu nú mɛ hweɖebǔnu e é ɖó hwɛjijɔ e wu é na wà mɔ̌ é. Amɔ̌, ɖò hwe ɖokpo ɔ nu ɔ, nǔblawukúnúmɛ Jehovah tɔn lɛ́ ɖó dogbó. Nǔnywɛtɔ́ e é nyí é zɔ́n bɔ é nɔ kú nǔblawu nú mɛ gbeɖé bo na dó myɔ́ nukún dó hwɛhuhu ǎ.

8. Etɛ é ka ɖò dandan ɖɔ è ni wà hweɖelɛnu? Etɛwu?

⁸ Mǐ ni ɖɔ ɖɔ Mawu sɛntɔ́ ɖé wá gbeta ɔ kɔn bo na zán gbɛ̀ bliblí. Etɛ mǐ ka ɖó na wà? Mawu sɔ́ d’ayi mɛ nú Pɔlu b’ɛ wlán ɖɔ: “Mi ni ma kpé nǔ ɖebǔ xá mɛ” mɔ̌hun ó. (1 Kɔ. 5:11) È nɔ ɖè hwɛhutɔ́ ɖěɖee gbɛ́ kɔ lɛ́ sín hwɛ yetɔn lɛ gudo lɛ é sín agun ɔ mɛ. É ɖò dandan ɖɔ è ni wà mɔ̌, bo na dó cyɔn alɔ nɔví sunnu kpo nɔví nyɔnu kpo mǐtɔn e ɖò gbeji lɛ é jí, lobo lɛ́ ɖè Mɛ mímɛ́ e Jehovah nyí é xlɛ́. Amɔ̌, mɛɖé lɛ sixu lin ɖɔ enyi è ɖè mɛɖé sín agun mɛ ɔ, Mawu kún kú nǔblawu n’i ó wɛ zɔ́n. Nǔgbo jɛn wɛ à? Mi nú mǐ ni kpɔ́n.

MƐ ÐIÐE SÍN AGUN MƐ Ɔ, NǓBLAWUKÚNÚMƐ SÍN NǓ JƐN É NYÍ À?

9-10. Sɔgbe xá Eblée lɛ 12:5, 6 ɔ, etɛwu mǐ ka sixu ɖɔ ɖɔ mɛ ɖiɖe sín agun mɛ nyí tuto nǔblawukúnúmɛ tɔn ɖé? Jlɛ̌ dó nǔɖe wu.

⁹ Enyi è xwlé ɖɔnúese ɖé mɛ ɖò kplé jí, bɔ mǐ sè ɖɔ mɛvívɛ́ mǐtɔn ɖé “kún sɔ́ nyí ɖokpo ɖò Kúnnuɖetɔ́ Jehovah tɔn lɛ mɛ” ó ɔ, wǔ nɔ kú mǐ tawun. Mǐ sixu nɔ kanbyɔ mǐɖée ɖɔ dandan jɛn è na ɖè è sín agun mɛ à jí. Mɛ ɖiɖe sín agun mɛ ɔ, nǔblawukúnúmɛ sín nǔ jɛn é nyí dóo à? Ɛɛn, ganji! Enyi é byɔ ɖɔ è ni dɔn tó nú mɛɖé hǔn, nǔnywɛnú wɛ é nyí, bɔ enɛ nɔ lɛ́ xlɛ́ ɖɔ è kú nǔblawu nú mɛ ɔ, bo lɛ́ yí wǎn n’i. (Nǔx. 13:24) Ðè e è ɖè mɛɖé sín agun mɛ é ka sixu d’alɔ ɛ, b’ɛ na huzu, bo lɛkɔ sín hwɛ tɔn lɛ gudo à? Nǔ sixu nyí mɔ̌. Mɛ ɖěɖee ko hu hwɛ syɛnsyɛn wá yì lɛ é gegě ɖɔ ɖɔ ɖè e è ɖè emi sín agun mɛ é d’alɔ emi bɔ emi mɔ ɖɔ hwɛ e emi hu é syɛn tawun; enɛ zɔ́n bɔ emi lɛkɔ sín hwɛ emitɔn lɛ gudo, bo huzu nǔwalɔ emitɔn lɛ, lobo lɛkɔ wá Jehovah gɔ́n.—Xà Eblée lɛ 12:5, 6.

