Nǔ ɖagbe kpó nǔ nyanya kpó: Gbeta e kɔn a ɖó ná wá é ɖé
Nǔgbódodó walɔ ɖagbe tɔn e mǐ nɔ wá gbeta ɔ kɔn bo ná zán gbɛ sɔgbe xá lɛ́ é nɔ ɖɔ lěe gbɛ mǐtɔn ná cí é. Jexóva Mawu tuun énɛ́. Hwɛjijɔ e wú é nɔ ba ɖɔ mǐ ní nɔ zán gbɛ sɔgbe xá nǔgbódodó émítɔn lɛ́ é nɛ́.
Jexóva ba ɖɔ mǐ ní mɔ fífá ɖo gbɛzán mǐtɔn mɛ bo lɛ́ ɖu awǎjijɛ sín vǐví.
‘Nyɛ, Jexóva ɔ, nyɛ wɛ nyí Mawu towe; nyi wɛ ná ɖɔ nǔ e ná nyɔ́ nú we ɔ nú we. Nyi wɛ ɖo ali xlɛ́ we wɛ ɖo ali e a mlɛ́ ɔ jí. Ényí a ko wlí tó nǔ e un zɔ́n we lɛ́ wú wɛ ɔ, nyɔ̌ná sín tɔ ɖé ná ko sa wá gɔ̌n towe; hwlɛngán ɔ ná ko xo wá gɔ̌n towe xu ɖɔhun.’—Ezayíi 48:17, 18.
Ðó Mawu wɛ nyí Gbɛɖótɔ́ mǐtɔn wútu ɔ, é tuun ali ɖagbe hú gǎn e nu mǐ ɖó ná zán gbɛ ɖe é. É byɔ́ mǐ ɖɔ mǐ ní nɔ xwedó ali e émí nɔ xlɛ́ mǐ é, ɖó é ná wa ɖagbe nú mǐ. Ényí mǐ nɔ nyi sɛ́n Mawu tɔn lɛ́ ɔ, é sɔ́ ná byɔ́ ɖɔ mǐ ní kanbyɔ́ mǐɖée ɖɔ gbɛ mǐtɔn ka ná ɖó nu a jí ǎ. Mǐ ná nɔ wá gbeta e sɔgbe lɛ́ é kɔn hwebǐnu, bɔ é ná nɔ tɔ́n kɔ dó fífá kpó awǎjijɛ kpó mɛ nú mǐ.
Jexóva nɔ byɔ́ nǔ e zɛ hlɔ̌nhlɔ́n mǐtɔn wú é mǐ ǎ.
“Nǔ e Mawu zɔ́n mi, bɔ un ɖo ɖiɖɔ nú mi wɛ égbé din ɔ hú gǎn mi ǎ; blǒbló tɔn gló mi ǎ.”—Sɛ́nflínmɛ 30:11.
Gbɛ zínzán sɔgbe xá nǔgbódodó walɔ ɖagbe tɔn Mawu tɔn lɛ́ sixú byɔ́ ɖɔ mǐ ní húzú lěe mǐ nɔ lin nǔ gbɔn bo nɔ lɛ́ wa nǔ gbɔn é. Amɔ̌, Jexóva ɖo nǔ byɔ́ ɖo mǐ sí wɛ zɛ xwé wú ǎ. È ná ɖɔ ɔ, ɖó é wɛ nyí Gbɛɖótɔ́ mǐtɔn wútu ɔ, é tuun nǔwúkpíkpé mǐtɔn. Gɔ́ ná ɔ, ényí mǐ ɖo kplɔ́nkplɔ́n bo tuun Jexóva wɛ ɔ, mǐ ná mɔ ɖɔ ‘sɛ́n tɔn lɛ́ kún vɛ́ nyi ó.’—1 Jaan 5 :3.
Jexóva d’akpá ɖɔ émí ná nɔ d’alɔ mɛ ɖěɖěe wá gbeta ɔ kɔn bo ná nɔ zán gbɛ sɔgbe xá nǔgbódodó émítɔn lɛ́ é.
‘Nyɛ, Jexóva ɔ, nyi wɛ nyí Mawu towe. Un hɛn alɔ towe bo ɖo ɖiɖɔ nú we wɛ ɖɔ: ‘Ma ɖi xɛsi ó, un ná gɔ́ alɔ nú we.’’—Ezayíi 41:13.
Mǐ hɛn ɔ, mǐ ná zán gbɛ sɔgbe xá nǔgbódodó walɔ ɖagbe tɔn Mawu tɔn lɛ́, ɖó é ná d’alɔ mǐ. É sixú gbɔn Xó tɔn Biblu e nɔ dó wǔsyɛ́n lanmɛ nú mǐ, bo nɔ lɛ́ ná mǐ nukúnɖíɖó é sín yɛkan mɛ dó nɔ gǔdo nú mǐ.
Gbɛtɔ́ e gbɔn gbɛ ɔ mɛ lɛ́ é lǐvi mɔ̌kpán ko mɔ ɖɔ gbɛ zínzán sɔgbe xá nǔgbódodó Biblu tɔn lɛ́ ko zɔ́n bɔ gbɛzán émítɔn kpɔ́n te d’é jí. Étɛ́wú a ma ka ná kplɔ́n nǔ d’é jí dó wě ɖagbe e Biblu ɖó bá ɖe xá mɛ é wú ǎ? A sixú bɛ́ kpó alɔnuwéma jínjɔ́n Biblu jí Ðu gbɛ víví káká sɔ́yi! éé tíin vɔ̌nu ɖo jw.org jí é kplɔ́nkplɔ́n kpó. Nǔkplɔ́nkplɔ́n élɔ́ lɛ́ wɛ ɖ’é mɛ:
Nɛ̌ Biblu ka sixú d’alɔ we gbɔn?
Biblu ná mɛ nukúnɖíɖó
A ka sixú ɖeji dó Biblu wú a?
Ée a ná ɖo Xó Mawu tɔn Biblu ɔ gbéjé kpɔ́n wɛ é ɔ, a ná ɖ’ayi wú ɖɔ é kún ko cá ó, è sixú ɖeji d’é wú hwebǐnu, bɔ é “ná nɔ te káká sɔ́yi.” (Ðɛhan 111:8) Nǔgbódodó walɔ ɖagbe tɔn e ɖo Biblu mɛ lɛ́ é xwixwedó wɛ nyí ali ɖagbe hú gǎn e nu mǐ ná zán gbɛ ɖe é. É ɖo mɔ̌ có, Mawu ná hɛn mǐ gǎnnugǎnnu ɖɔ mǐ ní wa mɔ̌ ǎ. (Sɛ́nflínmɛ 30:19, 20; Jozuwée 24:15) Gbeta ɖé wɛ bɔ mǐ mɛ ɖokpó ɖokpó ɖó ná wá kɔn