Hwenu e wǎngbɛ́númɛ ná bú bǐ gbídígbídí é!

MAWU NÁ SÚ KÚN DÓ NÚ NǓ E NƆ ZƆ́N BƆ WǍNGBƐ́NÚMƐ DÓ TÍIN LƐ́ É BǏ

1. 1. SATÁAN AWǑVI. Satáan wɛ zɔ́n bɔ wǎngbɛ́númɛ tíin ɖo égbé. Mawu ná sú kún dó nú Satáan kpó mɛ ɖěɖěe nɔ gbɛ́ wǎn nú mɛ éɖɔhun lɛ́ é kpó bǐ.—Ðɛhan 37:38; Hlɔ̌manu lɛ́ 16:20.

2. 2. GBƐ NYANYA SATÁAN TƆN. Mawu ná sú kún dó nú nǔ e nɔ zɔ́n bɔ wǎngbɛ́númɛ dó tíin lɛ́ é bǐ; toxóɖɔtɔ́ kpó sinsɛngán kpó ɖěɖěe nɔ sɔ́ wǎngbɛ́númɛ ɖ’ajo ɖó nǔɖuɖonǔmɛ wútu lɛ́ é lɔ bǐ sín kún wɛ é ná sú dó. Mawu ná lɛ́ sú kún dó nú tuto ajɔ̌wiwa tɔn e mɛ nukúnkɛndídó, nǔɖuɖonǔmɛ kpó mɛ ɖěvo lɛ́ hízíhízí kpó ɖe lɛ́ é.—2 Piyɛ́ɛ 3:13.

3. 3. HWƐHUHU SÍN GÚ E MǏ ÐU É. Biblu tínmɛ ɖɔ gbɛtɔ́ lɛ́ bǐ wɛ ɖu hwɛhuhu gú, bɔ hwɛhwɛ ɔ, lěe mǐ nɔ lin nǔ gbɔn é, lěe nǔ nɔ cí nú mǐ é kpó nǔ e mǐ nɔ wa lɛ́ é kpó nɔ gbán. (Hlɔ̌manu lɛ́ 5:12) Hwɛhuhu gú e mǐ ɖu é zɔ́n bɔ mɛ ɖěvo lɛ́ sín nǔ nɔ vɛ́ mǐ wú, bɔ mǐ nɔ lɛ́ ɖe xlɛ́ ɖɔ mǐ gbɛ́ wǎn nú yě. Mawu ná d’alɔ mǐ bɔ mǐ ná ɖu ɖo nǔ e nɔ sísɛ́ mǐ bɔ mǐ nɔ gbɛ́ wǎn nú mɛ lɛ́ é bǐ jí, bɔ wǎngbɛ́númɛ sín xó ná fó bǐ gbídígbídí.—Ezayíi 54:13.

BIBLU DÓ GBƐ E MƐ WǍNGBƐ́NÚMƐ MA SƆ́ NÁ TÍIN ÐE Ǎ É SÍN AKPÁ

1. 1. È SƆ́ NÁ WA NǓ AGƆ XÁ MƐ ÐĚBǓ Ǎ. Axɔ́súɖuto Mawu tɔn wɛ ná kp’acɛ dó gbɛ ɔ nu. É ná kp’acɛ sín jǐxwé, lobo ná bló bɔ hwɛjijɔ ná tíin káká sɔ́yi. (Daniyɛ́li 2:44) Akɔ klánklán kpó linlin agɔ ɖíɖó dó mɛ ɖěvo lɛ́ wú kpó sɔ́ ná tíin ǎ. Mawu ná ɖó nǔ, nǔ agɔ e sín wǔvɛ́ gbɛtɔ́ lɛ́ nɔ se ɖo égbé é bǐ nu.—Luki 18:7.

2. 2. MƐ BǏ NÁ ÐO AYIJAYǏ MƐ. Mɛɖé sɔ́ ná se dǎkaxixo, alǒ ahwan wúvɛ́ ɖě ǎ. (Ðɛhan 46:10) Mɛ e ná nɔ ayǐkúngban ɔ jí lɛ́ é bǐ ná yí wǎn nú fífá, énɛ́ wú ɔ, ayǐkúngban ɔ ná húzú fí e ayijayǐ tíin ɖe é ɖé.—Ðɛhan 72:7.

3. 3. MƐ BǏ NÁ NƆ NINƆMƐ ÐAGBE MƐ KÁKÁ SƆ́YI. Mɛ lɛ́ bǐ ná nɔ yí wǎn nú yěɖée kpó ayi bǐ kpó. (Matíe 22:39) Mɛɖé sɔ́ ná se wǔvɛ́ ǎ; nǔ nyanya ɖě ka sɔ́ ná wá ayi mɛ nú mɛɖé ǎ. (Ezayíi 65:17) Hwenu e wǎngbɛ́númɛ sín xó ná ko fó bǐ é ɔ, ‘fífá ma ɖó dogbó e mɛ e ná nɔ ayǐkúngban ɔ jí lɛ́ é ná mɔ é wɛ ná nyí nǔ e ná nɔ víví nú yě é.’—Ðɛhan 37:11.

A ka ba ná nɔ gbɛ mɔ̌hun mɛ a? Fí e mǐ ɖe din é ɔ, mɛ gěgé ɖo lěe yě ná jó wǎngbɛ́númɛ dó gbɔn é kplɔ́n wɛ, gbɔn nǔgbódodó Biblu tɔn lɛ́ zínzán gblamɛ. (Ðɛhan 37:8) Nǔ e Kúnnuɖetɔ́ Jehovah tɔn e gbɔn gbɛ ɔ bǐ mɛ lɛ́ é ɖo wiwa wɛ din é nɛ́. Aca vovo wɛ yě ɖó, bó lɛ́ gosín fí vovo có, yě ɖo bǔ xwédo ɖé ɖɔhun, lobo lɛ́ yí wǎn nú yěɖée.—Ezayíi 2:2-4.

Kpó akpakpa sɔ́ mɛ kpó wɛ Kúnnuɖetɔ́ Jehovah tɔn lɛ́ ná má nǔ e yě ko kplɔ́n bɔ é ɖɔ xó dó nǔagɔwiwa kpó akɔ klánklán kpó wú lɛ́ é xá we. Nǔ e kplɔ́n wɛ a ɖe lɛ́ é sixú d’alɔ we bɔ a sɔ́ ná nɔ gbɛ́ wǎn nú mɛ ǎ, bó ná jɛ wǎn yí nú mɛ jí. A sixú kplɔ́n lěe a ná ɖe wǎnyíyí xlɛ́ mɛ ɖěɖěe é cí ɖɔ nǔ kún nɔ su nukún yětɔn mɛ ó, alǒ yě nɔ gbɛ́ wǎn nú mɛ lɛ́ é gbɔn é. Wǎgbɔ tɔn ɔ, a ná ɖ’awǎjijɛ din, bɔ kancícá e a ɖó xá mɛ ɖěvo lɛ́ é ná lɛ́ kpɔ́n te d’é jí. Tají hú gǎn ɔ, a ná kplɔ́n lěe a sixú nɔ gbɛ e mɛ wǎngbɛ́númɛ ma sɔ́ ná tíin ɖe gbeɖé ǎ, bɔ Axɔ́súɖuto Mawu tɔn ná kp’acɛ d’é nu é mɛ gbɔn é.—Ðɛhan 37:29.