¹⁰ Nǔjlɛdonǔwu ɖé ɖíe. Lɛngbɔ̌nyitɔ́ ɖé ɖ’ayi wu ɖɔ lɛngbɔ̌ emitɔn lɛ ɖokpo ɖò azɔn jɛ wɛ. É tuùn ɖɔ nukún kpíkpé dó azɔn alɔkpa enɛ wu na byɔ ɖɔ emi ni sɔ́ lɛngbɔ̌ enɛ ɖó vo nú lɛngbɔ̌ e kpò lɛ é. Amɔ̌, lɛngbɔ̌ lɛ nɔ ba na jó yeɖée dó ǎ. Ye nɔ ba na nɔ kpɔ́ kpo gbɛ̌ yetɔn lɛ kpo, bɔ enyi è sɔ́ ye ɖó vo ɔ, ye sixu jɛ mlámlá sún jí. Mlámlá e sún wɛ lɛngbɔ̌ ɖé ɖè é ka xlɛ́ ɖɔ zɔ e lɛngbɔ̌nyitɔ́ ɔ sɔ́ ɛ ɖó é ɔ, adaka wɛ é xò wǔ tɔn à? Ðebǔ ǎ! É tuùn ɖɔ enyi emi jó lɛngbɔ̌ e ɖò azɔn jɛ wɛ é dó bonu é nɔ kpɔ́ kpo lɛngbɔ̌ e kpò lɛ é kpo ɔ, mɛ ɖě lɛ lɔ na bɛ́ azɔn. Alɔ cyɔn lɛngbɔ̌kpó ɔ bǐ jí wɛ é ɖè bo dó sɔ́ lɛngbɔ̌ e ɖò azɔn jɛ wɛ é ɖó zɔ.—Sɔ́ jlɛ́ dó Levíi ví lɛ 13:3, 4 wu.

11. (a) Ali tɛ lɛ nu mɛ e è ɖè sín agun mɛ é ɖé ka cí lɛngbɔ̌ e ɖò azɔn jɛ wɛ é ɖé ɖɔhun ɖè? (b) Nǔ tɛ lɛ mɛ e è ɖè sín agun mɛ é ɖé ka sixu wà? Alɔ tɛ è ka sixu dó è?

¹¹ Mǐ sixu sɔ́ Klisanwun e è ɖè sín agun mɛ é ɖé jlɛ́ dó lɛngbɔ̌ e ɖò azɔn jɛ wɛ é ɖé wu. É ɖò azɔn jɛ wɛ ɖò gbigbɔ lixo. (Ja. 5:14) Azɔn e è sixu sɔ́ lɛ é ɖɔhun ɔ, mɛ e ɖò azɔn jɛ wɛ ɖò gbigbɔ lixo é lɔ sixu d’azɔn mɛ ɖevo lɛ. Enɛ wu ɔ, é ɖò dandan ɖɔ ɖò ninɔmɛ ɖé lɛ mɛ ɔ, è ni sɛ̀ mɛ e ɖò azɔn jɛ wɛ ɖò gbigbɔ lixo é ɖé dó zɔ nú mɛ ɖevo e kpò ɖò agun ɔ mɛ lɛ é. Tódɔnnúmɛ enɛ ɔ, wǎn e Jehovah yí nú mɛ ɖěɖee ɖò gbeji ɖò agun ɔ mɛ lɛ é sín xlɛ̌ wɛ; é sixu d’alɔ hwɛhutɔ́ ɔ bɔ é na mɔ lee nǔ e é wà é nyla sɔ é, bo lɛkɔ sín hwɛ tɔn lɛ gudo. Enyi è ɖè mɛɖé sín agun mɛ ɔ, mɛ ɔ sixu kpò ɖò kplé lɛ yì wɛ, bo na dó mɔ nǔ ɖu ɖò gbigbɔ lixo, bo lɛ́ bló bɔ nǔɖiɖi tɔn lidǒ. É sixu nɔ yí wema lɛ, bo nɔ xà lobo nɔ lɛ́ kplɔ́n; é sixu nɔ lɛ́ kpɔ́n tuto Televiziɔn JW^® tɔn tɔn lɛ. Gɔ́ na ɔ, enyi mɛxo agun tɔn lɛ mɔ ɖɔ é ɖò huzuhuzu lɛ bló wɛ ɔ, ye sixu nɔ ɖè wě xá ɛ sín hweɖenu jɛ hweɖenu, bo na dó d’alɔ ɛ bonu é na ɖó kancica ɖagbe ɖé xá Jehovah; enɛ na zɔ́n bɔ è sixu yí i d’agun mɛ, bɔ é na lɛ́ huzu Kúnnuɖetɔ́ Jehovah tɔn.b

12. Etɛ mɛxo agun tɔn lɛ ka sixu wà nú hwɛhutɔ́ e gbɛ́ kɔ lɛ́ sín hwɛ tɔn lɛ gudo é ɖé dó xlɛ́ ɖɔ emi yí wǎn n’i, bo lɛ́ kú nǔblawu n’i?

