Nǔ ɖagbe kpó nǔ nyanya kpó: Nǔ e nɔ xlɛ́ ali mɛ gěgé é

Ðibla nyí mɛ lɛ́ bǐ wɛ nɔ yí gbe ɖɔ nǔwalɔ ɖé lɛ́ sɔgbe tawun alǒ nylá ɖésú. Ði kpɔ́ndéwú ɔ, ɖo kpaa mɛ ɔ, mɛ lɛ́ nɔ ɖó hwɛ nú mɛhuhu, kan hwlɛ́n xá mɛ kpó xó ɖó xá vǐ kpɛví lɛ́ gǎnnugǎnnu kpó, bo ka nɔ yí wǎn nú nǔjlɔ́jlɔ́wiwa, xomɛnyínyɔ́ kpó wǔvɛ́sexámɛ kpó. Amɔ̌, nú nǔ e kan gbeta e kɔn è ná wá dó xóɖóxámɛ, nǔgbóɖiɖɔ alǒ vǐ kplɔ́nkplɔ́n wú lɛ́ é ɔ, mɛ gěgé ɖi ɖɔ linlin e sɔgbe alǒ nylá é ɖé kún ɖo akpá énɛ́ lɛ́ xwé ó. Yě nɔ lin ɖɔ è hɛn ɔ, è ná yí gbe nú ɖibla nyí gbeta ɖěbǔ e kɔn è wá é. Hwɛhwɛ ɔ, mɛ lɛ́ nɔ zɔn dó lěe nǔ nɔ cí nú yě é kpó lěe nǔ nɔ cí nú mɛ e lɛ́ lɛ̌ dó yě lɛ́ é dó xó ɔ wú é kpó jí dó wá gbeta yětɔn lɛ́ kɔn. Énɛ́ ka nɔ sɔgbe hwebǐnu a?

LĚE NǓ NƆ CÍ NÚ MǏ É

Hwɛhwɛ ɔ, lěe nǔ nɔ cí nú mǐ dó nǔ e sɔgbe é kpó nǔ e nylá é kpó wú é, énɛ́ wɛ nyí nǔ e mǐ nɔ ylɔ́ ɖo kpaa mɛ ɖɔ ayixa mǐtɔn é jí wɛ mǐ nɔ zɔn dó dó wá gbeta mǐtɔn lɛ́ kɔn. (Hlɔ̌manu lɛ́ 2:14, 15) É ná bo tlɛ nyí hwenu e vǐ lɛ́ kpo ɖo vǔ é ɔ, yě hɛn ɔ, yě ná tuun vogbingbɔn e ɖo nǔwalɔ e sɔgbe é kpó nǔwalɔ e ma sɔgbe ǎ é kpó tɛ́ntin é bɔ ayixa yětɔn tlɛ sixú dó hwɛ yě. Ényí mǐ ɖo susu wɛ ɔ, mǐ nɔ kplɔ́n nǔ e sɔgbe é kpó nǔ e nylá é kpó ɖo mɛ e mǐ nɔ zán hwenu ɖó kpɔ́ xá lɛ́ é gɔ́n. Ényí mǐ ɖo gbeta lɛ́ kɔn wá wɛ ɔ, ayixa mǐtɔn nɔ ɖɔ nú mǐ ɖɔ gbeta e kɔn mǐ wá é sɔgbe xá nǔ e è kplɔ́n mǐ dó nǔ e sɔgbe é kabǐ nǔ e nylá é wú é alǒ gbɔ.

Linlin e mǐ nɔ ɖó dó nǔ e sɔgbe é kpó nǔ e nylá é kpó wú é sixú sísɛ́ mǐ bɔ mǐ ná nɔ kú nǔbláwǔ nú mɛ, nǔ ná nɔ su nukún mǐtɔn mɛ, mǐ ná nɔ wa nǔ jlɔ́jlɔ́ bo ná nɔ lɛ́ se wǔvɛ́ xá mɛ ɖěvo lɛ́. É sixú lɛ́ d’alɔ mǐ bɔ mǐ ná nyi alɔ nú nǔ ɖěɖěe sixú wa nǔ dó mɛ ɖěɖěe sín nǔ nɔ ɖu ayi mɛ nú mǐ lɛ́ é wú lɛ́ é, alǒ nyi alɔ nú nǔ ɖěɖěe sixú ɖe mǐ kpo, dó winnyá mǐ bo lɛ́ zɔ́n bɔ mǐ dó hwɛ mǐɖée é wiwa.

Lěe nǔ nɔ cí nú mǐ é ka sixú nyí alixlɛ́mɛnú ɖejidéwú hwebǐnu a? Hwenu e Garrick ɖo wǐnnyáwínnyá mɛ é ɔ, é zán gbɛ e wú é ɖɔ xó élɔ́ dó é: “Un sixú ɖó nǔgbódodó walɔ ɖagbe tɔn nyiɖésúnɔ tɔn lɛ́ ayǐ.” Amɔ̌, é mɔ ɖɔ nǔ e émí lin ɖɔ é sɔgbe é wiwa kún tɔ́n kɔ dó ɖagbe mɛ ó. É ɖɔ ɖɔ gbɛzínzán émítɔn kún dó awǎjijɛ nú émí ɖěbǔ ó, ɖó é nɔ kpo nú nǔblíblíwiwa, azɔ nunu zɛ xwé wú, ahan syɛ́nsyɛ́n nunu zɛ xwé wú kpó dǎkaxixo alɔkpa alɔkpa lɛ́ kpó.”

