1 | Ðɛ: “Mi zlɔ́n linkpɔ́n mitɔn lɛ́ bǐ dó jǐ tɔn”

BIBLU ÐƆ: “Mi zlɔ́n linkpɔ́n mitɔn lɛ́ bǐ dó [Mawu jí], ɖó nǔ mitɔn nɔ ɖu ayi mɛ n’i.”—1 PIYƐ́Ɛ 5:7.

Tínmɛ tɔn

Jexóva Mawu byɔ́ mǐ ɖɔ mǐ ní nɔ ɖɔ nǔ e ɖo adohu adohu ɖó nú mǐ wɛ, alǒ ɖo ayimɛya dó nú mǐ wɛ lɛ́ é bǐ nú émí. (Ðɛhan 55:23) Tagba ɔ ná bo tlɛ hwe gbɔn ɖěbǔ, alǒ d’agba gbɔn ɖěbǔ ɔ, mǐ sixú xo ɖɛ dó takún tɔn mɛ. Nú é nyí nǔ tají nú mǐ hǔn, nǔ tají wɛ é nyí nú Jexóva ɖésúnɔ nɛ́. Nǔ nyí mɔ̌, ɖó Jexóva nɔ kpé nukún dó mǐ wú, bɔ lěe nǔ nɔ cí nú mǐ é nɔ lɛ́ ɖu ayi mɛ n’i. Afɔ tají e mǐ sixú ɖe dó ɖó fífá ayi mɛ tɔn lɛ́ é ɖokpó wɛ ɖɛ xixo sɛ́dó Jexóva nyí.—Filípunu lɛ́ 4:6, 7.

Lěe énɛ́ sixú d’alɔ gbɔn é

Mǐ sixú mɔ ɖɔ mǐ ɖo mǐɖokpónɔ hwenu e mǐ ɖo xwi ɖí xá taglomɛzɔn wɛ é. Hwebǐnu wɛ mɛ ɖěvo lɛ́ nɔ mɔ nǔ jɛ lěe nǔ nɔ cí nú mǐ é wú bǐ mlɛ́mlɛ́ ǎ. (Nǔnywɛ́xó 14:10) Amɔ̌, ényí mǐ nɔ ɖɔ lěe nǔ nɔ cí nú mǐ é nú Mawu kpó ayi bǐ kpó ɔ, é ná nɔ ɖótó mǐ hwebǐnu kpó xomɛnyínyɔ́ kpó, bo ná nɔ lɛ́ mɔ nǔ jɛ lěe nǔ nɔ cí nú mǐ é mɛ. Jexóva nɔ mɔ mǐ; é tuun wǔvɛ́ mǐtɔn lɛ́ kpó tagba e ɖí xwi xá wɛ mǐ ɖe lɛ́ é kpó, bo nɔ ba ɖɔ mǐ ní nɔ ɖɔ nǔ ɖěbǔ e ɖo adohu adohu ɖó nú mǐ wɛ lɛ́ é nú émí ɖo ɖɛ mɛ.—2 Tan 6:29, 30.

Xó ɖiɖɔ sɛ́dó Jexóva gbɔn ɖɛ gblamɛ nɔ ná hlɔ̌nhlɔ́n kú e mǐ kú d’é jí ɖɔ é nɔ kpé nukún dó mǐ wú é. Lěe nǔ cí nú ɖɛhwanwlántɔ́ e xo ɖɛ élɔ́ é sixú cí mɔ̌ nú mǐ lɔ: “A mɔ ya e ji wɛ un ɖe é, a tuun adǎn e ɖo gbigbo mì wɛ é.” (Ðɛhan 31:8) Tuun e mǐ tuun kpowun ɖɔ Jexóva nɔ ɖ’ayi tagba e ɖí xwi xá wɛ mǐ ɖe lɛ́ é wú é sixú d’alɔ mǐ tawun, bɔ mǐ ná kpo ɖo didɛ wɛ ɖo hwenu vɛ́ wǔ lɛ́ mɛ. Amɔ̌, é nyí ayi kɛ́ɖɛ́ wɛ é nɔ ɖó wǔvɛ́ mǐtɔn lɛ́ wú ǎ, é nɔ lɛ́ wa nǔ hú mɔ̌. É nɔ mɔ nukúnnú jɛ tagba e ɖí xwi xá wɛ mǐ ɖe lɛ́ é wú hú mɛ ɖěvo ɖěbǔ, bo nɔ d’alɔ mǐ bɔ mǐ nɔ mɔ gbɔdónúmɛ kpó wǔsyɛ́n dó lanmɛ nú mɛ kpó ɖo Biblu mɛ.