¹² É ɖò taji ɖɔ è ni flín ɖɔ mɛ ɖěɖee gbɛ́ kɔ lɛ́ sín hwɛ yetɔn lɛ gudo lɛ é kɛɖɛ jɛn è nɔ ɖè sín agun mɛ. Mɛxo agun tɔn lɛ tuùn ɖɔ emi ɖó na lin tamɛ dó nǔjɔnǔ mɛ cobo wá gbeta ɔ kɔn ɖɔ è na ɖè mɛɖé sín agun mɛ. Ye tuùn ɖɔ Jehovah nɔ dɔn tó nú mɛ “lee é jɛxa gbɔn é.” (Jel. 30:11) Ye yí wǎn nú nɔví yetɔn e ɖò agun ɔ mɛ lɛ é bǐ, bo nɔ jló na wà nǔ ɖebǔ e na wà nǔ dó ye wu ɖò gbigbɔ lixo é ǎ. Amɔ̌, hweɖelɛnu ɔ, wanyiyi kpo nǔblawukúnúmɛ kpo nɔ sísɛ́ ye bɔ ye nɔ ɖè nǔnyanyawatɔ́ ɖé sín agun mɛ nú táan ɖé.

13. Etɛwu é ka byɔ ɖɔ è ni ɖè Klisanwun ɖé sín agun mɛ ɖò Kɔlɛnti?

¹³ Ð’ayi lee mɛsɛ́dó Pɔlu wà nǔ xá hwɛhutɔ́ e gbɛ́ kɔ lɛ́ sín hwɛ tɔn lɛ gudo é ɖé gbɔn, ɖò xwè kanweko nukɔntɔn ɔ mɛ é wu. Klisanwun ɖé ɖò Kɔlɛnti, bo nɔ ɖóxó xá tɔ́ tɔn sín asì. É xyɔwǔ tawun! Pɔlu tuùn ɖɔ Jehovah ɖɔ xó elɔ lɛ nú Izlayɛli-ví hwexónu tɔn lɛ: “Nú sunnu ɖé ba tɔ́ tɔn sín asì ɔ, wi wɛ é kɔ́n nú tɔ́ tɔn. È ɖó na hu sunnu ɔ kpo nyɔnu ɔ kpo dandan.” (Lev. 20:11) É ɖò gaan ɖɔ Pɔlu kún sixu ɖegbe ɖɔ è ni ɖó kúhwɛ́ nú nya ɔ ó. Amɔ̌, é ɖɔ nú Kɔlɛntinu lɛ ɖɔ ye ni ɖè è sín agun ɔ mɛ. Gbɛ̀ bliblí e nya enɛ nɔ zán é wà nǔ dó mɛ ɖevo e ɖò agun ɔ mɛ lɛ é wu, bɔ ye mɛ ɖé lɛ tlɛ sɔ́ nɔ mɔ ɖɔ hwɛ syɛnsyɛn wɛ é hu ǎ!—1 Kɔ. 5:1, 2, 12, 13.