LĚE NǓ NƆ CÍ NÚ MƐ ÐĚVO LƐ́ É

Gbɔn vo nú lěe nǔ nɔ cí nú mǐɖésúnɔ é ɔ, hwɛhwɛ ɔ, linlin e mɛ ɖěvo lɛ́ ná ɖó dó gbeta e kɔn mǐ wá lɛ́ é wú é lɔ nɔ xlɛ́ ali mǐ. Énɛ́ sixú d’alɔ mǐ bɔ mǐ ná ɖu le nǔ e yě mɔ kpɔ́n lɛ́ é kpó nǔnywɛ́ yětɔn kpó tɔn. Ényí mǐ wa nǔ e xwédo mǐtɔn, xɔ́ntɔn mǐtɔn lɛ́ kpó mɛ e lɛ́ lɛ̌ dó mǐ lɛ́ é kpó lin ɖɔ ényí nǔ ɖagbe é ɔ, yě nɔ ɖó sísí nú mǐ.

Lěe nǔ nɔ cí nú mɛ ɖěvo lɛ́ é ka nɔ nyí alixlɛ́mɛnú ɖejidéwú hwebǐnu a? Hwenu e Priscila ɖo wǐnnyáwínnyá mɛ é ɔ, é nɔ wa nǔ e xɔ́ntɔn tɔn lɛ́ gěgé ɖo wiwa wɛ é bo dó ta agalilɛ mɛ. Amɔ̌, é mɔ ɖɔ nǔ e mɛ ɖěvo lɛ́ lin ɖɔ é sɔgbe é wiwa kún ná awǎjijɛ émí ó. É ɖɔ: “Nǔ e mɛ ɖěvo lɛ́ bǐ ɖo wiwa wɛ é wiwa wa ɖagbe ɖěbǔ nú mì ǎ. É dɔn mì dó xlonɔnú e nyí awǒvinú lɛ́ é wiwa mɛ.”

ALI ÐAGBE HÚ GǍN ÐÉ KA ÐE A?

Ényí mǐ ɖo gbeta nǔ e sɔgbe é kpó nǔ e nylá é kpó tɔn kɔn wá wɛ ɔ, lěe nǔ nɔ cí nú mǐ é kpó lěe nǔ nɔ cí nú mɛ ɖěvo lɛ́ é kpó nɔ wa nǔ tají ɖé. Amɔ̌, alixlɛ́mɛnú énɛ́ kɛ́ɖɛ́ nɔ hɛn le ɖagbe lɛ́ wá hwebǐnu ǎ. Hweɖélɛ́nu ɔ, mǐ sixú wa nǔ dó mǐɖée alǒ mɛ ɖěvo lɛ́ wú, ɖó mǐ nɔ mɔ nǔ e mɛ gbeta e kɔn mǐ nɔ wá lɛ́ é ná tɔ́n kɔ dó lɛ́ é sɛ́dó ǎ wútu. (Nǔnywɛ́xó 14:12) Gɔ́ ná ɔ, ényí mǐ kpó mɛ ɖěvo lɛ́ kpó tlɛ nɔ lin ɖɔ nǔɖé sɔgbe ɔ, é hɛn ɔ, é ná wa nǔ dó mɛ wú, bɔ linlin mɔ̌hun lɛ́ sixú húzú. È ná ɖɔ ɔ, nǔwalɔ ɖé lɛ́ tíin bɔ è nɔ lin ɖɔ yě nylá ɖ’ayǐ bɔ mɛ lɛ́ ka nɔ yí gbe ná ɖo égbé, mɔ̌ jɛ́n zǐnzán ɖé lɛ́ tíin bɔ mɛ lɛ́ nɔ lin ɖɔ yě sɔgbe ɖ’ayǐ, bɔ din ɔ, yě ka nɔ lin ɖɔ é kún sɔgbe ó.

Alixlɛ́mɛnú ɖagbe e ná d’alɔ mɛ bɔ è ná wá gbeta nǔ e nyɔ́ é kpó nǔ e nylá é kpó tɔn kɔn é ɖé ka ɖe a? Nǔgbódodó walɔ ɖagbe tɔn ɖé ka ɖe bɔ mǐ sixú xwedó égbé bɔ é sɔ́ ná wá vɛ́ nú mǐ ɖo nukɔnmɛ ǎ a?

É nyɔ́ tawun ɖɔ jɔtɛn nǔgbódodó walɔ ɖagbe tɔn e nɔ xlɛ́ ali mɛ, ma nɔ húzú ǎ, nyí ɖejidéwú bo nɔ wa azɔ̌ nú mɛ lɛ́ bǐ ɖo fí lɛ́ bǐ é ɖé tíin. Ðo xóta e bɔ d’é wú é mɛ ɔ, mǐ ná ɖɔ xó dó alixlɛ́mɛnú e nyí ɖejidéwú hú gǎn bo sixú d’alɔ mǐ bɔ mǐ ná wá gbeta nǔ e nyɔ́ é kpó nǔ e nylá é kpó tɔn kɔn é wú.