Lěe Biblu ɖo alɔ dó gbɛtɔ́ lɛ́ wɛ gbɔn é Julian

Lěe adohu adohu wa nǔ dó wǔ ce gbɔn é

“Un ɖí xwi xá adohu adohu kpó taglomɛzɔn e nɔ nyí trouble obsessionnel compulsif (TOC) é kpó. Adohu adohu nɔ wa nǔ dó wǔ ce, hwenu e é cí ɖɔ un ma ɖó nukún tɔn ǎ é. Hweɖénu nɔ tíin bɔ un nɔ ɖo ganjí, bɔ tlóló kpowun ɔ, ado nɔ hu mì tawun, bɔ é ka nɔ nyí ɖó hwɛjijɔ tají ɖé lě wú ǎ. Tají ɔ, ado nɔ hu mì hwenu e mɛ ɖěvo lɛ́ lɛ́ lɛ̌ dó mì é. Nǔ e yě nɔ lin dó wǔ ce é nɔ ɖu ayi mɛ nú mì tawun.

“Xɔ́ntɔn ce ɖěɖěe tuun tagba e ɖí xwi xá wɛ un ɖe lɛ́ é nɔ wa nǔ e wú yě kpé lɛ́ é bǐ dó d’alɔ mì. Un ná ɖɔ xójɔxó ɔ, hweɖélɛ́nu ɔ, nǔ e yě nɔ ɖɔ lɛ́ é nɔ nyí nǔ e ɖó nukún wɛ un ɖe bá se é ǎ. Amɔ̌, é nɔ su nukún ce mɛ ɖɔ yě nɔ tɛ́n kpɔ́n bá d’alɔ mì.

“Hweɖélɛ́nu ɔ, adohu adohu kpó taglomɛzɔn e jɛ wɛ un ɖe é kpó nɔ zɔ́n bɔ ɖɛ xixo nɔ vɛ́ wǔ nú mì. É nɔ byɔ́ ɖɔ má dó gǎn tawun ɖo taglomɛ cóbá hwíhwɛ́ bo ɖɔ xó sɛ́dó Jexóva ɖo ɖɛ mɛ. Ayi ce nɔ jɛ jǎmijo, énɛ́ wɛ nyí ɖɔ ayi ɔ nɔ sixú nɔ fí ɖokpó ǎ, bɔ hwɛhwɛ ɔ, un nɔ flú bǐ. Ényí un ma sixú ɖ’acɛ dó linlin ce lɛ́ jí ǎ ɔ, é nɔ vɛ́ wǔ nú mì ɖɔ má tínmɛ nǔ e lin wɛ un ɖe é kpó lěe nǔ cí nú mì é kpó nú Jexóva.”

Lěe Biblu d’alɔ mì gbɔn é

“Biblu kplɔ́nkplɔ́n zɔ́n bɔ un mɔ ɖɔ é kún byɔ́ ɖɔ má xo ɖɛ gaga, alǒ nyɔ́ xó ɖɔ cóbónú Mawu ná se ɖɛ ce ó. Hweɖélɛ́nu ɔ, ényí un ma sixú ɖɔ lěe nǔ cí nú mì é ǎ ɔ, un nɔ xo ɖɛ kpowun bo nɔ ɖɔ: ‘Jexóva, kɛnklɛ́n d’alɔ mì.’ Un ná bo tlɛ xo ɖɛ gbɔn mɔ̌ ɔ, un nɔ mɔ ɖɔ Jexóva nɔ mɔ nukúnnú jɛ mɛ, bo nɔ ná mì nǔ e hudó mì gan ɔ mɛ é. Gbɔn vo nú ɖɛxixo ɔ, un lɛ́ ba alɔdó dotóo e alɔ se kpɛ́n ná ganjí é tɔn. É víví nú mì tawun ɖɔ nǔ we énɛ́ lɛ́ bǐ d’alɔ mì bɔ ninɔmɛ ce kpɔ́n te tawun. Alɔdó Tɔ́ ce jǐxwé tɔn ɔ tɔn byɔ́byɔ́ ɖo ɖɛ mɛ nɔ byɔ́ gǎndídó tawun ɖo así ce có, un nɔ wa mɔ̌, ɖó un kú d’é jí ɖɔ é jló ná d’alɔ mì.”