14. Nɛ̌ Pɔlu ka kú nǔblawu nú nya e è ɖè sín agun mɛ ɖò Kɔlɛnti é gbɔn? Etɛwu? (2 Kɔlɛntinu lɛ 2:5-8, 11)

¹⁴ Táan ɖé gudo ɔ, Pɔlu sè ɖɔ nya ɔ bló huzuhuzu taji lɛ. É lɛkɔ sín hwɛ tɔn lɛ gudo nǔgbo! Nya ɔ kɔn cí dó agun ɔ wu có, Pɔlu ɖɔ nú mɛxo agun tɔn lɛ ɖɔ emi ba ɖɔ ye ni ma “dó atɔ́ɔ́n nú jí,” alǒ hɛn xó ɔ gángángán ó. É ɖɔ nú ye ɖɔ: “Mi gbɔ bo sɔ́ hwɛ kɛ ɛ, bo dó gbɔ n’i.” Ð’ayi nǔ e wu Pɔlu ɖɔ ɖɔ ye ɖó na wà mɔ̌ é wu: “Bonu é ma yì jɛ aluwɛ ɖaxó ɖé mɛ, bo na mɔ ɖɔ nǔ bǐ ko vɔ ó.” Pɔlu kú nǔblawu nú nya e lɛkɔ sín hwɛ tɔn lɛ gudo é. Mɛsɛ́dó ɔ ba ɖɔ aluwɛ e mɛ nya ɔ ɖè, ɖó nǔ e é wà nyi dò é wutu é ni ɖi bǔ i kaka bonu é gɔn hwɛsɔ́kɛmɛ ba ǎ.—Xà 2 Kɔlɛntinu lɛ 2:5-8, 11.

15. Nɛ̌ mɛxo agun tɔn lɛ ka sixu nɔ dɔn tó nú mɛ, bo nɔ lɛ́ kú nǔblawu nú mɛ ɖò hwe ɖokpo ɔ nu gbɔn?

¹⁵ Jehovah ɖɔhun ɔ, mɛxo agun tɔn lɛ nɔ ba na kú nǔblawu nú mɛ. Enyi é ɖò dandan ɖɔ è ni dɔn tó nú nǔnyanyawatɔ́ ɖé syɛnsyɛn ɔ, ye nɔ wà mɔ̌; amɔ̌, enyi é nyɔ́ bló bɔ ye ɖó hwɛjijɔ e jí ye na zɔn dó dó kú nǔblawu n’i é ɔ, ye nɔ lɛ́ wà mɔ̌. Enyi é ka byɔ ɖɔ ye ni dɔn tó n’i bɔ ye ma wà mɔ̌ ǎ hǔn, ye kú nǔblawu n’i ǎ, nukún kpɛví sɔ́ dó kpɔ́n hwɛ e é hu é wɛ ye ɖè nɛ. Amɔ̌, mɛxo agun tɔn lɛ kɛɖɛ wɛ ɖó na nɔ kú nǔblawu nú mɛ à?

ETƐ KA SIXU D’ALƆ MǏ BƆ MǏ NA NƆ KÚ NǓBLAWU NÚ MƐ?

16. Sɔgbe xá Nǔnywɛxó 21:13 ɔ, nɛ̌ Jehovah ka na wà nǔ xá mɛ ɖěɖee ma nɔ kú nǔblawu nú mɛ ǎ lɛ é gbɔn?

¹⁶ Klisanwun lɛ bǐ wɛ nɔ ba na kú nǔblawu nú mɛ Jehovah ɖɔhun. Etɛwu? Hwɛjijɔ e wu wɛ é ɖokpo wɛ nyí ɖɔ, enyi mɛɖé ma nɔ kú nǔblawu nú mɛ ɖevo lɛ ǎ ɔ, Jehovah na ɖótó è ǎ. (Xà Nǔnywɛxó 21:13.) Mǐ mɛ ɖebǔ ba ɖɔ Jehovah ni gɔn tó ɖó ɖɛ mǐtɔn lɛ ǎ, enɛ wɛ zɔ́n bɔ mǐ nɔ ba na nɔ kú nǔblawu nú mɛ. Enyi Klisanwun hatɔ́ ɖé ɖò wuvɛ̌ mɛ, bo ɖò xó sú wɛ ɔ, mǐ nɔ dó tókúse mɛ ǎ. É nyɔ́ wà ɔ, mǐ nɔ ɖò gbesisɔmɛ hwebǐnu bo nɔ ɖótó ‘xó e sú wɛ lelenɔ ɖè é.’ Ðò ali ɖokpo ɔ nu ɔ, mǐ nɔ wà nǔ e wu mǐ kpé é bǐ bo nɔ zán nǔkplɔnmɛ e ɖò wemafɔ elɔ mɛ é: “Mɛ e ma kú nǔblawu nú mɛ ɖě lɛ ǎ ɔ, Mawu na kú nǔblawu n’i hwenu e è na ɖɔ hwɛ xá ɛ ɔ ǎ.” (Ja. 2:13) Enyi mǐ nɔ sɔ́ mǐɖée hwe, bo nɔ flín lě dò mǐ ɖó hudo nǔblawukúnúmɛ tɔn sɔ é ɔ, mǐ na ɖibla ɖexlɛ́ ɖɔ mǐ nɔ kú nǔblawu nú mɛ hugǎn. Taji ɔ, enyi nǔnyanyawatɔ́ e lɛkɔ sín hwɛ tɔn lɛ gudo é lɛkɔ wá agun ɔ mɛ ɔ, mǐ nɔ ba na kú nǔblawu n’i.

17. Nɛ̌ Axɔ́su Davidi ka xlɛ́ ɖɔ emi nɔ kú nǔblawu nú mɛ kpo ayi bǐ kpo gbɔn?

¹⁷ Kpɔ́ndéwú e ɖò Biblu mɛ lɛ é sixu d’alɔ mǐ bɔ mǐ na nɔ kú nǔblawu nú mɛ, bo na nɔ gɔn nukún syɛn. Ð’ayi kpɔ́ndéwú Axɔ́su Davidi tɔn wu. Hwɛhwɛ wɛ é nɔ kú nǔblawu nú mɛ kpo ayi bǐ kpo. Sawulu ɖò biba wɛ bo na hu i có, é kú nǔblawu nú axɔ́su e Mawu sɔ́ é. É ba hlɔn ǎ, é ka lɛ́ wà nǔ nyanya ɖé nú Sawulu kpɔ́n ǎ.—1 Sam. 24:9-12, 18, 19.

18-19. Ðɔ ninɔmɛ e mɛ Davidi ma kú nǔblawu nú mɛ ɖè ǎ é we.

¹⁸ É ɖò mɔ̌ có, é sù hweɖenu bɔ Davidi kú nǔblawu nú mɛ ǎ. Ði kpɔ́ndéwú ɔ, hwenu e Nabalu e nyí nya hunnylamɔ́nɔ ɖé é zun Davidi, bo lɛ́ gbɛ́ ɖɔ emi kún na na nǔɖuɖu é kpo mɛ tɔn lɛ kpo ó é ɔ, Davidi sin xomɛ, bo wá gbeta ɔ kɔn ɖɔ emi na hu Nabalu kpo mɛ tɔn lɛ bǐ kpo. Amɔ̌, Nabalu sín asì Abigayilu nyɔ́ xomɛ, bo lɛ́ ɖó suúlu, lobo yawǔ dó nǔɖuɖu sín agban yì jó nú Davidi, enɛ zɔ́n bɔ Davidi sɔ́ hu Nabalu kpo mɛ tɔn lɛ kpo ǎ.—1 Sam. 25:9-22, 32-35.

¹⁹ Ðò ninɔmɛ ɖevo mɛ ɔ, gbeyiɖɔ Natáan ɖɔ nya dɔkunnɔ e fin lɛngbɔ̌ vívɛ́ ɖé dó wamamɔnɔ ɖé é xó nú Davidi. Xomɛ sin Davidi kaka bɔ é ɖɔ: ‘Jehovah ɖò gbɛ̀. Nya e wà mɔ̌ ɔ, hu jɛn è na hu i.’ (2 Sam. 12:1-6) Davidi tuùn Mɔyizisɛ́n ɔ. Enyi mɛɖé fin lɛngbɔ̌ ɖokpo ɔ, é na na lɛngbɔ̌ ɛnɛ dó sú axɔ́ tɔn. (Tín. 21:37) Amɔ̌, è na ɖó kúhwɛ́ n’i wɛ à? Enyi è ɖɔ ajotɔ́ enɛ jɛxa kú ɔ, hwɛ e è ɖó n’i é syɛn dín. Natáan kpi tan enɛ bo na dó d’alɔ Davidi bonu é na mɔ nǔ jɛ wu ɖɔ hwɛ syɛnsyɛn wɛ emi hu. Jehovah kú nǔblawu nú Davidi tawun; Davidi ka ba na wà mɔ̌ nú ajotɔ́ e fin lɛngbɔ̌ bɔ Natáan ɖɔ ɖò nǔjlɛdonǔwu tɔn mɛ é ǎ!—2 Sam. 12:7-13.

20. Etɛ kpɔ́ndéwú Davidi tɔn ka sixu kplɔ́n mǐ?

²⁰ Hwenu e xomɛ sin Davidi tawun é ɔ, é wá gbeta ɔ kɔn ɖɔ emi na hu Nabalu kpo mɛ tɔn lɛ kpo. Gɔ́ na ɔ, nukɔnmɛ ɔ, Davidi lɛ́ ɖɔ ɖɔ nya dɔkunnɔ e xó Natáan ɖɔ ɖò lǒ tɔn mɛ é ɔ, hu wɛ è ɖó na hu i. Ðò kpɔ́ndéwú wegɔ́ ɔ mɛ ɔ, mǐ sixu kanbyɔ mǐɖée ɖɔ, aniwu Davidi e nyí nya xomɛnyɔtɔ́ ɖé é ka dá hwɛ syɛnsyɛn mɔ̌hun nú mɛ à jí. Lin tamɛ dó lee nǔ cí nú Davidi é jí. Hwe ɔ nu ɔ, Davidi sín ayi ɖò hwɛ ɖó n’i wɛ. Nú mɛɖé nɔ ɖó hwɛ nú mɛ ɖevo lɛ syɛnsyɛn hǔn, enɛ xlɛ́ ɖɔ é kún ɖó kancica ɖagbe ɖé xá Jehovah ó nɛ. Jezu gb’akpá nú ahwanvu tɔn lɛ syɛnsyɛn ɖɔ: “Mi ma ɖó hwɛ nú mɛɖé ó, enɛ ɔ, Mawu na ɖó hwɛ nú mi lɔmɔ̌ ǎ. Ðó lee mi nɔ ɖɔhwɛ xá mɛ gbɔn ɔ, mɔ̌ wɛ Mawu na ɖɔhwɛ xá mi lɔmɔ̌ gbɔn.” (Mat. 7:1, 2) Enɛ wu ɔ, mi nú mǐ ni wà nǔ e wu mǐ kpé é bǐ bo ma nɔ syɛn nukún dó mɛɖé wu ó, loɔ, mǐ ni nɔ ‘nyɔ́ xomɛ’ alǒ kú nǔblawu nú mɛ Mawu ɖɔhun.

21-22. Ali tawun tawun tɛ lɛ nu mǐ ka sixu kú nǔblawu nú mɛ ɖè?

²¹ Wuvɛ̌ kɛɖɛ wɛ mɛ e nɔ kú nǔblawu nú mɛ é ɖé nɔ sè xá mɛ ǎ. Mɛ e nɔ kú nǔblawu nú mɛ é nɔ wà nǔɖe lɛ dó d’alɔ mɛ ɖevo lɛ. Enɛ wu ɔ, mǐ mɛ bǐ sixu kpɔ́n ɖɔ mɛɖé ka ɖò xwédo mǐtɔn mɛ, agun mǐtɔn mɛ, alǒ kplékplé nɔví lɛ tɔn mǐtɔn mɛ bo ɖó hudo alɔdó tɔn à jí. É ɖò wɛn ɖɔ mǐ na mɔ ali e nu mǐ na kú nǔblawu nú mɛ ɖè lɛ é gegě. Mɛɖé ka ɖó hudo gbɔdónúmɛ tɔn wɛ à? Mǐ ka sixu d’alɔ tawun tawun ɖé lɛ ɛ, vlafo gbɔn nǔɖuɖu hinhɛn yì jó n’i, alǒ nǔ ɖevo lɛ wiwa n’i gblamɛ à? Bɔya mɛ e è yí dó agun mɛ é ɖé ka ɖó hudo xɔ́ntɔn ɖagbe e na dó wusyɛn lanmɛ n’i lɛ é tɔn wɛ à? Mǐ sixu lɛ́ jlá wɛnɖagbe gbɔdónúmɛ tɔn mɛ ɖevo lɛ. Ali ɖagbe hugǎn e nu mǐ sixu kú nǔblawu nú mɛ ɖěɖee mǐ nɔ xò gò lɛ é bǐ ɖè é ɖokpo nɛ.—Jɔb. 29:12, 13; Hlɔ. 10:14, 15; Ja. 1:27.

²² Enyi mǐ sè ɖɔ mɛɖé lɛ ɖò hudo e xó mǐ ɖɔ wá yì lɛ é ɖě mɛ ɔ, mǐ na kpɔ́n ɖɔ ali ɖé ka hun nú mǐ bɔ mǐ na gbɔn yɛkan enɛ mɛ dó kú nǔblawu nú ye à jí. Enyi mǐ nɔ kú nǔblawu nú mɛ ɔ, xomɛ nɔ hun Tɔ́ mǐtɔn jixwé tɔn ɔ, ɖó é ‘nɔ nyɔ́ xomɛ’ alǒ kú nǔblawu nú mɛ titewungbe!